أنا عاوزه أهدي لدكتوري هدية !!

[مصرية الهوى]

الأسبوع اللي فات قاعدة بتكلم مع صاحباتي عن الامتحانات والتخرج والمشروع ومناقشة المشروع وانه خلاص مفضلش الا القليل ولازم نشد حيلنا عشان الامتحانات على الابواب وتسليم المشروع ومناقشته وكده يعني .. في نص الكلام قلتلهم : بصوا بعد ما نناقش المشروع انا بصراحة فكرت ان انا عايزه اهدي الدكتور هدية بصراحة الراجل يستاهل .. يعني مثلاً ساعة ، بارفان إن شاء الله علبة شوكولاته ..

انا قلت كده لقيت وحده من صاحباتي مزعقة في وشي زعيييييييق يا ساااااتر :D : أنت اتجننتي يابت !!! ده راجل ..

قلتلها : ما انا عارفه انه راجل .. هو انا قلت ست يعني -_- !!

قالتي : بس ده عيب وقلة أدب .. ده هيفهمها غلط .. تفكيره هيروح لبعيد ..

وبعض البنات قالوا اه فعلا .. ده عيب .. ميصحش .. وبعضهم قالوا يا ستي وفري فلوسك ده ميستاهلش ..

أنا بصراحة ذهلت : طيب ليه .. يعني ازاي عيب .. ويعني ايه يفهمها غلط وتفكيره يروح لبعييد :angry2: .. ده دكتوري وفي مقام والدي .. مفيش أي حاجه بيني وبينه .. والله لو مثلا قلتلكم انا هاهدي لابن الجيران الشاب هدية في عيد ميلاده .. قولوا عيب وهتتفهم غلط .. انما ده دكتوري واكبر من بابا كمان وبيعاملني كأني بنته بالظبط ... يعني مش شايفه عيب خالص ..

قالتلي : بصراحة اكتشفت فيك انك بريئة جدا وعلى نياتك وبمعنى اصح واعم واشمل ساذجة :blink: .. وقال ايه هتهديله برفان والا ساعة .. ايه رأيك في بيجامة حمراء احسن .. والا أقولك اكتب كتابك عليه والا اضربوا ورقة عرفي وعيشوا ..

شوفتوا التفكير وصل لفييييييييييييييين :D !!!

أنا بس نفسي أفهم .. ليه دايما أي علاقة بين رجل وامرأة بتتفسر غلط كده .. يعني في حالتي أنا والدكتور أنا شايفه إنه مفيش أي مجال لتفسير العلاقة غلط اطلاااااااقا ..

ما انا هأسلم المشروع ونناقشه وامشي وخلاص .. ده اخر يوم بيني وبينه .. يعني يمكن اموت مشفتوش تاني ..

وانا فكرت اهديله لانه بصراحة الدكتور ده ليه معزة خاصة عندي .. بصراحة دكتور هايل عمري ما قابلت زيه .. غير جوايا حاجات كتيرة للأحسن .. يعني عيب لو أنا فكرت اهدي له هدية بسيطة .. يعني تعبير عن شكري للي عمله معايا .. لا أكثر ولا أقل ..

قالت : طيب تخيلي قالك ايه ده ؟؟ .. ورماها في وشك ..

ساعتها هيبقى منظرك وحش اوي ..

بصراحة انا فكرت في كده .. لو فعلا قالي ميرسي انا مش عايز حاجه منك .. ساعتها بقى انا ممكن امووووت من بياخة الموقف :blink: !!!!!

الفكرة بصراحة بقالها مدة في دماغي .. قلبتها يمين شمال .. اخر حاجه قلت ايه !! مفيش غير ان انا اجيب علبة شوكولاته واقوله من جروب المشروع كله .. يعني احتمال الرفض هيبقى بعيد جداً .. وكمان مش هتتفهم غلط عشان مش انا لوحدي .. وبرضه لو رفضها يبقى براحته مش حاجه خاصة بيا انا بس ..

ايه رايكم في الموضوع لو انتو مكان الدكتور هيبقى موقفكم ايه ... هتفهموها غلط ؟؟

[dr khaled]

تفكيرك يدل علي زوق سليم و انسانه بتفهم

ممكن تجيبيلوا علبه شيكولاته كبيره وتدهالوا انتي وواحده صاحبتك وتقولوا دي من الجروب كله و شكرا علي تعبك معانا

ده تصرف حضاري سليم ولا يعيب تماما

ملحوظه

ازا كنت محرجه ممكن تبعتهالي وان هاتصرف بطريقتي :angry2:

[مسافر زاده الخيال]

لالالا يابنتي هدية ايه وهباب ايه؟؟؟ ده حتى لو كانت الدكتوره ست انا ضد اعطاء الهدايا .............. دنت طيبه وعلى نياتك ومش عارفه الدنيا مشيه ازاي

طب انتي نيتك كويسه .....عارفه ايه حيكون موقف الدكتور (يمكن يفتكر ان المسألة اعجاب تلميذه بمعلمها على طريقة عقده الكترا؟) وخصوصا عندكم في القصيم حينظر للمسألة من زاوية متشدده؟

يمكن زميلاتك حيغيروا منك ويرسلوا هدايا هما كمان والمسأله حتزيط.......

