مذكرات شبشب الصفحة الأخيرة

[shahd]

ذكريات الطفولة

في الحقيقة وفي الواقع والسوق مليان شباشب

انا بجد بجد مش عارف ابتدي ازاي حاكم حكاية المذكرات دي صعبة قوي

بس انا قررت وانا لما اقرر بنفذ وانا قلت حكتب مذكراتي يعني حكتبها , ماهو كل من هب ودب بيكتب اشمعنى انا ولا

يعني اكمني شبشب ؟؟؟!!!

بس حقول ايه ولا ايه

طب انا حبتدي وتيجي زي ما تيجي

انني في غاية الحيرة

وحيث انني في وضع لا احسد عليه فقد .........

انت حتعلمي فيها سيبويه حيرة ايه يابتاع انت

سيادتك بتكلمني مين انت اصلا

اااااااه دي الجزمة بقلك ايه اخرسي انا مش فايقلك خليني اعرف اقول الكلمتين الي انا حافظهم

طيب اما نشوف يابتاع المذكرات انت ده انا الي اسمي جزمة مافكرتش في الحكاية دي حتيجي انت ياشبشب ووووو

بقلك ايه لم لسانك وبلاش عك اناشبشب محتررررررم

وتخرج الجزمة ويستمر الشبشب في التفكير

ايوة اهي جت اهي ياعيني عليا يلا قبل ماتطير

نخش على ايام الطفولة وايش ادراك بأيام الطفولة دي كانت حلوة بشكككككككككل

ايه دنيا كانت ايام , لما كان الواحد لسه عيل في جلد امه مدفي واخر امان لاحد يرميه تحت الدولاب ولا يتلقح في الحمامات ذات البرفنات

ولا المهمهات المتخانقين مع ولادهم كل ما يزعلوهم على طول بالشبشب واديييييييي, هو احنا زمبنا ايه بس يا خووووواتي

الله لايعديها ايام سووووده

هو ايه الي جاب السيرة دي احنا لسه في ذكريات التفولة

زمان لما كنا في المصنع انا واصحابي الشباشب ده قبل ما نطلع على وش الأرض كده ونبقى ملطشة للرياح والي جاي

كان الوضع اخر حلاوة .

هو اي نعم كان في دق مسامير وخبط على الدماغ لما الواحد طلع له كالو بس مش مهم

اهوكله يهووووون طالما هي ايد واحده والراجل الي كان بيعمل كده اهو برضه في مقام الأب الروحي

وكل يوم عن يوم تلاقي شبشب جديد يتولد قدامك وايه ياختي على كماااااالو اشي طبيعي على صناعي , على مش عارف ايه

انما الطبيعي ده كان مغرور قوي قاعد كده ومتقنزح

على ايه مش عارف ماهو برضه بياخد على قفاه زينا

ماعلينا خليني في نفسي , هو صحيح انا كنت بعيط من الشاكوش الي كان بينزل على دماغي بس كل ما افتكر

اقووووول يااااااه ده انا كنت فعلا عيل ومش عارف مصلحتي

صوت الشاكوش في ودني دلوقتي عامل زي موسيقى تصويرية جمييييييلة في فيلم رعب

قصدي فيلم رومانسي

اايييييييييه دنياااااااااااا يارتني ارجع عيل تاني وافضل في المصنع الجميل ولا حتى يرجعوني لجلد امي

يلا مافيش حاجة ترجع لورا تاني كله بيمشي لقدام وده نصيبك حتعمل ايه يعني ؟؟؟؟؟

فكرتوني بحاجة مهمة قوي عايزة اقولها قبل ما البلدوزر الي نايم ده مايقرر يخش بيت الراحة وياخدني معاه جته الهم

كان في شبشبايه صغننه كده بفيونكة حلوة قوي كنا متفقين علىالجواز لمانكبر بس ياالف خسارة فضلت عليا شبشب من مصنع تاني

ولما سألتها ايه الحجة ده انا بحبك قوي وداخل البيت من بابه وحدفعلك مهر عمرك ماتحلمي بيه

قالت لأ مش العبارة بس اصلي ووشها احمر كده

رحت انا فاهم العبارة وقلت لها بتحبيه يامقروضه انت

هي اي نعم حطمت روحي الجلديه بس اكمني شبشب جدع كده كررت وانا لما اكرر بنفذ

اني اقف جمبها في يوم زي ده حاكم انا شهم واعجبك قووووووي

فرحت معاها المصنع التاني عشان التعارف يعني مش لازم اطمئن على اختي

اااااااااخ يااااااااااني اختي غصب عني.. يلا لزوم الشهامة ماهوما بقاش ......... ماعلينا

المهم وانا رايح معاها اشوف ايه الواد الشبشب الي عايز ضرب الصرم

صرم ايه بس ماهو صرمه اصلاّ!! بس طلع ابن ستين شوووووووووز , سابها وراح خد واحده تانية

قال ايه هو اتحول مش شبشب لجزمة وهي مش قد المقام

مش قلت لك انا اولى بيكي؟؟

وجت تعتذرلي وتجر ناعم وانا ولا هنا ولايهمني كرامتي

ااااايييييي نعممممممم انا شبشب بس كرامتي ما تهونش عليا ابداااااااا

يييييييييييييييييه البلدوزر صحي حان وقت العقاب اليومي

انا اتشرشحت ياخرااااااااااشي انا جاي اهوووووووو

اشوفكوا في الصفحة الجاية من مذكرات شبشب

تم تعديل 19 يوليو 2005 بواسطة Scorpion

[shahd]

ااااااااااخ ياااااااااني طبقت على مراوحي

هو في حد يقعد في بيت الراحة 3 ساعات ليه يعني بتخترع الزرة ولاهو افترى وبس

روح ياشيخ نسيتني ذكريات الطفولة الكميلة

فينيك يا شبشباية ياام فيونكاية ؟؟؟اخ بس لو ماكنتيش غدارة هيييييييييييييه يعني لازم نقلب المواجع يلا

خلونا في المهم كنت بقول ايه قبل ما البلدوزر يوصل ويقطع نفسي

قلت ان السنيورة جت تستسمحني وانا ولا معبرها كرااااااااامتي اي نعمممممم.........

هو يعني اكمني شبشب وهو جزمة برباط ولا ايه العبارة

بس هو برضه اداها بالبلغة ماهو مقامها برضه

ايييييييييه حنطول لسانا لييييييييييه لألألألأ مهماعملت دي فيونكت قلبي

ولا كله كووووووم وايام الدقة الأخيرة كووووووم

ساعتها قرر ابونا الروحي انه يطلع روحنا

اااااااااااسف قصدي انه يخلي مسؤليته ونروح احنا فين؟؟؟

نتشرد في الشوارع يعني اكمننا شباشب امال فين حقوقنا

واحنا نصررررخ ونعيييييييييط

حدش سمع حاجة ولا عبرونا تقلش .........

المهم راحوا حاطوني انا وصحابي الأكارم الشباشب في حته كده فيها قزاز

قال ايه اسمها الفرتينة باين ولا ايه مش عارف

ايوة هي دي الفورتينه

ماخلاص بقى يعني غلطنا في مين ياخي

اسمها الفترينة يا ناصح

طيب اتلقح انت تحت السرير وسيبني اكتب

واحنا جوا ا لبتاعة دي الاقي الجزم معتصمة وعماله تقول طلعواااااااا الشباشب من هنا الفترينة دي اصلا لنااااااااااا

وتقوم الحرب بينا وبين الجزم واحنا طبعا بما اننا شباشب محترررررررمة وكله الا كرمتنا كان لازم ندافع عن حقنا

وانا بقى اكمني اخر الشباشب المحترمة قررت وانااااااااااا

يييييييييييه عرفنا لمابتقرر بتنفذ

رحت رافع سلاحي وقايل يااااااااااا يا شباشب اتحدوووووووووو

وهما طبعا ما صدقوا خبر تقلش كانوا مستنين

وتقوم المعركة وشبشب يطير وجزمة ترقعك في قفاك

وجلدك مايشوف الا النووووور

مش انا طبعا, اصل مافيش حد يقدر عليا

هو اي نعم انا شبشب بس ايه خبطة واحدة مني تجيب كل الجزم دي الأرض

اصلي متجربة حتىاسألوا المهمهات

بس العجيب في الأمر اني كنت بتخبط في الحيطة ليه مش فاهم ؟؟؟!!! هي الحرب بين مين ومين ؟؟؟؟؟

لسه اللسعه معلمة في قفايا بس اهو علقة تفوت ولا حد يمووووت

ايه هو انت كنت بتضرب

يييييييييه مش انا ده صاحبي

عليا انا مااحنا دافنينه سوى

بس يابتاعة انت زهقتيني في عيشتي

لو ماسكتيش حكتب عنك المذكرات واطلع القديم والجديد

جرب كده وانت تشوف , لو كنت ناسي الي جرا هات الدفاتر تنقرا

بصي اناسايبلك المكان وماشي حاجة تفلق

وياخد الشبشب دفترمذكراته وقلمه ويستمر في الذكريات

وبعد الحرب ماتخلص يقررصاحب المحل انه يفرق الشباشب عن الجزم وتقعد الجزم معززة مكرمة في الفترينا

واحنا الشباشب المغلوبة على امرها ننزل تحت خااااااالص وكله فوق بعضه حتى النفس يا عيني محرومين منه .....

