البحث عن عروسه !!

[سيزيف]

اصدقائى الاعزاء

اعتقد ان كثيرا من رواد المنتدى عزاب زى حالاتى

و فى الغالب يبحثون عن عروسه مناسبه للزواج

كما ان المتزوجين منهم من مر بتلك المرحله

مشكله البحث عن عروسه هى مشكله ضخمه - على الاقل فى نظرى -

طبعا الاشخاص المرتبطين عاطفيا سواء من العمل او الدراسه - مع وضع عامل السن فى الاعتبار - او فى ملتقى اجتماعى فهؤلاء لا مشكله بالنسبه لهم

اما المشكله التى اود طرحها عليكم و التى اعانى منها و اعتقد ان كثيرين يعانونها فهى عندما لا تتوافر لك تلك الفرص و يصبح مضطرا للجوء الى ما يطلق عليه اصطلاحا : جواز الصالونات

و تجاربى مع زواج الصالونات محبطه للغايه و بعضها يصلح كمواضيع لافلام كوميديه

و المشكله ان المطلوب منك ان تكون فكره شامله عن انسانه - لاحظ انه مطلوب من ذات الانسانه ان تبدى رايها فيك - فى خلال لقائين او ثلاثه على الاكثر

ترى ما هو الحل ؟

------------

لا يفوتنى ان ابدى اشفاقى على البنات

فان كان الشباب - و هم بيدهم زمام المبادره - يعانون تلك المعاناه فماذا تفعل الفتيات المضطرات الى انتظار الفارس على حصانه الابيض ؟؟

[NoorJehan]

إيه المواضيع دى اللى جايه على الجرح فى المنتدى مؤخرا :excl:

أما بعد..

بعض الأسئله فى الحياه لم أتوصل لإجابه شافيه عنها..

مثلا..أنهوا أسوأ..

أن يقع أتوبيس فى النيل، أم زواج الصالونات؟؟

أن يصاب أحدنا بإنفلونزا الطيور، أم زواج الصالونات؟؟

أن تشتعل الحرب فى المنطقه، أم زواج الصالونات؟؟

بيقولوا إن هى دى أفضل طريقه...بيقولوا :rolleyes:

ربما هى فعلا أفضل طريقه، كما إنها محترمه، ولكن ربما نحن من أفسدناها بالضغط وتدخلات 3/4 أفراد العائله..من الناحيتين :excl: وكما ذكر، أن تقرر موقف مصيرى بعد مقابلتين ;)

ولو إشتكينا, نلام..

"أمال عاوزين نبقى زى الغرب..تسيب وقله حيا" ;)

"منتوا هتتعرفوا على بعض أكتر فى فتره الخطوبه"...

كما أن لم يعد أحدا يطبق حديث الرسول عليه الصلاه والسلام "أسروا الخطبه وأعلنوا النكاح"...حتى تتحقق المعرفه على أصولها وبحريه فالكل يعمل تحت شعار "خلونا نفرح"...

ولو طرف مش مبسوط فى فتره الخطوبه (خاصا فى زمن العجائب هذا)..ندخل فى متاهاااات أخرى...لأن خلاص بيكون عم حسن النجار قص الخشب والعمال بدأوا العمل فى الشقه..وحكايهههه...إضافه على سمعه البنت لو فكت...

مكنا ساكتين أحسن :sad:

وللأسف..مع تدهور الأخلاق..وزياده الإنحلال..ضاعت فى الزحمه بركه الزواج..فأظن ان هذه هى المشكله وليست طريقه التعارف سواء عن صالون أو أنتريه :)

[ريهام]

