عن المرور أتحدث

[عصام]

إمبارح وانا مروح متأخر حوالى الساعة 3 الفجر .. وكان معايا المدام ..

ماشى على المحور البديل داخل 6 أكتوبر (المدينة بها طريقين رئيسيين متوازيين بطول المدينة ..)

الطريق مظلم نظرا لتعطل أنواره..

وانا ماشى شمال على 80 تقريبا ..

باتكلم مع المدام فى شئون الحياة ..

الطريق طالع .. يعنى نهايته غير ظاهرة ناهيك عن الظلام ..

ومن بعيد لمحت قدامى (أنا على الشمال) .. نور أبيض .. وإشارة شمال برضه ..

قلت أكيد واحد هايلف اليو تيرن ويرجع .. بس البلاستيك الأحمر على الفوانيس الخلفية مكسور ..

واستمريت زى ما انا على إنى آخد يمين خفيف .. أتخطاه يعنى ..

والمفاجأة ..

دا مش نور خلفى .. :lol: دا نور أمامى .. والراجل جاى فى وشى .. وبسرعة جدا

والإشارة اللى انا شوفتها فى عربيته دى إشارة يمين .. يعنى هو بيقول للى جاى فى وشه أنا ماشى جنب الجزيرة اللى فى النص .. :angry2:

أنا استوعبت المفاجأة وربنا ستر

مراتى بقى .. جالها هلاوس سمعية وبصرية ورقعت بالصوت B) .. ولا زالت تعانى من اضرابات نفسية .. لأن المسافة بينى وبينه وصلت لأقل من 10 أمتار mfb:

وش فى وش ..

ولما ضربت كلاكس طوييييييييييل مصحوب بشتيمة معروفة (بالكلاكس برضه :P )

رد عليا بالكلاكس .. بشتيمة أبشع mfb:

وربنا ستر

B)

[إبن مصر]

ايييييييييييييييييييييييييييييييييه دنيا كنا فين وبقينا فين..

ما دام الحديث من الحبيب عصام .. ومن كل من له علاقه ولو من بعيد بطريق اكتوبر فورميلا وان...

يبقى لابد من كشف المستور..

طيب ايه رأيكم دام فضلكم فى الى يمشى على المحور معاكسسسسسسسسسسسسسسسسسسسسسسسسسسسسسس....

ومن غير نور؟؟؟؟؟؟

وعلى 120؟؟؟؟؟؟

الساعه 10 بالليل فى الشتا؟؟؟؟؟؟؟

هذا ما حدث معى الشتاء الماضى وانا عائد من العمل وكنت اعترف انى ماشى بسرعه ( عصام عارف أعوووووووووووووووو)

وخير الله ام جعله خير بعد كشك المرور وعند المطب الى على اليمين..فاكره يا عصام باتفادى المطب لاقيت قدامى ازاز عربيه وواحد وواحده فى العربيه وهو متبت فى الدركسيون فى وضع الصدمه ( عرفه يا صاصا طبعا .. الذراعين رقم 11) وانا وش فى وش سعاتك.......قووووووووووووووم انا ربنا هدانى الم شمال بسرعه والى يحصل يحصل..

ربنا ستر بس الى جاى ورايا ..

شتمنى انا....

اه والله شتمنى انا...

ربنا يسامحه..

وككل مره ركنت على اليمين وشغلت الانتظار وولعت سجاره اشربها فى هدوء حتى استعيد اعصابى.... الحمد لله..

[عصام]

كنت نسيت الموضوع دا ..

والحقيقة اللى فكرنى بيه حاجتين ..

أول حاجة مداخلة سى السيد دى:

يعني الكارثة دي مات فيها 11 .. رحمهم الله جميعاً ونحسبهم شهداء ... والدنيا هاتتقلب طبعاً كام يوم كده .. اما من يومين لما اتوبيس محمل ناس راجعه بلدها يا عيني بعد العيد ورايحين بني سويف ويصطدم بعنف في حيوان مجرم يستحق الإعدام وهو سائق عربية نقل وقف عربيته في نصف الطريق السريع عشان شاف إتنين سواقين نقل زمايلة عربياتهم عطلانه ونزل يساعدهم وولا همه وولا في دماغه .. فجه الاتوبيس ودخل في العربية من الخلف وإتدمر ومات أكثر من 12 شخص ده غير الناس اللي مش نافعه تاني .... ساعتها ممكن نعدي على الخبر وكأن شيء لم يكن وهاتروح الحادثة في طي النسيان وسلم لي على قانون المرور وعلى دوريات المرور ...

