تقرير طازه برضه عن فيلم : واحد من الناس

[سيزيف]

لسه خارج حالا من فيلم واحد من الناس

و هذا التقرير مهدى الى الاخ العزيز محمود الشاعر اللى وعدته انه هيحضر معايا الافلام اللى ادخلها

بس يا عم محمود لازم تساهم فى تمن التذاكر عشان السينمات بقت غاليه :P

-------

يبدأ الفيلم بتعريفك على شخصيه محمود - كريم عبد العزيز - و هو شخص مصرى عادى من قاع المجتمع يعمل سايس جراج رغم انه يحمل مؤهل عالى متزوج من منه شلبى و يشاء حظه العثر ان يشاهد بالصدفه جريمه قتل يرتكبها شاب ابن احد الحيتان الكبار بالبلد - عزت ابو عوف - و يضغط عليه هؤلاء الكبار بواسطه ضابط مباحث فاسد و محامى انتهازى - احمد راتب - لتغيير شهادته و عندما يرفض يخطفون زوجته لاجباره و عندما ادلى بالحقيقه امام المحكمه يقومون بقتلها فيفقد صوابه و يحاول قتل الرجل الكبير فيحكم عليه بالسجن و فى السجن يتعرف على رجل اعمال ثرى تسبب ذات الرجل الكبير بالاشتراك مع حوت اخر فى سجنه لصراع على توكيل سيارات و يبدأ محمود خطه الانتقام فور خروجه من السجن بالاستعانه برجال الثرى المسجون فيقوم بعده خدع يتمكن من خلالها من تلفيق تهمه للضابط الفاسد فيسجن ثم يقتل فى السجن بعد ان حاول تهديد الرجل الكبير ثم يتعرف على ابنه الرجل الكبير و يجعلها تتعلق به ثم يخطفها و يساومه عليها بعد ان يقوم بالوقيعه بينه و بين شريكه الذى يخطف ابنه ايضا و يوهمه بان الرجل الكبير هو الذى خطفه و فى النهايه يركب السياره مع الرجل الكبير و يقوده الى كمين من رجال شريكه فيطلقون عليه الرصاص و يموت الرجل الكبير بينما ينجو كريم عبدالعزيز

---------------------------

الفيلم فى مجمله فيلم جيد يلعب على تنويعه الكونت دى مونت كريستو او امير الانتقام و لكن الفيلم به عيوب دراميه كثيره و تشعر بعدم العنايه بالحبكه الدراميه

فمثلا الضابط الفاسد المفروض انه رئيس مباحث منطقه معينه هى التى وقع فيها حادث القتل و مع ذلك كنت تجد هذا الضابط فى جميع القضايا و فى جميع الاقسام حتى يخيل اليك انه الضابط الاوحد فى مصر

مشهد اختطاف منه شلبى من منزلها بحى شعبى فى عز الضهر و هو امر غير معقول طبعا

مشهد التحقيق مع الضابط الفاسد فى النيابه وكيل النيابه لا يرتدى رابطه عنق - لاحظ ان تلك هى الصوره التقليديه المعروفه لوكيل النيابه - و يدور بينهما اثناء التحقيق حوار ساذج ينتهى بان يامر وكيل النيابه بحبس الضابط واحد و عشرين يوم !!!!!!!!!!!!

طبعا اى طفل يعلم ان الحبس فى النيابه لمده اربعه ايام - ما عدا حالات استثنائيه معينه ليست تلك الحاله من ضمنها

الفيلم بصفه عامه تشوبه المبالغه

المبالغه فى الفساد و المبالغه فى جرائم القتل الخططه التى تحدث بمنتهى السهوله داخل السجن

المبالغه فى صراع الحيتان و الذين كان رجالهم يتبادلون اطلاق النار فى الشارع فى عز الضهر فى صراع لا يحدث الا فى شيكاغو

ولكن اهم عيوب الفيلم على الاطلاق هو الرساله التى يوصلها

ان محمود فى رحله الانتقام اصبح لا يختلف عن الناس الذين يطاردهم فهو يخطف طفل صغير كان صديقا لابنه ثم يخطف ابنه الرجل الكبير التى تعلقت به و يتسبب فى قتل اكثر من شخص حتى يصل فى النهايه الى هدفه و هو قتل الرجل الكبير