موضوع جواز الصالونات بقى هو الى ماشي دلوقتى وبقى صعب اننا نعترض عليه وخصوصا البنات لان فى الاغلب اهلها مبيقبلوش وجهة نظرها ورغبتها فى انها تبقى عارفه الانسان دا كويس انا شخصيا اتعرضت لموقف جواز الصالونات دا مرة واحدة وبعدها قررت بينى وبين نفسي انى عمرى ما اتجوز بالاسلوب دا ولا حتى اتعرض للموقف دا بس دا طبعا بينى وبين نفسي يعنى مقدرتش اقول لاهلى .....ياجماعه احنا مش طالبين اننا نبقى زي الغرب لكن دا جواز وعشرة وعمر لازم اكون عارفه الانسان الى هتجوزه دا كويس جدا او على الاقل مكونه فكرة كبيرة عنه لان الانطباعات الاولى بتخدع كتير انا عن نفسي اعلنت الحرب على جواز الصالونات مش عارفه انتو ايه رايكم؟؟؟ :rolleyes: ;) ;) :excl: :excl:

[سيزيف]

بيقولوا إن هى دى أفضل طريقه...بيقولوا  :rolleyes:

ربما هى فعلا أفضل طريقه، كما إنها محترمه، ولكن ربما نحن من أفسدناها بالضغط وتدخلات 3/4 أفراد العائله..من الناحيتين  :excl: وكما ذكر، أن تقرر موقف مصيرى بعد مقابلتين  ;)

ولو إشتكينا, نلام..

"أمال عاوزين نبقى زى الغرب..تسيب وقله حيا"  ;)

"منتوا هتتعرفوا على بعض أكتر فى فتره الخطوبه"...

<{POST_SNAPBACK}>

------------------------

عزيزتى نورجيهان

يسعدنى ان الموضوع جه ع الجرح

فهذا معناه ان الموضوع هام بالفعل بالنسبه للعديد من الاعضاء

اما عن ان جواز الصالونات طريقه محترمه

فهى كذلك - على الاقل من حيث الشكل - حيث ان التعارف يتم فى اطار عائلى

ولكن هذا فى حد ذاته مشكله اخرى

لان العريس بيبقى قاعد تحت الميكرسكوب

اعين كل افراد عائله العروسه تتفحصه بعنايه فى محاوله لفك شفره العريس المرتقب

كل كلمه و كل لفته - وحتى الهديه التى احضرها - جميعا يتم فحصها بعنايه للمحاوله الخروج باكبر قدر ممكن من الانطباعات

اما العريس - و معه غالبا امه او اخته - فهو من ناحيته لابد ان يفحص العروسه جيدا - بقدر الامكان من غير ما اهلها ياخدوا بالهم كما ان المرافق للعريس لابد ان يقوم بوره فى عمليه الفحص

و بعد المقابله الاولى لابد ان يدور الحوار التالى

احد افراد عائله العريس : ها000000000؟

العريس : ها00ايه ؟

- ايه رايك ؟

- الحمد لله

-الحمدلله على كل شىء المهم ايه رايك فى العروسه ؟

- اممممم ربنا يسهل

- يا عم ماهو ان شاء الله ربنا هيسهل بس ايه رايك ؟

- رايى ف ايه ؟

- يعنى هى دى ؟

- مش عارف

- ازاى ؟ انت مش شفتها ؟

- شفتها

- وقعدت معاها ؟

- قعدت

- واتكلمتوا ؟

- على خفيف

- طب امال ايه بقى ؟

- يعنى مفروض اعمل ايه ؟

- المفروض تكون قررت

- نعم ؟ كده خبط لزق ؟

- امال بسلامتك عاوز تقعد سنه على ماتقرر ؟

- لا مش سنه بس احاول اعرفها اكتر قبل ماخد قرار زى الخطوبه

- يا عم انت هتتفلسف ؟ لو مرتاح خلص

- اخلص ؟ هو انا بشترى عربيه ؟

- اااااااااااه 000طب ابقى قابلنى بقى لما تتجوز

--------

وده طبعا مجرد مثال

و ربنا يسترها علينا جميعا و يوفقنا

[سيزيف]