تانى حاجة بقى اللى حصل لى امبارح ..

باختصار نزلت من الطريق الدائرى منزل المريوطية اتجاه المعادى - الهرم وفجأة تجمد الطريق تماما ...

أى نعم هو على طول زحمة بس المرة دى تجمد .. لدرجة انى بدأت افك بقى وارحرح فى العربية ... خصوصا ان لسا مشوارى يوميا لحد مدينة 6 أكتوبر ..

المهم وبعد مرور أكتر من ساعتين تقريبا فقدت فيهم كل أعصابى من البطء ..

وصلت النفق اللى تحت شارع الهرم ..

واتضح انه هو أساس المشكلة ..

لأن واحد .. بلغ بيه الجبروت وانعدام الفكر مع كثير جدا من البلطجة وقلة الأدب .. قرر يدخل النفق عكس الاتجاه :blush2:

تخيلوا؟

نفق .. عكس الاتجاه .. علما بإن النفق حارتين فقط ..

قوم ربنا يبعت له سواق نص نقل اعمى .. جابله عاليها واطيها ..

قوم الطريق وقف .. وطبعا كل البدل البيضا اللى ظهرت أول أيام قانون المرور الجديد .. فى بيوتها قدام التليفزيون ..

ما حد يا جدعان يقول لنا سكة كندا منين :ninja:

[لولا]

كنت نسيت الموضوع دا ..

والحقيقة اللى فكرنى بيه حاجتين ..

أول حاجة مداخلة سى السيد دى:

يعني الكارثة دي مات فيها 11 .. رحمهم الله جميعاً ونحسبهم شهداء ... والدنيا هاتتقلب طبعاً كام يوم كده .. اما من يومين لما اتوبيس محمل ناس راجعه بلدها يا عيني بعد العيد ورايحين بني سويف ويصطدم بعنف في حيوان مجرم يستحق الإعدام وهو سائق عربية نقل وقف عربيته في نصف الطريق السريع عشان شاف إتنين سواقين نقل زمايلة عربياتهم عطلانه ونزل يساعدهم وولا همه وولا في دماغه .. فجه الاتوبيس ودخل في العربية من الخلف وإتدمر ومات أكثر من 12 شخص ده غير الناس اللي مش نافعه تاني .... ساعتها ممكن نعدي على الخبر وكأن شيء لم يكن وهاتروح الحادثة في طي النسيان وسلم لي على قانون المرور وعلى دوريات المرور ...

تانى حاجة بقى اللى حصل لى امبارح ..

باختصار نزلت من الطريق الدائرى منزل المريوطية اتجاه المعادى - الهرم وفجأة تجمد الطريق تماما ...

أى نعم هو على طول زحمة بس المرة دى تجمد .. لدرجة انى بدأت افك بقى وارحرح فى العربية ... خصوصا ان لسا مشوارى يوميا لحد مدينة 6 أكتوبر ..

المهم وبعد مرور أكتر من ساعتين تقريبا فقدت فيهم كل أعصابى من البطء ..

وصلت النفق اللى تحت شارع الهرم ..

واتضح انه هو أساس المشكلة ..

لأن واحد .. بلغ بيه الجبروت وانعدام الفكر مع كثير جدا من البلطجة وقلة الأدب .. قرر يدخل النفق عكس الاتجاه :blush2:

تخيلوا؟

نفق .. عكس الاتجاه .. علما بإن النفق حارتين فقط ..

قوم ربنا يبعت له سواق نص نقل اعمى .. جابله عاليها واطيها ..

قوم الطريق وقف .. وطبعا كل البدل البيضا اللى ظهرت أول أيام قانون المرور الجديد .. فى بيوتها قدام التليفزيون ..

ما حد يا جدعان يقول لنا سكة كندا منين :sad:

ايييييييييييييييييييييييييييييييييييه.. الدراما دى عايزلها شعبان عبد الرحيم

يرد عليها غناء بطريقته :ninja:

وحسبى الله ونعم الوكيل .. دائما تختلف الأحداث والسبب واحد ..مفيش تنظيم

مفيش قانون..مفيش حكومه.