يمكن اذا الادارة شمت خبر يعلموا من الحبه قبه وجرصه ومصايب متلتله...........

يمكن ويمكن........

بس ممكن تكتبيله رسالة شكر (تشكريه على مجهوداته العظيمه معك)

الا على فكره........

هو في القصيم عندكو دكاتره رجاله يدرسوا بنات؟؟؟ :angry2:

علعموم بالتوفيق والنجاح يبنتي ان شاء الله ترفعي راية الوطن خفاقه على كل الارجاء

والسلام

[White heart]

كلما انغلق أفراد المجتمع أكثر و أكثر ... وقلت فرص الإختلاط و الإحتكاك الطبيعية - السوية، كلما إنعكس هذا على اسلوب التفكير نفسه بكل أسف ......

بالفعل إحتمال رفض الرجل للهدية قائم، وهذا لإنتشار عادات النميمة و القيل و القال - بل و الإتهامات بالتحرش أو الرشوة و إنحصار دائرة الثقة بين أفراد المجتمع .. الخ .. الخ .... من تلك مساؤى العصر، الا اذا كان الرجل يعرفك جيدا - فبكل تأكيد فأنه لن يرفض، بل و سيقدر ان أحد الطلبة قدر رسالته، و يتشجع على أن يستمر على ما هو عليه .... بالطبع هو ليس بإنتظار هديتك حتى يقنع برسالته و لكنها سوف يكون لها أثر بالغ من وجهه نظرى مثلنا القائل " إعمل الخير و ارميه البحر "هو بكل تأكيد مثال جميل و ينطبق على هذه الحالة على كلاكما ..... انا لو كنت مكانك ( و أعرف من خلال معاشرتى لهؤلاء الزملاء أو الزميلات مستوى تفكيرهم ) لم أكن لأستشريهم فى مثل هذا الأمر ... كنت بمنتهى البساطة احاول تحفيزهم على شراء هدية بإسم المجموعة ... وان رفضوا قمت اذن بعمل ما انا مقتنع به، و بعدها فليكن ما يكون، فسواء قبلها أو رفضها فأنتِ بكل تأكيد لم تفعلى أكثر من خير و القيتيه فى البحر.

أعتقد انه من إحدى آفات مجتمعنا هو إتساع دائرة التشكيك و المحظورات أكثر و أكثر خاصة تلك التى بلا أى سبب مثل هذة الحالة التى تتحدثين عنها .... و مع الوقت يجد الفرد نفسه مكبوتا لا يستطيع الحراك ( بالطبع انا لا أعنى هذا الموقف البسيط بعينه و لكن أعنى حزمة كاملة ) ....

أقترح بتقديم " قلم " هدية، و حاولى أن يكون بالفعل بإسم المجموعة ( أى أن يشتركوا فعليا معكى فيه ) و ان رفضوا و انتِ ما زلتِ عند رغبتك فى إهداه اياه، فتشجعي و لا تترددى لأنك ببساطة لا تفعلي أى فعل مجرم أو غير سوى - بل لا تفكري كثيرا أين و متى يكون الوقت المناسب .. ببساطة خليكى على طبيعتك.

بالمناسبة .. أنتِ بكل تاكيد لستِ على نياتك و لستِ ساذجة، انتِ إنسانة طبيعية حساسة، تقدري من حولك و تسعى الى التعبير عن إمتنانك و رضائك عليهم بطريقتك التى أنتِ مقتنعة بها ( هذه نقطة فى غاية الاهمية ) ..... فلا تجعلى أى شئ يُشعرك بالعكس .....

مع تحياتى.

[الاسكندرنى]

لو تسالنى انا اكون مكان الدكتور اقولك انا حعمل ايه

الدكتور , اتفضلى يا بنتى خير فى ايه عاوزه حاجه ( حيث افترض حسن نيه الدكتور )(جى جى انت عارفه الدكتور كويس ولا لا )

جى جى , شكرا يا دكتور امير بس فى هديه لحضرتك من افراد المشروع لحسن تعاونك معنا و بذلك للمجهود طوال تلك الفترة يعنى يا دكتور ولادك بيقوللك شكرا

الدكتور , اقوم اقف من على كرسيه و اسلم عليكى و اقولك ربنا معاكوا و يوفقكم واخد علبه الشوكولاته افتحها و اقدملك منها و اقولك لو محتاجه اى حاجه تانيه انا موجود الصراحه ديه مفاجاة ليه ماكنتش متصور ان فى ناس بتقدر مجهود الاخرين

راى بصراحه فى الموضوع كله

لفته طيبه منك يا جى جى و ماتشغليش نفسك بكلام الناس الناس دول كمان بعد المشروع مش حتشفيهم تانى

وفى حاجه تانيه علشان كلام الاخ مسافر

الموقف ده ليه ردود افعال كتير جدا محتمله من الدكتور بس انتى ممكن تجبرى الدكتور على رد الفعل الملائم يعنى تجبريه بطريقة كلامك على احترامك

