O .. الأسطى سيد رئيس عمال

[ragab2]

الأسطى سيد كان فى الأول سيد

ودلوقت بقى  عبد  عبد  السيد

وكل شغله بس يوافق ويؤيد

ويبوس أيادى سى السيد

الأسطى سيد كان على قد الحال

وكان عامل عادى وشغال

جتلة شغلة ماكانتش ع البال

الأسطى سيد بقى رئيس عمال

والحال معاه ماشى عال العال

الاسطى سيد نهاز الفرص فى الحال

يبوس الجدم ويلمع الخلخال

وكل ده عشان يربى العيال

الأسطى سيد طلق أم العيال

عشان ياخد واحدة تناسب الحال

على سنجة عشرة وتحب المال

ماتينيه وسواريه وياه  جوال

تمسح جوخ وتقول وياه  موال

طلع له لغد م العز يكيد بيه العزال

وكرشه الكبير من صفات الجمال

وبقى من أصحاب الشهرة والمال

الأسطى سيد حافظ شعر فى كل مجال

مدح ورياء وتزلف وحتى السيجال

واذا نسى الورقة بيقول ارتجال

عشان كدة التفريط فيه محال

الأسطى سيد ودع الفقر وبقى شغال

فى الهبر والخطف والتملق والترحال

وبقى بيه كبير من غير كلام ولا جدال

وأصبح شغله يتجسس ع العمال

ويربى المشاغبين ويقطع الأوصال

واللى يعارضه يضمن الزوال

ويابخت اللى كان له سيد خال

التوقيع

مواطن مصرى على قد الحال

[هشام عبد الوهاب]

يا عينى ياعينى على الكلام الحلو

احسنت يا عم رجب يا عمنا كلنا

[ragab2]

شكرا أخى هشام باشا

الحقيقة الحاج سيد ده غالى علينا كلنا ولازم ياخد حقه

تحياتى

[ezzat afifi kotb]

عمنا سيد الحمال

فكرنا بواحد زبال

اتوظف واتنظف

واتعدل له الحال

من بعد الجلابية

وقماشها الدبلان

فى قفاه المهرية

من هبش الاكلان

بقى عنده العربية

وعمارة بسكان

واهو كله من التمثيل

فى الشعب الغلبان

[ragab2]

أكلان ايه ياقطب ده عمك سيد بقى دلوقت عال العال

وعمر الشريف نفسه بقى يقول له دلوقت  يا خال

اللى  انت تقصده  ده  فعلا  كان  راجل زبال

لكن الأسطى سيد بتاعنا كان بنا وكمان عتال

بس الأسطى سيد دلوقت بقى خالى المخ والبال

بيروح وييجى بطيارة وحتى لو على طيران العال

وينادوه  بالبيه والباشا  ونسى أبوه اللى كان بقال

سريع فى الهبش والاقتباس وكله على حساب العمال

اللى تقصده عنده عمارة لكن ده  عنده شارع  وكنز مال

ده عمره ما ركب الخيل لكنه بقى فارس وكمان خيال

ده مرة طلب منى قصيدة  يغنيها لصاحب العزبة  مع موال

اللى خد خد واللى سرق سرق وعشان تسترد المسروق محال

تعرف ان الأسطى سيد خد دكتوراة فخرية أثناء التجوال

ومابيفكش الخط ولا بيكتب اسمه وطول عمره على ده الحال

بس الشطارة حلوة ولازم الواحد يكون مفتح وحرك وكمان  دجال

الأسطى سيد جوز ابنه لبنت راجل أعمال

عمل حفلة فى الشيراتون فى صالة نوال

وجاب مطرب فرنساوى غنى لشفيق جلال

وصرف فى الحفلة دى ملايين ..أيوة أمال

وان مافتحتش مخك فى البلد دى هايلبسوك قضية نصب واحتيال

وعشان كدة كله فى الهبش والخطف والسرقة والكذب والرياء سجال

(Edited by ragab2 at 6:27 am on July 18, 2001)