و هو ما يقودنا للتساؤل ان كان القتل هو الهدف فما فائده كل هذا التنكر و الخداع لماذا لم ينتظر اللحظه المناسبه و يقتله

هل المطلوب من كل انسان يتعرض للظلم ان ياخذ حقه بيده

---------

كريم عبدالعزيز : ادى دور جيد جدا و اعاد اكتشاف نفسه كممثل خارج الاطار التقليدى له

منه شلبى : فى دور الزوجه ادت بشكل جيد فى حدود المساحه الصغيره للدور

عزت ابو عوف : اداء متوسط و كان يمكنه ان يؤدى الدور بشكل افضل

محمود الجندى : فى دور ابو محمود اداء باهت بعد طول غياب

بسمه : فى دور الصحفيه التى حاولت مساعده محمود ادت بشكل جيد

احمد راتب : فى دور المحامى الفاسد دور صغير لا يتناسب مع امكانيات احمد راتب اداه بشكل نمطى

محمود شومان : فى دور الضابط الفاسد - و هو بالمناسبه نفس الممثل الذى كان يظهر باستمرار فى اعلانات الضرائب - ادى الدور بشكل متوسط و لكنه لم يكن مناسبا من الناحيه الشكليه لاداء دور الضابط و يظلم اذا ما وضع فى مقارنه مع خالد صالح فى فيلم تيتو مثلا

رشا مهدى : فى دور ابنه الرجل الكبير وجه جميل و اداء باهت

احمد نادر جلال : اخراج جيد فى بعض المشاهد و خاصه مشاهد الاكشن و التفجيرات و المطاردات و اختيار جيد لمواقع تصوير

بلال فضل : يحيرنى للغايه فانا اعلم انه كاتب جيد و لكنه على ما يبدو يكتب و ذهنه مشغول بشباك التذاكر كما انه لا يعنى بالقصه العنايه اللازمه و ربما يكون ذلك راجعا الى التعجل فى الكتابه - لاحظ ان بلال له فيلمين هذا الموسم

------------

باختصار فيلم واحد من الناس فيلم جيد يستحق المشاهده يمكنه ان يدخل الى قلبك و لكنه غالبا لن يدخل عقلك

[محمود الشاعر]

شكرا سيزيف اشكرك بشدة على هذا الاهداء وهذا الموضوع

بس يا راجل ما دام عزمتني على الفيلم كمل جميلك بسندوتشين سدق وكبدة من على ناصية الشارع

لك كل تحية واحترام

مع حبي

[عطر]

------------

باختصار فيلم واحد من الناس فيلم جيد يستحق المشاهده يمكنه ان يدخل الى قلبك و لكنه غالبا لن يدخل عقلك

مش مهم الفيلم يدخل عقلي انا عقلي مش ناقص خلاص حيشط مني لأن اساسا الحبكات الدرامية المصرية غسلت ايدي منها على رأي الخليجيين :lol:

أهم شيء اني اتفاعل مع الفيلم بقلبي وياحبذا لو فيه شوية دموع :ph34r:

انا دخلت عن العشق والهوى وجهزت معايا علبة كلينكس وعيشت دور الحزينة وقلت عايزة اعيط لما اقول يابس

لكن الحقيقي فضلت اضحك لما قلت يابسين :sad:

أحمد السقا ما شفت في تناحته الرومانسية ابدا بحياتي والفيلم مفبرك وكرهني في الرجال اكتر وانا مش ناقصة :P

تم تعديل 3 أغسطس 2006 بواسطة عطر

[nancy]

سيزيف

اختلف معاك فى بعض النقاط

محمود الجندى عمل مشهد واحد كويس اوى الى بيحاول ينصح ابنة فية وهو مش عارف ينصحة بايةة بالكذب ولا بالصدق

حكاية واحد وعشرين يوم هما عموا بيكونوا 4 وقابل للتجديد حسب القضية

بس كبر دماغك متخليش المهنة تسيطر عليك

مع انى برضة بابص على تفاصيل الديكور واعمل تقيم ان كان مطابق للواقع ولا مبالغ فية

وبعدين فية حتة انت فهمتها غلط هو مخطفش صاحب ابنة هو اخد ابنة وحفيد عدو عزت ابو عوف علشان يقنعة انة فعلا بيتحداة وانة هو خطف الولد باومر من عزت ابو عوف وعلشان يثبت حسن نيتة ساب ابوة وابنة معاه تاكيدا لحسن النية وبعد ما التانى رجع الولد وراة صورة ابنة ومراتة وابوة علشان يقولة انا ضحكت عليك