و علشان الموضوع يكون فى صالحك اقترح ان تقدمى هديتك للدكتور وسط مجموعه من الطلبه يعنى انتهزى فرصه يكون واقف بيتكلم مع احد الطلاب و اسمعى هو بيقول ايه و بعدين تقوليله يا دكتور اتفضل هديه من المجموعه و يشرفنى انى اكون من قدمها اعترافا بالجميل بكده زى مابنقول احنا يا اسكندرانيه ( ثبتى الجميع ) الكل حيكون فى حالة زهول و فى الحاله ديه الشياكه دائما بتكون رد الفعل :angry2:

تم تعديل 26 مارس 2006 بواسطة الاسكندرنى

[Hammer]

نفسي كمجتمعات شرقيه أن نتخلص من هاجس الرذيلة اللي منغص علينا عيشتنا , و ان ننظر للعلاقه بين الجنسين كعلاقه بين إنسان و إنسان و ليس بين ذكر و انثي !!

هذا الهاجس الذي حول التعامل بين الجنسين إلي ( تكلف و تصنع و تشكك ) و تنبع جميع التصرفات فيه من مرجعية واحدة ألا وهي ( يا تري ح يقول علي إيه ؟ ) أو ( أحسن يفهمني غلط ) .

ثقافة إختزال الخير و الشر و الاخلاق و الشرف و الأمانة و العفة و الطهارة في شئ واحد فقط ... الجنس :angry2:

إديله الهديه ... حتي و لو كنت لوحدك , و الهديه في أخر العام يعني لا توجد مصلحه مرجوة منها .. و حتي و إن ظهر فهمه الخاطئ لها (و هذا لن يحدث ).. كوني ثابته و واثقة من نفسك و صححي له مفهومه .

و طبعاً كل شخص و له نوع الهدايا .. يعني بلاش الشيكولاته و القلوب الحمراء :D و خليها هديه رسميه زي قلم أو طقم مكتب .

و عقبال ما نجيب لك شربات نجاحك في البكالوريا كدا .

تم تعديل 26 مارس 2006 بواسطة Hammer

[shahd]

هيا فكرة جميلة ومعبرة يا جيجي انا وزميلاتي عملنها مع الدكتور بتاعنا وكان تونسي الجنسيه

بس احنا كنا يد واحده وكل الي عملناه اننا حطينا الهدية على الدرج بتاعه في المدرج وكتبنا عليها بس شكرا على كل حاجة

بجد فرح جداااااا وقال انا فعلا مش عارف اقلكوا ايه واشكركم ازاي

تم تعديل 26 مارس 2006 بواسطة شهد

[se_ Elsyed]

أن مستغرب من الأراء اللي بتقول إن الراجل يفهم الموضوع غلط وكإننا أصبحنا في غابة مليئة بالذئاب والكل متربص بالأخر

إتوكلي على الله يا جيم جيم إنتي ما بتعمليش حاجة غلط ولا مخططة إنك تقابلي الراجل في كافيتريا ولا كوفي شوب عشان تعطيه الهدية ..

قال رسول الله " تاهدوا تحابوا "

وإنت قصدك خير وربنا هايجازيكي خير .

والهدية ولو كانت بسيطة وبريال حتى تترك أثر كبير في نفس المُهدى إليه .

[مهيب]

فى معلومة مهمة جدا ناقصة علشان تبقى النصيحة صح .. ايه جنسية الدكتور ؟؟ الموضوع ده للأسف ليه أهمية مفرطة من وجهة نظرى ... لان ردود أفعال الأشخاص و فهمهم للمواقف الاجتماعية بتتغير من مجتوع للتانى ... فياريت تعرفينا جنسيته ايه ؟؟

[مصرية الهوى]

يا سلام أنتو شجعتوني والله ..

أنا شكلي هأنزل اشتري الهدية النهارده :sad: ..

استنوني كمان شهرين ان شاء الله وهأقولكم قال ايه ...

الدكتور مصري يا مهيب ..

بس مفتكرش ان الجنسية لها علاقة ابدا بالموضوع ..

يعني مثلاُ لو هأقولك الدكتور سعودي .. هتقولي متديهوش !!

أنا شايفه ان الموضوع له علاقة بشخصية الدكتور ..

يعني بعض الدكاترة بيبقى طيب ودايما يتكلم معانا وكده يعني ..

شخصيته سهلة والتعامل معاه سهل ايا كانت جنسيته ..

ودكاترة لا .. كل همه يدخل يقول المحاضرة ويخرج .. مفيش اي مجال للاحتكاك بيننا وبينه ..

وبرضه الموضوع متعلق بتأثير الدكتور ..

يعني انا اشمعنى اخترت الدكتور ده .. ما هو فيه دكاترة كتير درسوني !!

لأني زي ما قلتلكم حاسه انه فيه دين عليا ليه .. وعايزه ارد له الدين ده ..

والهدية هي وسيلتي عشان اعبر له عن كده ..