انا عارف ليه التفرقة دي ماكلنا ولاد جلده واحده

طيب انا مضطر اقلب الصفحة دلوقتي

اشوفكوا الصفحة الجاية

سلالالالالام

تم تعديل 9 يونيو 2005 بواسطة شهد

[وليد صفوت]

شهد !!!!!!

مش ممكن الجمال ده ؟؟

قصة راااااااااااااااااااائعة ! أنا كنت فى غاية الإنبساط و انا بقراها ,...

الى الأماااااااااااااااام ,................... يا شبشب :blink:

[shahd]

شهد !!!!!!

مش ممكن الجمال ده ؟؟

قصة راااااااااااااااااااائعة ! أنا كنت فى غاية الإنبساط و انا بقراها ,...

الى الأماااااااااااااااام ,................... يا شبشب  :blink:

<{POST_SNAPBACK}>

يارب يخليك ميرسي على الرد الجميل ده كلك زووووووووووق :blink:

تم تعديل 9 يونيو 2005 بواسطة شهد

[shahd]

يوم في حياتي

يا فتاح يا عليم يارزاق يا كريم هو القلم راح فين

والدفتراختفى كمان؟؟؟ يعني حيروح فين يعني

هي المنيلة ام كعب مقصع دي تلاقيها خدته ماهي غاوية تعملي قزعرينه , حقد بقى حنقول ايه طول عمرها كده من واحنا عيال صغيرة

اكمني انا شبشب اصيل وهي اي نعم جزمة بس كعب مهكع

انت فين يا ........ قفشتك هات مذكراتي لحسن اديكي بالبلغة

وبعد عناء وشقاء ياخد الشبشب دفتر مذكراته

تقلش مذكرات شنطة جلد تعابين يا خيي؟؟؟

انا وقفت فين اييييوة ايام الفترينة والحرب الجزمية الشبشبية الي انتهت بانتصار الجزم ورمينا رمي الــــــ .... من غير اي احترام ولا تقدير لجهودنا وهرية جلدنا اشي رزع مسامير واشي ابرة داخلة وابرة خارجة

هييييييييييييه يعني لازم تفكرونا يعنييي

في يوم من الأيام وانا وزمايلي الشباشب المحتررررررمة

قاعدين و راضين واخر سلطنة

نلاقي فوج من الزباين داخلين المحل , كله بيدور ويقلب الي عايز جزمة كعب قعرالكباية والي عايزقبقاب والي والي وياريت

تعالى شوف لمايجي الدور علي ,,,ياعيني انا شفت يادوب لمحت بس الراجل ومراته جاين قلت ابااااااااا وقعتك سووووووده

هما وصلوعندي ازااااااااي مش عارف؟؟؟ شافوني ازاااااااي برضه مش فاهم

ماعلينا , اهم مافي الموضوع انهم وصولي ويارتهم ما وصلو

الراجل ذراعه بس 180 كيلو

قلتش انا حاجةعلى وزنه

ولا مراته 500 بطيخة في بعض

وياختي على كمالو الواد ابنه دبابة صغيرة ده بالنسبة ليهم

انما هوحجم عائلي تنفع في الحروب العالمية

ويقف الواد ويفرك عينه وبصوت رقيق ونااااااااعم ,, خرم ودان جزم المحلات الي جمبينا,, تقلش كروووووووان

بابااااااااااااااااا انا عايز الشبب دههههههه

ترد البقرة الحلووووب

قصدي الأم الحنون عنيا يا نور عنيا

طب هو قال بابا دخلك ايه انت يا وليه ياقرشانة

يمد الأب ذراعه وااااااه ياني من ذراعه

وياخدني ,,,, ياخدني ايه ده خد اجلي

خد يا حبيبي قيس

ويقيس ويحاول عل وعسى ,, طب ياابني الشباشب مالية الفترينة اهي ولا خدلك جزمة مقاس سبعة راكب

لازم انا يعني

ويقعد يعييييييط بابااااااااا ماليش دعوة اناعايز ده يعني ده اصل حلو قويييييي

متشكر اناعارف اني حلو وكميل قوي بس مش معاك يادبابة

ويرد الدولاب ابو ذراع 180 كيلو ,,,,,,,

عنيا ياحبيب بابااااااااااا

حجيبهلوك يعني حجيبهولك

واتخطف من وسط اهلي وناسي

ويتجه الثلاثي المرح لصاحب المحل ويقلوله الشبشب ده مافيش امل انه يكبر

يقوم صاحب المحل بيصلهم طبعا في مقاس اكبر

يرد العيل لالالالالا اناعايز ده يكبر

عايزني اكبرهو كان ممكن بس خلاص ماعادش يجي منه اصل امي فطمتني بدري

يرد صاحب المحل ويقول لا ماينفعش انااسف جدا يا افندم

وساعتها بس خدت نفس طووووووووووويل وياسلام عليا لماباخد نفس؟؟؟؟؟

اييييييييييييه هو في ايييييييييه؟؟؟ ايه الصوت ده

وووووووووووووووووووواععععععععععععععع

وااااااااااااااااااااووووووووووووووووووووعععععععععععععع

عايزههههههههههههههههههههههههههههههههههههههههههههههه

خلاص يا روح ماما , بس ياعيون بابا

مش حرام عليك جرحت احساسات الواد

نعم ياختي احساسات الواد وانا طز في احاسيس الي جابوني

واتخدت على خوانة واتشديت من قفايا بس ايه انا كرامتي ما تهونش عليا

وقررت وانا لمااااااا اهئ اهئ اهئئئئئئئئئئئئئئئ

مش قااااااااادر اكمل هاتي الكلينس يا ام كعب مهكع انت

يظهر ان الشبشب عايزيقعد لوحده

نسيبه شويه معلش حقه ولا اييييييييه

اشفكوا في الصفحة الجاية

تم تعديل 10 يونيو 2005 بواسطة شهد

[shahd]

وصدر القرار

مساااااااء الخييييير نقلب الصفحة بقى

وبعد مااتخدت من قفايا واااااااه ياااااااني يا قفايا

واستسلمت لمصيري المينل بستمية نيلة

بس قبل مااستسلم كان لازم اسلم على حبايبي

اصل العشرة ما تهونش

واكمني اصيل ومتأصل وجدع واعجبكوا قووووي

كان لازماً ولا بد اسلم على الكل شباشب وجزم ايووووووة

الشباشب ودعتني وهي بتعييييييط اما الجزم بقى شمتانة فيا وتقلي مع الف سلامة والقلب داعيلك

وعمالين يتدودو ويقولو مش ده الي كان عمال يقول دي عيشة دي امتى حخلصمن الزل والمرار الي انا فيه ده وكرررررررامتيييي ومش عارف ايه

سلامااااات ياابو كرامة

يلا المهم انا عملت بأصلي

كان مالها القعدة تحت الجزم يعني هو انا صحيح خدت باشلاليت بس على الأقل من جزم زيتنا في دقيقنا يعني

انما دلوقتي حروو فين ومصيري اييييييييه يا غلبي يااااااااني

الواد لف دماغي يلالالالالالا اهمد بقى

الواد مصر اني لازم اكبر بس نفسيييييي اعرف حيكبروني ازااااااي ؟؟؟؟

مش فاهم انا ؟؟؟؟!!!!!!!