وبعدين الظابط رمز لفساد كبير فى شريحة مش بشخصة

وحتة ان خطف مراتة فى عز الظهر اعتقد تفوت لان الناس كلها على ما تفوق من الصدمة حتدخل فى الخوف وعلى ما تفوق من الخوف حتكون البنت اتقلتلت فمتقلقش تفوت فى الزمن دة

عطر اختلف معاكى جدا جدا

العشق والهوى فيلم مليان بالمشاعر الضايعة والحب المفقود والرضا باقل القليل من حلمنا الى بنتمناة فمشفتش اى حاجة فية حتى تدعو للابتسام

وكنت مستغربة جدا من الى بيضحكوا فى الفيلم اكيد هما حسين وفهمين غير الى انا فهماه

[محمود الشاعر]

نانسي انت كنت معانا فى الفيلم هاتي كوباية العصير اللي عليك لو سمحتي

ايوه كدة خلي الفرجة تحلو

[nancy]

كدة يا محمود يخونك الفيشار الى جبتة وعزمت عليك بية وحطيتة بينى وبينك رحت مخلصة كلة وجاى تسال على عصير ماكينة حتى مش كانز :P

[عطر]

عطر اختلف معاكى جدا جدا

العشق والهوى فيلم مليان بالمشاعر الضايعة والحب المفقود والرضا باقل القليل من حلمنا الى بنتمناة فمشفتش اى حاجة فية حتى تدعو للابتسام

وكنت مستغربة جدا من الى بيضحكوا فى الفيلم اكيد هما حسين وفهمين غير الى انا فهماه

والله يانانسي انا كنت داخلة الفيلم وحاطة صورة معينة عنه وهو انه كله مليان رومانسية وحب وشجن

فأول شيء انصدمت بأداء أحمد السقا وده لوحده كفيل انه يخرجني من المود اللي كنت داخله على أساسه فهو أقرب للتناحة عنه للرومانسية غير تمثيله البكاء واضح جدا انه مفبرك عكس أحمد لطفي كانت مشاعره اصدق وخصوصا وهو بيعترف بحبه لبشرى زوجة احمد السقا

احمد السقا ظهر بمظهر اللي عايز يحب والسلام مش مهم كيف يجرح لكن في النهاية يقول مش قصدي اجرح، اعطى لنفسه الحق انه يحب ويتسبب في طلاق زوجه حتى لو هي انكرت انه السبب لكن في نفس الوقت ردت فعله كانت عنيفة وغير مبررة لمجرد ان عرف ان اخوه كان بيحب مراته في صمت متناسي ان اخوه اكتر واحد كان بيساعده ووقف جنبه واتهمه اتهامات سخيفة غير مبررة برضه يعني انانية وحب الذات وبس رغم ان المخرج حاول يظهره بالإنسان الحساس حسن النية

الشيء الوحيد اللي في صالح الفيلم ان المخرج وزع البطولة بالتساوي على منى وبشرى ومنة غير كدة الفيلم لا يستحق ابدا

[محمود الشاعر]

معلهش يا نانسي اصل الدنيا كانت ضلمة فمخدتش بالي اني خلصت الفشار بتاعك ههههههههه

ليه انا مش عارف اروح السنما

لأني زعلان منها جدا

بقالي كتير مش عارف اشوف فيلم حلو

اخر فيلم شفته كان فرحان ملازم ادم

فيلم بجد

في قصة وتطور متناسق مع الاحداث المنسابة بتلقائية مدروسة

كمان الاسقاط السياسي و النفسي و الاجتماعي متوظف صح

علشان كدة فعلا مش عارف اروح السيــــــــــــما زي ما بحب اسميها ( بحب اسمع الكلمة دي قوي من العواجيز بتوع زمان معرفش بحس حالة جميلة قوي لما اسمعها )

[Sherief AbdelWahab]

1-قد يفسر وجود الضابط الفاسد "في كل مكان" على أنه خطأ منطقي ، وقد يبرر على أساس أنه إما أنه قد ترقى (وهذه إشارة أوضح على الفساد) ، وإما يفسر كرمز لفساد السلطة التنفيذية..