[Guest النسر المصري]

جي جي ...اسمعي مني الحدوته دي ...وبلاش تنساقي ورا رغباتك بدون دراية تامة بابعاد الموضوع

انا كنت في فنون جميلة في القاهرة...وكان لي زملاء شباب عاوزين يقدموا هدية لواحد معيد محترم الكل بيحبوا عشان اخلاقة وادبة

لكن المعيد رفض وقال (واجب المعلم ان ينقل الرسالة...ذلك هو واجبه....وليس تطوع منه لمساعدة احد كي يستحق عليه الهدايا...انما قد يستحق كلمات الشكر كون المعلم يستحق الثناء)

اجتمع الافراد فيما بينهم وقرروا التبرع بقيمة الهدية باسمه لاحد الفقراء...واجتمعوا في عمل لوحة رسموا له رسما شخصيا وكتبوا فيه كلمتين تدل على شكرهم لجهوده كمعلم ..وكانت كلمات قليلة بدون تكلف

لاحظي المفارقة....شباب بيقدم لشاب مش لدكتور كمان.....الكلام دة في فنون جميلة ، يعني كلية تعتمد على المهارت الفنية وليست المذاكرة والطحن في الحفظ .....لاحظي رد المعيد المحترم الذي زاد اعجابنا به وبكلماته الرنانه...لاحظي التصرف الذكي الأمثل للزملاء...فتبرعوا بقيمته دون ان يعلم ذلك المعيد....وكتبوا كلمة في اطار ماعلمهم ايهم من فن

اذن فذلك النوع من الهدايا العينية يثير الجدل في الوسط التعليمي وله معان كثيرة فنحن في مجنمع يمنع الرشوة والعلاقات غير الشرعية وووو...اذا لما اضع نفسي في موضع شك

ولا ناخد بمبدأ خالف تقرف..قصدي تعرف....زي ماعاوز احد المتداخلين يغير مجتمع على كيفه وهو اللي رافض اساسا نمس تلك المجتمعات الأخرى بأي كلمه تحت مبدأه العلماني الوبائي (أنا حر بس انت مش حر) وبمزاجه كدة يقولك ان دي آفات مجتمعنا في حين هو بجيلنا بافكاره الوبائية الغربية ليبثها سما في مجتمعنا المحترم المحافظ

ياسيدتي التصرف الذكي بيقول كلمات الثناء كافية أن تشعر هذا الدكتور بالاحترام لابناءه وبناته من الطلبة

ثانيا اذا كنت مجبرة على الهدية يبقى تكون في اطار اللي علمهولك...يعني لو بيدرسك مادة هندسية مثلا...يبقى اشتروا له أحدث كتاب بيتكلم عن مادته أو كتاب نادر مثلا واكتبو عالصفحة الأولى إهداء باسم المعلم (وهو في اعظم من الكتاب) ولو يبقى القرآن الكريم في علبة شيك وعليه كارت صغير يكون قليلا وذات دلاله يبقى اعظم واعظم

مش شيكولاته وساعة ومش عارف اية

يارب اكون وصلت ليك الفكره

[مهيب]

الحقيقى يا جيجى أنا مش معاكى فى مسألة ان الجنسية مالهاش علاقة ... أنا مش عاوز أتكلم لغة رمادية و أجامل و خلاص .. لكن طبعا الجنسية ليها علاقة و الدليل ببساطة انك لو كنتى فى مصر و هتقدمى هدية لدكتورك مكنتيش هتسمعى من زميلاتك كل التعليقات دى الا لو كان معيد شاب مثلا (بيدور على عروسة) .. لكن لاختلاف المجتمع أصبح التصرف اللى هو عادى فى مجتمع ما ... غريب و مستهجن فى مجتمع تانى ...

لو الدكتور كان مصرى .. أنا بقولك روحى و قدميله الهدية عادى .. مش هتلاقى أكتر من ابتسامة بسيطة مع كلمة شكر و ترحيب لأنه هياخد الأمر عادى .. أما لو كان سعودى مثلا .. يبقى مش هقدر أقولك رد فعله علشان أنا ماعرفش .. لكن أعتقد ان البنات زميلاتك يعرفوا .. و الدليل كلامهم ...

مسألة ان الموضوع بيعتمد على الشخصية .. ده كلام - واسمحيلى - عام .. الشخصية جزء من تكوينها المجتمع و الثقافة و العادات و المفاهيم ... مثلا .. عادى فى دول الخليج و حتى فى بعض دول الشام ان الست يتقالها (مرة .. أو حرمة) كلمة عادية جدا مفيهاش أى حاجة خالص ولا فيها شبهة اساءة ... لكن خللى واحد يقولها لواحدة مصرية مثلا ... يووووووه .. يبقى كويس لو اكتفت بصفعه على وشه و خلاص ... طيب ماهى نفس الكلمة .. لكن المسألة ليها علاقة بالمجتمع و ثقافته ... مهما اتغيرت الشخصية ... ده اللى بيخلينى مصرى و يخليكى سعودية و يخلى شهد مثلا يمنية ... أنا معاكى ان فى اختلافات مرجعها البيت و التربية و الاخلاق و حتى القراءات .. لكن طبعا المجتمع اللى بيشمل كل المتغيرات دى بيبقى تأثيره أكبر

