جمله سمعتها ولسه بترن في ودانك رغم مرور السنين ؟

[مريوم المصرية]

انت عندك غباء اجتماعي!!!

قالتهالي تيتة مرة كانت زعلانة مني عشان دايقت ماما

طبعا بترن ف وداني جامد .بترقع. لما أحب أثبت عكس النظرية

تم تعديل 9 مارس 2006 بواسطة مريوم المصرية

[nancy]

كان فية كلمة بابا كان بيقولهالى ان الى يقول انا عندى وعندى يبقى معندوش والى يحكى عن بطولاتة كتير يبقى جبان

انا كمان فى وقت من الاوقات كنت بحس انى جزيرة مش بتوصلها مراكب (لاسباب خاصة) موضوع قديم كدة

انما الى نفسى اعمل بيها بجد اعمل لدنياك كانك تعيش ابدا واعمل لاخرتك كانك تموت غدا .. انما انا كسولة جدا

[NoorJehan]

من لم يقبل علي الله بلطائف الاشارات.... سيق اليه بسلاسل الامتحانات

جميله جدا جدا المقوله دى...وأشهد شخصيا على مدى صحتها (يا بوووووى...أمنت وسلمت ليك يا رب)..

وإليكم شئ قرأته على النت أثر فى للغايه حول ميثاق العلاقه الزوجيه الغليظ...مش اللى بنسمعه اليوم عن التساهل فى هد بناء الحياه الزوجيه (بالطبع أستثنى المشاكل الكبيره"الضاره" التى لا مخرج منها إلا بالطلاق)...

ولسه سامعين عن 2 إنفصلوا بعد 40 سنه زواج، اى والله :(

يقال إن الآتى كان بندا من بنود الزواج فى العصر الفرعونى:

(عذرا إن كان خارجا بعض الشئ...ولكن به معانى معنويه أكثر منها حرفيه)

"سأظل في فراشك لو ملأته بالدفء، أو تكورت فيه باردا"

---

أرشح أن ينضم هذا الموضوع لموضوع "قالوا" بسبب تشابه المضمون..

[أبو محمد]

قوله صلوات الله عليه وسلامه : "تبسمك فى وجه أخيك صدقة"

وقوله : " كل معروف صدقة و إن من المعروف أن تلقى أخاك بوجه طلق ...".

وقوله صلى الله عليه وسلم واصفا حسن الخلق : "بسط الوجه و بذل المعروف و كف الأذى"

فالابتسامة تغنيك عن قول جملة طويلة مثل :

أنا أرحب بك .. أنا مسرور لرؤيتك .. مستعد للتفاهم معك .. يهمنى أمرك .. أحترمك .. أحبك .. أتمنى لك الخير ..

بل إنها تفعل أشياء بالنيابة عنك .. فهى تذيب الجليد .. تزيل الحواجز .. تختصر المسافة بينك وبين الناس ..

وهناك حكمة بالانجليزية تقول Smile is a curve that sets things straight

[حدوته مصريه]

بفتكر دايما الايه القرانيه " ومن يتقي الله يجعل له مخرجا ويرزقه من حيث لا يحتسب"

بفتكر دلوقتي وانا في الغربه كلمه قالهالي استاذي في الجامعه لما كنت قرفانه من مصر..مصر دي عامله زي الدوده في قلب الواحد مهما يبعد مسيره يرجعلها

[قهوجى]

كلمة كانت بتقولها لنا ميس بلانش مدرسة الرسم : اللى يتكلم كتير لازم حايغلط كتير !!

يا ريتنى سمعت كلامك يا أبلتى :wub:

[kfaya]

من مأثورات الكلام و الذى ما زال يدوى فى أذانى منذ الطفولة ...

" قوم يا منيل ذاكرلك كلمتين ينفعوك بدل ما تييجى ليلة الأمتحان و تعمل عيشة "

" الناس خبيتنا السبت و الأحد و انت خيبتك مش على حد "

[Sameha]

من مأثورات الكلام و الذى ما زال يدوى فى أذانى منذ الطفولة ...

" قوم يا منيل ذاكرلك كلمتين ينفعوك بدل ما تييجى ليلة الأمتحان و تعمل عيشة "

" الناس خبيتنا السبت و الأحد و انت خيبتك مش على حد "

ده تشجيع لك وإستنفار لمجهودك. نوع من أنواع الإستعارة اللى نحن المتخصصون فى أدب الأطفال على علم به وندرسه وإسمه مدح فى صيغة ذم و تشجيع فى صورة تعنيف. وبعدين ده تهريج و دلع ...

لو عايز صحيح تسمع بعض الجمل التى لا تنسى وما ترتب عليها من أفعال لا تمحى من الذاكرة يبقى خد عندك:

" إفتحى إيدك كويس وإلا حأمدك على رجليكى"

( وغالبا من ألم الضرب ومن صوت الخرزانة فى الهواء كانت إيد الواحد تفلت بحركة لا إرادية أو نتيجة الجهل ببروتوكول فتح الإيد وطبعا دى إهانة ما بعدها إهانة للأبلة أو المدرس من المفعوصة اللى بتنضرب و قلة تربية تستدعى المد على الرجلين)

" عمرى ما شفت بنت أغبى منك "

أو مدرسة فى أول السنة تدخل لفصل سنة سادسة إبتدائى وترسم دونكى على التختة و تقول: " عايزاكم تعتبروا نفسكم زى الدونكى ده لحد آخر السنة ... ده شرف لكم. "

(التختة لأبناء الطبقة الإرستقراطية و أبناء المدينة مش الفلاحين هى السبورة )

دى الحاجات البسيطة ...................

