مطلوب شرطي منزلي يخلص خناقات البنات

[فولان بن علان]

الأجازة سهر طول الليل ونوم بالنهار

خناقات متواصلة في البيت معظمها على حاجات هايفة وتافهة

البنتين ضدين في كل شئ إلا لما يتفقوا علينا في طلب زيادة في المصروف أو شراء أي حاجة جديدة

مفيش حد بيسمع الكلام

أي طلب مننا ودن من طين وودن من عجين

الكبيرة 12 سنة ونص هادئة تحب الجلوس أمام التليفزيون تمل من الخروج بره البيت تحب الأكل

تميل إلى الحفظ في المذاكرة مدرساتها يشكرون في أدبها وتفوقها وهي تشتكي منهم ولا تبوح لا تحب امتحانات الشفوي

تنتقي صديقاتها

الصغيرة 9 سنوات ونص دائمة الحركة شقية تحب الخروج بره البيت لها هوايات متعددة الرسم والخياطة بالابرة مبتكرة

لا تحب الحفظ ملولة مدرساتها يشتكون من شقاوتها ويمدحون تفوقها تحب امتحانات الشفوي أكثر من التحريري

لها صداقات كتيرة معها كل أرقام زميلاتها طول النهار يسألوا عنها بالتليفون

أثناء الخناقة

الأم : أبوكم موجود كفاية عليا لما يكون في الشغل

أنا محاولا التخليص : ليه بس كده أنتم اخوات لازم تحبوا بعض وتحترموا بعض

زمان كنت اهدد بالضرب الوقتي ما ينفعش ممكن أنا أنضرب :sad:

الصغيرة : هي اللي غلطانة

الكبيرة : هي اللي بدأت

الصغيرة: كل حاجة تقول عليا أنا غلطانة انتم دايما ظالمني.

الكبيرة: ما تقوليش أنت كبيرة وقدوة مش عايزة أكون قدوة

أنا : مش عارف أعمل إيه معاكم أنا ها أبلغ الشرطة تيجي تخلص بينكم :blush:

[sendrella119]

استاذ فولان

ممكن تقول اسباب الخناقة ..المتكررة

يعني مثلا لو هما التنين في اوضة واحدة طبيعي لازم لازم حيتخانقوا

او لو بيلبسوا سوي او مشتركين في اشياء كتيره

وده الطبيعي ....وعلي فكرة مع ان ده بيعمل مشاكل كتير وخناق لكن بنظري ده احسن لهم ....بيتعودوا علي المشاركة وحب بعض....وبيحد من الانانية

انا حا اقولك حاجة

الاجازة طويلة ومملة ولازم يكون في حاجة مفيدة تشغلهم

اولا لازم يكون في هواية

يعني لو في ميول معينة لاي بنت في اي رياضة او رسم مثلا ساعدها انها تنمية وبكده حتفضل ساعات طويلة بالنهار مركزة في الشئ اللي بتعملة وبس ومش حتفضي للخناق

ثانيا يعتمدوا علي المسؤلية

بمعني

حا اقولك علي فكرة حلوة ومتجربة ومفيدة

الام تقسم شغل البيت ل 3 اقسام

1-قسم للطبيخ ....الشؤن الكبيرة في المنزل ........وده بيتولاه الام

2-قسم لترويق الاوض ونظافة المنزل

3-قسم لترويق المطبخ

طبعا كل بنت بتتولي رقم 2 او رقم 3

لمدة اسسسسسسبوع فقط

وبعدين بيتم التبادل بعد اسبوع

وطبعا اللي بتاخد رقم 3 بتتعرف اكتر علي المطبخ ..هي بس لو في اي حاجة في الشقة تابعة للمطبخ مسؤليتها انها تقوم بيها ........من كوبايات فاضية او اطباق فاكهة او .......

