ألفاظ تولد ... و تموت

[هادي]

قديمه مين ياعم

ابو عمر بس يمكن مزارش دولة الاسكندرية من فترة .. عشان لسه باسبوره اخضر من اللي عاملين زي جرنال الوفد ..

لكن احنا ..

بعون الله

بنخش اسكندرية كل سنة

ومحدش بيكح معانا (برضه مش عارف بيحك ايه لزمتها)

باسبور ازرق ياعزيزي :wub:

والحمد لله .. لسه بصحتنا وبنتكلم اهوه

يابرنس دي مش قديمة

دي جديده طحن

أو يمكن متججده ف المانيا

والعمرة النضيفة بترجع العربية عروسة

الله يرحمك ياجدي :mellow:

كان باشا

بس شغال ميكانيكي للتواضع بس

كان يقول

سامع صوب الوابور ده

(يقصد الموتور)

اضحك من اللغة

كان لما يسألني عن أجازة الصيف

يقول لي : إيه يا فندي .. اخدتوا المسامحه وا لالسه ؟

أهي دي كلمات ماتت

بس عاشت في قلوبنا .. زي ماعاش كل الطيبين

[الرافعي]

آخر حاجة سخنة بنار الحلاق مش الفرن (أصلي كنت باحلق من يومين)

أي موضوع يحكي عنه الشباب دلوقتي يقولوا عنه "حـــــوار"

إيه رأيك يا عبده في الحــوار ده ..... سمعت يا عاتشف الحوار ده ؟؟؟

الظاهر الناس اتأثرت ببرنامج حالة حمار

تم تعديل 13 ديسمبر 2005 بواسطة حلاوة العنتبلي

[وائل ثابت عبد الرحمن]

السلام عليكم

الموضوع تريف جدا

فى كمان

أستنى سيكا = أنتظر قليلا

واد سونح = شاب وسيم

كليلة = الكلية

[الاسكندرنى]

احم احم و انا اقول مين بيجيب فى سيرتى بس

طيب كويس انى عرفت و بل المرة كده اقولكم على كام كلمه جديدة تنفعكم و انتوا تازلين مصر

صبح صبح يا عم الحاج من فلم بوحه لمحمد سعد

الهشكه يعنى البنت

الحبرشه يعنى المهم

اتك على الصبر يعنى اصبر يا اخى

كوكو سيجارة كليوبترا

شقيقى صاحبى

[وائل ثابت عبد الرحمن]

السلام عليكم

ايه تريف دى ...... اسمها طريف

لمؤخذة غلطة مطبخية ( مطبعية )

فى كمان

نكروز = نزهة بالسيارة ( تعريب cruise )

[sleeping]

ايه النظام - بقت دلوقت: ايه النيز

إنجز

البنت زمان كانت بتقول مش عارفة - دلوقت بتقول مش عارف

واد سِو - يعني واد مخلص

فـ السكرتة - يعني في السر (من secret)

<{POST_SNAPBACK}>

و في برضوه كلو في الخلاط يعني اي كلام يعني في الكلتش

[shawshank]

مفيش جديد في القاموس العصري الروش ؟

[Alshiekh]

الحقيقة دى أول مرة اشوف الموضوع ده النهاردة

وعلى فكرة فى مصطلح شفته هنا كام مرة ولا زلت لاأفهم معناه

إفتكاسات

يعنى ايه؟

[se_ Elsyed]

إفتكاسات

يعنى ايه؟

يعني إختراع مالوش أساس

[The Professor]

ساقني قدري ان اشهد فيلم اسمه " سيد العاتفي" ( انا متعمد اكتبها كده... ) ومن ضمن مشاهد الفيلم وقف هذا السيد يشرح للشباب خبراته ويغدق عليهم من تجاربه " العاتفية" هو وزميل له.

ومن النصائح التي اهداها للشباب النصيحة دي : حب البنت تكرفك - اكرف البنت تحبك " مش عارف انا سمعتها كويس ولا لأ .... بس تقريبا هي كده

يعني إيه " تكرفك " دي ولو انا سمعتها غلط حد يصلحها لي .

[Modest]

يعني إيه " تكرفك " دي ولو انا سمعتها غلط حد يصلحها لي .