عشوائية فى كل شيئ.

طريق كندا على فكره بعد الكوبرى الدائرى وانت نازل خد يمين wst::

[وليد أهلاوى مصراوى]

الإشارات بقى والانتظار

إ

لما سألت أحد العالمين ببواطن الأمور .. قالى "تدى إشارة؟ .. فى مصر؟ .. إنت اتجننت؟ لا طبعا غلط الصح انك تعمل عبيط .. وهووووووووووووب فجأة وبدون مقدمات تقوم حادف ولو انت راجل محترم يعنى هاتبص فى المراية قبلها" :blush2:

الأشاره فى مصر معناها أنك كشفت نواياك للأعداء :ninja:

[se_ Elsyed]

صحيح .. عدوك ابن كارك .. وما يجيلكش المهموز الا من مُشرف زيك

واقول واسجل هذا لإني كنت ناوي اكتب ارهاصة جديدة من ارهاصاتي واسميها " انا مش مسرور من قانون المرور " وادون فيها ملاحظاتي المرورية السين سينية

بس ولو .. انا هاعمل العملية .. ومنعم هايغني يا عصام ... منعم هايغني

بس لحد ما اخلص .. خد الحتة دي

بعد اسبوعين من تطبيق المرور الحلو الجديد نيوز زي ما بنقول .. وكانت تاني او اول مرة اركب فيها تاكس في الاجازة وكانت الساعة 3 بالليل .. وكنا طالعين كوبري ... آه والله كوبري ... وإذ بي اجد رتل - حلوه رتل دي ؟ - رتل من اتوبيسات النقل العام جاي من الاتجاه المعاكس واحنا طالعين في طريقنا الصحيح .. فطبعاً صرخت بعلو صوتي وقولت " يا لهوتي ياما " .. تخيل سواق التاكس استغرب وقال لي : في ايه يا بيه ؟ فقلت : مانتاش شايف ؟ .. دي الباصات يا عمو جايه في الاوبيزت واي يا اونكل ؟ فقال لي وهو يهدء من روعي : لا تستغرب يا بني تراي تو كالم داون .. الحاجات دي بالليل عادي يا بيه وهي دي القاعدة لإن الليل ستار وكلام الليل مدهون بزبدة بلدي وتصبح على خير

[الباشمهندس ياسر]

معلش ممكن اقول حاجة واحدة بس

بعد اذن عمو عصام

طب انا بسوق من بدرى

تخيل بقى انى عمرى ما عملت حاجة ضد السواقة وضد السيفتى

و اعرف ناس كتير زيى بالظبط

و نفسى يجى اليوم اللى كلنا نرجع زى زماااااااااااان

و محدش يقولى قل للزمان ارجع يا زمان

لانى عايش على شوية الامل اللى فاضلين دول

[أحمد سيف]

والله يا جماعة بعد عدة تجارب في المنتدى الواحد بقى خايف ينتقد أي أوضاع خاطئة في مصر ... أحسن يتهم بعدم الوطنية والخيانة وكراهية مصر وأنه من دعاة التغريب وتبع عمو بوش وبيستقوي بالخارج وعاوز يغير هوية مصر وانتماءها الحضاري ... الى آخر هذه الاسطوانة المشروخة

علشان كده أنا نصيحتي لكل واحد عايش في مصر ... زي دايما ما أدعياء الوطنية و اخوانا الحمشين بيقولوا

Love it or leave it

سلام

[se_ Elsyed]

والله يا جماعة بعد عدة تجارب في المنتدى الواحد بقى خايف ينتقد أي أوضاع خاطئة في مصر ... أحسن يتهم بعدم الوطنية والخيانة وكراهية مصر وأنه من دعاة التغريب وتبع عمو بوش وبيستقوي بالخارج وعاوز يغير هوية مصر وانتماءها الحضاري ... الى آخر هذه الاسطوانة المشروخة

علشان كده أنا نصيحتي لكل واحد عايش في مصر ... زي دايما ما أدعياء الوطنية و اخوانا الحمشين بيقولوا

Love it or leave it

سلام

بالعكس يا ريس .. ده احنا بننتقد عشان نصلح ... او عى الأقل نبدأ بنفسنا ... او بمعنى أخر love it and start by yourself

لإني لو عملنا كده حسب مانت قلت love it or leave it يبقى مين اللي هايصلح ؟ وسواء سبتها وهاجرت بره أو سبتها زي ما هي معجونة كده وخلتنني في حالي جوه ... يبقى برضوا مين اللي هايصلح ...

