منتخبنا 100 % في تجربتة الكورية الجنوبية

[se_ Elsyed]

في أول مبارياته بعد ان تم تعيينه رسمياً مديراً فنياً للمنتخب القومي بمرتب مش بطال ، أستطاع المعلم حسن شحاته ان يجعل المنتخب القومي اللي كان مشهور قبل ذلك " بيتيم الفرح " ان يكون له شكل ولون وطعم وريحة امام كوريا الجنوبية اللي هزمناهم في عقر دارهم بهدف مقابل لا شيء في مبارة ودية كان فريقنا فيها فايق وعايق و100 فل وأربعتشار وتحس وإنت بتتفرج على المباراة إن العيال إبتدت تحب الكورة وتلعب بمزاج وتحس إنهم بقوا 20 لعيب في الملعب مش 11 مكسحين وحاطين في رجليهم شكاير رمل ... حتى اللي اول مرة يلمسوا كورة في مباراة دولية زي احمد عيد عبد الملك أو عبد الله رجب او احمد أبو مسلم بعد ما ربنا فك سجنهبرضوا لقيناهم إندمجوا مع باقي القوام الرئيسي للفريق ... ولسه كمان لما يرجع الأشاوس ( احمد حسن ، وميدو مشاكل وبيشو التابعي وبس .. لإن باقي المحترفين كسر إن كان السقا ولا حسام غالي وخسارة فيهم ثمن تذكرة الطيران اللي بتتبعت لهم كل ماتش )

ونتمنى ان لا يُصاب الفريق بالاحباط نتيجة إنعدام املنا وعمرنا وحازمنا وكل الشخصيات اللي خدناها في كتاب المطالعة الرشيدة في إبتدائي .. في وصولونا لكأس العالم .. وأن يعتبروا الـ 5 مباريات بتوع الراوند التاني تجارب قوية وعلى الهواء مباشرة لكأس الأمم الأفريقية 2006 بالقاهرة واللي لازم نفوز بها بالذوق أو بالعافية عشان شكلنا ما يبقاش وحش ويتردم علينا ..

وأرجو كل التوفيق للمدرب القدير حسن شتحاته اللي راهنت علي نجاحة من البداية لإنه معلم وفاهم بيعمل إيه ، بس ربنا يبعد عنه عفاريت الأسفلت والأرزقجية الإعلاميين اللي بيعطلوا المراكب السايرة ...

وما يجب ان نقوله بإن مصر تمتلك حالياً مجموعة لا بأس بها من اللاعبين ، أي نعم هما عايزين يستحموا وينضفوا وينفضوا الكلاب الميته اللي في دماغهم ويبطلوا بقى الجري عمال على بطال ورا الفلوس .. بس بشوية إدارة على حبة إخلاص ممكن نبقى شكل تاني .. حبك أنت شكل تاني ..

[محمد شلبى]

اتفق معك استاذ سى السيد فى ان النتخب تحسن اداؤه ولكن ما زال ينقص الفريق الفكر الهجومى واللعب للامام,فقد كان ابوتريكة ومحمد شوقى فى اوقات كثيرة يلعبون بالعرض او للخلف مع ان زملائهم يكونون فى مواقع جيدة ولكنهم يصرون على اللعب للخلف ,لا اعرف لماذا prt: