لاجل النبى خلينا نعيش بلا جبن

[nemr111]

الجبن انواع نوع مصنوع من الحليب زى بتاع الدنمارك اللى جاب لها عيل صايع الكافية .. و عمل لها مشاكل مع العالم الاسلامي .. ماهو اصل الولد النيلة يوقع امه فى الرزيلة و ماشاء الله عليهم بلدهم كلها بلاوى

أما الجبن اللى احنا عايزين نتكلم عنه هو الجبن اللى مصنوع فى قصور المخابرات و مقار أمن الدولة و اتصرف لنا بالبطاقات و فضل معشش في قلوبنا و عقولنا .. لحد ما دماغنا ها ينفجر و يتدلدل بره

بلاش نتعاطى (الجبن) ده ..و ممكن نضرب لنا طقمين (مش ) ساكتين ..لأن الموقف بقى كله ملوحة و عفانه و ريحتها ضاربة من رشيد لأسوان و حتى لو اضطرينا نأكل البصل حاف و لازم ( نصن ) شويه