[abdulmuttaleb]

مرحبا بكم جميعا

موضوع رائع ولي ملاحظة على إدارة المحاورات أن تعيد تقسيم فروع هذا المنتدى الرائع

يعني موضوع رائع عن المرور في موضوعات خفيفة، رغم أنه يمكن أن يوضع ضمن قسم المنتدى العام أو الحوارات الجادة وكثرة وتشعب الأقسام يشتت الزائر ويقلل من الاستفادة،

أفكر جديا في عمل موضوع مستقل بهذا المقترح لأني أعتقد أن هذا المنتدى الجميل يمكن تلخيصه في 8أقسام بدلا من الدوخة في أكثر من 35قسم:

القسم الأول: قضايا المغتربين العامة

القسم الثاني: قضايا البنية الأساسية المصرية (اقتصاد، الإعلام، التعليم، الأمن، المرور، العمل، القانون)

القسم الثالث: قضايا دينية واجتماعية وطبية

القسم الرابع: قضايا الأسرة والطفل

القسم الخامس: السياسة المحلية والدولية والتاريخية

القسم السادس:قضايا الهجرة إلى كندا

القسم السابع:قضايا الشعر والأدب والفن والرياضة

القسم الثامن:عالم الكمبيوتر والانترنت والبرامج

نرجع لموضوعنا،

وأود التطرق لجزئية من يعودون للخلف في طريق سريع لأنه فاتهم منزل كوبري أو مخرج فرعي، وهي ظاهرة أولا مميتة، ثانية منتشرة، أنا أدعوكم (وإن كنت لم أجرب بعد) أن تفرغوا من وقتكم ربع ساعة، بحيث وأنتم سائرون إذا رأيتم من يرجع للخلف بهذا الشكل نفعل معه الآتي:

1)نضحي بقليل من الوقت ونغير اتجاهنا للحاق به.

2)نحاذيه بالسيارة.

3)إذا كانت هنالك إمكانية لتوجيه النصح شفاهة له باعتبار أنك تخاف على حياته وتخشى عليه من عواقب هذا الفعل كي يعود لأهله سالما فبها ونعمت.

4)إذا لم يتيسر فيمكن طباعة ورقة A4 تتضمن أخطار هذا الفعل وعواقبه وتلقى إليه أو إلى الجالس بجواره.

*نقطة هامة جدا حيث إنني خرجت قبل بضعة أشهر من حادثة على كورنيش الإسكندرية والحمد لله كانت بسيطة على كل الأطراف (ولعلي أخصص موضوعا لأحداثها وتعاملي مع المرور):

إياكم والسرعة فإنها أم المهلكات بحقّ.

أنا معي سيارة يابانية 2007م والسيارات الحديثة مشكلتها أنها تشجعك على إطلاق العنان للسرعة.

صدقوني، هنالك قاعدتان في قيادة السيارات وخصوصا في مصر لو اتبعهما أي سائق فسيدعو لي وسينعم براحة البال:

1)لا تسرع، داخل المدينة أقصى سرعة 60-70 على الكورنيش أما داخل الشوارع فـالقصوى 30-40كم/س.

2)اترك مسافة الأمان بينك وبين من أمامك وإياك إياك من التلاصق على الطرق السريعة مهما كان نظرك قويا ومهاراتك عالية.

3)كن حذرا عن القيادة في الصباح الباكر وبعد منتصف الليل فهنا يكثر السير المعاكس والانفلات في السرعة

4)إذا كنت تسير على طريق لأول مرة فإذا كان داخليا فلا تتجاوز 60كم أبدا، وإذا كان صحراويا أو سريعا فلا تتجاوز 80كم/ساعة أبدا مهما كانت الظروف والأحوال.