ماتشغل مخك ولا انت فالح بس في القنزحة الفارغة

قنزحت ايه ماخلاص راحت عليا الوداع يافوترينة

انا رايح الودااااااااع يااحلى شباشب عشتك معاها احلى ايام عمري

فيه ايه يا منيل هو انت رحت فين يعني

ما انت اترقيت

ما تنقطينا بسكاتك داهية تاخدك

هما بيودوني على فين اباااااااااا المكان ده مش غريب عليا

لألألألألألأ مش ممكن حرام عليكوا يا ظلمة يامجرميييييين

انا لسه ضغنن ؟؟؟؟؟

لاااااااا مش عايز من ده تاني

الغوث الغوث ياشباشب العااااااااالم النجددددددة

اجري عمالي نفسه في فيلم كرتون

ولا حعبرك ياحاقده ياحااااااااقددددددددة

وحكمل وخليكي كده مغلولة مني

على ايه يعني تقلش ماركة

وقعدت اصرخ واصرخ واعييييييييييط

وياخواتي عليا لما اعيط تقلش لولي نازل ينقط على الأرض

ولا في فايده وكأني بأدن في ملطة الي مافي حد يعبرني ولا حتى يرحم دموعي اهئئئئئئئئئئئئئئئ اهئئئئئئئئئئئئئ

ولا جزماية ولا شبشباية كله ورا مصلحته جتكم الهم

لكن ليه عايزين يودوني المصنع تاني

ااااااااه فهمت وانا عمال اعيطخلاص هما حيفصلوا شبشب مقاس الواد ؟؟؟؟؟؟ هو كده هييييييييييييه

امال كانو بياخدوني ليه

يمكن عشان يعمله واحد زييي

اديني حشوف.. اصله مافيش غير كده

نعم نعم نعممممممممم لاماهو ده الي مش معقووووووول

عايزه ايه الدببة المتوحشة دي

عايزين يلزقولي جلدة لييييييييه هو انا حنفية

هو يوم باين من اوله

ويرد الراجل الي بيصلح الجزم يا افندم ليه مانعملوش حاجة شبه الشبشب ده بالظبط

يجعر الواد لألألألألألألألأ يابابااااااااااااااااا ده يعني ده

يرد الأب بصوته الي عامل زي ما يكون بغل واخد دش وبيكتشف مواهبة

حاااااااضر ياروح باباااااااااااااا حنكبره حنكبرررررررره

ها يا استاذ حتكبره ولا نشوف حد غيرك

لالالالالا ده انا اكبره واكبر عشرة زييه سيبهولي وانا حتصرف

وهنا بقى ابتدت رحلتي مع العذاب هو اي نعم حيكبروني ولو اني مش فاهم ازاي بس مش مهم

المهم اني حترقع تاني وحاخد بالشاكوش من جديد

يا شماتك فيا يا ابو ربااااااط

اييييييييييييييييييي ابتدينااااااااااااا

اشفكوا الصفحه الجاية مع اول ايام

الصبا وماادراك ما الصبا هما كل الي بيكبروا بيتعمل فيهم الي بيتعمل فيا ده

انا عارف ؟؟؟؟؟

ايه مالك مش قلت حتقلب الصفحة

اه صحيح اصلي افتكرت حاجة مهمة قوي

طب هي ايه

لا مش حقوووووول استنوتني في الصفحة الجاية

[shahd]

ايام الصبا

انت يا ام كعب مهكع قومي فزي اعمليلي كوباية كافرتشينو تعدل الدماغ عشان اعرف اكتب يلا

وانا مالي انا ماتقوم تعمله بنفسك ناقصك ايه يعني

اااااه ما انت............

بقلك ايه انت حتقومي ولا اصحي القبقاب هااااااااااا قلت ايييييه

هي فيها قواله ده انا اعملك كافرتشينوا وكفر الشيخ وكل الي انت عايزه

ايوة كده جزم تخاف ما تختشيش

واقعد بقى شبشب فوق شبشب واخر منجهه وابتدي التعبير عن مشاعري المنكبته ..... ماهو اقول اصل الكبت وحشششششششش

ونخش في ايام الصبا وياسلام على ايام الصبا هي بتوجع شويه

لأ شويتييييييييييين خصوصا لما تقضيها غصب عنك ويكبروك غصب عن نن جلد الي جابوك زي ماتكون بطة بيزغطوها

في ليوم خرجتها.......

اااااااااااه الظلم وحش ياخوانا

وتتركبلي جلدة توصيلة يعني ...... عشان الواد ياعني على كمالو لو تشوفوا فرحتو بيا وهو بيحيط رجليه فيا ..... واي رجلين ماتفكرونييييييش حاجة كده قطر على مركب على كاااااام عربية ووسائل مواصلات كاملة

حدش فيكوا عايز عربية يجي عند الواد ده ...... زورونا تجدوا ما يسركم

عيني عليه باااااااارده

لكن الحق يقال برضه ماهو انا حقاني .... كان من كترحبه ليا مش راضي يفارقني ولا لحظة ده بينام بيا .... اي نعم

هو حب ايه ده انا مش عارف

انا دلوقتي عرفت يعني ايه من الحب ماقتل

ثواني كده اخد شفطة........... انت يا مقصعه مش قلت لك عايز كيك مع الكافرتشينو

طيب حعملهولك سم اما يهري جلدك

استنظروني شويه كده عشان اما في لحظة تأمل دلوقتي

وانا لما بتأمل ماحبش حد يقاطعني ابداااااااا

نسيت اقلكوا انه ساعة ماخرجوني من المصنع وعرفت اني حفارق الحياة واخد اعدام قلت بيني وبين نفساويتي هما مش لما الواحد يشرف على طبلية عشماوي بيتسأل نفسك في ايه قبل ماتموت

انا بقى ما اتسألتش

ياااااااااه لو كانوا سألوني ساعتها كنت حقول حلمي الكبير

طالما قادرين تكبروني ماترجعوني لجلد امي اهوووووون

لكن اقول لمين لهيئة الجزم ..... ماهم مديني الطرشه

ولآكأني جزمة قديمة.............

اييييييييييييه مالها الجزم ياعرت الشاشب

ياستي على عيني وراسي طرقعه واحده من كعب سيادتك

بأجدع مصنع شباشب بحالو من عينتي يلا بقىاستريحتي

اعتقييييييييييينييييييييي

اهي حاجة كده جت على الماشي مش مهم

وبعد مااتركبتلي الجلده ومش اي جلدة ........ دي ضروري تبقى حاجة تليق بالمقام ومش كده وبس لازم تبقى مرحرحة

عشان ايييييييه كل صباع وصباع يعرف ياخد نفسه

فهنا بقى تكمن المشكلة كووووول جلود المحل ماكفتش فأضطر ابونا الروحي انه يشتري الجلد الي في المصنع الي جمبينا وبرضه مش كفاية

تعمل ايه ياعمنا ؟؟؟؟؟؟؟؟؟ تعمل ايييييييييه

نجيب من بتاع بره ....... ماهو كله عشان خاطر نن عيون الواااااد

لأ مااصل ماينفعش يقلهم مااقدرش اصل دول 500 بطيخة في بعض على ذراع 180 كيلو قبل الغدا بس

شوف بقا بعد ما يهبروا حيبقوا ايييييييه

فلازم ينفذ ويجيب من بره ......... كده بقى كله يبقى مبسووووط ...... غيرك انت يالي مافيش حد حاسس بيك ولا بنفساويتك المنكسررررررررة

الي في سني كانوا بيجروا ويلعبوا مع زمايلهم

انما انا كسروا نفسي وحطموني العيلة الي ماتتسمى دي

طب ياعم سبني حبة استريح بس

هو في حد في الدينا بينام بشبشب ولا هو اضطهاد وخلاص

مافيش في رجلين اهلك رحمة

طب خلاص ماشي البسني طووووووول النهار واديني اجازة باليل

برضه مافيش فايدة يا بابا انا كده حتقطع وكل جلدة مني حتروح في ناحية ..... حتستفيد ايه بقى لما اترمي في الزبالة

ايه ايه ........ مش حترميني حتصلحني وتفضل لابسني لحد ما يبقى عندك 75 سنة!!!!!!

