عن لعب البلى .. أسأل

[عادل أبوزيد]

بينى و بين نفسى أشعر بنوع من الحرج عندما يستغرقنى المرح أحيانا !! أكيد هناك شئ خطأ.

و ماذا عن لعب البلى ؟

الأمر ببساطة و كما سبق أن ذكرت فى أحد موضوعات الرياضة أنى من هؤلاء الذين لسبب أو لأخر لم يقربوا الرياضة فى حياتهم ... و لا حتى لعب البلى.

و بدأت "على كبر" أذهب إلى النادى و أمارس بعض تمارين اللياقة و أمشى بعض الوقت .. و هذا يمثل نمطا غريبا للحياة كنت محروما منه بلا سبب معروف.

فى الأسابيع الأخيرة قرر النادى الأهلى تكوين أسر لدعم العلاقات الإجتماعية بين الأعضاء ......

و تكونت أسرة إسمها الوفاء و كل الأعضاء فيها ممن تجاوزوا الستين من العمر و بالتالى مجال ممارسة الرياضة لا يزيد عن المشى و قليل من السباحة و بعض تمارين اللياقة البدنية و بعدها ليس عننا إلا الطاولة و الشطرنج و الدومينو و كلها للأسف خارج نطاق إهتماماتى.

عن لى أن أبحث عن اللعبات الشعبية التى كنت أراها أو أمارسها على إستحياء فى طفولتى و من تلك الألعاب لعب البلى.

كلما سألت شخصا تبدو على وجهه إمارات السعادة ربما للذكريات التى يستدعيها فى مخيلته

و لكن لم يدلنى أحد على أنواع لعب البلى و قواعده ... إلخ

على الإنترنت لم أجد شيئا بالعربية ووجدت العديد باللغة الإنجليزية

موقع و كتب عن أساسيات لعب البلى

أتصور من بين أعضاء محاورات المصريين ذوى الطفولة النشطة و الإهتمامات الرياضية من يستطيع إفادتى بأنواع لعب البلى و قواعد اللعب لعلنى أستطيع إدخال هذه اللعبة إلى النادى الأهلى

[yasovinas]

ياه يا استاذ عادل بلي ايااااااام

شوف يا استاذي الفاضل كنا زمان بنلعب ترنجيله وهي عبارة عن كل واحد بيلعب بالاب بتاعه (البلي نوعان بليه وأب) الاب هو اللى بتضرب بيه والبلي هو اللي بينضرب الترنجيله دي عباره عن حفرة واحيانا دائرة بالطباشير على الارض من يدخل الاب بتاعه فيها يكسب وكل دور على حسب الاتفاق ممكن بليه ممكن بليتين

كمان كان فيه طسه وشبر

الطسه وشبر دي عباره عن كل واحد يرمي الاب بتاعه ويحاول يخبط اب المنافسين ودي هي الطسه ولو طسيت تاخد الاب اللي طسيته او لو كانت المسافه اقل من الشبرتيبقى خسران ويروح عليك الاب بتاعك

ايضا في المثلث وهو عبارة عم مثلث مرسوم بالطباشير على الارض ويقف جميع المتبارين على خط واحد يبعد عن هذا المثلث مسافه معقولة ويضع كل واحد من المتسابقين بليه على احد رؤوس هذا المثلث طبعا اذا زاد عدد المتسابقين عن ثلاثه يوضع الباقي داخل المثلث ويبدأ كل واحد بمحاولة اخراج اكبر عدد من البلي من المثلث وما تنجح في اخراجه تاخذه حلال عليك

هناك العاب اخرى كثيره منها جوز ولا فرد وهي ان ترج البلي في ايدك ثم تاخذ بعضه في قبضة ايدك المقفوله ويتوقع الاخر عدد زوجي ام عدد فردي اذا كان توقعه صحيح حلال عليه كل ما في الايد وييبقى هو اللي يلعب واذا اخطأ يعطيك نفس العدد الموجود باليد وتكمل انت

العب واستمتع يا استاذ عادل ولو عايزين محترفين ممكن اتعاقد مع الفريق

ياسو فيناس

بطل الالعاب الاوليمبيه بكفر عبده رشدي اسكندريه

لرياضة البلي لمسافات طويله

[ابو خليل]

بعد ما ذكره اخي yasovinasعن رياضة البلي .. ( رياضتي المفضلة صغيرا ) لا استطيع أن اضيف شيئا !