الحمد لله فأنا منذ الحادثة ملتزم بهذا الأمر، وقبل بضعة أيام سافرت عبر الصحراوي وألزمت نفسي بذلك وكنت مستريحا حتى على المستوى النفسي

أخطر ما في مصر أثناء القيادة من وجهة نظري:

1)الحفر والمطبات ومعظمها بدون إشارة أو تنبيه مسبق

2)قطع الرصيف البارزة (وبعضها كفيل بقلب السيارات المسرعة ووالله كم رأيت على كورنيش الإسكندرية من مآسي بروز قطعة من الجزيرة الوسطى للكورنيش فإذا كان هذا في الإسكندرية على الكورنيش فما بالكم بالطرق الجانبية والفرعية؟).

3)التوقف والدوران العشوائي والمعاكس للسيارات

4)العبور العشوائي للمارة

حفظكم الله جميعا في حلكم وترحالكم وشكرا للأستاذ عصام على موضوعه الشيق،

تم تعديل 17 أكتوبر 2008 بواسطة abdulmuttaleb

[عصام]

إمبارح فى طريقى للشغل

حدث وبدون قصد إنى خبطت مراية عربية جنبى بمراية عربيتى

الحمد لله ربنا سلم وما حصلش حاجة غير إن مرايتى اتقفلت ومرايته اتفتحت

فتحت الزجاج الأيمن عشان أعتذر له فوجئت بصوت عالى جدا لدرجة انه مش سامعنى وفاهم انى باتخانق معاه

إستمر سيل الزعيق والتهليل وتعليم أصول القيادة بدون توقف لمدة حوالى خمس دقايق متواصلة بينما أنا باشاور له وباحاول أسمعه "أنا آسف" دون جدوى

فى النهاية لما سكت قلت له بصوت عالى جدا "أنا كنت باحاول أعتذر لك .. أناااااا آآآآآآسف"

بص لى باحتقار ومشى

:lol:

[محمد عيسى]

كنت جاي من جنب الشيراتون فوق النفق و داخل شمال على شارع التحرير و انا في الدوران و قبل ما ادخل شارع التحرير عدت ادامي فجأه عربيه قطعت الطريق كانت جايه من اتجاه العجوزة و مكمل في اتجاه قسم الدقي .. قمت فرملت فجأه و كان ورايا تاكسي خبطني .. نزلت علشان الحق اعربيه اللي قطعت الطريق فجأه متصورا انه هايقف و يعتذر .. لكنه جري بسرعه .. و لقيت بعدها سواق التاكسي اللي ورايا يبزعق .. قلتله انت شايفني كلمتك؟؟ انا بسوق من زمان قوي و عارف انك مش غلطان و العربية اللي عدت بالعرض هي الغلطانه .. لكن لو عايز تتخانق اهو القسم ادامك و انت عارف قاعدة اللي خبط من ورا هو الغلطان فاحترم نفسك و امشي و انت ساكت الدنيا مش ناقصاك

انا بطلت اروح الاسكندرية بالعربية .. باروح بالقطر و اقضيها تاكسيات هناك .. علشان ما افسدش استمتاعي بالاجازة .. و ده درس ما اتعلمتوش بالساهل

[الترجمـان]

موضوع في الجون بجد وو بيسجل هذه الفتره العصيبة " البهيميه " عن احوال المرور المصريه ... :rolleyes:

الأخ عصام اكتفى بالحديث عن قصص الأكشن التي تحدث بين السائقين في الطريق كل يوم تقريبا ...لكنه لم يتحدث عن المشاه الذين يشتركون مع أصحاب السيارات في صنع هذه الملحمة اليومية المرورية في الشارع المصري ...

يعني على سبيل المثال

1- الستات لما تيجي تعدي الشارع ..

بجد حاجه غريبه جدا وصورة تكاد تكون كربونيه , بتكون هيه نظرة واحده فقط لا غير تتعطف بها العابره للشارع وبعد كدا ماتشوف غير ضهرها ...

ومش مشكله بقى لو بتعدي الطريق بشكل عمودي أو زاوية تخطيها للشارع 45 ْ ماتفرقش ياعني حضرتك لازم تهدي أو حتى تقف في وسط الشارع مادام ست الكل بتعدي ... وماتفتكرش أنها ممكن تبص لحضرتك وتحاول تساعدك وتراعي ظروفك وتستعجل خطواتها وهيه بتعدي ...أبدا

2- القراءة للجميع حتى وحضرتك بتعدي الشارع ..