.....ياجماعه احنا مش طالبين اننا نبقى زي الغرب لكن دا جواز وعشرة وعمر لازم اكون عارفه الانسان الى هتجوزه دا كويس جدا او على الاقل مكونه فكرة كبيرة عنه لان الانطباعات الاولى بتخدع كتير انا عن نفسي اعلنت الحرب على جواز الصالونات مش عارفه انتو ايه رايكم؟؟؟ :rolleyes:  ;)  ;)  :excl:  :excl:

<{POST_SNAPBACK}>

-----------------------

عزيزتى ريهام

اتفق معك

و اعتقد ان نفس المعنى قالته صديقتنا نورجيهان

و لكن من فتره ابتديت افتح الباب اما فكره جواز الصالونات

و السبب باختصار

ان ممكن الوسيله اللى ان مش مقتنع بيها تكون السبب فى تعارفى على انسانه كويسه

عشان كده ان عندى ليكى نصيحه

ماتقفليش الباب تماما لان ممكن يتقدملك بالطريقه دى شخص كويس جدا بس ماكنش عنده وسيله تانيه يعرفك بيها

ولا انتى رايك ايه ؟ :sad:

[nancy]

دة انت لو حتجيب عربية بتدرس الموديلات وانهى فية قطع غيار لها ارخص وبتستهلك بنزين اد اية وسهل بيها الحركة فى الشارع وانك تركنها ولا لا وتفكر فى لونها ولو مستعملة بتجيب ميكانيكى يتمنها وتاخد اصحابك وتلف تدور على اى حد عندة نفس النوع وبقالها فترة معاه وتسالة عن عيوبها

تقدر تعمل ربع دة مع عروسة بتتقدم لها مستحيل طبعا

انا اكرة جواز الصالونات لانة بيعتمد على الانطبعات الى غالبا الكسوف والرهبة بتمنعك تحس بيها

انا احب ان الواحد يتخبط فى نصيبة فى شغلة فى تعاملاتة لازم تتعرف البنت علية وهو كمان عن طريق تصرفهم العادى فى الحياة وموقفهم مش قاعدة بيتكلم فيها الكبار وبس

الجواز دة اكبر مشكلة لان اختيار صعب مش دايما تلاقى حد تقدر تفهمة وتديلة حياتك وعمرك كدة بسهولة

ربنا يعين الى بيدور من الشبان والى مستنى م البنات

[khedr]

الجواز قسمه ونصيب

عرفنا بعض قبل الجواز ..معرفناش بعض

برضه قسمه ونصيب

جواز صالونات ..جواز اتوبيسات...جواز سفر

برضه قسمه ونصيب

بنت خالتك ..بنت عمك...بنت الجيران...بنت الشيطان(فيلم قديم)

برضه قسمه ونصيب

اقفل انت ..لأ اقفلي انتي...طيب نعد 1 2 3

برضه قسمه ونصيب

سميحه وصلاح الي الابد.....جواز فؤاده من عتريس

برضه قسمه ونصيب

يتبع (لو فيه قسمه ونصيب )

[tarek_almeghallawy]

أولا لازم تعترف يا شاين إنك اقتبست فكرة الموضوع ده من طريقة علاجي للأرق

وعلى فكرة الطريقة دي مسجلة باسمي في الدوريات العلمية مثل ميكي وسمير وتان تان

عموما انا ها اقدر ظروفك ومش هااطلب تعويض لحقوق الملكية الفكرية

ثانيا الموضوع لا يمكن تعميمه على جميع المجتمعات والمستويات التعليمية والثقافية والاقتصادية بل والدينية

بالنسبة لكم كمسيحيين مصريين فكرتي ان البحث عن عروسة اسهل

لا ادري ان كانت هذه الفكرة خاطئة..عموما نحن نجهل كثيرا ما يدور في دواخل المسيحيين

مثلا اول مرة اعرف ان فيه حاجة اسمها نص اكليل بسبب خناقة حدثت بيني وبين زميل في الجيش على استحقاق كل منا للاجازة وقالي انا عندي نص اكليل