مثلا عندنا فى الكلية (كلية الهندسة) كان فى تقليد بأن طلبة كل جروب يقدموا للدكتور المشرف على مشروعهم هدية قيمة فى آخر السنة .. نوع من أنواع الفرحة و الاحتفال و كمان اللفتة الظريفة على المجهود اللى بذله (حتى لو مكانش عمل حاجة) .. تقليد الكل بيتبعه ... حتى لو كان الجروب كله من البنات بس أو الأولاد بس أو مختلط .. و حتى لو كان الدكتور راجل أو ست ... عمر مسالة الفهم الغلط دى ما أثيرت من الأصل ... طب ليه أدام كل واحد و شخصيته ؟؟ لأنها ببساطة شيىء عادى جدا فى المجتمع ده ..

فى النهاية أنا شايف انه لو مصرى يبقى اتكلى على الله وقدمى الهدية و غالبا الموضوع لن يعلق بذهن الدكتور لآخر اليوم ... ولا هيقعد يفكر أصل كان قصدها ايه .. آه يبقى بتحبنى ... وكلام من ده ...

مهيب

[الأفوكاتو]

لقد تكلمتم عن هدية الطالب للأستاذ, و لكنى لم أجد من تكلم عن هدية الأستاذ للطالب.

تعودت( طبعا قبل أن أعتزل) أن أعزم طلبتى كل عام إلى مناسبتين إحداهما فى منزلى.

الأولى :

حفل عند إقتراب نهاية العام الدراسى, حيث أدعو كل اساتذة المادة, لكى ينتاقشوا مع الطلبة فى مشاكل دراستهم. أثناء تناول طعام فى حديقة المنزل الخلفية, تتكون من بعض الشواء, والسلطات, التى أعدها بنفسى

و الثانية,

فور إننهاء العام الدراسى, حيث أدعوهم لوليمة مع أعضاء الكلية, لكى نودع طلبتنا, و لنمنحهم بعض الهدايا الرمزية. و عادة ندعوهم لهذه الوليمة فى إحدى صالات الإجتماعيات.و يشارك فيها كل الأساتذة.

قد نتلقى من بعضهم بعض الهدايا الرمزية, و لكن ذلك يكون دائما بعد ظهور نتيجة التخرج و ليس قبلها.

هذه هى التقاليد المتبعة هنا, و جميعنا يلتزم بها.

تحياتى للجميع.

تم تعديل 28 مارس 2006 بواسطة الأفوكاتو

[se_ Elsyed]

تعودت( طبعا قبل أن أعتزل) أن أعزم طلبتى كل عام إلى مناسبتين إحداهما فى منزلى.

إحمد ربنا يا متر إنك لم تدرس لطلبة كلية التجارة جامعة عين شمس ..

إحنا بالصلاتو عالنبي كنا 6000 في الدُفعة الواحدة في الصف الواحد .. يعني كنا عايزين واحد زي حسني مبارك يدرس لنا .. على أساس قصر القُبة يكفينا ونبقى قاعدين على السُفرة واخدين راحتنا يعني وكده ... ويبعت يجيب لنا قلاب فول ومتغرق ببرملين زيت حار وعليه شوال ملح ... وقد 20000 رغيف عيش من أبو 10 صاغ .. و5 قول 7 براميل طُرشي عشان نبلع .. وإنتاج قد فدانين تلاتة جرجير .. على 10 آلاف قُرص طعمية .. على تريلتين بصل أخضر ... على شوالين لمون ... على ألفين جردل شاي سُخن وكل واحد يجيب كوبايته ويعبي من الجردل ... وبعدين مافيش شفاشق ميه هاتكفي الجرمأ ده كله .. ولكن المفروض ساعتها يشربونا بإسلوب الري الآلي .. يعني خرطوم جنينة كبير والجنايني يمكس بزبوز الخرطوم ويعدي على كل 50 شخص برشة واحده .. يشربوا يستحموا كل واحد وضميره .

يادوب الحاجت دي تكفي

وعلى قدر ما كانت تلك الحفلة ستترك اثراً طيباً في نفوس الدُفعة ..

إلا إن أثرها هايبقى وخيم على إقتصاديات مصر ..

