و حأصدق ...

[عبير يونس]

و حأصدق ان في دهب ياقوت مرجان

حتى لو كنا وقعنا في عصابة الإخوان

أيامهم تتعد صلاحيتهم خلصت من زمان

جماعة محظورة وخدوا لهم يومين حلوين

من نفسهم يللا ان شا الله ماحد حوّش

اهو مقاطيعهم شافوا لهم حاجة أروش

كله بيفلسع و الجدع اللي لحق يطفش

فاضل ع الحلو تكة و ادي احنا اهو صابرين

بقى بعد حضارة سبعتالاف سنة مصر تتقزم ؟

تضلّم الدنيا و لا مية و لا بنزين و العيشة تتأزم ؟

عايزيني أأيد مرسي طب استنوني حأتحزم

و اجيلكم و يا استيفان روستي راقصين

شعب صبور امور مهاود مسالم و راضي بقليله

و يتعامل بحكمة و صبر مع كل بلوة سودا تجيله

و لما تأفّور العملية يينكت بضحك يشفي غليله

و لما يؤن الاوان يصرخ و يزلزل الميادين

الأمل مش بس جوايا أنا ده جوة ناس كتير اوي

و بعد طول ليل الضنا يختفي السواد و ينزوي

ديتها ترفع ايديك وتقول يا قوي على كل قوي

ده ربك كبير يامؤمن و دايما مع الصابرين