قلت له طب وماله ده بيوجع اوي

وحتى الان لا اعرف ان كانت تعني خطوبة او مثل كتب الكتاب اهي ملزمة ام لا

ولا اعرف هل الطوائف المسيحية كلها تمنع الطلاق

لا اريد ان احول الموضوع الي حوار مسلم مسيحي لكن الكلام جر كلام

بالنسبة للتعارف قبل الجواز

تعارف ايه يا باشوات كل واحد من الاثنين بيكون لابس قناع عسل

طب دا فيه ناس متجوزة من سنين ولسة ميعرفوش بعض

العلاقات الانسانية لا يمكن اخضاعها لقاعدة تعامل واحدة

الامر يحتاج الى الدعاء بالتوفيق

[احمد هادي]

عندكو حل تاني ؟

بدل ما نتقابل في الصالون نتقابل في الانتريه مثلا ؟؟

ونسميه جواز انتريهات

خدوني كمثال

شاب مصري غلبان يعمل في الخليج

تخطي الثلاثين

بينزل مصر مره في السنه

ده لو نزل

وعايز يتجوز

يعمل ايه ؟

يروح يدور علي كافيهات المهندسين ؟

ولا يقف في الاشارات ؟

الحل الوحيد هو الصالونات

او الانتريهات

خصوصا انه لازم يخلص الموضوع من اول الاجازه

عشان يلحق يفتكر شكل العروسه قبل ما يرحل

ويقضيها بعد كده نت وتليفونات

والله كريم

لو حد عنده اي حل تاني او اي فكره تساعد في الخروج من الورطة دي ...

يقوول

[ريهام]

عندكو حل تاني ؟

اعتقد يا استاذ احمد انك مش المفروض بتجوز لمجرد الجواز انت بتجوز عشان دي حياة فيها عشرة وحب وثقه وقدرة على التفاهم مش مجرد انى شفت واحد عجبنى شكله واسلوب كلامه يبقى اتجوزه خصوصا الى وضعهم زي حضرتك بيسافر ....انا معرفش ايه الحل التانى بس احنا ممكن نعمل هنا فى المنتدى جواز منتديات انت تنقى واحدة وتفضل تكلمها لحد ماتنزل اجازة مش فكرة :happy: انا بهزر على فكرة ....مقصدش حاجه بجد انا شايفة ان الجواز فعلا فى النهاية بيبقى قسمة ونصيب ومش كل الى عرفوا بعض قبل الجواز استمرو ومش كل الى معرفوش بعض انفصلو

ازا كان نور الشريف طلق بوسي بعد 35 سنه جواز احنا بقى هنعمل ايه؟؟؟؟؟ :blush:

[NoorJehan]

الجواز قسمه ونصيب

عرفنا بعض قبل الجواز ..معرفناش بعض

برضه قسمه ونصيب

جواز صالونات ..جواز اتوبيسات...جواز سفر

برضه قسمه ونصيب

بنت خالتك ..بنت عمك...بنت الجيران...بنت الشيطان(فيلم قديم)

برضه قسمه ونصيب

اقفل انت ..لأ اقفلي انتي...طيب نعد 1 2 3

برضه قسمه ونصيب

سميحه وصلاح الي الابد.....جواز فؤاده من عتريس

برضه قسمه ونصيب

يتبع (لو فيه قسمه ونصيب )

<{POST_SNAPBACK}>

الأخ خضر،

مداخلتك مريحه للغايه...

والله جبت الخلاصه..

تحياتى

ان ممكن الوسيله اللى ان مش مقتنع بيها تكون السبب فى تعارفى على انسانه كويسه

عشان كده ان عندى ليكى نصيحه

ماتقفليش الباب تماما لان ممكن يتقدملك بالطريقه دى شخص كويس جدا بس ماكنش عنده وسيله تانيه يعرفك بيها

ولا انتى رايك ايه ؟

الله يا شاينر، يعنى هتديها جواز صالونات ولا مش هتديها، إرسالك على بر :blush:

[khedr]

اخوكم بتاع ال...قسمه ونصيب

الجواز... ... ...