لييييييييييييييييييه يعني حرررررررررررام

هو لا وانا عيل بيرحموني ولا صبي وحتى وانا عجوز عايز تقضي عليا

ايه مالك بس ,طب اهدى اهدى

سيبيني انا مكتئبببببب قووووووووي يا ختي

طب معلش معلش ريح شوية وبعدين ابقى كمل

انت شايفة كده

اه طبعا امال حتكتب وانت بالحالة دي

ايوة عندك حق بس تعرفي اول مرة في حياتك تقولي حاجة صح

يوووووووووووه هو انت مافيش فايدة فيك لسانك متبري منك حتى وانت في حالتك دي

مالها حالتي ماانا زي الفل اهووووو ولا اكمنك شفتي شوية اللولي على خدودي ؟؟؟؟؟؟؟

لولوي ايه يا ابو لولي

غوررررررررررري من وشيييييييييييييييييييي

اهلالالالالالالالالالالالا ابتدت الخناقة الدفتر طار ...... القلم وقع

اشفكوا الصفحة الجاية لو الدفتر رجع لقواعده سالما

[shahd]

المقامات محفوظة

اه ياجلدي ياااااااني لازم اروح اعمل كشف عام بس انا عايز كنسلتو يكشف عليا انا باين عليا جالي تمزق في الأحبال الجلدية كله منك.........

ياسلام يا اخويا انت جالك تمزق وانا اقول ايه جبتلي فشل كعبي .... اعمل ايه انا دلوقتي , ابقى جزمة صالون ازاي

ان ما اشتكيتشك لنقابة الجزم والشباشب

ياختي اشتكي حتى رئاسة الجزم والشباشب المتحدة

انا ولا حعبرك ولا حنزل نفسي لمستواك يا جزمة

وتقف الجزمة ام كعب وتحط ايديها في وسطها

ما يحكمشييييييييييي انت فاكر نفسك مين ياعرة يا جربان

ده انت كرامتك تحت رجلين عيل صغير لاراح ولا جه

وانت يا مهكعه يامقصعه يا ام كعب معوج وجلد مقطوع يالي مالكيش كرامة اصلا

على الأقل انا تحت رجلين سيدة صالون مش انت يااااااااااا .........

برضه مش حعبرك ........ خليكوا معايا في ذكرياتي مش احسن برضه

وتفضل الجزمة تهري وتنكت وهو ولا معبرها

عارفين انا حبيت الواد ده قوي هو أي فعلا طبق على مراوحي وطلع روحي بس بصراحة الواد متمسك بيا قوووووي رغم كل الأغراءات وهو صامد صمود الأبطال ماكانش عايز يتنازل عني ابدا ..... وهو نال الي هو عايزة

عيل بس ايه بمية شحط , ياعيني الواد بيكبر قدام عنيا وانا حساسس زي ما يكون حته مني ....... نهاري اغبر المقامات محفوظة طبعا بس من حبي ليه يقول الكلام ده ......... اهو جه اهو باين عليه عايز يخرج مشوار مع اصحابه

طب على كده حيلبس جزمته ام رباط .... لااااا ده جاي ناحيتي حيخرج بيا معقولة طب والبرستيج؟؟؟؟ برستيج ايه لا حد يسمعني وانا فيا ايه يعني ده انا اعجبكوا قوي ..... وفعلا حط اول صباع واااااااي الواد ابتدى يتخن ويكبر ورجليه طاااااااالت باين رحلة الألم والعذاب حتبتدي هييييييييه حكم القوي بقى

المهم هو مزقطط مش مهم أي حاجة تانية بقى ....... واخيررررررا اتلبست بعد حرب ضرووووووس

يا ابني انت بتجيب الكلام ده منين الي يسمعك يقول متسقف قوي تقلش جلد طلياني

انا بقراااااا يا جاهلة انت كل همك المنيكير والبديكير

هههههههههه انت ايه يقرة ههههههههههه افتكرت ثووووووووور

اتلمي بقلك والالالالالا ...........

حتصحي القبقاب ..... هااااااااءوووووو كان غيرك اشطر القبقاب خرج مع الست هانم

تحب اصحيلك ابو زراير يعرفك مقامك

مين انت بتقولي مين لالالالا , ده انا رهن اشارة خضرتك ياست الجزم يا سكرة انت

يعني لازم يعني ولا فاكر ماليش ضهر يعني

ماقلنا انت ست الكل ومنك مافيش وانااسف وحقك عليا بس بلاش ابو زرار ده

للدرجة دي خايف منه وعاملي فيها مش عارف مين وعمال تهدد

وانت طلعت ولا حاجة هو ماله خاف ليه ابوزرار عمل فيه ايه

عايزين تعرفوا استنونا الصفحة الجاية

[shahd]

ذكرياتي مع ابو زرار

اما انا كانت ليا حكاية مع ابو زرار انما ليها العجب

ماهو احنا ولاد مصنع واحد بس والجلدة واحدة غرش هو حظي الأسود الي خلاني شبشب وهو جزمة بزرار , يلا كل واحد بياخد نصيبة

الواد ده بقى كان دايما حاطط نقره من نقري ودايما محسسني اني اقل منه

ويبصلي من فوق لتحت ويعملي حركات كده مالهاش لازمة

قمت انا من غيظي رحت نافش جلدي ........ ماهو كله الا كرااااامتي ........

وقلت له ايه بتبصلي كده ليه مش عاجبك ولا ايه .... ولسه ما لحقتش اكمل

واااااااااازززززز بيا اتفاجئ, وانا لما بتفاجئ بتخض ولما بتخض بتنح وانا متنح خلقه....

بحاجة سخننننننننننننة , سخنة مين دي مولللللللعة ,لالالالا دي ملهلبة انا قلت بس دى الراجل ابن صاحب المحل الي جمبينا بيستحمى حماية العيد الكبير ,

قلت مش مهم نستحمل اهم مرتين في السنة.... خليه يستمتع

بس العجيب ان العيد الكبير لسه بدري عليه والصغير كمان ؟؟!! امال ايه الي بيحصل ده وايه الي مولع قفايا ده

مش قفايا وبس ده كل حته فيا اتشوت عـــــ الجمبين

عايز افسفر الحكاية مش عارف؟؟ كل ما اسأل حد يتهرب ..... ,المهم تعبت قووووي وحالتي اتأخرت وجت عربية الأسعاف وخدتني .. طبعا تقرير الدكاترة بيقول ان

عندي تمزق في الفقرات الجلدية وانقباض في القفص النعلي ولابد من الراحة لمدة سفاتاشر شهر علىالأقل

سمعت كلام الدكاترة وريحت حعمل ايه..... لازم استرد صحتي

واسترديت صحتي بعد كفاح ..... بس ما سكتش وانتوا عارفين اني لما بنوي على حاجة بعملها وقررت وانا لمابقرر........

وسألت هو ايه الي حصل ايه الي جابني هنا

الدكتور قالي عن حالتي بكل صراحة وبدون أي تزويق خبط لزق كده........

طب يا دكتور ايه الي وصلني لكده قام قالي حادثة بسيطة ...

بسيطة ايه يا دك ...... كل ده وتقلي بسيطة هو انت كنت عايزني اروح فيها عشان تبقى مستعصية !!!!

فيه ايه رد عليا؟؟؟!!!

قام قالي لا ابدا هوسوء تفاهم بينك وبين ابوزرار

سوووووووء تفاهم...... ياحلالاووووووووتك !!!!!! بس ؟؟؟

بسسسسسسسسسسسسسسسسسسسس

الدكتور( نص نعل) ايوة بس. اهم حاجة انك تستريح وماتفكرش غير في صحتك

طب قلي يادكتور النقابة ( نقابة الجزم) عملت ايه في ابو زرار هو اتسجن واتخلعت زرايره واتقطع جلده؟؟!!

ده مين ده الي يتحبس وتتخلع زرايرة وكمان يتقطع جلده , جلدك ابيض ده ابو زراااااااار ماحدش يستجري يجيب سيرته......ده اتعين وبقى رئيس النقابة ....

اناطبعا عرفت بالمحسوس الحاجة الملهلبة دي كانت ايه ...... ومن يوميها .........