من الطرائف اللي بنشوفها برضه من الإخوة اللي بيعبروا الطريق تلاقي واحد معدي ومطلبتش معاه القراءه إللا وهوه بيعدي طالما أنه في اللحظه اللي نوى فيها أنه يعدي كان خير الله مجعله خير الشارع فاضي .. مش مشكله بقى إن السيارات مصدقت الإشاره فتحت وجايه من آخر الشارع وبسرعه عاليه و الأخ " Mr. BEAN " مش واخد باله برضه ويقف في وسط الشارع ويحني ضهره علشان يلم الورقه اللي وقعت منه في وهو مندمج في القراءة ...

3- ساعة العبور تتوه العقول ...

مش عارف أيه مزاج الناس في تعدية الشارع أول لما الإشاره تفتح وتأذن بتحرك المركبات ...؟؟! وتلاقي تحدي رهيب ياعني لو واحد وعدى ساعتها نقول ماشي لكن إن كتيبه من الناس تعدي في تلك اللحظه وعسكري المرور واقف لا بيهش ولا بينش طيب ليه ...

ليه العربية لما تيجي تقطع الإشاره بتتخالف طيب الناس اللي بتعدي والإشاره مفتوحه ... دي ماتتخالفش ليه ...؟؟

وتستمر الرحله :lol:

تم تعديل 17 مارس 2009 بواسطة الترجمـان

[عصام]

من كام يوم وأثناء قيادتى السيارة على المحور باتجاه ميدان لبنان (بالمناسبة رفعوا حد السرعة القصوى على الطريق من 80 إلى 90 ك/س بعد التجديدات)

لفت نظرى عربية قديمة (بولونيز تقريبا)

اللى لفت نظرى فيها كان سرعتها بالنسبة لموديلها

إتفاجئت بحاجة غريبة جدا

بينما كانت تلك السيارة تنطلق بسرعة حوالى 90 ك/س

كان السائق الملتحى واضعا المصحف على الدركسيون ومستمر فى قراءة القرآن

راقبته لمسافة حوالى 5 كيلومترات

ومازال مستمرا فى الانطلاق بسرعة 90 إلى 100 ك / س

ومستمر أيضا فى القراءة

صورته فيديو

وربما أضع لكم الرابط هنا حالما أجد الملف

:rolleyes:

[محمد عيسى]

كنت بوصل احد اقاربي الى المطار و كان الوقت الضهر و الشوارع الرئيسية المؤدية للمطار زحمة و بطيئة فقعدت اختصر من الشوار الجانبية لتوفير الوقت، و بعد مروري من احد التقاطعات مباشرة العربيه اللي علي شمالي هدت جامد .. ما انتبعتش لكده لاننا كنا لسه طالعين من اشاره و الواحد ابتدا ياخد سرعته و كمان قدامه تريلا، مره واحده و بدون و بدون اي اشارات وقف و فتح الباب الجانبي اللي ناحيتي و نزل واحد من العربيه و الباب خبط في الرفرف الشمال عندي .. بقوله بقى حد يقف في نص الطريق و ينزل زباين و بدون اي اشارات حتى!!! يقوللي احمد ربنا انك ما خبطتش الراجل و ما حصلتلكش مشكله !!! رديت عليه انت اللي تحمد ربنا انني مستعجل اروح المطار و إلا كنت وريتك شغلك و دفعتك تمن عربيتي كلها لو عايز

[محمد عيسى]

و استطرادا لموضوع الحوادث

مره خدشت ميكروباس تويوتا خدشه خفيف و وقفنا .. اعتذرتله و قلتله انا غلطان و شوف التكاليف هادفعهالك .. قام طلب مني حوالي سبع اضعاف القيميه الحقيقية .. وريته انني فاهم ايه اللي هايتعمل و تكاليفه لان عربيتي ياباني برضه (نيسان) و بالعافيه خد ضعف اللي يستحقه

و ده اتكرر تاني مع تاكسي خبطه و طالب باضعاف تكاليف التصليح .. قلتله مالكش عندي حاجه و المبلغ اللي شايفه مناسب للصيانه هاتبرع بيه لجامع .. ساعتها ابتدا يتحايل و قبل المبلغ

