يوميات سنكوح

[هشام عبد الوهاب]

بعد التحيه والسلام ،،اعرفكم بنفسى

اسمى سنوسى وبشتغل فى السجل المدنى بتاع الزمالك و ساكن فى حاره فى بولاق

اسمها حارة الغلابه

جيت م الصعيد الجوانى من المنيا من بلد اسمها سمالوط ،،كفر المساكين

طبعا مش متجوز ،،لأنى مش لاقى اكل ،،وطول النهار الف فى الشوارع ،،هواية والفاضى يعمل قاضى ،، ولما القشيه تبقى معدن ـ باقعد على قهوة السناكيح فى بولاق

علشان كده زمايلى واصحابى سمونى سنكوح اهو منه شبه سنوسى ومنه علشان باتسنكح واقعد على قهوة السناكيح

شغلتى هايفه واى واحد يقدر يعملها ،،استلم الورق واشوف ايه اللى ناقص فيه وبعدين اديه للمراجع وهو كمان شغلته تافهه وسهله واقدر اعملها بسهوله انما حظ بقى

مرتبى ،،،، اخخخخ ولا بلاش فضايح احسن على العموم انتم مش غرب يعنى حوالى 200 جنيه ،،، استنوا لسه ،، ده غير تفتيح المخ

اوعوا تفهمونى غلط يعنى سيجاره من مواطن على خمسايه بقشيش يوم ماتتمعظم

واهو ماشيه بالسنكحه

بادفع م المرتب 30جنيه ايجار الاوضه

والاكل والشرب الحمد لله فول على كشرى وفى العيد باديها لحمة راس وفته

المهم انى باشوف حاجات عجب العجاب فى السجل واعجب منها فى القهوه واعجب واعجب فى الشارع وقت السنكحه وطبعا هاحكيلكم عليها وتقولولى رأيكم ايه حاكم انا احب الكلام مع الناس الحلوه

مره وانا فى السجل جالى بيه محترم ولابس بدله انما قيمه قوى تطلعلها كده يجى ب400 جنيه ولابس كرافته اخر حلاوه مدندشه ع الاخر واول مادخل جالى على طول مانا كنت لسه جاى واول ماشوفته قولت اترسم عليه لحسن يفتكرنى هافأ

اول ما وصل للشباك قالى سلاموا عليكم ،ردينا السلام وبقلاطه قولتله

ثانيه واحده يا باشا ،، ام مطلع سيجاره افرنجى وعزم على ،، طبعا انا ماصدقت باين كنا اخر الشهر والسنكحه ع الاخر قلتله من يد مانعدمها ،، أأمر

قاللى عاوز اعمل بطاقه بدل فاقد ايه المطلوب ،، طبعا قعدت ارصله اللازم

ام مميل عليا قوى وقالى انت اسمك ايه ،، قولتله سنوسى ،، قام مميل اكتر وقالى

شوف ياسنوسى انت باين عليك ابن حلال وامك داعيالك ،، بقى البيه بتاعنا بطاقته ضاعت وعاوزين نعمله بطاقه جديده فيها اسم الزوجه والمهنه

قمت انا قلتله وماله ياباشا انت والباشا على راسنا ،،فين البطاقه القديمه

قاللى مافيش ،،، ماشى طيب اسم الباشا ايه عشان اجيب الدوسيه

راح مقرب عليا قوى وقاللى ،، مش هتلاقى الدوسيه لانه اصلا من اسكندريه

لسه هافتى ام مكمل : ماتقاطعنيش واسمعنى كويس

انا هاديلك البيانات وانت تعمل البطاقه واللى تطلبه هاتخده

يا داهيه دقى طب اعمل ايه واروح فين د باين عليهم ناس جامده قوى ،، ايوه ابعتله لاسماعين افندى المراجع واخلص

بص يابيه احسن حاجه تروح للأستاذ اسماعين وهو هايخلصهالك

ام باصصلى وكانه هايبلعنى وقال :اعدى عليك امتى يا سنوسى علشان استلمها وليك 500جنيه لما تخلص وابتدا يكتب البيانات وانا نزل عليا سهم الله وخرست واخدت الورقه وبقى مفتوح ومش عارف ارد والراجل مشى ،، المهم لقيت تحت الورقه ورقه تانيه بخمسين جنيه