مشـــــــــاركه بين انسان وآخر انسان برضه.. ...المشاركه دي حدودها ايه ولحد فين

كلنا سمعنا وشفنا علاقات زوجيه استمرت الي ما شاء الله

وعلاقات زووجيه انتهت قبل ان تبدأ

وعلاقات زوجيه...استمرت لفتره ثم اصابها ما اصابها

المشاركه في الحياه تحتاج الي ..التعاون..التفاهم..الفهم...الاحترام...التقدير

من منا جميعا يستطيع ان يحكم علي كل هذه الاشياء حتي لو كل يوم نام في الصالون او في كنتاكي

مفهوم الزواج ...يجب ان يتغير عند الرجل وعند المرأه(خصوصا هذه الايام)

مفهوم العشره والعلاقه الزوجيه الصالحه يجب ان يُدرس لنا في البيت والمدرسه والجامعه

زواج الافلام والاحلام لا مكان له وسط الحياه ..الواقعيه مطلوبه...

والحب والحنان ...مطلوب ( بس اي حب ..واي حنان )

الزواج .. .. نعمه الاستقرار والامان ...في بيت كله حنان

الزواج.. ..نقمه الفرار ..والهجران... .في بيت كله جنان

[احمد هادي]

:sad:

عندكو حل تاني ؟

اعتقد يا استاذ احمد انك مش المفروض بتجوز لمجرد الجواز انت بتجوز عشان دي حياة فيها عشرة وحب وثقه وقدرة على التفاهم مش مجرد انى شفت واحد عجبنى شكله واسلوب كلامه يبقى اتجوزه خصوصا الى وضعهم زي حضرتك بيسافر ....ازا كان نور الشريف طلق بوسي بعد 35 سنه جواز احنا بقى هنعمل ايه؟؟؟؟؟

<{POST_SNAPBACK}>

يا ريهام العزيزه

معرفش ازاي استنتجتي اني عايز اتجوز عشان مجرد الجواز ؟؟

انا مقلتش ايه حاجة عن السبب في الجواز بالنسبه لي خالص

انا كل كلامي كان عن الطريقة

ع العموم انا عايز اتجوز لسبب اعمق من مجرد الزواج

وهو اني بخاف انام لوحدي في الضلمه :)

وكمان في سبب تاني اعمق

وهو ان المطعم اللبناني اللي جنب بيتي رفع تمن الوجبه من 25 درهم ل30

وانتي عارفه الواحد في غربه والتوفير واجب B) :P :D

ثم ....انا احلي بكتير من نور الشريف :D :D

تم تعديل 26 فبراير 2006 بواسطة احمد هادي

[ريهام]

:sad: معاك حق يااستاذ احمد النوم فى الضلمة بيخوف جدا .....اما بقى عن الوجبة الغالية فربنا يعينك ......

ويارب تقابل بنت الحلال بسرعه جدا قبل الوجبة ماتوصل 40 درهم ربنا يوفقك :)

[احمد هادي]

برضه يا ريهام مجاوبتيش علي سؤالي

والمره دي بتكلم جد والله مش هزار

ايه في كلامي الاولاني اداكي الانطباع الخاطئ ده عني ؟

انا مقتنع بكل كلمه قولتيها عن علاقة الزواج وانها لابد ان تقوم علي اسس سليمه بداية من الاختيار الي الاستقرار

والشكل والمناظر مفيش اسهل منها

انما الشخصيه هي دي اللي مش سهل تلاقيها

يعني احنا مش مختلفين

منين بقي اعتقدتي اني تفكيري في الشكل فقط لا غير ؟

[khedr]

هو لسه بيتنطط

صوره لكائن بعد الزواج

[مصرية الهوى]

والله يا شاينر .. موضوع الزواج ..