موضوع النية و مراعاة ربنا مهمة جدا في الموضوع ده .. مره كنت رايح شغلي الصبح و ماشي في اجد الشوارع الرئيسية ذات الاتجاه الواحد في الحاره الشمال (كالمعتاد ) مره واحده تاكسي وقف و نزل زبون - في الحاره الشمال محدش يستغرب هنا القاهرة - و بعد كده ابتدا الطريق يتحرك وراه و ابتدا الواحد سرعته و فجاه يطلعلي تاكسي من شارع جانبي و بوشه كله منغير ما يهدي حتى و قام مطيرلي الرفرف القدام شمال و المرايه و العربيه وقفت خالص و شكلها بقى يخض .. جالنا امين شرطه مرور كان في المكان و اديناله الرخص .. و سألته مين الغلطان ؟ قاللي التاكسي و ده قادم السواق علشان ميتكلمش و قلت للسواق ايه رايك؟ قاللي اللي تشوفه دي مش عربيتي و لسه صاحب العربيه حايبهدلني و انا كمان اتضريت جامد .. بصراحه صعب عليا و قلت كفايه عليه مصيبته في عربيته و قلتله ربنا يسهللك و جبت الرخص من الامين و قلتله احنا اتصالحنا خلاص .. و سبحان الله العربيه اتلمت بمبلغ تافه جدا مقارنه بحالتها ساعة الحادثه و ده من توفيق ربنا (ميكانيكي ابن حلال جه الوكاله جاب مقص و اكس و اشتريت فانوس رخيص و المرايه كانت بايظه اصلا فمش محسوبه و السمكره و الدوكو كانوا بأرخص الأسعار و الحمد لله)

بالمناسبه امين الشرطه لما شافني باتكلم في الموبايل سالني انت بتكلم حد؟ (يقصد ضابط معرفة مثلا) قلتله العمليه مش مستاهلة ما الراجل مؤدب اهه انا بس كنت باكلم شغلي اعرفهم انني هاتاخر

[MoTo]

مش هقولك إنت جيت عالجرح إلي أخر الكليشيهات اللي في المواقف دي

بس فيه كلام انا حاسس إن انا اللي كاتبه .. و الحقيقة انا بتعرض لمواقف و انا سايق

بتجعلني أفكر إن ربنا بيعاقبني بسبب ذنب انا عملته و العياذ بالله !! بس واضح إن ده العادي

أكتر حاجة بتجنني موضوع الإشارات ..يعني الموضوع as simple as إنك لو عايز تخش يمين .. تدي إشارة يمين .. عايز تخش شمال تدي إشارة شمال .. أظن مفيش جمال بعد كدة !

إيه بقي اللي بيجنن الناس أول ما تشوف الإشارة !!؟؟

يعني إنهاردة فوق كوبري 15 مايو ماشي علي شمال عربية سوزوكي النقل الصغيرة دي و الطريق ماشي ببطء شدييييد .. و الراجل كان سايب مسافة كبيرة قدامه و بيعد فلوس أصلاَ .. و كان ممكن جداَ أقوم داخل شمال علي طول .. بس لسبب ما بحب أعمل الصح و أدي إشارة .. متفهمش إيه لسع الراجل بمجرد ما حركت ذراع الإشارة .. لقيته في المرايا إتنفض كدة و قام مكلبش في الكلاكس و كابس عليا و إيده عالكلاكس ! انا بقي بتنرفز جداَ من البلطجة و قلة الأدب قلت هزنق انا كمان .. و قمت زانقه و معدي .. و شايفه في المرايا بيقول للي جنبه "إيه الواد ده !!!" .. يا عم منا مديك إشارة .. أعمل إيه تاني .. أبعتلك مندوب بيتكلم بالنيابة عني يقولك بعد إذن جنابك هعدي!! ثم منتا كنت ماشي بالراحة أصلاَ و ورايا من أول الكوبري .. إيه اللي حصلك و حولك فجأة !!

ده غير إن علي مطلع الكوبري (مطلع 15 من الكورنيش و إنت جي من التحرير ) .. المطلع ده علي شكل دائرة 360 درجة .. انا كنت طالع علي أخر قطر الدائرة و شايف المطلع واقف .. مع إن و انا جي كان الكوبري ماشي و شايفه من بعيد ماشي فوق! اتاري المطلع بس اللي واقف .. ليه ؟ أصل ميكروباص راجع من أخر الدائرة بضهره .. و بيبص من الإزاز بمنتهي القرف للناس .. وسعووووا .. إبعدددد !!! وسعععععع !!!! ولا أكن الناس اللي جاية عكس !!