مش لازم اشرح بقى اللبيب بالأشارة يفهم

اناممكن اشرح بس هو باين عليه صحي وانا لازم اخفي الدفتر ده انا مش حمل هزاره التقييييييل

اهو صحي اهو

سلالالالالالالالالالالالالالالالام

اشفكوا في الصفحة الجاية

تم تعديل 14 يونيو 2005 بواسطة شهد

[shahd]

داهية تاخده

دلوقتي اقدر اكمل بعد ما الفك المفترس مشي

كنت بقول ايه ؟ كنت بتقول ايه ياشبشب ؟

ايوة كنت بتكلم عن.......... اففففففففففف ما علينا انسواااااااا خلونا في موضوع النهاردة .

تعرفوا رغم اني قاسيت وعانيت واتهديت وطلعت عيني وبكيت

ايه دهههههههه ايه الدرر ردي يا عيني عليا ؟ بس يا خسارة ماحدش حاسس بيا وبمواهبي المدفونة تحت الرملة ..... حاكم انا اعجبكوا قوي ده

انا لما بحرك شفايفي بس , واخد بالك الحركة لوحدها من غير ما انطق بكلمة واحدة تخلي اجدع راجل بأجدع شنب يضربلي تعظيم سلام

شوف ازاااي

ايه مالكو مش مصدقني ؟؟!!

ولا اكمني حكيتلكو على ابو زرار ؟؟لالالالا ده احنا كنا بنهزر بس و انا حبيت اخليكوا تندمجوا معايا مش اكتر

هو القبقاب وام كعب راحوا فين مش عاويدهم يعني

ده مافيش حد غيري هنا ؟؟ هو في ايه انا مش فاهم

وانا مالي احسن برضه علىالأقل الواحد يعرف يركز بدل الغاغة الي بيعملوها كل يوم

طيب طالما ان ما فيش حد , انا حخش المطبخ اشوفلي لقمة اكلها اصلي جعان قوووووي والواد الدبابة ده طول ماهو ماشي عمال يلغ يلغ ومش هاين عليه يرحمني ويديني لقمة واحدة حتى ؟؟؟ طوووووول الوقت وهو بينده على الشغالة تنضف فيا طب انا بحب النظافة ماااااااشي بس عايز مم

يعني هو والعائلة المصونة ؟ هي دي عائلة دي ؟! دول كل واحد فيهم عيله واضرب في عشرا

يلا امانشوف المطبخ فيه ايه............. اهلا.......ياسلام على النظافة مش فاضل غير انهم ياكلو الحلل

بقلك ايه ارجع مكانك احسن وافتكر الذي مضى واكتب , ما هو انت مالكش في الي جاي فأحسن لك تخليك في الي فات.

طب هما راحوافين بس؟؟ وانت مالك ياحشري

ما انا بطمئن عليهم فيها ايه يعني؟؟ هو انا بكلم مين باين عليا صواميل مخي ضربت

صواميل ؟؟ انت بقيت تستعر من اصلك ولا ايه ؟؟؟؟؟ لا بقى اصحى كده وفوق!!!!! صحينا اهو .....

حفضل طول عمري شبشب ومش حقب على وش الدنيا ؟ ارضى بنصيبك وبلاش طمع انت لاقي .

مش احسن ماكنت تبقى صرصار في بلاعة ولما تكتب مذكراتك تقول مذكرات صرصار في بلاعة ؟ اخييييييييييييييييي؟

صح.. هو انا غلاباوي وطماع كده ليه ده انا سيد الشباشب كلها

على الأقل ممكن افعص أي صرصاراية وانا ماشي عادي بكل بساطه.

انا باين عليااااااااا؟؟ لا ابدا ده في صميم ذكرياتي. قصدي مذكراتي..

كنت دايما بحب ابقى فوق من وانا عيل صغير ؟ طموحاتي كبييييييرة

لولا الي انا فيه دلوقتي ؟ ياجماعة انا لسه صغير بس الهم خلاني احس ان عندي 60 سنة

ده انا ابن 15 والنعل قمر اربعتاااااااشر يا ختي على كمالي, دفنوك يا وشي الكميل وانت لسه في عزك؟؟ متبقاش في فرق بينك وبين ابوصباع لما صباعه يتقطع !!!

انت شتمتان فيا يا شبشب الهم والغم ؟؟؟؟؟؟؟؟؟

مين انت هنا هما بيطلعوا الساعة كاااااااام

ياترى حيحصل ايه

اشفكوا الصفحة الجاية

[shahd]

الهم طايلني وطايلك

في اخر الصفحة الي فاتت دخل عليا ابو صباع زي القضى المستعجل , خلوني اقلكو الي حصل بيني وبينه يوميها

في اليوم ده هو خد على خاطره مني خالص وقالي ايه يعني اكمني بصباع وبلاستك وانت جلد يعني ؟؟!!

قلت له لا ابدا وبعدين انامش قصدي انت الوحيد الي خطر على بالي ساعتها ,

يا سلام ليه يعني حد قالك عليا ملطشششششششة ولا عشان انا في الباث رووووووم

ايه ايه ايه باث ايه يااخويا ؟؟ ده احنا كنا في جرة وطلعنا لبرة..

ياعم لاملطشة ولا حاجه هو في حد يقدر يستغنى عن خدمات صباع سيادتك

ايوة كده اعرفوا قيمتي لحسن.........

لحسن ايييييييييييه ؟؟؟؟؟ حتحرمنا من الميراث يعني

لااااااا اكتر بكتير .. ده انا ممكن اخلكيو تتمنوا اليوم الي تلبسوني فيه .....

طب وايه يعني ياعم هو انت بتهددني انا ليه ؟؟!! هواناالي حلبسك روح كلم الي مشغلينك........

ما انا بقلك اهو عشان تبلغ اسيادك.. ماهو انا مااقعدش في وسط الروائح الفواحة دي وتبقى اخرة خدمة الغز علقة

يا دي النيلة يعني احنا بقى الي قاعدين على قصر والخدم والحشم حولينا ؟؟ مااحنا برضه بننداس

سيبني في همي ارجوووووووك

طب ما تلم همي على همك ونبقى ايد واحدة ؟ ولا انا مش قد المقام ؟؟!!

مقام ايه وبتاع ايه ده احنا شباشب زي بعض رغم اختلاف الأشكال.

هو انت يعني مش شايف ابوزرار وابو رباط وام كعب خرجين يتفسحوا مع بعض واخر انبساط ؟

ده حتى القبقاب معاهم؟؟!! بس مسيروا يرجعلنا اصل الضفر عمره مايطلع من الجلد ولا البلاستك يلا ياعم ولا تزعل

ازعل ايه بس ما انت فيك حته بلاستيكايه اهيه ..... يعني لاتعاريني ولا اعايرك الهم طايلني وطايلك

بس قلي انت كنت داخل المطبخ ليه؟

قلي انت ؟ دخلت ليه

انا اصلي جعان جدااااااااااا

وانا كمان جعان قووووووي

بس المطبخ فاضي ومافيهوش ولا حتى بيضاية ولا اي حاجة .. نعمل ايه طيب انا مش قادر استحمل؟؟

ااااااااااااه يا بطني جعااااااااااااااااان

انا قربت تجيلي قرحة

وانا صباعي قرب يخس 55 كيلو

عايزاكللللللللللللللل

ومين سمعكككككككك

ايه الريحة الحلوة دي ؟؟

دي من عند الجيران .....

طب ماتقرب الكرسي شوية خلينا نطل نشوف طابخين ايه

ياسلام يافالح ولو قفشونا

على الأقل نتقفش واحنا شبعانين احسن ماااا الجوع يخلص علينا

ياترى حيعملوا ايه

وحيقدروا ياكلو فعلا ولا ايه الي حيجرى اشفكوا الصفحة الجاية

[shahd]

حتة غدوة جنااااااااان

مش كنتواعايزين تعرفوا حنعمل ايه انا والواد ابو صباع لماالجوع قرصنا في اليوم المفلس ده

ما هو لوصبر القاتل على المقتول كان مات لوحده اديني جيت وحقلكم

في اليوم ده زي ماسبق وقلت لكم دار نقاش بيني وبين ابو صباع وقررنااننانستكشف الريحة الجميلة دي جاية منين

والي هي طبعا طالعة من شباك مطبخ بيت الجيران عشان تلفح مناخير الغلابة الجعانين الي هو احنا طبعا

وحيث انه لابد من اتخاذ القرار الحاسم في مثل هذه الأمور فقد قررت واناااااااااا......