او قرار الزواج .. اعقد واصعب واتعب قرار يمكن الواحد يتخذه في حياته ..

يعني الواحد يتعب فعلا في محاولة اتخاذ مثل هذا القرار ..

هل البني ادم اللي قدامي هيبقى جوزي فعلا ؟

يعني يشاركني حياتي وعمري وفرحي وحزني .. وهيبقى نصي التاني وتوأم روحي وكله كله ..

هل ينفع لحاجة زي كده ؟؟ .. او هل هو الانسان المناسب ؟؟

هل هنقدر نتفاهم ونعيش سعداء ..

الحكاية مش حكاية سنة والا اتنين .. ده عمر بحاله .. واسرة وبيت وعيال ومسئولية ..

القرار متعب فعلا فعلا .. وبينكد على الواحد عيشته .. والنفسية بتتعب اوي :P ..

بس انا حاسه .. مش عارفه ليه ..

فكرة الجواز او موضوع الجواز متعب للبنت اكثر من الولد ..

الشاب حتى لو بقى عنده ستين سنة وهو متجوزش .. محدش يقدر يقوله حاجه ..

صحيح بيزنوا فوق دماغه بس اقل من الزن فوق دماغ البنت ..

انما البنت .. ياساتر .. من كلام الناس .. دول ميصدقوش يبقى عندها 10 سنين .. عشان يبدوا يتكلموا .. هي مش راضية تتجوز ليه ..

انتي بتتشرطي .. انتي عايزه واحد تفصيل على شروطك بالضبط ..

انتي مش عارفه ايه .. ومن كتر خطابها بارت .. وانا لما كنت قدك كان عندي عشرين عيل .. وانا اتجوزت وعندي مش عارفه كم ... وما الى ذلك ..

بس فعلا الموضوع ده .. شاغلني ومتعبني ومزفت نفسيتي وخاصة اليومين دول ..

مش عارفه بصراحة حاسه اني مش قادرة اتخذ قرار زي ده .. او يمكن اكون خايفة اتسرع في اتخاذ قرار زي ده ..

وكمان يعني نفسي اعرف ايه الشروط اللي ممكن الواحد يتنازل عنها .. وايه الشروط اللي تعتبر اساسيات .. بجد نفسي اسمع رايكم في الموضوع ده !!

مثلا: انا السن مهم عندي جدا .. عايزه واحد اكبر مني اقل حاجه 4 سنين وممكن نمشيها 3 والماكسيمم 8 سنين .. ويمكن نمشيها 10 - ولو انها كتير اوي - لو كان واحد يستاهل فعلا ..

انا حاسه انو عنصر السن ده مهم جدا بالنسبالي .. مرة واحد اتقدملي اكبر مني بيجي 12سنة :D .. ورفضته لاني حاسه انه مش ممكن يبقى بيني وبينه اي توافق .. وخصوصا انه واحد عاقل وجاد .. حاسه انه كل شويا هيقولي اعقلي .. انت كبرتي خلاص.. انتي مش عارفه ايه .. مع ان ماما كانت مصممة عليه عشان هو قريبها بس ..

وعلى النقيض تماما :o اخر واحد اتقدملي اكبر مني بكذا شهر بس ..

بذمتكم ده اعمل فيه ايه .. نلعب عروس وعروسة والا نتفرج على سبيس تون :D .. حاسه ان خبرتي وخبرته في الحياة وحده .. مفيش فرق يعني ..

والنهارده كنتي باحكي لصاحبتي على الموضوع ده .. وشخطت فيا بجد .. وطب وماله لما يكون اكبر منك بكم شهر .. قلتلها : انتي بتتكلمي جد .. بس انا لو اتجوزته هأحسه انه فيه حاجه ناقصاني .. قالتلي: انت اللي معقدة وشروطك غريبة .. خبطتها بالكراسة وسيبتها ومشيت !!