[بنت شعنونة]

كلمة كتبتها في احدى قصصي و فجأة وجدتها واقعية جدا!!

" الناس ما بترحمش حد الدنيا ما رحمتوش.."!

كلمة تعلمتها في اخر 6 سنين..

اللي ما تحتاجش النهاردا ل وشه بكرا تحتاج ل قفاه..

[hopsan]

جمله صغيره قالها لى بحار عجوز فى اول رحله بحريه لى فى حياتى بعدما تخرجت فى الأكادميه البحريه

قال ( اوعى تزعل من البحر او حتى تخلى البحر يزعل منك ) فمهما كبرت او ادركت سأظل محتاج للآخرين و لا اغضب من الآخرين او اسمح للآخرين ان يغضبو منى ....هذا ما ادركته بعدما شاب شعرى لم ادرك معنى ما قاله البحار او اعتقدت ان عنفوان شبابى يغتى عن كثير و لكن اتذكر تلك الجمله على الدوام ...رحمه الله هذا البحار العجوز

[moood]

ادم الصلاة على النبي محمدٍ

فقبولهاحتكاً بدون ترددِ

أعمالنا بين القبول وردها

الا الصلاة على النبي محمدٍ

سبحان الله بحمده سبحان الله العضيمundefined

[elhondos]

والله يا جماعة هيا نصيحة بدأت بيها أول مرحلة فى حياتى وهيا مرحلة التعليم وبيها برضه هبدأ مشوار عمرى كله

كانت نصيحة غالية اوى من مدرس الانجليزى بتاعنا فى المدرسة كنت ايامها فى اول تانية ثانوى فى اول شهر فى الدراسة قالنا يبنى انت وهوا اللى هيتعب السنتين اللى باقيين(تانية وتالنة ثانوى) دول هيرتاح طول عمره ما كدبتش خبر وأول حاجة عملتها بعد ما روحت البيت طلبت من والدى انه ينقلنى مدرسة تانية غير اللى انا فيها لان انا بصراحة كنت بزوغ من المدرسة اللى انا كنت فيها وقليل لما كنت بحضر وكانت الانذارات شغالة على ودنه __شغل عيال بق __المهم حولت مدرسة تانية والحمد لله طلعت الاول على علمى رياضة فى سنة تانية وتالتة وربنا وفقنى ودخلت كلية الهندسة مع انى شفت الويل فى الكلية دى بس الحمد لله ربنا كرمنى وطلعت بتقدير وانا على فكرة لسة خريج السنة اللى فاتت ...المهم

اكتشف ان نصيحة دى كانت أغلى حاجة اتقالت لى فى حياتى وان هيا دى سبب نجاحى بعد توفيق ربنا طبعا وان مهم جدا الواحد يخطط ويحسبها صح من الاول علشان يرتاح بعد كده...

[NoorJehan]

كلمه قالها والدى، ربنا يبارك فى عمره، لما كنت بشتكيله عن صعوبات الحياه وهمومها (وش أمينه رزق)...فبسأله الواحد إزاى يعدى من المواقف دى..فقاللى إن الحياه هتكون مليئه بالإختبارات والتعثرات، الى جانب المواقف الجميله..ولذلك يجب ألا نتوقف أمام الصعب منها..بل :

لازم تركبى مع الموج

وبعد حديث طويل عن الثقه والإستعانه بالله وغيره من النصائح الجميله،

فسألته بيجيب الكلام الجميل ده منين..فقاللى:

الشعر الأبيض ده مجاش من فراغ

:happy:

[احمد هادي]

الـــــرجـــولــــة مـــــــوقــــف

[عبير يونس]

كلُ آتٍ قريبٌ

جملة كان دايما يقولها لي والدي رحمه الله عندما كنت أتعجل الأشياء

[hOuSsAm]

كن جميلا ترى الوجود جميلا

جملة فى قصيدة للشاعر الجميل ايليا ابو ماضى

[شيدوان]

جمله سمعتها كثيرا من جدتى

اجرى يا ابن آدم جرى الوحوش لحد رزقك لم تحوش

والرزق هنا هو كل شئ يسعى اليه الانسان ويتمنى تحقيقه .. المال ..الصحه ..الاولاد..النجاح.. التوفيق..الراحه..السعاده ....الخ

ورغم ان الحكمه تبدو محبطه لانها تقول للانسان انك مهما فعلت لن تحصل الا على ما كتب لك ،الا انها تعطى ايضا بعض الرضا للذين يعتقدون ان ما حصلوا ويحصلون عليه اقل بكثير مما قدموه وكانوا يتوقعون تحقيقه

تحياتى

[Dreamwithme]

Only in dictionary "business" become before "people

فقط في القاموس يأتي العمل قبل الناس.

[hOuSsAm]

Only in dictionary "business" become before "people

فقط في القاموس يأتي العمل قبل الناس.

مش فاهم

[Dreamwithme]

Only in dictionary "business" become before "people

فقط في القاموس يأتي العمل قبل الناس.

مش فاهم

بمعني إن فقط في القاموس تأتي الأولوية للأهتمام بالعمل علي حساب الاهتمام بالناس ومشاعرهم

اللي قاللي الجملة دي كان مديره قالها له لما لقاه مكتئب فأخده علي جنب عشان يطمن عليه

أتمني أكون وضحت المعني