ومش بعيد كانوا باعوا لنا فيها " شيكوريل " أو صيدناوي وشملا .. عشان العشوا دي

آه ياني ياما

[الاسكندرنى]

سين سين انت جامد بجد مش هزار :unsure:

[nancy]

شوفى يا جيجي

جيبى الهدية بس خليها شكولاتة وبلاش تكون خاصة اوى يعنى مش من الحاجات الى ممكن هو يحتفظ بيها سنين وقدميهالوا وانت ماشيا

وهو بتهايالى دكتور مصرى لانك هنا فى مصر مش كدة يا جيجي

انا كنت فى الماجستير فى فنون جميلة برضة كنت كل ما ارجع اجازة اجيب هدية للدكتور المشرف والاول يقولى اية دة ملوش لازمة ولاهى اقولة لا ابدا يا دكتور انا افتكرت حضرتك وانا هناك وحسيت انها فيها حاجة منك

وعادى جدا مفيهاش حاجة خالص دة اد بابا مش حيفكر فى حاجة غلط بتوع فنون جميلة دماغهم متفتحة وعندهمش عقد

وصحباتك هما الى ماغهم سودا مش انتى الى على نياتك

هو التعبير عن المشاعرفى الزمن دة لازم يكون مرتبط بان النية وحشة وانك عندك عقدة الكترا وحاجات كدة

اعملى الى يعجبك مدام انت عرفة انك صح والى مش عاجبة يشرب من البحر ياخد القطار وينزل فى سيدى جابر يدى ظهرة للمحطة ويمشى على طوووووول 20 دقيقة يبقى على البحر يشرب ويرجع برحتة

[مصرية الهوى]

جي جي ...اسمعي مني الحدوته دي ...وبلاش تنساقي ورا رغباتك بدون دراية تامة بابعاد الموضوع

انا كنت في فنون جميلة في القاهرة...وكان لي زملاء شباب عاوزين يقدموا هدية لواحد معيد محترم الكل بيحبوا عشان اخلاقة وادبة

لكن المعيد رفض وقال (واجب المعلم ان ينقل الرسالة...ذلك هو واجبه....وليس تطوع منه لمساعدة احد كي يستحق عليه الهدايا...انما قد يستحق كلمات الشكر كون المعلم يستحق الثناء)

اجتمع الافراد فيما بينهم وقرروا التبرع بقيمة الهدية باسمه لاحد الفقراء...واجتمعوا في عمل لوحة رسموا له رسما شخصيا وكتبوا فيه كلمتين تدل على شكرهم لجهوده كمعلم ..وكانت كلمات قليلة بدون تكلف

لاحظي المفارقة....شباب بيقدم لشاب مش لدكتور كمان.....الكلام دة في فنون جميلة ، يعني كلية تعتمد على المهارت الفنية وليست المذاكرة والطحن في الحفظ .....لاحظي رد المعيد المحترم الذي زاد اعجابنا به وبكلماته الرنانه...لاحظي التصرف الذكي الأمثل للزملاء...فتبرعوا بقيمته دون ان يعلم ذلك المعيد....وكتبوا كلمة في اطار ماعلمهم ايهم من فن

اذن فذلك النوع من الهدايا العينية يثير الجدل في الوسط التعليمي وله معان كثيرة فنحن في مجنمع يمنع الرشوة والعلاقات غير الشرعية وووو...اذا لما اضع نفسي في موضع شك

ولا ناخد بمبدأ خالف تقرف..قصدي تعرف....زي ماعاوز احد المتداخلين يغير مجتمع على كيفه وهو اللي رافض اساسا نمس تلك المجتمعات الأخرى بأي كلمه تحت مبدأه العلماني الوبائي (أنا حر بس انت مش حر) وبمزاجه كدة يقولك ان دي آفات مجتمعنا في حين هو بجيلنا بافكاره الوبائية الغربية ليبثها سما في مجتمعنا المحترم المحافظ

ياسيدتي التصرف الذكي بيقول كلمات الثناء كافية أن تشعر هذا الدكتور بالاحترام لابناءه وبناته من الطلبة

ثانيا اذا كنت مجبرة على الهدية يبقى تكون في اطار اللي علمهولك...يعني لو بيدرسك مادة هندسية مثلا...يبقى اشتروا له أحدث كتاب بيتكلم عن مادته أو كتاب نادر مثلا واكتبو عالصفحة الأولى إهداء باسم المعلم (وهو في اعظم من الكتاب) ولو يبقى القرآن الكريم في علبة شيك وعليه كارت صغير يكون قليلا وذات دلاله يبقى اعظم واعظم

مش شيكولاته وساعة ومش عارف اية

يارب اكون وصلت ليك الفكره

معليش يا عمرو .. الفكرة موصلتش اوي ...

يعني هل أنت تؤيد الهدية والا لا ؟؟

مثلا في حكاية المعيد اللي تكلمت عنه .. صحيح هو من حقه يقبل أو يرفض ..

بس انا شايفه في الحالة دي .. انه مفيش اي مبرر لرفض الهدية ..

اللي فهمته انها اخر سنة يعني مفيش مصلحة ويمكن الهدية تعتبر رشوة ..

وبرضه يعني الهدية من شباب مش بنات يعني .. في حالة فكر المعيد انه يمكن البنت دي بتحبه ..

او انه نفسه مش عايز يقبل هدية من بنات ..او انه مش عايز يكون فيه اي كلام على علاقة بينه وبين البنت ..

والرسول صلى الله عليه وسلم قبل الهدية ..

وموضع الشك اللي ممكن احط نفسي فيه ..

صحيح الواحد لازم يبتعد عن مواضع الشك ..

