تاتا تاتا بعد الهجرة الي كندا

[شعبان متولي]

لسه ما قررتش حعمل ايه .. لسه بشوف الأمور حتمشي ازاي في ألمانيا .. بس لو قررت إنني اروح كندا فبالتأكيد حروح ألبرتا لأنني لاحظت من بحثي ان كالجاري فيها فرص كتير للمهندسين ...

[arabiccanada]

الحاقا لكلامي عن تفاوت الحياة بين المقاطعات لقيت النهاردة الرسم التوضيحي ده

أول حاجة لفتت نظري هو ان أكتر سلعة بينفق عليها الكنديين في نوفا سكوشيا هو الخضروات المعلبة,,,, بينما في ألبرتا بينفقو علي المجوهرات والمطاعم والقمار!!!!!

وده يثبت اني وقعت في مقاطعة ,,,,فقر:)

الامر التاني ان الكنديين بينفقو علي الكحول والحيوانات الاليفة وتذاكر اللوتاري كتير قوي ودي كلها سلع رفاهية ,,,,,منين ؟

الظاهر ان أنا مش عايشة في كندا

[شعبان متولي]

طيب انتم مش ناويين تنقلوا ألبرتا أو بريتيش كولومبيا؟ :)

[arabiccanada]

هستني لغاية يونيو لو جوزي مالقاش شغل هنا غالبا هيرجع مصر وأنا وابني هنروح تورونتو ,,,فيه متحف فيه أثار مصرية هناك وجامعة تورونتو فيها قسم للاثار المصرية هشوف النظام ايه.

[شعبان متولي]

طيب انتي ما حاولتيش تشوفي فرص في ألمانيا؟ خصوصا انك عملتي الدكتوراه هناك ..

[MZohairy]

خدي الجنسيه و اخلعي خالص

[arabiccanada]

والله يازهيري كأنك بتقرا أفكاري لسة كنت بفكر في كدة. بس فيه خبر وحش للي زيك واللي زي هو ان السنوات قبل التقديم علي الجنسية هتزيد,,,,فيه قانون مقترح هيناقشوه في فبراير والتفاصيل هنا

http://www.arabiccanada.com/2014/01/blog-post_24.html

بس بصراحة أنا عندي حق اني عايزة امشي لأني لا أنا ولاجوزي لاقيين شغل,,,لأكن انت يمكن يبقي أفضل ليك الاستقرار هنا,,,,,,,,,,

بالمناسبة هل تعرف حالات مهاجرين رجعو بلدهم قبل أو بعد الحصول علي الجنسية؟

تم تعديل 26 يناير 2014 بواسطة arabiccanada

[أدهم الشرقاوى]

والله يازهيري كأنك بتقرا أفكاري لسة كنت بفكر في كدة. بس فيه خبر وحش للي زيك واللي زي هو ان السنوات قبل التقديم علي الجنسية هتزيد,,,,فيه قانون مقترح هيناقشوه في فبراير والتفاصيل هنا

http://www.arabiccanada.com/2014/01/blog-post_24.html

بس بصراحة أنا عندي حق اني عايزة امشي لأني لا أنا ولاجوزي لاقيين شغل,,,لأكن انت يمكن يبقي أفضل ليك الاستقرار هنا,,,,,,,,,,

بالمناسبة هل تعرف حالات مهاجرين رجعو بلدهم قبل أو بعد الحصول علي الجنسية؟

قيمى الأمور بعيد عن أى مؤثرات خارجية، بمعنى آخر شوفى أنتى عاوزة إيه و شايفة حياتك فى الـ 10 سنين اللى جايين عاملة إزاى و شوفى إية المكان اللى هيساعدك أكتر فى الوصول لهدفك.

شوفى أنتى سبتى مصر ليه و روحتى كندا ليه و سبتى إية هنا فى مصر عشان تاخدى إية من كندا. أنا بقول الكلام دة عشان أنا عارف إن البطالة و المدخرات اللى عمالة تطير ممكن يكونوا شىء محبط و ممكن تشاورى عقلك بالرجوع لمصر و الرجوع للأهل و الخروج من المأزق دة بس صدقينى أنتى لو سبتى مصر من 6 أشهر و ماكنتيش مرتاحة فيها لو رجعتى دلوقتى مش هتبقى مرتاحة أكتر و غالباً هتندمى على قرار العودة لمصر.