حفظتوا طبعا شطااااااااار

دار بيني وبين صديقي الحوار التالي:

ابو صباع :يلا يلا حط الكرسي قدام الشباك واطلع

الشبشب:اطلع ازاي بس ده عالي قوي

ابو صباع: طب بص انا حقف على الكرسي وانت اطلع على كتفي

الشبشب:كتف ايه ياعم هوانت فيك كتف اصلا دا انت يادوب ما حصلتش ضفر

ابو صباع: يييييه حنلبخ والا ايه ما بلاش العك بتاعك ده

الشبشب: خلاص طيب ما تزعلش

يلا نطلع بقى انا حموووووت من الجوع يمكن نقدر نخطفلنا رغيف ولا اي حاجة بدل المجاعه الي احنا فيها دي

وفعلا ننجح ويطلع هو بقى على كتفي حاكم انا شديد قوي وماليش حل .. اه ما انا لعيب وبشيل .....حاجات تقييييييلة ومن كتر ماشلت بقى عندي عضلات اجباريه......

وبعج ماطلع الواد ابو صباع

ياابني ما تقول في ايه

اقول ايه ولا ايه ياسلالالالالام

يا ليلة بيضاااااااااا

يا حلاوة ياحلاوووووووووووة

ايه في اييييييييييييه ماتنطق حرقت دمي

لا ما بدهااااااش هات حبل وخلينا نخش والي يحصل يحصل

ونروح نجيب الحبل وننط على المطبخ

ايه الجمال ده دول باين عليهم ناس اغنيا قوي

اشي محمر واشي مشمر

هما حياكلو كل ده امتى ؟؟

والفاكهة والعصير وكمان الحلوووووو

بلاش قر احناناخدلنا لقمتين ترم عضمنا ونمشي على طول

اسمها ترم جلدنا يابلاستك انت

بطل لماضه وسيبنا ناكل قبل ما اصحاب البيت يطبواعلينا وتبقى وقعتنا سوده

ولسه حنبدتي نفتح الحلة ونــــــ...........

اتقفشنا اجري استخبى تحت التلاجه

انت شايف الي انا شايفة

اه شايف يا اخويا

بقى الهيصة دي كلها والأكل الكتير ده مش لأهل البيت

امال لمين؟؟؟؟؟؟؟؟

وفجأه الاقي حد بيشدنا من تحت التلاجه ويقول

انتوا مين وايه الي جابكوا هنا

احنا احناااااا أأأأأأأأأأأأ

انا عارف انكوا من عند جيرانا وجاين هنا عشان الجوع قرصكم

اوكي انا حأكلم ماتقلقوش اصل احنااهل الكرم

طب ممكن سؤال هو الأكل ده ليكم فعلا

اه لينامستغرب ليه

مش مستغرب , بس اشمعنى العيلة الي عندنا بخلانين علينا حته بالفاتفيت؟؟!!

ماهوانت لازم تعرف ان مش كل الشباشب اتساوت

اشفكوا الصفحة الجاية

[shahd]

ياعيني على الشباب وايامه

اديني اهو بقيت شاب زي الفل طول بعرض بعضلات , مقاسي بقى 73 !!!مقاس غوريلا عارف ..... ما اصل من الحب ما قتل ولا نسيتوا

ايووووووة هو ده ................ مش انا لوحدي الي كبرت كل الحوليا كبروا وبقوا شباب زي العسل .... عسل اسود ومهبب

حتى المقصعه ام كعب زادت 5 سم وابو زرار اتركبتلو زرارير جديدة وابو رباط اتركبلوا وش اصله كان بقفا بس والقبقاب اترقى وبقى عنده فله علىالجمب

اما ابو صباع فبقى ابو ذراع ....... هييييييه كله زي ماهو مع بعض التحسينات

ماهو ما فيش حاجة جديدة تخش البيت ده اصل هم عشرين بشكللللللل ...... هي باين عليها اشغال شاقة ؟؟!!

بس انا راضي ومبسوط كمان..... اه ماتستغربوش اصل واحد زي كان حيروح فين يعني اخرتي الزبالة .... يعني كده ارحم على الأقل اسمي عايش وسط عيلة .... هي صحيح عيلة جربانة بس اهو اهون من قرف الزبالة

هو انا بضحك على نفسي ولا ايه ياعم الزبالة على راسي من فوق جتهم القررررررف .......... لاطفولتي عشتها ولاوانا صبي عرفت اتهنى وباين على شبابي حيضيع هدر ..... يلا كل شبشب بياخد نصيبة .... اسكت وحط لسانك جو جلدك وارضى بنصيبك

بس انا شاب وليا طموحات ؟؟؟

طموحات ايه ياابو طموحات طب خلي غيرك يتكلم

غيري مين يعني ما كله محصل بعضه اخرتها مزبلة التاريخ

تاريخ ايه وجغرافية ايه انت مين اصلا انت اخرتك في الزريبة الي جمبينا ده لو ما اااااااااااا

ماااااااااااااا ايه؟؟؟

مش دلوقتي حتعرف بعدين خليك على عماك احسن

هي ايه الحكاية انا مش فاهم بس مش مهم قال يا خبر بفلوس بكره يبقى ببلاش

تعرفوا نفسي في ايه ؟؟

نفسي اقعد في وسط اهلي واخواتي قعدة صفا كده ونشرب شاي وناكل جاتوه وياسلالالالالالالالام لو نسهر سهرة جميلة كده ونختمها بحرجين معسل ....

يارااااااايق ...

رايق ياساتر يعني حتىالحلم مستخسرينوا فيا ......

طب فز قوم البيه بتاعك وصل وباين عليه كده عايز يقلك كلمة سر

كلمة سر ؟؟!! عقبال الهانم بتاعتك توصل اشوف فيكي يووووم يا بعيدة

هههههههه طب اجري اجري قبل ما تتمط زيادة ......!!؟؟؟

امشي جتك خيبة كده وانت الكعب بتاعك عامل زي رقبة الفرخة المخنوقه

هي على طول كده بتحطمني ومش بتهنيني على حاجه يعني انا كنت ناقص الجعر الي انا معاشره لما حتجيلي البتاعة دي ....

سدت نفسي عن الكتابة .. يييييييييييييه اهو وصل هو كمان يظهر ان عندها حق

باين عليا وحشته مع اني لسه معاه من خمس ثواني ....

اما اشوف حيوديني على فين

عايزين تعرفوا؟؟

اشفكوا الصفحة الجاية

[أبوخطوه]

فعلا حاجه كده تحفه... انتى مشكله...حاجه كده تجرى الريق للكتابه...صحيح أنا لسه جديد عليكم لكن ...الكتاب باين من عنوانه... :rolleyes:

[shahd]

فعلا حاجه كده تحفه... انتى مشكله...حاجه كده تجرى الريق للكتابه...صحيح أنا لسه جديد عليكم لكن ...الكتاب باين من عنوانه... :rolleyes:

<{POST_SNAPBACK}>

منووووور يا باشا ما انا برضه لسه جديده, ميرسي جداعلىردك الجميل ده وكلك زوووووق :)

[shahd]

مش انا رحت الديسكو

قال ايه وانا الي كان كل همي اروح اشرب شيشة في حته هادية كده من اهلي وعيلتي

اقوم اروح ديسكووو ...... ياحلاوة ياحلاوة

الواد ده سكره بياخدني معاه في كل مكان ومش بيعبر لا ابو زرار ولا ابو رباط غير كووول فين وفين يلا يستاهلو عشان يعرفوا قيمتي....

حدش فيكو راح ديسكو ؟؟!!

عارف ان اغلبكو رحتوه بس لا ممكن ابدا يكون زي الي انا رحته

يا خراااااااااااشي ........ يا للهوووووووول

ده انا شفت ا لعجب !! وااااااااااااااااااووووووو ......اشي احمريكا واشي اصفريكا ....

عارفين لقيت مين هناك ؟؟

فكرررررر

حذررر, فذرررررر

امممممممممم فيونكةةةةةةةة

بقت شابة بفيونكتنين وضفيرة

دي نضفة بشكل باين عليها اتجوزت واحد متريش

بس ايه الشبشب المهزأ ده الي يسيب المودام بتاعته تيجي هنا لوحدها؟؟

لالالا ديمش لو حدها باين عليهاجاية مع شلة .......

ثواني كده اطقس اشوف مين دول؟؟

اخص ومليون اخص , ثم اخييييييييي؟ ويععععععععع

دي اشكال تمشي معاها يا فيونكتي ؟؟

وانت مال اهلك

لألأ من امتى طولة اللسان دي؟

طولة لسان ايه ياابو نص لسان انت لسه شفت حاجة

يا حبيبتي انا مش عايزك تمشي مع الشلة البايظة دي دول مشيهم بطاااااااااااال

حبيبتك ؟؟؟؟؟؟؟!!!!!!!!

حبك برص وعشرة خرص

وانت مالك تكنش من بقية اهلي

جوززززززززززي

خطيبيييييييييييييي

قريبييييييييييييييييي

انت اتغيرتي خاااااالص .

لالالااحنا لينا قعدة انامش حسيبك في الوضع المنحط الي انت فيه

منحط؟؟؟؟؟؟؟ يااخي ان شالله يحطوك على نقالة

يا ابو زرار رررررررر

ياابو ربااااااااااااط

انت يااحمريكاااااااااااااااا

تعاليلي يا اصفريكااااااااااااااااا

وجب يا فيونكااااااااااااااية

امرييييييييييي

اندهولي مدير المخروبة دي

انا مش عارفة هما يعني مش عارفين يستنضفوا

زباين ايه دي حاجة تفلقققققققق

وبناء على اوامر اميرة الأمراء وست الستات

اتشال هيلة بيلة و من الشباك عدلللللللللل

وياريت على كده وبس

ده انا لقيت شلة شباشب صيع تحت وكأنهم كانوا مستنيني

وفين يوجعك وادييييييييييييي

حسرة عليا حتى الخروجة الي قلت حنبسط فيها والاقي نصي التاني يجرالي فيها كده؟؟ مووووووش ده ظلم؟؟؟؟

الي انا مستغربله فين الغوريلا الي خدني معاه ؟؟

يعني هو يرقص ويتنطط ويسبني انا من غير مايسأل عني

طب هوحيروح ازاي حافي يعني؟؟!!

الا صحيح هو حيروح ازاي؟؟!!

عايزين تعرفوا ؟؟

استنوني الصفحة الجاية

[shahd]

شوف الواااااد

بقى انا الشبشب المحترررررم صاحب الأصل العريق اتهان بالشكل ده وكرامتي تتمرمغ في الوحل ؟؟!!

اااااااه يا نعلي يااااااااني

هما عمالين لبعض كده ليه ؟؟؟ هي الشابشب دي مالهاش صاحب؟؟

وانا صاحبي فين سايبني اتبهدل وراح فين ؟؟ ولا فالح تطبق على مراواحي في وقت راحتي ,ولما احتاجلك بجد تسبني وتجري؟؟؟؟؟........ وحتجري بأيه ياحسرة ولا يمكن لقيت حد غيري يلمك

وطول الوقت وانا بتضرب ومستحمل لحد ما شوال الرز المسوس

وصل ماسك في ايده .. 30 حتة بيتزا حجم عائلي + 22 بيسبسي ده غير الي في الي بيلغه طبعا

دول بس للقزقزة يعني مسافة السكة وطبعا مع المجهود الجبار الي بيعمله نسي انه ماشي حافي واخيييييييرا افتكرني

وخدني بقى ورحنا بيت العز يا بيتنا

بيت الهم يا بتنا ........ بيت الفقر يا بيتنا

يا باشا ما ترميلي حته ...... حتة صغنوووووونه

طب شفطه .... انا ريقي نشف

ولا كأني بكلم حيطة .. يلا ان شالله تزوووووور

كح كح كح كحححححححححححححححححححححح

كح كح كحححححححححححح

هيييييييييييييه بيكح احسن يا فقري يا بخيل

ايه ده يادي النيييييييلة هو مافيش فايدة برضه بتهبر

حار ونار في جتتك ..... هو مش رايح البيت ولا ايه حيوديني فين تاني .... انا مش ناقص جتتي خلصانة

ده داخل محل اهو بس ده مش محل جزم وهو اصلا مش بيشتري ؟؟

طيب عايز ايه ولا غاوي يتعبتني بس ؟؟؟؟؟؟

وفضل ماشي من شارع لشارع ومن حارة لحارة

وفي كل مرة يستريح خمس دقايق على اي كرسي قدامه ويادوب لسه حيقعد يقوم الكرسي يودع خالص على القرافة عدل .. اما الترابيزات فياعيني مش مابتلحقش حتى تروح القرافة ...... احفر وادفن على طول كله في مكانه ....

وطبعا الضحايا كانوا حوالي 555 كرسي

999 طربيزة في غرفة الأنعاش

وبعد ان وصلت الأنباء لكراسي طربيزات القهاوي بل والشوارع والحواري المجاورة وانتشر الخبر في اذاعة الكرررسترابيزات

بقت كل الكراسي تجريييييييي وتوقع الزباين والطربيزات تتقلب في وش الزباين

واخيرا وصلنا بيتنا واترمى الفك المفترس على سريره قال ايه حينام ؟؟؟؟؟

تنام ايييييييييييه ده كان زمان ......... السرير سمع الخبر

اشفكوا الصفحة الجاية

[shahd]

الا ليت الشباب وان دي كام باك

وراح الشباب والشعر شاب

هييييييييييييه دنياااااااااااا ... كانت ايام وخصوصا يوم الديسكو كح كح كح ...... اديني كباية ميه يا بنتي

ايه مالك بتكح ليه خلاص عجزت

اعجز ايه ده انا لسه في عزي يعني ايه 80 سنة ؟؟

لا ولاحاجة ده انت في عز شبابك

ياشيخ انت بقيت نص نعل انا عارفة هو مش بيرميك ليه

لما تترمي انت يا ام كعب طالع من السلخانة ابقى اترمي انا

وبعدين انت مغلولة ليه قاعد على دماغك انا ؟؟ بشاركك في رجلين الست هانم الي مش عارفينلها وش من قفا ؟؟

لااااااااا احفظ ادبك.... ده انت يحصلك الشرف لو فكرت واتنازلت وحطت رجليها فيك يامعفن انت

لألألأ انت بتطولي لسانك عليا

اكمني بقيت جلدة كبيرة ومش حعرف اجري وراكي زي زمان؟؟!!

فاكرة زمان يا ام كعب

اه فاكرة كانت ايام فيها الحلو وفيها المرر

طب بالمناسبة ايه رأيك تعمليلي فنجان قهوة وكيكاية ونقعد نفتكر الماضي

بقلك ايه امشي من قدامي هو انا فاضيالك يا عجوز

ومش فاضيالي ليه يعني وراكي الديوان يا خيي

لا مش الديوان يااا حدق ورايا ندوة ثقافيه

ايه ايه ايه ؟؟؟ من امتى ده انت مش بتفكي الخط حتى

لااااااااا ده كان زمان ؟؟

ازاي يعني؟؟

انا اصلي اتعلمت وخدت البك بك

بك بك ايه ده

البكالوريوس بس بدلعها

يا خفة دمك

طيب يا مثقفة

خدتيه في ايه

بعدين بعدين اقلك, اصل الحكاية فوق مستواك المتواضع

مستوايا انا الي متواضع

طيب يا عالمة عصرك وزمانك

ياعاللللللللللللمممممممممممممممة

يلا يلا روحي الندوة الثقافيه

ههههههههه قال ثقافيه قال

بقى كده يا شبشب ماشي اما ارجعلك

ياترى لما حترجع ايه الي حيحصل

اشفكو الصفحة الجاية

[shahd]

سن ايه انا لسه في عزي

الواحد كل يوم عن التاني صحتى في النازل وتعبان على الأخر, هو اناباينلي عجرزت ولا ايه العبارة

شكلي كده عندي مورتيزم , يااااااه هو جلدي رخي من بدري ليه بس ده انا لسه في عزي

يا اختي كميلة هو انت فاكر نفسك ابن 25 ,يا مدهول انت بقى عندك 80 سنة

في ايه يا مفترية جيتي امتى ؟؟؟؟؟؟

من شويه وانت بتكتب في اخر ايامك

اخر ايامي ايه ده انا قاعدلك لحد مايبقى عندي 150 سنة وحدفنك بأديا دول

اديك اجري اجري شوف انت فاضلك ايه؟؟!!