بس في حالتي انا .. أول حاجه ان الهدية هتبقى في اخر السنة .. وخلاص انا مش هاشوف الدكتور بعدها تاني .. يعني مش قصدي رشوة واستمالة قلب عشان يخلي باله مني وهو بيصحح لي مثلا ..

ثاني حاجه انا قلت ان الهدية هأقدمها باسم جروب المشروع كله .. يعني مفيش مجال لاحتمال وجود اي علاقة بيني وبينه شخصيا .. وبرضه زي ما قلت الدكتور بعتبره في مقام والدي بالضبط ..

يعني مش حاسه انه فيه اي مجال لاي شبهه ..

لا انا مش مجبرة ولا حاجه على الهدية بس انا خدتها من باب رد جزء من الجميل ..

صحيح الدكتور مش بيستنى حاجه على العلم اللي بيقدمه لنا وبيشرحه لنا ..

بس برضه هيفرح من جوا ويحس ان حد عبره لو احنا شكرناه بهدية ..

وبرضه ايه الفرق بين الشوكولاته والكتاب ..!!

والا ايه رأيك ؟؟!!

الحقيقى يا جيجى أنا مش معاكى فى مسألة ان الجنسية مالهاش علاقة ... أنا مش عاوز أتكلم لغة رمادية و أجامل و خلاص .. لكن طبعا الجنسية ليها علاقة و الدليل ببساطة انك لو كنتى فى مصر و هتقدمى هدية لدكتورك مكنتيش هتسمعى من زميلاتك كل التعليقات دى الا لو كان معيد شاب مثلا (بيدور على عروسة) .. لكن لاختلاف المجتمع أصبح التصرف اللى هو عادى فى مجتمع ما ... غريب و مستهجن فى مجتمع تانى ...

لو الدكتور كان مصرى .. أنا بقولك روحى و قدميله الهدية عادى .. مش هتلاقى أكتر من ابتسامة بسيطة مع كلمة شكر و ترحيب لأنه هياخد الأمر عادى .. أما لو كان سعودى مثلا .. يبقى مش هقدر أقولك رد فعله علشان أنا ماعرفش .. لكن أعتقد ان البنات زميلاتك يعرفوا .. و الدليل كلامهم ...

مسألة ان الموضوع بيعتمد على الشخصية .. ده كلام - واسمحيلى - عام .. الشخصية جزء من تكوينها المجتمع و الثقافة و العادات و المفاهيم ... مثلا .. عادى فى دول الخليج و حتى فى بعض دول الشام ان الست يتقالها (مرة .. أو حرمة) كلمة عادية جدا مفيهاش أى حاجة خالص ولا فيها شبهة اساءة ... لكن خللى واحد يقولها لواحدة مصرية مثلا ... يووووووه .. يبقى كويس لو اكتفت بصفعه على وشه و خلاص ... طيب ماهى نفس الكلمة .. لكن المسألة ليها علاقة بالمجتمع و ثقافته ... مهما اتغيرت الشخصية ... ده اللى بيخلينى مصرى و يخليكى سعودية و يخلى شهد مثلا يمنية ... أنا معاكى ان فى اختلافات مرجعها البيت و التربية و الاخلاق و حتى القراءات .. لكن طبعا المجتمع اللى بيشمل كل المتغيرات دى بيبقى تأثيره أكبر

مثلا عندنا فى الكلية (كلية الهندسة) كان فى تقليد بأن طلبة كل جروب يقدموا للدكتور المشرف على مشروعهم هدية قيمة فى آخر السنة .. نوع من أنواع الفرحة و الاحتفال و كمان اللفتة الظريفة على المجهود اللى بذله (حتى لو مكانش عمل حاجة) .. تقليد الكل بيتبعه ... حتى لو كان الجروب كله من البنات بس أو الأولاد بس أو مختلط .. و حتى لو كان الدكتور راجل أو ست ... عمر مسالة الفهم الغلط دى ما أثيرت من الأصل ... طب ليه أدام كل واحد و شخصيته ؟؟ لأنها ببساطة شيىء عادى جدا فى المجتمع ده ..

فى النهاية أنا شايف انه لو مصرى يبقى اتكلى على الله وقدمى الهدية و غالبا الموضوع لن يعلق بذهن الدكتور لآخر اليوم ... ولا هيقعد يفكر أصل كان قصدها ايه .. آه يبقى بتحبنى ... وكلام من ده ...

مهيب

يمكن يا مهيب :lol: ..

بس برضه انا مش مقتنعة بحكاية الجنسية دي ..

يعني ان الجنسية لوحدها بس هي اللي هتحدد هو هيقبل والا هيرفض ..

صحيح الشخصية تتأثر بالبيئة والاسرة وثقافة المجتمع ..

بس برضه تتأثر بالتعلم والنضج وجماعات الرفاق ووسائل الاعلام وغيره ....

مش حكاية انه خلاص جنسيته مصرية يعني هيقبل الهدية .. او سعودي هيرفض ..

والحكاية اللي قالها عمرو مثلا اكبر دليل على كده ..

