قولولي العيب في مين؟

[Sherief AbdelWahab]

فاكرين كل سيل التوعية ..

فقرة المرور في صباح الخير يا مصر زمان اللي كان بيقدمها فنطاس الرخامة خالد مهني ، والمقدم أحمد عاصم..

برنامج الناس والمرور بتاع سيادة المقدم أحمد عاصم ، سجعه السخيف ، وحواراته الأسخف مع السواقين..

أنا شخصياً افتكرت الكلام دة لما كنت معرض لموت مؤكد قبل 3 أسابيع..

إيه القصة؟

كنت بأعدي شارع رئيسي عندنا في المنصورة ، صحيح إن الإَضاءة ما كانتش على المستوى المطلوب ، لكن كان الشارع (اللي ما فيش فيه إشارات مرور) فاضي ، وكانت العربيات على مبعدة تخليني أعدي الشارع مستريح زي ما بعمل كل مرة ..

إلى أن..

إلى أن فوجئت بشخص (ما يسمح لي الأدب بذكر وصفه أنه حشاش) يركب دراجة ، مرق بجانبي من عكس اتجاه سير السيارات في الشارع ، وكاد أن يصدمني، اضطرني للرجوع للخلف ولتضييع ثلاث ثواني أو أكثر جعلتني في مرمى سيارة مسرعة ، ولولا ستر ربنا ما كنتش بأكتب لكم دلوقت..

المذهل إن الشارع دة ، شارع المحافظة ، اتجاه واحد ، معروف لكل من دب رجل في المنصورة ، وأي شخص عديم القوى العقلية يمكنه استنتاج اتجاه الشارع حتى ولو ما كانش من المنصورة أو كان بيزورها لأول مرة في حياته..

الناس دي أكيد بتشوف تليفزيون محلي ، سواء السواق ، أو الحشاش ، أو العبد لله بحكم متابعتي لما هو حالي والكتابة عنه هنا ، ويمكن السواق والحشاش وغيرهم حظهم الإسود إنهم بيشوفوا الأولى والتانية ، ويمكن حظهم حلو ويكون عندهم الوصلة اللي بيشوفوا فيها ماتشات الدوري الإنجليزي وعمرو أديب..

أي مسئول في المرور ، لما بيظهر بطلعته البهية في التليفزيون ، بيتكلم عن دور الإعلام ، وعن التوعية اللي بيقدمها الإعلام .. علشان يرسم المذيع ولا المذيعة اللي بتقدم له البرنامج، "علماً بإن التوعية دي بفلوسنا وضرايبنا غصبن عنه -الإعلام يعني"..

يا ترى الناس اللي التوعية موجهة ليهم ما بيسمعوش الكلام؟

ولا التوعية وأسلوبها اللي غلط؟

هل يعقل إن يقدم برنامج توعية مرورية ضابط مرور؟ أخذاً في الاعتبار مطارق الحداد اللي بين شرطة المرور والسواقين ، المؤدبين منهم وضريبة البانجو (وما أكثرهم في أقاليمك يا مصر وخصوصاً على خطوط المحافظات في الوجه البحري)..

ليه زادت حالات الإصابة بأنفلونزا الطيور رغم كل التوعية العنيفة جداً في كل وسائل الإعلام؟

العيب في مين؟

خلص الكلام