هو انت لسه حتقاوح يا عم روووووووح,داري خيبتك

اروح فين هو انا قادر اروح ولا اجي ,,,,, بقلك ايه ناوليني دوا الضغط من فوق الكومودينو

وايه الي طلعه فوق من طولك , قال يعني عمود نور؟؟

يا بنتي ارحميني انا في مقام والدك

والدييييييييييي!!!!!

انت والديييييييي لاااااااا بقلك ايه انا والدي كان شبشب جلد اصلي محتررررررررم

انما انت جلد تقليييييييييد, ايش جاب لجاب ايش جاب الشبشب للقبقاب!!.

وفضلت تناقر فيا لحد ماهدت حيلي .

وبيني وبينكوا انا مش فايقلها اصلي كنت بفكر في مستقبلي , وايامي الي جاية........ حاكم انا لازم افكر في خطة مستقبليه مزبووووووووطة

ياترى الدنيا مخبيالك ايه يا شبشب ؟؟

ياترى حتعيش كاااااااااام سنة بعد النهاردة ,,

واسألة كتييييييرة بتدور في بال اي واحد في سني لسه ما تخطاش سن المراهقة

ايه عندكوا اعتراض انا لسه في عزززززززززي

ياعمووووووووووودي الفقررررررررررري ياااااااااااني

بس برضه لسهههههههههههه

اديني دوا القلب يا بت , العمر مش بعزقه

انا لسه ما دخلتش دنيا...

اشفكوا الصفحة الجاية

[shahd]

ماكنش العشم

اديني راقد بقالي ست اشهر عيان وفي النفس الأخير والجعر الجربان ولا معبرني ولاكأني كنت مستحمله وشايلة على اكتافي طول السنين دي ؟؟

هيييييييييييه حقول ايه بس يا خسارة كل يوم قضيته معاه .... بقى بعد ده كله ما يكلفش نفسه حتى ويجي يزورني ويجيب معاه بوكيه ورد

ولا حتتة لحمة ولا حتى صنية مكرونة بالباشميل

حسرة عليا وعلى عمري الي ضاع مني ....

ايوة مين الي بيخبط ده تلاقيه هو .......

مين ام كعب ??

ايوة طبعا ليه هو انا اقدر اسيبك دي العشرة ما تهونش يا اخويا

اصيلة يا كعوبة اصيلة واحسن من غيرك

شوف انا جايبالك مين معايا ؟؟

ابو زرار وابو رباط وابو صباع والقبقاب كلهم جاين يطمنوا عليك .........

كلهم جاين عشاني يااااااااااااادي الهناااا يادي الهناااااااا

تعالى شوف واسمع بنفسك ..... اهو انا عندي الي يسأل عليا مش انت وبس .... اتففضلوا اتفضلوا يا الف مرحب

يااااااااااااه زيارتكو دي حسستني ان ابن اربعتااااااشر

فيونكتي ايه رأيك تتجوزيني وانا اعيشك احسن عيشة وسيبك من المهزأ الي انت متجوزاه

حتى وانت بتمووووووت برضه مش ناوي تتلم

انا حمشي خسارة فيك الزيارة

لالالالالا يا فيونكتي انا ااااااااسف مش اقصصصصد

كح كح كححححححححححححح

هو ايه اصله ده هو انا ماليش نفس !!! محروم من كل حاجة حتى الهزار!!!

وتروح ام كعب تجري ورا ام فيونكة عشان تاخد بخاطرها وتراضيها, على ايه انا مش عارف ؟؟ وفيها ا يه لما اقول كده يعني ؟؟ لالالا ده اسمه دلع مرق وانا مش بحب المياعة

مش بتحب ايه ؟؟ده انت طينت الدنيا هو في حد يطلب طلب زي ده حتى لو كان بيهزر؟؟!!

ومين قالك اني بهزر

كمان يا بجاحتكككككككك

ويرد ابو زرار : بقلكوا ايه يا جماعه ده باين عليه مخه ضرب خلاص ..... يلا بينا احنا قبل مانتعدي

تتعدوا لييييييييييييه شايفني جرباااااااااان ولا جرباااااااااااان ولايعني كنت جربااااااااااان

لا مش جربان ...... ده انت الجرب نفسه

امشوا يا جماعة خلصووووووونا

ولاقيت نفسي لوحدي من غير لأ انيس ولا ونيس ولا صاحب وكل ده ليه عشان عجزت وما بقاليش قيمة ولا ضهر اتسند عليه

ضهر ايه بس انا الي كنت بسند ولا عمري اتسندت اقوم لما جلدي يرخى ونعلي يتقطع مالاقيش الي ياخد بيدي ويقف جمبي

معقووووووولة دي ؟؟؟ ما كانش العشم يا صاحبي

ويخش عليا اخيرا ويقعد على الكرسي الي انا متلقح تحته

وانا قاعد بستنى نظره من عنية طله, بصة ,اي حاجة

وكل ده من غير اي فايدة بالعكس ...

عارفين كان شايل ايه معاه؟؟؟؟؟؟

علبة فيها شبشب جديد جلد اصلي من بتاع بره

وراح مطلعه من العلبه ولبسه وهو فرحاااااااان قوي زي البقرة يبوم فرحها

قلت معلش خليه يتهنى انا خلاص بقيت مهكع وراحت عليا

بس كل ده مش مهم ولا اثر فيا ولا نزل الدمعه من عنيا ابدااااااااا

اهئ اهئ اهئ اهئئئئئئئئئئئئئئئئئئئ

الي حرق دمي وعذبني وحز في نفسي انه زقني برجليه

كأنه بيشوط كورة وفتح الباب وراح راميني من فوووووووووق العمارة للشارع .

وقالها بعضمة لسانه الي مالهاش علاقة بألسنة بني البشر

خلاص ياشبشبي العزيز كفاية عليك كده انت حتاخد عمرك وعمر غيرك ؟؟؟؟؟؟

واتدحرجت زي الكورة لحد ما وصلت لزريبة المعييييييز

رماني بعد كل الي عملته عشانه من غير حتى ما يديني مكافأة نهاية خدمة !!!!!!!!

استغنى عني وانا محتاجله ؟؟؟؟ فعلا بني ادم غدااااااااار

طب كان رماني في حته عدلة ......... في صفيحة زبالة اوتيل خمس نجوووووم مثلا مش زريبة....

وبعدين انا شبشب محترررررررررم ومش وش بهدلة ...... ليه بس كده ؟؟؟

بقى انا ببرستيجي ده تبقى دي اخرتي ؟؟

زربية معييييييييييز ليه يعني؟؟؟

مافيش رحمة مافيش اوحساس

اوخص والف اوخصصصصصصصصصص

بس هو الخسران ؟؟ مش حيلاقي حد يستحمل قرفه زيي خاااااالص

ده انا كنت ستر وغطا عليه ... خلي صاحبك الجديد ينفعك

وقعدت في الزيبة لحد ما بقى عندي 90 سنة

ولقيته جايلي يجري وهوحافي

جي ليه؟؟

بتدور علىايه؟؟

وبعد ايه؟؟

وعايز ايه؟؟

ما خلاص كله راح وانتهى

روح شوف صاحبك الي رمتني عشانه, يمكن يقدر يلم الي فضل فيك لكن انا خلاص ....

عرفت ان العيشة هنا وسط المعيييييز انضف بمليون مرةمن العيشة مع الي من عينتك

سيبني هنا مع الي حيعرفوا قيمتي وانا حي بيكرموني , وانا ميت حيفتكروني بكلمة طيبة

روح شوف مصلحتك وسيبني انا اعيش اليومين الي فاضلنلي من غير اهانات ولا بهدلة

امشي دلوقتي احسن لك عشان المكان ده ممنوع فيه دخول البشر

ولا انت مابتعرفش تقرا ؟؟

طريقك اخضر يااااااااااااااا صاحبي

كنتم مع مذكرات شبشب