2-منة شلبي أدت الدور بشكل جيد جداً كما أراه ، وإن كان قصر مساحة الشخصيات يحرمك من الحكم بشكل تام الدقة على أداء فريق التمثيل في هذا الفيلم ، رشا مهدي مثلاً كان أداؤها باهتاً لأن الشخصية التي أدتها يمكن نزعها تماماً من الفيلم ، بل إني شعرت أن علاقة كريم ورشا في الفيلم شديدة الشبه بعلاقة عادل إمام ونيللي في "الغول" ، حيث أن نيللي وهي مذيعة في الفيلم (لا أذكر اسمها) تعيش في أسرة مفككة ولا ترضى عن ممارسات والدها "الكاشف" -فريد شوقي في الفيلم ، وأسلوب تربيته لابنه "نشأت الكاشف" - حاتم ذو الفقار ، الذي يتورط في جريمة قتل مشابهة لتلك في "واحد من الناس"، ولم يقنعني بالمرة استخدامها "كعامل ضغط" أو كورقة من ورقات الضغط التي تكمل بها الخطة التي وضعها كريم عبد العزيز..

3-بالنسبة لرسالة الفيلم ، هناك بالفعل مشكلة ما بين العقل والعاطفة ، أنا كمشاهد "متعاطف" أتمنى أن يدمر البطل "الذي أنا متوحد معه ومتعاطف معه إلى أقصى حد" كل الأشرار في الفيلم ولا عادل إمام في فيلم "أنا اللي قتلت الحنش".. لكني أجد نفسي عقلياً غير متعاطف مع حمل قرر محاكاة الذئاب ، ربما هذا ما بدا في جملتين حواريتين في الفيلم ، الأولى في بداية الخطة بطلها محمود الجندي (في تجربته الأولى في دور الأب التقليدي) ، والثانية من بسمة (التي جاء أداؤها نمطياً) في صورة رسالة صغيرة تحملها لابن "محمود" .. والتي ظهر فيها هذا الرفض!

4-شومان ممثل جيد بكل المقاييس حتى ولو في دور ضيق المساحة نسبياً ، وهو واحد من ممثلين جيدين يغص بهم حقل الإعلانات الذي يقدم في الغالب ممثلين لا ممثلات (باستثناء ياسمين عبد العزيز فقط)..

5-التضخيم الشديد في الفساد هو عيب مشترك للعديد من الكتاب خاصة في منتصف التسعينيات وطالع ، ظهر ذلك جلياً في أفلام أسامة أنور عكاشة التي كتبها للسينما (دماء على الأسفلت على سبيل المثال)، وحتى أفلامه التليفزيونية ومسلسلاته ، وأعمال عديم الموهبة مجدي صابر، ولم ينتقد أي منهما على ذلك العيب الخطير الذي يضفي على أعمالهما فجاجة ومباشرة تجعلك تشمئز من مشاهدة الفيلم أو المسلسل .. صحيح أن لبلال فضل أخطائه في السيناريو والحوار ، لكن من الخطأ أن أنتقد شخصاً ما على فعل يفعله بحذافيره آخرون دون أن أقول لهم ثلث الثلاثة كم!

خلص الكلام

[سيزيف]

الاخ الفاضل محمود الشاعر

غالى و الطلب رخيص

احلى سندوتشين كبده و سجق اسكندرانى يا عمنا

بس الحاجه الساقعه على نانسى

----------------

الاخت الفاضله عطر

انا معك ان عاده السينما المصريه الا تهتم بالحبكه الدراميه و ان تهمل التفاصيل

ولكن المفروض ان نطور من انفسنا

وفى السنوات الاخيره شاهدنا عده افلام جيده جدا من حيث الحبكه الدراميه و التفاصيل و منها سهر الليالى و مافيا و ملاكى اسكندريه لذا من حق المشاهد ان يتمسك بمستوى معين يرفض النزول عنه

اما عن العشق و الهوى فسوف افرد له تقريرا مستقلا

-------

الاخت العزيزه نانسى

اسمحى لى بالاختلاف معك

محمود الجندى قدم اداء نمطى بالخبره و لكنه خال من الاحساس و دور الاب كان مليئا بالاحاسيس و الشجن و اكن يمكن الابداع فيه عندك مثلا مشهد دخول كريم عبد العزيز على ابوه بعد اختطاف زوجته و المفروض ان الاب فى حاله انكسار و انهيار و هو احساس فشل الجندى فى توصيله للمشاهدين