تقريبا اغمى عليا ،،، يانهار اسود اعمل ايه دلوقتى واتصرف ازاى ،، يا دي النصيبه السوده

قمت اروح دورة الميه وانا راجع اتفتح الباب بتاع سيادة العميد اللى فى السجل وهوب باضرب عينى لقيت البيه اللى كان معايا خارج من عنده وسيادة العميد بيقوله

ابقى سلملنا ع الباشا وماتنساش توصيه علينا

يانهار مش فايت ،، اعمل ايه دى اتنيلت اكتر

ايه رأيكم يا حضرات اعمل ايه

[ragab2]

قصة

حقيقية وواقعية وفيها بساطة انسان مطحون وتتكرر كل يوم

ولها مدلولان

أما السجل كله شوربة بما فيه البيه العميد

أو كمين من جهة رقابية لسنكوح بمعرفة العميد

Edited By ragab2 on Sep. 15 2002 03:54am

[freefreer]

قصة مؤلمة .. و الخيارات المتاحة كلها .. أكثر ايلاما ..

انما ايه المواهب الرهيبة دى يا هش .. جبتها منين .. ؟؟؟

[Byte]

الاخ هشام:

فعلا اسلوبك القصصي رائع

واتمني ان ينتهي الموضوع عند اعجابي باسلوبك وطلبي بزيادة مداخلاتك كمحاور

وان لا اجد ان هذه القصة واقعية ولها علاقة بالمحامي والطبيب والقطن والشاش اللي كنت عايزهم من يومين :lookaround:

[amir]

الاخ هشام

الاسلوب رائع وبسيط و قريب من القلب....عايزين الباقى

[متسائل]

إيه ده يا عم إتش؟

كنت مخبي المواهب دي فين..

لا لا لا لا لا ... إنت لازم تكتب لنا قصص مختبفة عن شخصيات مختلفة.. أسلوبك رائع.. إيه الحلاوة دي؟

أنا فعلاً أريد أن أسمع المزيد.

أما فيما يخص الفكرة:

شوف يا سنوسي.. إنت تعمل اللي يمليه عليك ضميرك.. و غير كده لا تخف... لو العميد يستطيع أو يجرؤ أن يفعل ذلك لفعل أو أمرك مباشرة.. لكن الواقع أن إما لا يعرف أو أنه يلقي بالمسئولية بعيداً..

إسمع يا سنوسي.. كلما علت المناصب كلما كان الخوف عليها أكثر. خش فيهم شمال إعملهم فضيحة.. و بلغ عنهم مفتش الداخلية  :D

[أسد]

أنصحك ياسنوسي انك تبلغ عن الموضوع ده

أما سنكوح .. فأقول له .. إفعل ما بدا لك ..

اللي انت عاوزه ..

إذا كنت مصر انك تفضل سنكوح  ....

[KWA]

الي حد ما القصه واقعيه..... ولكن في رائي   الشخصي ان هناك شخصيتين في القصه لأنسان واحد شخصيه السنكوح اللي هو علي استعداد تقبل الرشوه و المضي في الطريق مهما كانت النتائج و شخصيه سنوسي الطيب ذات الضمير الحي الرافض للحرام ....و ممكن ان اي انسان في وقت ما في موقف ما يكون ذات شخصيتين مثل سنوسي او السنكوح اما من سينتصر .....الأقوي....

[متسائل]

بالضبط يا أخ KWA

كل منا في داخله سنوسي و سنكوح..

و هناك عوامل تجعل سنوسينا يظهر على السطح و يهزم سنكوحنا أو العكس. :D

[إبن مصر]

الخط الدرامى ممتاز احييك يا اخ هشام واعتقد ان سنكوح سيقاتل قتال عنيف من اجل ان يقتل سنوسى ويفتح لنفسه مغاره على باب الممثله فى تفتيح المخ والفهلوه التى ستكون نتيجتها ان يركب سياره موديل السنه فى اقل من شهرين ...

الحل المثالى ان يقيم الدنيا ولا يقعدها .

