يعنى اية كلمة وطن

[شاب_نوبى]

يعنى اية كلمة وطن

سؤال محيرنى

يعنى شعب

يعنى أرض

ولا يعنى نظام

وماهو الولاء للوطن

هل هو خدمة الشعب

هل هو حب الارض

هل هو الاخلاص للنظام

وشكرا

[المدهش]

محتار انا..

الحس ترابك يا وطن..

وانسى اللي شفته من عفن..

والذل على ايد جلاديك..

اللي ابتديت من ظلمهم..

اتبرى من جنسيتي..

واندم على يوم ولادتي فيك..

واتمنى اهاجر زي باقي صحبتي ..

ولا اني اعيش ولا لحظة ليك ..

ده القسوة اهون لما تيجي من الغريب

والغربة مرة.. بس العن منها الاغتراب

و كتيرة جدا أسئلة مالهاش جواب

ازاي احبك.. وانت مش بتحبني

وعايزين اركع للمامة وانحني

ودموعي لسه م الوجع بتهزني

لا انا ابن جاحد ..ولا ابويا ضحا بالضنا

محتار انا..

الحس ترابك يا وطن..

ولا اخبط الراس العجوزة في الحجر..

قلبك حجر ..

صمتك حجر..

ناسك حجر..

متحنطين من عهد خوفو مش بشر

خايفين وراضعين الهوان

ومكتفين حتى اللسان ..

الحس ترابك يا وطن ..

ولا اخبط الراس العجوزة في الحجر

يمكن تلين..

وتسكت الصوت اللي موت ضحكتي قبل الاوان..

مين الوطن..

الأرض والطين والفضا ولا البشر..

لو كانت الارض الوطن

يبقى انا بصراحة برئ من ده وطن

علشان ماليش ولا شبر فيه

يبقى البشر..

مين م البشر

الاغنيا.. والاوليا.. ولا الغلابة.. ولا الغجر

ايوه الوطن هوه البشر..

المنقوشين فوق الحجر

والمسخوطين زي الحجر ..

مجنون انا.. لو كنت افخر بالحجر

مجنون انا.. لو كنت ادافع عن حجر

لا انا ابن جاحد ولا ابويا ضحى بالضنا

محتار انا..

قصيدة كتبتها أيام تأدية الخدمة العسكرية"المدهش"