شقق الإسكان الإستثماري بمدينة العبور

[se_ Elsyed]

تلقيت إتصالاً هاتفياً من اخي بمصر بيكلمني عن فتح باب الحجز لشق الإسكان الإستثماري بمدينة العبور ..

ومش عارف أنا ليه مرتبط بذهني فكرة خاطئة إن مدينة العبور دي عبارة عن بلوكات شعبية ؟!!!!

المهم قالي إنه راح بنفسه وأتفرج على تلك الشقق وقال لي إن تقسيمها روعة وأسعارها مناسبة جداً وهناك مسطحات خضراء بين المباني وبها وسائل موصلات عديدة ولها مدخل خاص بجوار " جيرو لاند " وللعلم بالشيء سألته عن المساحات فقال لي في 125 م و 185 و200 فهو من نفسه سأل في جاهز المدينة على الـ 125 ( صافي بدون المرافق وبير السلم والمنور والكلام ده ) فقالوا له إن سعر المتر هو 900 ج تدفع 22000 وتستلم وتقسط الباقي والباقي على أقساط شهرية بمعدل 600 ج يعني تقعد 12 سنة تسدد ولو عاوز تطول المدة لها حساب أخر .. ولو عاوز تخلص بدري بدري أعتقد هناك خصم .. والإستلام بيكون على المحاره وإنت تعيش مع التوضيب .

فطلبت منه يروح تاني ويجيب معلومات أكثر وصور إن أمكن عن المنطقة المحيطة وعن تقسيم الشقق نفسها والأسعار وكامل التفاصيل ...

على فكرة أهم حاجة سألته عليها هي هل يُمكن إن أي شخص يشتريها كأستثمار يعني ياخد شقة ويسقعها ؟ ولا لازم يسكن فيها زي إسكان مبارك وجمعية المستقبل والكلام الفاضي ده اللي لو حسوا إنك بتتاجر في الشقة يقوموا سحبينها منك على طول على أساس إنها مُدعمه وللشباب غير القادر ؟... فقال لي لأ يُمكن التصرف فيها طالما أستلمتها .. والشقق جاهزة على الإستلام لإن نظامها يختلف في إنها إستشماريه يعني الدولة بتاخد من ده تحط في ده .

برضوا لقيت هنا في العروبة بلازا بالرياض شركة تقسيم أراضي بمدينة بدر ( ماكنتش أعرف هي فين أساساً بدر دي ) وبيبيعوا المتر بـ 90 ريال أو 140 ج لك حرية عُملة التسديد وبالتقسط على 36 شهر تقريباً ومساحة العماير 200 م والفلل 400 وتبني على 60 % من الأرض والباقي حديقة بالنسبة للفلل ولما سألت على موقعها من الأعراب قالوا لي دي أقرب لمدينة السويس منها للقاهرة مع إن جبت صورة من مخطط الأرض دي وعجبني جداً ..

المفاجأة بقى إن اللي شاري كل الهلومه دي كلها ( مساحة كبيرة جداً ) واحده ست وشكلها مسنودة يعني مرات وزير ولا واحد من الأكابر وطبعاً أشترتها بتراب الفلوس من الحكومة وباعتها من بره بره لواحد مستثمر سعودي وأخدت حسنتها وخلعت ...

فحد عنده معلومات زيادة عن إسكان العبور ده ؟ وهل الشقة تستاهل هذا السعر ؟

هما ليه ما بيعملوش مواقع إنترنت بتلاتة تعريفة لتسويق مثل هذه المشاريع أو تزويد راغبي الشراء خصزصاً اللي عايشين بره مصر بمعلومات بدل ما تبعت واحد ويصور ويعطل نفسه وممكن ينقل لك فكرة غلط إنطلاقاً من مبدأ إختلاف الأذواق مثلما حدث في كثير الحالات أمامي ؟

ده حتى شركة التوفيقية للإسكان والتعمير بتاعت فوزي السيد جبت الموقع بتاعهم ودخلت عليه ووجدته فقير للغاية ولا توجد به معلومات تبل ريق الواحد ....

لسه لنا 300 سنة على ما نفكر بعقلية تجارية معملية بحته ...