الحل الواقعى ..... لما يشوف الباشا يطنشه ولو راجل يقوله هات ال50 جنيه  :angry2:

[ragab2]

هذه

قصة صريحة من قصص ملايين الموظفين الصغار السناكيح

والذين أرغمتهم الدولة على السنكحة لتدبير معيشتهم

ثم تترك سناكيح الملايين وتحاسب الفقراء منهم فقط

[freefreer]

يا جمعة .. سنكوح وجد نفسة فجأة بين الديناصورات .. و على عتبة جريمة .. و الراجل شرقان ل عشرة جنية مش 500 .. و اى قرار خطأ .. ممكن يلاقى نفسة اتفعص .. فى حذاء احد الديناصورات .. الخيارات ليست سهلة أبدا ..  :nervous:

[أسد]

الخيارات سهلة .. مش صعبة ..

الخمسمائة جنية ليست ثروة ..

ممكن يطيرها السنكوح فوراً ..

ولكنها ممكن تحوله من سنكوح إلى حوت ..

البداية صعبة .. وحياة سنوسي صعبة ..

وحياة السنكوح أيضاً صعبة ..

والأفضل هو أن يختار ما بين أن يكون سنوسي ..

أو أن يكون حوت ..

لكن يفضل سنكوح .. لا أوافقه ...

وأقترح أن يظل سنوسياً ....

[هشام عبد الوهاب]

رحت اترميت ع الكرسى والناس عماله تنده عليا يا استاذ ،،لوسمحت ،، يا فندى ،،يابيه

وانا ولا هنا ،،، اعمل ايه واسوى ايه واروح فين

احسن حاجه اشوف رأى الشله بتاعت القهوه ،، المهم اليوم خلص مش عارف ازاى وجرى ع القهوه

سنونسى: يا واد يا سحلب حد جه م الشله

سحلب: اهلا يا سى سنوسى الاسطى فهيم والاستاذ نبيه جوه عندك

سحلب :طب هات واحد زفت وحصلنى بيه

يدخل على الشله سلاموا عليكم يا اخوننا

الاستاذ نبيه :مالك يا سنوسى ،،زى ماتكون ضربتك عربيه

الاسطى فهيم : ايه يابنى فيه ايه كفانا الشر

سنوسى : مصيبه وحطت على دماغى

نبيه :مصيبة ايه بس اهدا كده وفهمنا ايه اللى حصل

سنوسى : طيب اشرب الزفت واقولكم

ياواد ياسحلب فين يابنى الزفت هى ناقصاك انت راخر

---------------------------------------------------

سنوسى : ادى الموضوع كله اهو اعمل ايه بقى فى النايبه دى

الاسطى فهيم :هاهاهاها هى دى المصيبه

الاستاذ نيه : استنى يافهيم بس دى مشكله بجد

بص ياسنوسى انت تبلغ اسماعيل وهو يتصرف

فهيم : يا عم يبلغ مين ماهو اولى بالخمس ورقات الكبار

نبيه : ياجدع افهم دى رشوه وممكن يروح ف داهيه ،، يعنى يزور بطاقه للراجل طب افرض عمل بيها جنايه وبعدين ماهو اسماعيل لازم يعرف مش هو اللى بيراجع والا ايه

سنوسى : اسماعين مش مشكله لو غمزته ببريزه يعدى اى حاجه

فهيم : يبقى خلاص انت ترش على عمك اسماعين وهو يخلصها

سنوسى :ياسطى لو حصل حاجه بالبطاقه دى هاتحبس

نبيه : هو الراجل ده اسمه ايه

سنوسى :ماعرفش هو انا قدرت افتح بقى

نبيه : ياجدع الراجل اللى عاوزينك تعمله البطاقه

سنوسى :اه صحيح ولا بصيت فى الورقه حتى

ويخرج الورقه من البنطلون ويناولها لنبيه

نبيه وعينه تلمع وكأنه شاف عفريت: يانهار مش باين ،ده ...ده ..ده

سنوسى : ايه فى ايه مالك

نبيه : ده راجل مهم قوى واسمه فى الجرايد كل يوم

سنوسى : يادى الليله الكحلى ،، طبلت على دماغك اكتر ماهى مطبله يا سنوسى

وهو البيه ده عاوزبطاقه تانيه ليه ،، انا كان مالى ومال الشغلانه المهببه دى ،،دبرونى ياجدعان اعمل ايه

المهم قعدنا نرغى يجي ساعتين وماوصلناش لأى نتيجه ولا ايتها حل ،، قلت فى عقل بالى ياواد ياسنكوح انت تروح بكره تقدم على اجازه عارضه وتسلم الورقه لأسماعين وتخلع