اللى إيده فى المية مش زى اللى إيده فى النار و أنا مش فى مكان أحكم منه على حد بس إحسبيها كدة، فى مئات الآلاف بييجوا كندا كل عقد من الزمن و بيتعبوا فى الأول بس بالدراسة و الشغل و العزيمة الدنيا بتمشى و بياخدوا أحلى ما فى كندا و المجود اللى بيبذلوه فى أول مشوار الإستقرار بيتردلهم أضعاف بس كندا محتاجة صبر و مرونة فى التفكير و الأمور بتمشى فى الغالب، فى بلد متقدمة زى دى لا يمكن تبقى الحياة فيها مستحيلة و فى بلد زى مصر لا يمكن تبقى هى الملاذ.

غيرى المكان و جربى و حاولى و ربنا هييكرمك إن شاء الله.

تم تعديل 26 يناير 2014 بواسطة أدهم الشرقاوى

[arabiccanada]

اكيد انا لو رجعت مش هيبقي دلوقتي خاااااالص ,,,لازم علي الاقل افضل لغاية ما اخد الجنسية ,,,,وطبعا سنين هتعدي فغصب من عني هحاول اكتر الاقي شغل واجتهد علي اخر ما اقدر,,,ماعدشي اختيار.

الكنديين عارفين كويس الوضع اللي المهاجرين بيبقو فيه وقد ايه بيبقو نفسهم يرجعو في الاول علشان كدة طولو المدة علشان يقضو علي اي صلة ليك ببلدك وتضطر تقتل نفسك علشان تنجح هنا

بالنسبة لمصر هي الجحيم بالنسبة ليا,,,نفسي ارجع المانيا بس حتي لو لقيت وظيفة شروط الجنسية صعبة جدا. اللي اعرفه ان الواحد لازم يفضل يشتغل 8 سنين علي مايقدم طلب الجنسية وياعالم ساعتها هيكونو غيرو القانون ولا لأ

[MZohairy]

والله يازهيري كأنك بتقرا أفكاري لسة كنت بفكر في كدة. بس فيه خبر وحش للي زيك واللي زي هو ان السنوات قبل التقديم علي الجنسية هتزيد,,,,فيه قانون مقترح هيناقشوه في فبراير والتفاصيل هنا

http://www.arabiccanada.com/2014/01/blog-post_24.html

ده توقع لقانون هيناقشوه

يعني مش قانون تم مناقشته و تطبيقه

و حتى لو وافقوا عليه بيحطوله فتره معينه لبدء سريانه

[arabiccanada]

تجربتي مع وزارة الهجرة ان مشاريع القوانين بيتوافق عليها وبتتنفذ بأثر رجعي. يعني مافيش حاجة اسمها فترة انتقالية مفهوم العدالة هنا في كندا مختلف عننا تماما.
هما عايزين يدو نفسهم فرصة علشان يخلصو تراكم الطلبات علشان كدة هيطولو فترة الانتظار قبل الحصول علي الجنسية سنة كمان علي الاقل

[شعبان متولي]

على فكرة القانون الحالي للجنسية في ألمانيا بيسمح بالتقديم للحصول عليها بعد قضاء 6 سنوات لو كان مستواكي في اللغة عالي كفاية (B2 على الاقل) و لو اظهرتي اندماجك و معرفتك بالثقافة الألمانية .. و مش لازم على فكرة تكون السنوات دي عمل .. يعني السنوات اللي حضرتك قضيتيها في الدكتوراه محسوبة!! ...

العيب الوحيد في موضوع الجنسية الألمانية (بس فيه أمل انه يتغير قريبا نتيجة جهود الحزب الديمقراطي الاشتراكي الموجود في الائتلاف الحاكم حاليا) انهم مش بيسمحوا بالجنسية المزدوجة، و بالتالي يجب على المتقدم للحصول على الجنسية انه يتنازل عن الجنسية الاصلية .. انا شخصيا مستحيل اتنازل عن الجنسية المصرية بس زي ما قلت عندي أمل الوضع ده يتغير في السنوات القادمة نتيجة جهود سياسية مبذولة في هذا الاتجاه ...

[arabiccanada]

تصدق أحلام اليقظة عندي اني أرجع ألمانيا,,,,قد ايه مفتقداها

[arabiccanada]

ثبتت الرؤية ياجماعة ,,,فعلا انا وقعت في تاني افقر مقاطعة في كندا,,,ترتيبها التاسعة بين المقاطعات العشرة ,,,من حيث دخل الفرد

ده تصنيف للمقاطعات من حيث نصيب الفرد من الدخل في المقاطعة, نصيحة لكل قادم جديد خد الموضوع ده في الاعتبار لما تختار مكان استقرارك في كندا وشوف الترتيب ده كويس قبل ماتيجي وتتورط:

http://www.arabiccanada.com/2014/02/blog-post.html

[arabiccanada]

ايه ياجماعة الموضوع اتهجر ليه انتو فين؟

[شعبان متولي]

انا شايف انك تحاولي تنقلي من المقاطعة الفقرية دي بأسرع ما يمكن :)