حد قابل المشكلة دي ... الطفل العنيد

[مصريه بالكويت]

عزيزى لخبطه

انا حالى حال بعض الناس غير مهتمه بالاغانى لدرجة كبيره لكن المنتشر هذه الايام ان الاغانى فى كل مكان

سواء فى اعلان عن فيلم او فى فاصل بين برنامجين ولو زهقت وطفينا التلفزيون

تلاقى الموبايل بيغنى

غيرنا نغماته وركبنا مواصله تلاقى السواق مشغل كاسيت

نزلنا من السياره ورحنا محل وهكذا

صدقنى مفيش تعمد لسماع الاغنيه ...وربنا يهدينا جميعا

بمناسبة الحاجات اللى بتعلق فى الزهن .... كان ليا ابن اخت اول ما جه يتعلم الصلاة وكل ما ينوى الصلاة

بعفويه كان يقول نوية اصلى صلاة العصر حسب التوقيت المحلى لمدينة القاهره . طبعا مش بتريق بس هو فعلا

صغير ومكنش يعرف ووضحناله الامر :blink:

[ياسر ابو احمد]

شكراً يا اخ لخبطه على طرح هذا الموضوع الذي أعاني منه شخصياً .. ووصلت فيه لمرحله انا غير راضي عنها تماماً ولكن زي ما تقول كده العيال حطّيني في دماغهم وبيعملوا كل ما هو عكس ما انصحهم به .. ليه .. معرفش ..

فالوقت الذي اتواجد به في صحبة الابناء لا يخلو من الدروس التعليميه في كل شئ وهذا بناءاً على ما يصدر منهم من افعال .. فلكل فعل من قِبَلهم .. رد فعل ودروس تعليميه من قِبَلي.. المشكله الكبيره جدا ان انا دايماً حاسس ان انا سبب المشكله .. يعني ساعات اقول لنفسي انا مزودها شويتين ليه .. ليه بتزعق .. ليه بتصرخ .. ليه بتضرب .. العمليه مش مستاهله كل ده .. لكن العيال مفيش فايده .. والله ان حاسس اني مستهدف منهم ..

اقول تاني .. لمّا سعادتك (اللي هو انا وانت وهي وهو) شايف ان اللي بيعملوه ده غلط وحيأثر على مستقبلهم او على اسنانهم او على النمو الطبيعي لهم او على سلوكهم العادي في من هم مثل سنهم .. ياترى ايه رد فعلك .. طبعاً انا ببقى متنرفز جدا من اللي بيعملوه وبحاول اثنائهم عن كل اللي بيعملوه بكافة الطرق .. ولكن حاسس ان كل اللي بعمله مأخوذ من فيلم " ذهب مع الريح" ... :blink:

اشتريت كتب عن التربيه الحديثه والقديمه والنص نص ..ولكن .. نو واي (اقراها بالانجليزي) ..

"بابا ممكن العب بـ ....." الكمبيوتر .. لأ ياحبيبي علشان انا عندي شوية شغل .. طيب اديني الموبايل بتاعك العب عليه شويه .. لأ ياحبيبي اصل الموبايل في الشاحن .. والمره اللي فاتت انت خلصتلي البطاريه ومعرفتش اشوف شغلي .. طيب ممكن العب بلاي استشن ... !! طيب ممكن اتفرج على التليفزيون .. طيب ممكن اروح العب مع جارنا احمد .. طيب ممكن العب مع ...طيب ممكن نخرج انهارده .. طيب حنروح فين ومع مين وامتى .. وليه منروحش هنا وليه عمو فلان مش هييجي معانا .. طيب ممكن نروح نتغدى في المطعم .. لأ انا مش عاوز المطعم ده .. ياريت نروح ده .. يوووه هو كل مره حنروح نفس المطعم .. انا مابكلش فراخ .. وانا مابكلش لحمه .. طيب اجيبلك يابني سمك .. لأ انا عاوز جمبري .. طيب اجيبلك يا حبيبتي جمبري .. لأ انا عاوزه سمك .. طيب اطلق امكم علشان استريح منكم انتو الاثنين :ninja: (معذره لام احمد .. دي كانت دعابه اظاهر تقيله شويه) !!

الجمله الشهيره اللتي تتكرر كل يوم على مدار الساعه .. ممكن العب .. ممكن العب ..

مفيش مره يابني او يابنتي ممكن اقرأ .. ممكن ارتب البيت من القلق اللي انا عملته .. ممكن اقرأ واحده من العشرين قصه اللي انا جبتهملك .. ممكن اروح اصلي بدون ما اقولك انا روح صلي يا ... يا حبييييبي :lol: .. ممكن تروح تاكل من غير ما تسأل حد تاني يجهزلك الاكل ..

العيال دي شكلهم مش حاسين بأي معاناة .. كل حاجه سهله بالنسبه لهم .. مفيش اي احساس بالمسئوليه ... طظ ..!!

انا ياجماعه وصلت الى درجة اني بادور على دكتور نفسي يعالجني انا .. مش هم .. :lol: .. حد فيكم نفسه يجرب حظه !!