حكايه واحد و عشرين يوم حبس احتياطى دى جديده لنج غالبا الحبس بيكون اربعه ايام و ممكن يبقى خمسه عشر يوما فى جرائم امن الدوله و لكن واحد و عشرين دى ماحصلتش و اسالى استاذنا الافوكاتو

و بعدين يا نانسى بطلى تنامى فى السينما عشان تاخدى بالك من الفيلم كويس :rolleyes:

الولد حفيد عدو عزت فعلا و لكن كريم تمكن من اختطافه بعد ان انشا صداقه بينه و بين ابنه فى حمام السباحه

------

الاخ الفاضل شريف

واضح جدا ان رؤيتنا للفيلم متفقه الى حد كبير كما تتفق اسماؤنا ايضا " بالمناسبه انا اسمى شريف برضه :rolleyes: "

وان كنت اختلف معك بشان بلال فضل

فالكاتب الجيد نقسو عليه اذا كتب عملا دون المستوى حتى يعود الى الابداع

اما الكاتب الغير موهوب فلماذا نكلف انفسنا عناء انتقاده فهو لن يستطيع ان يفعل احسن مما فعل

و اعجبتنى للغايه العباره التى قلتها " اننى اجد نفسى عقليا غير متعاطف مع حمل قرر محاكاه الذئاب " و هى جمله صادقه و حكيمه

و الحديث حول السينما و دورها فى ابراز و غرس مبادىء و قيم معينه فى نفوس المشاهدين هو حديث يطول و ربما تحدثنا عنه قريبا

[nancy]

انا برضة الى نمت فى الفيلم يا سيزيف :rolleyes:

حول على موضوع اسكندرية والناس والصيف دخلت امبارح والنهاردة فيلمين جداد

وماشى خلى الحاجة الساقعة علياويلا خليها فيروز ولا يهمك :rolleyes:

[سيزيف]

فيروز ده اسم عضوه معانا فى المنتدى

بس هى مش باينه بقى لها فتره عشان كده هاشرب

" نانسى " كولا

قصدى بيبسى كولا

:)

[bentmasria]

اتفق مع شريف واختلف مع بعضكم فتقييم العمل بشكل عام جيد جدا باستثناء اخطاء لا تقلل من قيمته كعمل سنيمائي متميز وانتاج جيد جدا ولولا بعض اخطاء السيناريو لاعتبرناه افضل فيلم لهذا الموسم

الواقعية ربما ليست المفرطة لكنها الحقيقة المغلفة بآنات الكادحين تنفرط كعقد الم بين طيات هذا العمل جميعنا نحمل جزءا من هذا الشخص المقهور داخلنا ولن يجدى الانكار شيئا فالواقع يظهر خلال الملابسات والظروف لماذا نقف امام ملابسات وتفاصيل وننكر قيمة حملها الفيلم ورغم اعتراضى على نهايته الا انى احيى اذاء ابطاله كلهم كان ضرورى فى مكانه ولم يكن احدهم باهتا وكان الجندى صوت ضمير لا بد من وجوده

وللكلام بقية

باى موقتا

[ارسطو]

مساء الخير يا جماعه كل الاراء اللى اتقالت عن الافلام دى تحترم لانها فى الاخر وجهات نظر بس لو بصينا للفبركه اللى فى الافلام فتحسوا ان الافلام الامريكانى الاكشن كلها فبركه يبقى الممثل داخل فى رجله حديده ومتعلق فى جبل ارتفاع 200 متر وماسك بايد واحده وبيضرب رصاص بالايد التانيه يبقى ساعتها لازم نحمد ربنا على التقدم اللى وصلتله السنيما المصريه وانا شايفة ان اجمل الافلام الموسم ده هو (عماره يعقوبيان) بس للاسف لما بسمع اراء الناس عنه بحس انهم بيبصوا للامور وللمشاهد بشكل سطحى من غير ميدوروا على الهدف اللى ورا كل الحاجات دى

وعلى فكره يانانسى انا كنت وراكى وانتى اللى كلتى كيس الفشار كله مش محمود B) :angry: