نولع التليفزيون ولا نطفية على قناة النايل تي في ؟

[se_ Elsyed]

من حوالي 4 أيام قاعد في امان الله في الشغل وبأجهز نفسي لإجتماع بعد خمس دقايق لقيت المكالمة التالية جتني من صديقي خوان أنطونيوس مانمان :

مانمان يصرخ بصوت كل لهفه ولوع : بوكيرتوف آدون س س .

س س : يا نهارك إسود يا باتمان .. بوكيرتوف إيه يا واد ؟ إنت بتكلمني من تل أبيب ولا إيه نظامك ؟

مانمان : بأقولك إيه .. روح إفتح التليفزيون على النايل تي في بسرعة بسرعة

س س : يابني أنا في الشغل ومش فاضي للكلام ده ... إنما قولي في أخبار سعيده تستاهل ؟ يعني مارينجوس أعلن إعتزاله .. ولا أمموا اللحمه ولا إيه الحوار بالظبط ؟

مانمان : إسكت يا س س ياخويا بأفتح التليفزيون على قناة النايل تي في لقيتهم بيذيعوا برامج باللغة الصهيونية ( قصدوا العبرية )

س س : طب وإيه الجديد يابني في كده .. ما هي البرامج دي بقى لها ييجي 3 سنين ... إنت ما بتاكلش كرنشي ولا إيه ؟ وما تعرفش إن السفارة في العمارة وإن العملية في النملية ؟

مانمان : قول وكتاب الله ؟

س س : آه والله العظيم .. أصلهم بيقولوا إننا لازم نخاطب الشعب الإسرائيلي لتصحيح المفاهيم الخاطئة عنده ... شوفت الآمله اللي إحنا فيها ؟... وقولنا مليون مره يا عالم ياهو يا ناس يا بتوع الإعلام ياللي في عقولكم فردة شبشب مش مخ ( بالمناسبة يا بودا قولنا على وصفة المخ البانيه بالجبنة الرومي ) إن إسرائيل كلها شغاله بنظام الكيبل يعني مش هاتلاقي فوق البيوت أو المستعمرات بتاعتهم دشات من اللي بتلقف القنوات البلوشي .. يبقى البتاعه دي موجهه لمين يا بشر ؟

مانمان : آه صحيح .. هي موجهه لمين ؟

س س : طب يمكن موجهه يا باتمان للهصاينة اللي بييجوا طابا وسينا يعربدوا ؟

لأ بس دول ما بيبقوش فاضيين للكلام ده ...

طب يمكن موجهه للموساد ؟ لأ برضوا ده احنا مفضوحين قدامهم فضيحة اللحمة في السوق وأوراقنا كلها مكشوفة ؟

أيوه أيوه إفتكرتوا إفتكرتوا .. يمكن مع مرور الأيام الإسرائيليين حتماً ولابد هايوصلهم كلام من هنا ولا هنا عن القناة دي ولما يتفرجوا عليها مفاهيمهم هاتتغير ويحسوا على دمهم ويسيبوا أرضنا وكل واحد يرجع للنقرة اللي جاي منها .

تعرف يا بات ياخويا ؟

مانمان : أعرف إيه ؟ وبعدين إنت مش بتقولي وراك إجتماع وعايز تقلبني يبقى بترغي كثير ليه ؟

س س : إستنى بس ... تعرف إني أتحدى وزير الإعلام نفسه حضرت الظابط صفوت الشريف يقول لي عدد القنوات المصرية كام .

مانمان : سفوت مين يابني .. ده راح في الوبا الله يرحمه ..

س س : يا جدع مانا عارف .. بس إنت بتاكل من الكلام ده .. يعني عايز تفمهني إن أنس الفقي ده ينفع وزير ؟

الأكاده يا جده عندنا اللهم لا حسد - ما يحسد المال إلا أصحابه - مش أقل من 50 قناة مصرية إيشي أرضية وفضائية وثقافية وملوخية ومافيش فيهم قناة تجبرك على الإحترام وكلهم رافعين شعار " إديها في الهايفه وأنا أحبك يا فنانس " والأكاده بقى إن مافيهومش ولا قناة دينية ولا يا راجل حتى قناة إخبارية لها مصداقية ... هي الناس دي ماعندهاش دم ؟

مانمان : آه طبعاً يابني .. هما لو عندهم دم كان ده يبقى حالنا ... إمشي بقى خلينا أكمل البرنامج ده وأشوف أدون عيزرا عمل إيه مع نينو إبن أخويا ميتشولح ...

[Sherief AbdelWahab]

عزيزي س س :

فترة البث دي مفتوحة فقط لنفس السبب اللي البعدا فاتحين فيه فترات وقنوات باللغة العربية ..

بل اننا محتاجين نعرف العالم دي بتفكر في إيه بالضبط .. ومن عرف لغة قوم أمن مكرهم..

خلص الكلام

[أمل حياتي]

انت علي طول معترض ليه يابو السيد.....

مش بيقولوا لازم تعرف لغة عدوك

انا فاكره زمان قبل ما الدش ده يطلع كنا بنتفرج على قناة اسرائيل

بس عشان اتابع الآفلام الاجنبي كامله بدون مقص وكمان اجدد حاجه

وتعلمت شويه من كلامهم اتعلم انت بقى

وكمان قناة النايل تي في من اجمل القنوات المصريه وبالذات الاخباريه

المهم تكون انت تعلمت كم كلمه بعد السنين دي,,,,,,,,,

[التونسى]

دا مش شئ جديد.. من الناحيه الاعلاميه .. علميا تسمى هذا البرامج ب ((البرامج الموجهه)) .. والمفروض يتم استخدامها لصالح الجهه التى تقوم بتوجيهها .. لاهداف تخدم مصالحها .. وده كان موجود من ايام عبد الناصر .. كانت فيه محطات اذاعه بلغات مختلفه .. للدعايه والترويج للثوره عند الدول الاخرى الغير ناطقه بالعربيه

طبعا فيه حاليا محطات بحالها موجهه .. زى البى بى سى مثلا .. محطات اذاعيه وتلفيزيونيه تتبع لها تصدر بلغات عديده وفى دول مختلفه .. طبعا هما بيبرروا ده انهم بيقدموا خدمه لدول العالم .. لكن اكيد لهم اهداف اخرى منها محاولة الهيمنه الاعلاميه .. وفيه برده قناة الجزيره باللغة الانجليزيه .. وطبعا دى موجهه للغرب عشان عرض القضايا العربيه من وجهة النظر الاخرى بالنسبه للغرب

[Sherief AbdelWahab]

محطة النايل تي في بشكلها الحالي لا تستحق أن تولع عليها التليفزيون ، أو نطفي عليها التليفزيون.. تستحق فعلاً أن نولع فيها التليفزيون ، هي وقناة النيلة للأخبار عزبة سميحة دحروج وحسن حامد ومن جاء من بعدهم..

إيه الهدف من النايل تي في ؟ مش عارف..

إخبارية؟

منوعات؟

بي بي سي ولا تي في 5؟

دويتشة فيللة ولا قناة press الإيرانية؟

لما بافتحها منتظراً أي تغيير يا بالاقي كراسي يا بالاقي برنامج تسجيلي؟

بالسوري : العمى على قلبون!

خلص الكلام