وهي علي فكرة لعبة فرعونية قديمة ورأيت عدة صور فرعونية وهم يمارسون لعبة البلي ..

وقد اشتقت منها لعبات معاصرة مثل البولينج والجولف ... الخ ..

وبعد ما قالته عزيزي ياسو لا يمكنني ألا أن اضيف اضافات بسيطة من ألعاب البلي :

1- البلي مسافات طويلة ..

يقوم لاعب أو اثنين بلعب هذه اللعبة ، ويجب ان تلعب في مسافات طويلة ، وهي مفيدة في رياضة الجري ، وهي اشبه بالجولف ..

حيث يقوم الاعب الأول برمي بليته .. ثم يحاول الثاني من نفس نقطة لعب الأول أن يصيب البلية الأولى ،ـ واذا استطاع وهذا صعب من اول رمية فقد كسب نقطة ، واذا طاشت البلية فعلي اللاعب الأول ان يحاول ان يصيب بلية اللاعب الثاني .. و هذا تلاحظ ان رمي البليات يجعلك تتقدم في المشي شوية شوية ...

وكنا نجعلك - ونحن اطفال - الفائز يضرب المهزوم عشر ( شلوت ) ولا احبذ أن هذا ، ومن الأفضل لك أن تبحث عن جوائز أكثر احتراما !!

2- النُقرة

وهي اشبه بلعبة البولينج ..

أعمل نقرة في الأرضية ( بس أوعي حد يشوفك يعمل لك فضيحة ) وتكون نقرة غير عميقة ، يعني 3 أو 4 سم

وحط في النقرة شوية بلي ( يعني كل متسابق يحط مثلا 4 أو 5 بليات )

أوقفوا صف حسب قدراتكم

يعني لو متوسط النظر عندكم 6 علي 6 اقفوا علي بعد 3 متر .. وكلما نقص متوسط النظر تقدموا اكثر من النقرة ..

يبدأ كل لاعب رمي الطس ( وهو البلية الكبيرة ونسميها (دكر ) ) علي النقرة

ومن يخرج البلي خارج النقرة يحصل علي البلي الذي خرج من النقرة .. وفي النهاية يجمع كل لاعب البلي ..

واتمنى ألا تحدث بينكم مشاجرات كالتي كانت تحدث بيننا في اثناء جمع محصلة البلي !!

وربما نلتقي في مصر قريبا لنمارس هذه اللعبة !

بمالمناسبة ألم تشاهد كاس العالم في البلي في شهر فبراير الماضي ؟؟

[عصام أبوالفتح]

ياه :D

رجعتنا يا دكتور بموضوعك ده 20 سنة ورا ..

يا أخ ياسو اجاباتك دايماً وافيه ومتسبش للى وراك حاجة .. :D

بس أبشرك عندى اضافة ..

النوعين اللى حضرتك قولت عليهم .. كان اسم البلى الصغير بلية والكبير كان اسمه نيكل .. ممكن لانه كان بيكون تقيل ومصنوع من النيكل .. وكنا زمااااااااان نتصاحب على اصحاب

ورش الحدادة ونخليهم يخرطوا النيكل ده على كبير مرة ونص حجم البلية العادى ..

وكان فى نوع صغير جدا نصف حجم البلية .. ده كان للمنظرة بس الحقيقة ..و مكنش حد بيلعب بيه لانه صعب يتشاف اصلاً ..

وكان فى تفنن فى القوانين ..لكن انا علشان اخوانجى من صغرى ;) كنت مبحبش اخد البلى اللى

باكسبه .. كنت حريف اوى .. بس كنت باعتبر اللعب علشان البلى حرام زى القمار .. نلعب وكل واحد معاه بلية ..

وعلشان كده كنت باجمع البلى المميز أوى وفى زمنا كان البلى الصافى الرايق اللى لون واحد هو المميز .