ورجعت من الكلية متنكدة فعلا فعلا .. عايزه اهرب .. عايزه اسافر المريخ .. مش عايزه اشوف ولا بني ادم .. واختي زودت نكدي بعريس تاني !!!!!!!!!!!!!

هل فعلا انا غلطانة ومعقدة B) ؟؟!!!!

انا مش واخده موقف سلبي من الزواج .. بالعكس الحمد لله اغلب الزواجات اللي في محيطي ناجحة .. بس انا حاسه اني مش قادرة اخذ موقف زي ده .. يعني ببقى خايفة ومترددة .. مع انه في كل اللي اتقدموا مجرد ما يقولوا فلان .. مبحسش براحة ابدا .. بالعكس بحس بقلق وتوتر.. وكل اللي متجوزين بيقولولي ان كل اللي ارتبطنا فيهم ارتحنالهم من اول نظرة .. هل فعلا ده اللي بيحصل والا تخاريف ؟؟!!!

وكمان محدش ييجي في باله اني بتشرط شبه توم كروز وعنده عربية اخر موديل وفيلا وشاليه ومهر 100 الف وشبكة 50 الف وووو ...

انا مش طالبه ياربي الا انسان طيب ومحترم يحبني واحبه ويفهمني وافهمه ..

بجد يا جماعة انا عايزه نتناقش في الشروط .. اللي ممكن الواحد يتنازل عنها والشروط اللي تعتبر اساسيات ..!!!!!!

تم تعديل 26 فبراير 2006 بواسطة مصرية الهوى

[سيزيف]

اصدقائى الاعزاء

اسف لانقطاعى عنكم لدواعى العمل

وان كان الظاهر انه محدش خد باله :D

دة انت لو حتجيب عربية بتدرس الموديلات وانهى فية قطع غيار لها ارخص وبتستهلك بنزين اد اية وسهل بيها الحركة فى الشارع وانك تركنها ولا لا وتفكر فى لونها  ولو مستعملة بتجيب ميكانيكى يتمنها وتاخد اصحابك وتلف تدور على اى حد عندة نفس النوع وبقالها فترة معاه وتسالة عن عيوبها

تقدر تعمل ربع دة مع عروسة بتتقدم لها مستحيل طبعا

انا اكرة جواز الصالونات لانة بيعتمد على الانطبعات الى غالبا الكسوف والرهبة  بتمنعك تحس بيها

انا احب ان الواحد يتخبط فى نصيبة فى شغلة فى تعاملاتة لازم تتعرف البنت علية وهو كمان عن طريق تصرفهم العادى فى الحياة وموقفهم مش قاعدة بيتكلم فيها الكبار وبس

الجواز دة اكبر مشكلة لان اختيار صعب مش دايما تلاقى حد تقدر تفهمة وتديلة حياتك وعمرك كدة بسهولة

ربنا يعين الى بيدور من الشبان والى مستنى م البنات

<{POST_SNAPBACK}>

-------------

عزيزتى نانسى

اولا مرحبا بك فى المحاورات و نورتى المنتدى

ثانيا - انا متفق معاكى فى ان جواز الصالونات بيعتمد على الانطباعات و انه غالبا لا يعطى صوره صادقه عن الطرفين

ولكن

ممكن ان جواز الصالونات يكون مدخل لعلاقه ناجحه

مجرد مدخل

بس ده محتاج طرفين على درجه عاليه من النضج يبصوا للطريقه دى على انها مجرد وسيله تعارف

و انا شخصيا اعرف جوازات ناجحه ابتدت بالصالونات

وبعدين على فكره

جواز الصالونات ماهوش بدعه مصريه خالصه

ف امريكا مثلا فيه حاجه اسمها موعد اعمى blind date

وهو باختصار ان اتنين مايعرفوش بعض بيتقابلوا سواء عن طريق النت او اصدقاء مشتركين - مع مراعاه طبعا فروق التقاليد بينا و بينهم