انا بضم صوتي لصوت كل رب اسره نفسه ولاده يطلعوا كويسين (بالمفهوم العام .. علم .. ادب .. اخلاق.. سلوك .. ثقافه ...) !!.. اذا كنتم فاكرين الحل سهل فاسمحولي اقولكم ..هيهات .. الحل صعب جداً ..؟؟!!

انا يمكن اقتنع بأنك (الحديث للقارئ وليس شخص بعينه) بتعمل اللي عليك بالبيت .. وبعدين !!.. ابنك حيروح المدرسه ؟؟.. ياترى سألت نفسك اذا كان كل الاباء الاخرين قد قاموا بواجبهم نحو ابنائهم كما فعلت .. !!!!؟؟؟ :o

هل ولادك مشتركين في نادي .. بيروحوا النادي .. ليهم صحاب هناك ..!!

هل ولادك بيتفرجوا على التلفزيون .. يا ترى كام محطه بيتفرجوا عليها وايه نوع المادة العلميه او العمليه او الماده الهشك بشك اللي بيتفرجوا عليها ..

هل ولادك بيتفرجوا على قنوات فضائيه للاطفال .. ام بي 3 .. سباس تون .. ايه ار تي .. يا ترى شفت البنات اللي في افلام الكارتون لابسين ايه .. و و و .. وطبعاً مش ممكن يحبوا قناة الجزيره للاطفال علشان دي قناة هادفه وبتجيب برامج تعليميه جيده وبيتكلموا فيها باللغه العربيه ..

هل اختلست النظر على منظر ابنك او بنتك وهو بيتفرج على برامج الاطفال .. شفت بقه (فمه) مفتوح ازاي .. طيب عينه بترمش ولا لأ .. شفت نظرة التناحه اللي حتقابلها لو طلبت منه شئ وهو بيتفرج على التلفزيون .. :angry2:

اللي عايز اقوله .. اوكي .. انت بتعمل اللي عليك داخل البيت.. بس في النهايه هو بيتعامل مع مين خارج البيت .. !!

الموضوع كبير .. كبير .. وانا زهقت ... B) B)

السلامو عليكو ..

[لخبطه]

نوية اصلى صلاة العصر حسب التوقيت المحلى لمدينة القاهره

:wub: :wub: :wub: :wub: :wub: عندك حق والله مصرية فعلا الاغاني اصبحت مفروضه في كل مكان لكن اهو بنحاول والله المعين

للأسف الموقع مابعتش تنوية بإضافة ردود بعتذر لكم وخصوصا عمنا / ياسر أبو احمد

ردك لذيذ أوي وفيه هموم أنا بشاركك الاحساس فيها بس بشكل مسبق وعلشان كدا فتحت الموضوع

واضح أن حضرتك عصبي زي حالتي :wub: :wub: :D

بخصوص فكره أن الولد ممكن يتأثر بتعاملاته خارج البيت رغم أنه في البيت موجه فأنا بتصور أنه

التأثير الخارجي دا هيكون محدود جدا لانه الولد بيكون خلاص اطبع باللى هو نشأ عليه ولاحظ كمان أن الله لايضيع أجر من أحسن عملاً يعني طول ماهنحاول نحافظ على الولد في البيت ربنا هيحفظه خارجه ...

هحاول أعمل تجميع لكل الاراء اللى قيلت في الموضوع علشان تبقا شبه مجمعة للكل

مخلص المشاركات

عدم ضرب الطفل العنيد لأن الضرب غير ذي فائده وفي نفس الوقت عدم تلبية كل رغباته ( المصدر نانو )

الطفل العنيد يحاول اختبار مدى قدرتك على الصمود او ما يسمى صراع الاردات فكن ثابتا ولا تتزعزع ( م الغزالي )

الإصرار و التكرار وعدم الممل ومحاولة العقاب بالعزل وعدم استخدام القسوه بل يجب أن يشعر الطفل بالحنو عليه ( ياشو )

قد يبتكر الاطفال العنيدين حيل لتلبية رغباتهم فيجب تمييز الحقيق من المفتعل ( مصريه بالكويت )

الاستماع والفهم لمطالب الطفل ومحاولة أقناعه بخطأه أو تلبيتها في حالة كونها مطالب عادلة ( بنت النيل )

معاملة الطفل على أنه شخص كبير ويفهم وعدم الرضوخ لطلباته وعدم التعامل معه بعصبيه ( م/ نانسي )

ترسيخ مبدأ الثواب و العقاب من خلال ابتكار اسلوب لتدوين الخطا و الصواب كلوحه في المنزل مثلا يكتب عليه نقطا للافعال المرفوضه وكذلك الافعال الحسنه وهو ما يعطى الطفل الرغبة في فعل الصواب والابتعاد عن الخطأ (Handicraft )

محاول تحفيظ الأولا د القران الكريم في سن صغيره ( مصرية بالكويت )

تربية الأطفال على حرية التعبير عن الرأي وعدم اعتبار ارائهم تافهة لا تستحق الإهتمام (الاستاذ ahm_ali_baba)