الأنواع اللى ذكرها أخونا ياسو والأخ ابو خليل ( اللى واضح انه كان شورعى زيى :) ) كلها مارستها باحتراف .. وفعلا البلى مصدر الجولف والبولينج وكمان .. البلياردو ..

وفيه النوع اللى هاضيفه هو ان كل المشاركين يضعوا بليهم على صف واحد ويقفوا بعيد وننشن على البلى بالنيكل والشاطر اللى يطلع اكبر عدد من الصف ..

افتكر قانون نوت تنظيف ( NOT بمعنى مفيش ) .. وهو انه مينفعش تنظف الطريق ما بين البلى وبعضه .. نوع من غتاتة العيال لا أكثر :wub:

كانت ايام جميلة جدا .. :D

كنت فى محل لعب اطفال ولقيت اكياس بلى الكيس فيه 100 بلية .. جبت كيس لاولاد العيلة لما رجعت اجازة .. وفرحوا اوى بيه

وللاسف مكنش فيه وقت العب معاهم :)

دلوقتى بنتى كبرت على انها تبلعه .. بافكر اجيب كيس :)

بس حد يبعتلنا نيكلين الله يخليكم .. النيكل بخمس بليات .. اوكى :D

[عصام أبوالفتح]

بس علشان محدش يتريق علينا .. مع البلى لعبت كورة وركبت عجل ولعبت كونغفو .. وكمان العقلة وعسكر وحرامية وشيك على العالى واستغماية .. ونط الحبل و...

وكل لعب الأطفال اللى تتخيلوها ..

الآن مشى ودراجات واحيانا جرى مع مشى فى يوم واللى بعده دراجة هوائية .. مهمة جدا الحقيقة واحسن بكثييييييييييييير من صالات الجيم اللى الواحد بيتعقد فيها وخلاص ..

وطبعا لما اشترى كيس البلى هايبقى مشى وجرى وعجلة وبلى .. على وزن ضحك ولعب وجد وحب ...:wub:

[yasovinas]

طيب يا عصام لعبت صياد وحمام :unsure:

ولعبت كهرباء شد الكوبس :blink:

ولعبت كيك على العالي وكيك على الواطي :P

ولعبت نطه اسكندراني :D

ولعبت اولنا الجن :unsure:

ولعبت ولا ينزل ولا يتزلزل mfb:

طيب وركبت كرنك ::

وركبت مستعجله :lol:

ولعبت بالطوق

طبعا ما ركبتش دنسوار

ولا رحتش لغاية البرميل :)

[se_ Elsyed]

ياه .. وكنا زمااااااااان نتصاحب على اصحاب

ورش الحدادة ونخليهم يخرطوا النيكل ده على كبير مرة ونص حجم البلية العادى ..

<{POST_SNAPBACK}>

يا عم شرا العبد ولا تربيته .. الواحد لسه هايروح لخراط وورشة والكلام من ده ..

إحنا كنا بناخد رولمان البلي اللي بيبقى موجود في العجل ..ومشي حالك ..

من وأنا صغير كان عندي عقلية تجارية معملية بحته .. فكنت بألعب بلي كأي طفل صغير .. وفي نفس الوقت بأتاجر فيه وبأبيع للمحلات وللعيال أصحابي ..لإني كنت بأكسب لي في الشهر مثلاً قد 300 إلى 400 بليه .. وقليلاً لما كنت بأخسر عشان كنت محترف .. فده كله كنت هاوديه فين ؟

الغريب بقى إن والدي ووالدتي كانوا بيحاربوني وواقفين في طريق مستقبلي وتجارتي الرائجة ..وما كانوش بيرضوا أدخل البيت ومعايا البلي .. ويانا يا البلي ؟

المهم كنا نبتكر حلول أنا وأخويا الكبير ونعمل مخازن بلي خارج البيت وفي أماكن يصعب الوصول إليها .. وساعات كنا نحفر لها حفر في الشوارع الميحطة وندفنها ( فيلم العار إقتبس مننا الأفكار دي ) بس نعلمها بعلامة مميزة عشان نقدر نرجع لها بسهولة ...