لا يا نانسي انا بادرس هنا في السعودية ..بس الدكتور مصري ..

بس عايزه افهم ليه الكتير معترض على حكاية ان الهدية تكون ساعة مثلا والا اي حاجه تعيش طويل mfb:

على فكره فيه نقطة مخدوتش بالكو اوي منها اغلب البنات اللي عارضوني ..

هم اعترضوا على حكاية اني اقدم الهدية مني انا بس ..

انما عن جروب المشروع كله قالوا شدي حيلك ...بس مش هندفعلك ولا مليم mfb: ..

يعني هأشيل الليلة كلها ..

[وليد صفوت]

ج ج ...

اتكلى على الله و اشترى الهدية اللى نفسك فيها و لفيها فى ورق من ابو ترتر بيلمع -_- و حطيها فى شنطة من شنط الهداية و اديها للدكتور قدام الجروب بتاعك و ماتفكريش فى حاجات تانية اكتر من كده ...

صدقينى اللى بيفكر كتير فى حاجة عمره ما بيعملها فى الآخر ....

و مادمت انتى نيتك كويسة يبقى خلاص الموضوع منتهى و مش محتاج أى نصايح من اى حد ...

بس ابقى قوليلى جبتيله ايه و كان رد فعله ايه عشان انا عاوز اعمل نفس عملتك دى .... و اهمممم حاجة الهدية كلفتك كاااااااااام ؟؟ :wub:

[nancy]

جيجى اعملى الى تشفية صح

بس احنا بنقولك لية بنكلمك على حكاية الجنسية لان فية عادات وتقاليد ومحددات لكل شعب انتى فى السعودية والبلد هنا لسة مش متقبلة التعامل المباشر بين الراجل والست الا فى اماكن محددة زى جدة مثلا

وبعدين انتم بتتكلموا مع الدكتور ازاى الاماكن الى فيها دراسة للبنات بيكون الىبيدرس ست ولو اضطروا يجيبوا راجل دكتور لازم بيكونوا لابسين غطا الوش

يعنى مفيش تعامل مباشر انتم فى الكلية عندك التعامل مباشر ازاى انتم فى انهى مكان فى السعودية بس علشان يبقى عندى معلومة

لانى موجودة فى السعودية فى مكان الاختلاط فية صعب حتى شغلى الحر بيعتبر الى انا بعملة انى واخدة وضعى بالدراع وانى الوحيدة فى البلد الى فى تخصصى

[مصرية الهوى]

ج ج ...

اتكلى على الله و اشترى الهدية اللى نفسك فيها و لفيها فى ورق من ابو ترتر بيلمع :blink: و حطيها فى شنطة من شنط الهداية و اديها للدكتور قدام الجروب بتاعك و ماتفكريش فى حاجات تانية اكتر من كده ...

صدقينى اللى بيفكر كتير فى حاجة عمره ما بيعملها فى الآخر ....

و مادمت انتى نيتك كويسة يبقى خلاص الموضوع منتهى و مش محتاج أى نصايح من اى حد ...

بس ابقى قوليلى جبتيله ايه و كان رد فعله ايه عشان انا عاوز اعمل نفس عملتك دى .... و اهمممم حاجة الهدية كلفتك كاااااااااام ؟؟ :o

ابو ترتر ياوليد :blink:

مش ده انقرض برضه :P

أقولك على موضة تغليف الهدايا اليومين دول ..

تجيب صندوق خشب صوغنن كده .. وتفرشه ورد مجفف وشموع صوغننة ..

بعدين تحط الهدية جواه وتغلفه بقماش اورجانزا :closedeyes:

وحاجات التغليف بتبقى اغلى من الهدية نفسها :D

خلاص ماشي هأبقى اقولك ان شاء الله ..

جيجى اعملى الى تشفية صح

بس احنا بنقولك لية بنكلمك على حكاية الجنسية لان فية عادات وتقاليد ومحددات لكل شعب انتى فى السعودية والبلد هنا لسة مش متقبلة التعامل المباشر بين الراجل والست الا فى اماكن محددة زى جدة مثلا

وبعدين انتم بتتكلموا مع الدكتور ازاى الاماكن الى فيها دراسة للبنات بيكون الىبيدرس ست ولو اضطروا يجيبوا راجل دكتور لازم بيكونوا لابسين غطا الوش

يعنى مفيش تعامل مباشر انتم فى الكلية عندك التعامل مباشر ازاى انتم فى انهى مكان فى السعودية بس علشان يبقى عندى معلومة

لانى موجودة فى السعودية فى مكان الاختلاط فية صعب حتى شغلى الحر بيعتبر الى انا بعملة انى واخدة وضعى بالدراع وانى الوحيدة فى البلد الى فى تخصصى

لا يا نانسي الدكتور بيشرح لنا من دوائر تلفزيونية وبيننا وبينه مايكات عشان نتكلم معاه ..

ولو عوزنا منه حاجه أو عايزين نديه له حاجة .. فيه زي الشباك بيننا وبينه بنكلمه منه ..