"تكرفك" يعني "تدلقك" أو "تحلق لك" :lol:

سمعت مصطلح جديد بيقول "ما تلعبش في عداد عمرك :lol: "

و المعنى واضح :lol:

[The Professor]

افادكم الله يا مستر Modest .. نورت المحكمة ولكن االقاموس العصري ( ما أقصدش قاموس إلياس طبعا ) مليان كلمات عجيبة وغريبة تحلقللك - تدلقك - تنفضلك ...... ماشاء الله ثراء لغوي فاحش .... بس معلهش اصل انا فهمي تقيل شوية ايه " ماتلعبش في عداد عمرك؟ "

[Modest]

افادكم الله يا مستر Modest .. نورت المحكمة ولكن االقاموس العصري ( ما أقصدش قاموس إلياس طبعا ) مليان كلمات عجيبة وغريبة تحلقللك - تدلقك - تنفضلك ...... ماشاء الله ثراء لغوي فاحش .... بس معلهش اصل انا فهمي تقيل شوية ايه " ماتلعبش في عداد عمرك؟ "

"ما تلعبش في عداد عمرك".. على ما أعتقد إنها ترمي إلى التهديد بالقتل نتيجة للاستفزاز :rolleyes:

و بها تشبيه بعداد الكيلومتر في العربيات .. يعني لو عداد عمرك آخرُه 80 و انت استفزيت هذا الشخص ، تبقى كده بتلعب في عداد عمرك و هاتخليه يوقفهولك.

و الأعمار بيد الله.

[DARWEEN]

بعد إذنك يا موديست

تكرفك ممكن تيجي بمعنى تكبك أو تدلقك

[يحى الشاعر]

كان عندنا فى بورسعيد بعض المصطلحات التى كنا نستعملهم فى حياتنا اليومية (مقتطفين من الأيطاليةأو اليونانية أو الأنجليزية والفرنسية) مثلا

اليسطه وتعنى ... مـــســـتعد ... أو ... كله تمام

إستابينه ونعنى .... كويس أو مضيوط

الأهــم من ذلك ، أننا نستعمل فى مصر والبلدان العربية كلمة فلافل .... وكنا نجد خلال الأربعينيات

الكلمتين مع بعض ( طعمية فــلافل)

يرجع الأصل الى الأربعينيات عندما كان بهض الأنجليز يجربون الطعمية ويطلبوها FLUFFY مش مكبوسة

وكان الأجانب يشترون الطعمية فلافى وبالتالى أصبحت ... فلافل

لوكوماديس أى لقمة القاضى وهى يونانية

وكلمة إسبتالية أو إستبالية وتعنى المستشفى Hospital

المساجيرى (ركاب السفن) Passenger

الــكوبانية ( وبقصد بها شركة قناة السويس الفرنسية فقط ) Company

كوبوراتبف (بقصد به الجمعية التعاونية من شركة وبهد ذلك هيئة قناة السويس) co-operative

أورنــــه (أعتقد المدينة الوحيدة فى مصر التى تستعملها تعبيرا عن الناصبة ونحن مشهورين بذلك ) Corner

فارماشية (الصيدلية) Pharmacy

وغيره الكثير

يحى الشاعر

تم تعديل 7 مارس 2007 بواسطة يحى الشاعر

[رمضان]

طيب ومأنتخ ومستكنيس ودول سمعتهم من المدعوة هالة بنت سرحان

[memo2007]

أيه الجمال ده... أيه الحلاوة ده ...أيه الطعامه دى

بجد قاموس لذيذ خاااااااااالص ماااااااااالص

وجميل جدا .........وأسهل طبعا

دلوقتى بأه لو شفت البنتين لما بيجوا يتكلمو مع بعض تحس إنهم أولاد

"ازيك عامل أيه لأ بجد وحشنا ياراجل كل ده مانشوفكش تؤتؤتؤ حرااااااااااااااااااااااام"

هو ده طريقه الكلام "الاستايل يعنى "

وبعدين انا كنت فاكرة بوب دى تتقال للريس يعنى رايس الشله أورئيس عصابه مش للأب

بصو انا هاجى فى مرة اقول لبابا يابوب وأشوفوا هايعمل أيه "أكيد هايجرى ورايا "

[The Professor]

فيه افتكر كلمات مثل اوسطة وهي ايطالية تعني رئيس العمل - او المعلم - بكسر الميم و كذلك مورستان وهي من اصل عربي وتعني البيمارستان ( المشفى او المستشفى) و كلمة مسقعة من كلمة موساكا اليونانية وهي نفس الطبق بجميع مكوناته

[masraweya]

السلام عليكم

بعد ما قريت الموضوع ده فهمت ليه صاحباتي (و أحيانا قرايبيّ!) كانوا بيقولولي "إنتي متأكدة انك متربية في مصر!؟

و حيث ان الموضوع آخر تحديث له من 3 سنين و نص .. يبقى كدة أنا معدتش متأخرة كتير

تحياتي