ناهيك بقي عن مواقف إن مرة كنت ماشي جنب لودر في ميدان جهينة و السواق نام و طلع فوق الرصيف شال عواميد النور و واحد منهم انا شفت وقوعه فوقي بالتصوير البطئ و الله و عديت منه بفرق مللي مترات !

ده غير إن السرعة القانونية مبتعجبش حد .. يعني انا عالمحور بمشي في تاني حارة من اليمين علي 90! علي إعتبار إني بطئ!! ماشي علي أقصي سرعة محددة للطريق و واخد يميني و سايب لهواة الجنان باقي الطريق .. و تلاقي الناس بتقلبلي نور بجنون !!! و يعدوني من اليمين .. و ساعات تبقي الساعة 4 الفجر و المحور فاضي و يطير من يميني برضه مع إن شمالي متاح و الله !

بص انا رأيي إن المصريين مبيعرفوش يسوقوا عربيات .. المصريين بيعرفوا يحركوا العربيات .. و من خلال العناية الإلهية بيوصلوا أحياناَ للأماكن اللي رايحنها .. إنما جرب تقنع واحد إن التخطي من اليمين غلط أو إن الغرز و الكلام ده قلة أدب و إن الإشارة ضرورية سواء في الإنعطاف أو التوقف .. هيحسسك إنك كائن فضائي .

و الأحوال المرورية في البلد تكاد تكون في أول 3 أسباب بتخليني أفكر في الهجرة .. لأن مجرد إنك عايز تروح من مكان بقي عناء ! من الأشكال اللي بتشوفها و تتعامل معاها .. و مفيش ركنة .. و لو فيه تلاقي العربية إتخبطت بعد ما ترجع أو عليها فن مسماري و أشكال زخرفية .. ده إلي جانب إني فقدت ناس كتير علي أسفلت البلد دي و أختي كادت تفقد مننا في حادث سيارة برضه .. دي مش سواقة بني أدمين .. و لو حصل حاجة مبتعرفش تجيب حقك .. من الأخر .. الموضوع ده ملوش حل لأن دي أخلاقيات الناس .. صفر .. الناس مش متربية و مش واعية هنعملها إيه !! مختلف العربيات بأسعارها بفئاتها .. اللي سايقنها صعب تطلق عليهم بني أدمين .

مجرد التفكير في الموضوع بيعصب !!

[عصام]

مجرد التفكير في الموضوع بيعصب !!

أوجزت فأعجزت :sad:

[ابو محمود]

العزيز عصام

تحية طيبة ... كلامك ينفع يكون حلقات اذاعية لتعريف الناس مدى ما حل بنا من همجية مرورية

انا كنت فى نفس المأذق وبعد تفكير وتمحيص وعلاج نفسى وصلت الى حل جميل جدآ

انتقلت الى مسكن يبعد عن العمل بحوالى 20 دقيقة او اكثر مشى وياسلام على الحياة بقت جميلة

لا خناقات

ولا نرفزة وبقت الحياة بمبى يا صديقى وسلملى على قانون المرور المصرى بس الموضوع محتاج انك تختار آى باركينج تركن او تسيب عربيتك فية وياسلام لو عيل ولا بنت من ولادك هو اللى يسوق تبقى كدة ضربت كل العصافير لما تروح مشوار وتقعد فى الصالون وتقرأ جرنال وتريح الجمجمة

[الباشمهندس ياسر]

امبارح كنت بليييين العربية ( التلييييين هو تمهيد للموتور بعد العمرة ) و خدت الميكانيكى معايا و طلعت على طريق اسماعيلية

و بعد ما رجعت و دخلت القاهرة تانى و خلاص هنروح ... افأجا بميكروباص قافل الشارع بالعرض .. ليه

البيه عايز يلف و جه من اقصى اليمين لاقصى الشمال بالعرض عشان يلف

طبعا انا فوجئت و رحت خابط فرامل بعزم ما عندى و وقف قبل منه بنص متر تقريبا

و بدون ما اشعر رحت مطلع دماغى من الشباك و رحت شاتمه بعلو صوتى ... باعتذر للناس الركيكة ..

و السواق اكتفى بان نظر لى شذرا .. حلوه شذرا دى ...

كان نفسى طبعا يعمل اى اكشن عشان اعمله ف وشه ري اكشن ملوش حل