بس يا خسارة .. موسم البلي عادة لا يستمر أكثر من 3 شهور في السنة - مش عارف إيه السبب أو ليه ؟- فكنا نخزن البلي للسنة الجاية وندخل بقى إما على الكازوز بتاع قزايز البيبس .. أو نوا المشمش اللي كنا بنسمية ( نقى ) ... والحاجات دي ما فيهاش مكسب وكانت بتقف عليه بخسارة لإن ممكن الحصول عليها بسهولة ... وتخلص بقى ألعاب المكسب والخسارة ندخل على النحل ( الخشب المخروطي الشكل ) واللي كنا بنتفنن في زخرفته بحيث النحلة لما تدور تدي شكل جميل ونحاول نقلل مقاومتها للهوا علشن تبقى أطول فترة ممكنة دايرة .. وفي أيام الهوا والرياح العاتية بنعمل طيارات ورق ونخرب ميزانية المصروف عشان نشتري خيط بأطول قدر ممكن بحيث طيراتنا تبقى أعلى من أي طيارة تانية .. أو نركز على قوة الخيط عشان نوقع بها طيارات العدو ( وياريتنا فلحنا فمع وجود كوادر طيران قوية إلا إننا إتكسوحنا في 67 .. لكن برضوا ربنا عوضنا بالنسر الذهبي .. الأخ قائد العبور للمستقبل .. ما هو دفعتنا برضوا :D )

لحد دلوقت من وقت للتاني بأحاول أمشي إيدي في لعب البلي علشان ما نساش .. بس بطلت أجيبه عشان برضوا العيال الصغيرة عمر وعلي بيبلعوه والعملية مش ناقصة ..لكن لما يكبروا شويه ناوي أنقل لهم عُصارة خبرتي ...

[عصام أبوالفتح]

هههههههههههههههههههههه

ابسط يا أستاذ عادل .. الأخوة الأعزاء ياسو و س س اثبتوا بما لا يدع مجالا للشك .. ان المنتدى مليان شوارعية من العيار التقيل .. ان شاء الله نعمل معاهم انا وعزيزى ابو خليل

منتخب حارات المحاورات

:D :)

[Alshiekh]

طيب يا عصام لعبت صياد وحمام  :)

ولعبت كهرباء شد الكوبس :D

ولعبت كيك على العالي وكيك على الواطي

ولعبت نطه اسكندراني  :)

ولعبت اولنا الجن :)

ولعبت ولا ينزل ولا يتزلزل  :sad:

طيب وركبت كرنك  ::

وركبت مستعجله

ولعبت بالطوق

طبعا ما ركبتش دنسوار

ولا رحتش لغاية البرميل  :D

<{POST_SNAPBACK}>

شكلك كده بيقول اسكندرانى :D :D

شيلوه من عليا احسن اشرحه :lol:

[se_ Elsyed]

طب حد فاكر البلي الصيني اللي كان بيُصنع من الخزف مش من الزجاج زي البلي العادي ؟

واللي كان معاه شويه من الصيني ده كان بيبقى أرستقراطي ومن كِبار المُلاك ..

هيييييييييه أيام ورا أيام لا الجرح يهدى ولا الرجا بينام ...

[yasovinas]

طيب يا عصام لعبت صياد وحمام  :angry:

ولعبت كهرباء شد الكوبس :blink:

ولعبت كيك على العالي وكيك على الواطي

ولعبت نطه اسكندراني  :D

ولعبت اولنا الجن :unsure:

ولعبت ولا ينزل ولا يتزلزل  mfb:

طيب وركبت كرنك  ::

وركبت مستعجله

ولعبت بالطوق

طبعا ما ركبتش دنسوار

ولا رحتش لغاية البرميل  :wub:

<{POST_SNAPBACK}>

شكلك كده بيقول اسكندرانى :D :D

شيلوه من عليا احسن اشرحه :wub:

<{POST_SNAPBACK}>

ايوة يا محمد اسكندراني وعاشق للاسكندريه وللاسكندرانيه وحتى لو شرحوني ;)