الغوث الغوث يا وزير الإتصالات

[se_ Elsyed]

السيد المهندس الدكتور وزير الإتصالات / طارق كامل

مقدمه لسيادتكم المواطن رقم 1513 الملقب بـ س س والمقيم في بقعة من أرض مصر ولكنه حالياً سايب لكم الجمل بما حمل أو بالبلدي سايبها لكم مخضرة وعايش بره عند ناس بتقدره..

أرفع إليكم شكوى مُره يا سيادة الوزير الهمام لتنظروا لنا بعين العطف وتوقفوا هذا التهليب المنظم الذي تمارسه شركة الإتصالات ضد مواطني شعب مصر ..

فأنا يا سيدي أعيش في الغربة ببلاد الله لخلق الله منذ ما يقرب من 11 عام ... وتوجد لدي شقة متواضعة بالقاهرة ..

ما أطولش عليك ..

أخويا الكبير .. ما أنت عارفه ( مش إنتوا الحكومة يعني عارفين كل حاجة ) أخويا راح يسدد فاتورة تليفوني ديك النهار على أساس يدفع لي رسوم الشبكة فقط ... لقى على الفاتورة مبلغ 100 ج !!!!!!!!!!!!!!! فصرخ الراجل وإتشنج ووقع في الأرض وجت له حالة هياج .. المهم فوقوه بطريقتهم وعرفوا منه إن أخوه – اللي هو س س – كان في إجازة من حوالي 9 شهور وعائلته أتبعوه من حوالي 7 شهور .. يعني الشقة مقفولة والمفتاح معايا في جيب البدلة الصغير .. فقالهم إزاي يا حكومة ؟ والمكالمات دي جت منين ومين إتكلم ؟ ده الشقة موجوده في بيت . والبيت ملكنا وأخواتي اللي ساكنين فيه .. وبدل التليفون كل واحد عنده إتنين .. ده غير أجهزة المحلول .. فقالوا له الحكومة ما تعرفش كده ، إبقى خلي صاحب التليفون يروح يشتكي في السنترال المركزي بألماظه .. ودلوقت هاتدفع ولا نشيل العدة ؟ فأنا قولت له لأ ياخويا أنا في عرضك دول عالم مفترية وممكن يعملوها ويشيلوا العده .. إدفع يابني وأمري لله .. يمكن الشقة أتسكنت باللهم أحفظنا شمهورش وإخواته عزراؤط وعصفروت وأرناؤط .. وإنت عارف الناس دي لها عائلات تحت الأرض ولازم يتصلوا بهم ويطمئنوا عليهم .. ومافيش مانع إنهم يتصلوا بـ 0900 على أساس لو في مسابقة ولا حاجة ... ومافيش مانع برضوا يتصلوا عشان ينزلوا نغمات على المحاليل بتاعتهم ..

يرضيك كده يا عم طارق ؟

يعني أجي مسافر وأبلغ في السنترال إني مسافر من حوالي 3 سنوات وبعدين أرجع أجازة ألاقيهم مديين خطي لواحد تاني وأقسم بالله بهدلوني بهدلة الأرملة اللي بتجري على معاش جوزها وكل ده عشان أرجع الخط وكل ده وأنا ساكت وبأتصرف بأدب كمواطن محترم يرفض الكوسة والواسطة ولما مالقتش في فايدة كلمت واحد من أصدقائي يعمل في السنترال الأم برمسيس رجع لي الخط في نفس اليوم .. بعد ما راحت الأجازة وراح كل شيء .

يرضيك كده يا بابا طارق ؟

ولما حرمت إني أقولكم إني مسافر .. تقوموا تسرقوا الخط وتتكلموا فيه براحتكم وأنا اللي أحاسب على المشاريب ..

يرضيك كده يا اونكل طارق ؟ طب خد رأي عمو نظيف كده وشوف هايقولك إيه ؟

إبنكم المعذب والمغترب س س

[achnaton]

طب مش تكتب رقم تلفونك يا ابو عمر .. عشان سرقة الخط تبقى سرقه شرعية .. تصدق بالله أنت فتى محظوط .. الفاتورة عندى 880 .. دى أسمها يا ابو عمر الخدمة عن بعد .. وعاوزين يحسسوك انكم معاهم قلبا وقالبا ,, كتر خيرهم يا سيدى .. اهم ونس بيفكرك بالهم اللى فى البلد .. الغريبة بقى ان كل السنترالات والشبكات الارضية والهوائيه تم تمويلها من فلوس الضرائب .. يعنى الشعب هو الممول ,, ولكنه لأنه شعب طيب .. بيمول وبدل ما يأخذ فوائد .. بيدى هوالشركه فوائد لأنها سمحت له بالتمويل .. !!

إنت بتفتح مواضيع يا ابو عمر .. ياه .. طب استنى لما المطبخ يفضى ويوزعوا وجبه ال 76 .. يخلق فى قضاه رحمه بعدها .. وطبعا الحال حيفضل هو الحال .. وحأضطر انى ابيع الخلخال.. آه بتاع جدتى " صبوحه ".. كانت عارفه .. عشان كده كتبه لى الوصية .. خلخال حديد زى الرزيه .. لكن برضه حينفع .. وانا احسن من غيرى .. غيرى باع الجزمه ولا مؤاخذه !!!! عشان يدفع فاتورة شلركة النظافه ..

:D :)

تم تعديل 17 مايو 2005 بواسطة achnaton