وبالتالي بساعدوا مامتهم

وبيكسبوا خبرة

وبيقضوا الوقت الباقي في اي حاجة هما بيحبوها

الطريقة دي كانت مطبقة علي انا واختي طول ما كنا بنات..............وكانت ناجحة وكان كل نهاية اسبوع لينا نقط عند ماما ...مين الاحسن ومين طلباتها تتنفذ فورررررررررررررررررا بعد نهاية كل اسبوع

ارجو اني اكون افدت

[فولان بن علان]

أستاذة sendrella119

أشكرك على الإفادة والاهتمام

فعلا هما مشتركين في غرفة واحدة لكن لبس لا

أسباب الخناقات في الغالب في منتهى الهيافة

مثلا مين يمسك ريموت الرسيفر

سباس تون ولا مسلسل

لو واحدة اشترت أي شئ لأن مقاسها كان متوافر في المحل والتانية لا تبقى مشكلة

أمهم فعلا بتقسم شغل البيت بينهم

لكن لو واحدة منهم خلصت شغلها والتانية لا تبدأ خناقة

ليه ما عملتيش شغلك ..وأنت مالك..طيخ طاخ طروخ

المشكلة فيا أنا ساعات فعلا بأعمل نفسي مش هنا ومش شايف حاجة

أو تنبه للاثنين بالتوقف بدون الدخول في التفاصيل

لو حبيت أتدخل في الغالب مش بأعرف مين الغلطان

غير الملل من وجع الدماغ بعد يوم متعب في الشغل

حتى ممارسة الهوايات بتكون أحيانا سبب الخناق

واحدة أخدت ألوان الأخرى

ربما يكون السبب الرئيسي هو الانكماش علي بعض في البيت نتيجة الغربة

وقلة الاختلاط بالغير

عموما بعد حوالي شهر ونص والنزول لمصر والبحر والأقارب ممكن تتحسن الأمور

تم تعديل 3 يونيو 2006 بواسطة فولان بن علان

[nancy]

ادة يا فلان انت بتتكلم على بناتى

بس الى عندى اكبر من بناتك ب 3 شهور

بص الخناقات على اية

الكبيرة عندها موبيل ... الصغيرة استولت على الكاميرا

الصغيرة واخدة كل العرايس الباربى والفلة والبيبهات والكبيرة عوزة تلبسهم وترتبهم على ظهر سررها وبس

مين الى يلعب بلي استشين.. تبقى خناقة

وحدة عوزة تسمع فى الكاسيت محمد منير والتانية عاوزة واما

الصغيرة عوزة كرتون .. الكبيرة عاوزة اغانى

الصغيرة مش عوزة تذاكر خالص وبتكرة المدرسة

والكبيرة مش عوزة تعمل حاجة غير المذاكرة والقراءة والاغانى

الخناق الى الاكسسوار من سورتيت الى الساعات ونظرات الشمس وشنط الخروج والروج (اة ولهى ) جيبين تلميع للشفايف وعملينة روج

البرفنات مين الى السبب فى ان اوضتهم مش نظيفة

والادهى الفتنة

الصغيرة السوسا

كل شوية ماما زعقى لاثار بتتكلم فى التليفون بقالها ساعة

ماما اثار بوظة الاوضة

ماما اثار بذاكر ومشغلة التلفزيون

ماما اثار ضربتنى

دى بعض اشكال الخناقات

الظاهر كل البنات زى بعض

انا بعالج الامور دى بالزعيق او التهديد او احيانا ضربة خفيفة

جوزى ملوش دعوة خالص

ولو ادخل يبقى يومهم اسود لان كفاية علية مشاكل الشغل

[فولان بن علان]

يبدو يا باشمهندسة نانسي إن عنوان الموضوع محتاج لتغير

مطلوب جهاز شرطة منزلي لتخليص خناقات البنات

كله كوم والبنات المفاعيص عايزين يلبسوا كعب عالي رفيع

وده مش ممكن أبدا لانه بيسبب وجع الضهر وده شغلي

وتقلب الخناقة عليا

أنت ياسي بابا كل حاجة تقول لأ

متقفلهاش علينا كده

ولأني بأضعف مع البنات في معظم طلباتهم لكن في دي لا

تقوم البنات ترد تقول أكيد في يوم من الأيام ها نشتري اللي احنا عاوزينه

أقوم أرد عليهم بالمقولة المأثورة أنا ها اتصل بالشرطة