------------------------------------------------------------

تانى يوم فى الشغل رحت بدرى واول مادخلت لقيت البيه ابوكرافته مدندشه قاعد قدام الشباك ومافيش حد غيرنا فى المكتب

دخل عليا بالسلام والاخبار وعامل ايه وانا برد عليه وببلع ريقى بالعافيه

وراح مناولنى دوسيه فيه شوية ورق وقاللى : الاوراق كلها عندك اهى يالا خلص كل حاجه وبكره اعدى اخد البطاقه وام مناولني خمسين جنيه تانيه واختفى

قلت الحمدلله وانا اللى كنت فاكرها مصيبه

فتحت الملف ولقيت كام ورقه ،، شهادة ميلاد على عنوان سكن على وصل نور على شوية حاجات ،،المهم ان الورق كامل من كله

قلت يا واد يا ابو السناكيح والله وباضتلك فى القفص اهو كام شغلانه من دول وابقى فى التمام

وقعدت اضحك على نبيه وفهيم لما اقابلهم واحكيلهم

اخدت الورق وقعدت اقرا فيه وفجأة ،، يانهار مش باينله شمس ،، د الورق ده باينه مضروب

لأ مابدهاش بقى انا ابلغ البيه الضابط واللى يحصل يحصل ،، ايوه هايعملولى ايه ياعنى

اوعى تخاف يابو السناكيح ،، اتكل على الله ،، رحت رايح على مكتب العميد طوالى

والباب مفتوح ولسه هادخل ،،لقيت ابو كرافته مدندشه قاعد جوه وقدامه القهوه ،،رحت للخلف در وراجع تانى ع الشباك وكتبت طلب الاجازه ،،كان عم اسماعين جه

ناولته الورق وقلتله انا ماراجعتوش عشان انا تعبان وهاروح وادى اجازه عارضه 3 ايام

ورحت لافف وماشى من قدامه وع الشارع طوالى

يتبع

[هشام عبد الوهاب]

فات الخميس والجمعه وخلصت الاجازه العارضه وانا ولا واخد بالى ان اخدت اجازه ايام الاجازه ، خساره لكن مش مهم

وانا فى السكه رايح السجل فضلت افكر ياترى المصيبه اياها حصل فيها ايه ،، اول ما وصل استنى اسماعين واعرف منه الاخبار من غير مايحس ،، اشمشم يعنى

غريبه السجل فاضى مع ان الساعه تمانيه الاخمسه ،، هانت كلها عشر دقايق واسماعين يجى

---------------------------------------------------------

وبعدين بقت تسعه ونص واسماعين ماجاش

يافاروق هو الاستاذ اسماعين فين

فاروق : قدم على اجازه 3 ايام من اول امبارح يعنى يرجع بكره ، ليه فى حاجه

سنوسى: ابدا اصل فيه ورق بطاقه كنت سيبتهوله من غير مارجعه وكنت عاوز اعرف خلصه ولا لأ

فاروق : يعنى يا خويا قلبك ع الشغل قوى ،، دماغك مانت عارف عمك اسماعين ،،تلاقيه راكنه فى الدرج لحد مايرجع او خلصه ووداه المكتب يتمضى

سنوسى : ايوه على رأيك

يظهر الموضوع اتعقد ،، لحسن ابوكرافته يرجعلى تانى ، تبقى واقعه ،، ولا يكونش اسماعين خلع راخر ،، اما اقوم اتطقس فى المكتب

---------------------------------------------------------------

ايوه هو عرفه جدع وهايقوللى

صباح الخير ياعرفه

عرفه :صباح النور ياسيدى ، اخبارك ايه ،،لسه برضه بتقعد ع القهوه اياها

سنوسى : يعنى هاسلى نفسى بأيه ،،اهو ابقى عدى اشربك شاى

عرفه : ان كان على حسابك ماشى

سنوسى :بقولك ايه فيه ملف بطاقه كنت سيبته لاسماعين يوم الاربع ماتعرفش خلص ولا لأ لحسن صاحبه كان مستعجل قوى

عرفه :ولا اعرف عنه حاجه ،،استنى يا فتحى اسماعين مابعتلكش دوسيه يوم الاربع

فتحى : ايوه ليه

عرفه : خلصته

فتحى : هو انا لحقت ابص فيه ، سيادة العميد طلبه وادتهوله

سنوسى : طيب اروح اشوف الناس اللى فى الشباك

--------------------------------------------------------------

يا نهار ازرق على كحلى ،، وبعدين زمان سيادة العميد كشف المستور وهاروح فى داهيه

يارب استر ،، وشويه ولقيت الواد الفراش بيندهللى

يا استاذ سنوسى الباشا عاوزك ف مكتبه

ياليله سوده ربنا يستر ،، انا ماليش دعوه انا كنت اجازه

خبطت ع الباب من يره ودخلت لقيت العميد قاعد مع ابوكرافته وهات ياضحك ،،ربنا يجعل كلامنا خفيف عليهم

ايوه ياباشا أأمر

العميد : خد يابنى البطاقه دى اختمها م المكتب وهاتها

سنوسى :حاضر ياباشا

وخرجت ولا كأنى شفت ابو كرافته وع المكتب واخدت الختم وهوب لطعته ع البطاقه وطبعا ضربت عينى فيها وكأنى حفظتها ،، رجعت المكتب ودخلت

سنوسى :البطاقه اتختمت يا باشا

العميد :الختم واضح يابنى

سنوسى:وبيلمع ياباشا ،،،،،،،،، اخد البطاقه وسلمها لابو كرافته وقاله

ابقى بلغ الباشا تحياتى وماتنساش توصيه علينا

وانا واقف زى الاهـــــــــــــــــــــــــــــــبل

طبعا خرجت والعميد خرج يوصل ابو كرافته لحد السلم التحتانى

---------------------------------------------------------------

بعد الشغل جرى ع القهوه وعلى فهيم و نبيه

مين بقى الباشا اللى اتعمله بطاقه ده يانبيه

نبيه: ايه ياسنوسى هوانت يابنى مش عايش ف البلد دى ده رجل اعمال مشهور جدا

سنوسى: اعمال ايه ،، وعاوزبطاقه مضروبه ومش مضروبه ليه

نبيه : انت عارف مجلس الشعب

سنوسى : شعب ايه ،، واعمال ايه ، وبطاقه مصريه ليه ، واسماعين خلع ليه، والعميد يقولى اختمها ليه ، والمية جنيه ليه

ياواد ياسحلب : الحقنى ياد بالزفت بسرعه

واخذ نبيه وفهيم يضحكون بصوت عالى وانا عمال اهلفط

شعب ايه وبطاقه مصريه ليه والعميد ايه وادانى فلوس ليه

والى حلقة اخرى من يوميات سنكوح

[mnman]

عشرة علي عشرة يا أخ هشام....  :)  :D

[إبن مصر]

من سخريات القدر ان اكثر القصص نجاحا هى التى تستمد فصولها من الواقع وهذا ما فعلت يا عزيزى ... اكرمك الله وحفظ فكرك وقلمك فى المستقبل من ان يسلط فى الاتجاه الخطأ ... فمثلك من يقرأ بين السطور قد تكون كلماته سلاحا لا يقوى عليه احد ...

[freefreer]

الله حلوة قوى يا هش .. سؤال .. ياترى عم سنكوح لو جالة تانى واحد بيه و قالوة طلعلى بطاقة كذا كذا .. حيكون رد فعلة اية؟

[هشام عبد الوهاب]

شكرا للجميع على الكلمات الرائعة والتى لا استحقها  واتمنى ان اكون استطعت ان اصل الى ما قصدته من خلال هذه اليوميات  والتى لا اجرؤ ان اسميها قصه فهى مجرد مجموعه كبيره من الافكار طالما حاولت اظهارها على السطح فقررت ان اجمع مايستحق منها لكتابته فى مكان واحد

اجزم بأن  اجمل لحظات السعاده تأتى عندما يقرأ لك الاحباء والاصدقاء

اما اجملها على الاطلاق عندما يرون ماخفى ويدركون ما ظهر

اخى العزيز فرى

هناك جوانب اخرى فى شخصية سنكوح لم تظهر بعد

الاستاذ ابن مصر

لا تخف ياسيدى واطمئن

[Alshiekh]

[b:post_uid0]طريقة السرد، التخيل، والعرض كلها محاولات جيدة وان كنت اعتقد انك شبه محترف او فى طريقك للاحتراف،  :blush:  ;)

لكن متهيأ لى القصة قديمة شوية، انا سمعت انهم غيروا النظام ده فى استخراج البطاقات،

مش عارف الأخبار دى صحيحة والا ايه؟[/b:post_uid0]