لكن على الاقل المبدا موجود

[سيزيف]

أولا لازم تعترف يا شاين إنك اقتبست فكرة الموضوع ده من طريقة علاجي للأرق

وعلى فكرة الطريقة دي مسجلة باسمي في الدوريات العلمية مثل ميكي وسمير وتان تان

عموما انا ها اقدر ظروفك ومش هااطلب تعويض لحقوق الملكية الفكرية

ثانيا الموضوع لا يمكن تعميمه على جميع المجتمعات والمستويات التعليمية والثقافية والاقتصادية بل والدينية

بالنسبة لكم كمسيحيين مصريين فكرتي ان البحث عن عروسة اسهل

تعارف ايه يا باشوات كل واحد من الاثنين بيكون لابس قناع عسل

طب دا فيه ناس متجوزة من سنين ولسة ميعرفوش بعض

العلاقات الانسانية لا يمكن اخضاعها لقاعدة تعامل واحدة

الامر يحتاج الى الدعاء بالتوفيق

<{POST_SNAPBACK}>

----------------------

عزيزى طارق

اولا اقر و اعترف ان مشاركتك موضوع الارق كانت دافعا لى فى اثاره هذا الموضوع - مبسوط يا سيدى ؟ :D

ثانيا - اسمح لى اختلف معك فيما ذهبت اليه

اما عن اختلاف موضوع الزواج بالنسبه للمستوى الثقافى و التعليمى و الاجتماعى فانا افترض انه بطرح هذا الموضوع فى المنتدى فقد طرحته على شريحه متقاربه ثقافيا و تعليميا

اما عن اختلاف الدين فصدقنى ان نظام الزواج هو نظام اجتماعى بالدرجه الاولى و ليس نظام دينى بمعنى انه اذا استبعدت الطقوس الدينيه فستجد ان زواج المسلمين و المسيحيين شيئا واحدا

اما ما اثرته بشان الطلاق و الفرق بين المسيحيه و الاسلام فى ان الاولى لم تجيز الطلاق الا لعله الزنا فهذا لا يمنع اتفاقهما على ان الاصل فى الزواج التابيد و الطلاق هو الاستثناء بغض النظر عن كونه اوسع نطاقا فى الاسلام

و ما يعنينى بالدرجه الاولى هو مناقشه الزواج - او بمعنى ادق المرحله السابقه على الزواج و هى الاختيار - كنظام اجتماعى و هذا شىء انا اعلم - من خلال كثير من اصدقائى المسلمين - انه لا يختلف فيه مسلم و مسيحى فكلنا فى النهايه مصريون و عاداتنا و تقاليدنا الاجتماعيه واحده

و انا اقصد بالعادات طريقه الاختيار و معاييره و ليس التفاصيل الفرعيه كالمهر و الشبكه وما الى ذلك

ملحوظه : نص اكليل يعنى خطوبه

عقبال عندك و عندنا :)

[سيزيف]

شاب مصري غلبان يعمل في الخليج

تخطي الثلاثين

بينزل مصر مره في السنه

ده لو نزل

وعايز يتجوز

يعمل ايه ؟

يروح يدور علي كافيهات المهندسين ؟

ولا يقف في الاشارات ؟

الحل الوحيد هو الصالونات

او الانتريهات

خصوصا انه لازم يخلص الموضوع من اول الاجازه

<{POST_SNAPBACK}>

--------------------

عزيزى احمد هادى

قلبى معاك

اذا كان احنا اللى عايشين ف مصر طالع عينينا امال الطيور المهاجره اللى زى حالاتك تعمل ايه ؟

عموما

ربنا يوفقك و حاول تركز فى الاجازات

و على فكره استمرار اتصالك بخطيبتك ع النت او التليفونات اهو على الاقل برضه نوع من التواصل