لازانيا باللحم والبشاميل

[bentmasria]

بسم الله الرحمن الرحيم

لازانيا باللحم والبشاميل

المقــادير

كلغ لحم مفروم

ثلاثة أكواب بصل مقطع

أربعة ملاعق كبيرة زيت زيتون

ملح وفلفل أسود حسب الرغبة

مغلف ماجي أسرار خلطة البشاميل

ثلاثة ملاعق صغيرة ثوم مقطع ناعماً

كلغ طماطم مقطعة

نصف ملعقة صغيرة إكليل الجبل

ملعقة صغيرة زعتر مجفف

مكعب مرقة دجاج ماجي مذوب في 2 كوب ماء

إثنا عشر طبقة رقائق لازانيا

ثلاثة أكواب جبنة تشيدر مبشورة

الطريقة

. لتحضير حشوة اللحم، يحمر اللحم المفروم وكوب من البصل في زيت الزيتون الساخن، ويضاف الملح والفلفل

. تحضر ماجي أسرار خلطة البشاميل كما هو محدد خلف المغلف. تغطى وتوضع جانباً

. لتحضير صلصة الطماطم يقلى ما تبقى من البصل والثوم بالزيت. تضاف الطماطم وإكليل الجبل والزعتر وتحرك جميعاً بملعقة خشبية

. يضاف مكعب مرقة دجاج ماجي المذوب وتغلى جميعها، ثم تخفف الحرارة وتترك على نار هادئة لمدة 20 دقيقة حتى تتكاثف الصلصة

. يدهن قاع طبق الفرن بالزيت

. توضع أول طبقة لازانيا بالطبق وفوقها صلصة الطماطم واللحم وصلصة البشاميل والجبنة

. تكرر العملية، ثم تغطى آخر طبقة بصلصة البشاميل وفوقها الجبنة المبشورة

. يغطى الطبق بورق الألمنيوم ويوضع في فرن حرارته 220 درجة مئوية لمدة 15 دقيقة، ثم تخفف الحرارة إلى 180 درجة لمدة 30 دقيقة أخرى

. يرفع الغطاء خلال آخر 10 دقائق لمنح الجبنة سطحاً ذهبياً مقرمشاً

وووو أأأأأأأأألف صحة وهنا

[se_ Elsyed]

إثنا عشر طبقة رقائق لازانيا

إيه ده .. هي اللازنيا طلعت رقائق مش مكرونه ؟

والله العظيم طول عمري كنت بأفتكرها مكرونة بس معملوه بطريقة معينة ..... وكنت بأهبر منها هبر !!!!!

يالله حصل خير .... حصل خير صحيح .... اللي خلا السمك البرتقاني يبقى بعد السنين دي كلها إسمه سيمون فيميه ... مش هايخلي المكرونة بنت عم الباشمل تبقى رقائق لازنيا ..

طب والرقائق الإلكترونية دي يا أم محمد الواحد يجيبها منين ؟

يعني أروح الفرن وأقوله إديني ربع كيلو رقائق لازنيا .. ولا إيه النظام ؟

على فكرة ... أنا بأحكم على الفندق او المطعم الكويس من حاجتين فقط :

1- اللازنيا : فمعظم المطاعم بتعملها قريبه من المكرونة بالباشمل ... فبتبقى حاجة كده زي الرقص على السلم لا هي مكرونة ولا هي لازنيا ....

2- ام علي ( يا ترى انتي فين يا مسلمة إيجشيبشان ؟) : المحل اللي بيعمل أم علي بإحتراف يبقى الواحد ياكل منه وهو مطمئن .

[على ويكا]

كلغ لحم مفروم

ثلاثة أكواب بصل مقطع

أربعة ملاعق كبيرة زيت زيتون

ملح وفلفل أسود حسب الرغبة

مغلف ماجي أسرار خلطة البشاميل

ثلاثة ملاعق صغيرة ثوم مقطع ناعماً

كلغ طماطم مقطعة

نصف ملعقة صغيرة إكليل الجبل

ملعقة صغيرة زعتر مجفف

مكعب مرقة دجاج ماجي مذوب في 2 كوب ماء

إثنا عشر طبقة رقائق لازانيا

ثلاثة أكواب جبنة تشيدر مبشورة

على فكره المقادير اللى حضرتك ذكرتيها فى المداخله فيها نظر والله اعلم fsh:: حيث ان الزعتر لا يعد من مكونات اللازانيا ولا التوم ايضااما عن اكليل الجبل هذا فانا لا اعرفه وعليه لا يمكننى التعليق او التصحيح اما عن الجبنه المبشوره فالاصل فيها انها موتساريللا ويقال عليها فى ارض الكنانه موتزاريللاـ اما فيما يتعلق بالبشمل فانها حاجه سهله جدا ومفيهاش اى اسرار قليل من الزبد يسخن على نار متوسطه ثم يضاف كميه من الدقيق تتناسب مع كميه الزبد (الاضافه تتم على مراحل مع التقليب المستمر)ولا داعى ترك الخليط الى ان يتغير لونه ثم يقلب الخليط على كميه من البن الساخن الى ان يلتحم ويتجانس بواسطه التقليب حضرتك نسيتى تذكرى فى المقادير الكرفس الافرنجى والجزر الاصفر

[عادل أبوزيد]

رد من حرم أبوزيد لأول و آخر مرة

الموضوع وصفة اللازانيا

أولا اللازانيا هي نوع من المكرونة و لكن علي شكل رقائق ورقية في حجم كف اليد و تباع في محال السوبر ماركت الكبيرة مثل أولاد رجب . مترو , أبو زكري أو كارفور و غيرهم و هي للأسف غالية الثمن رغم أن مكوناتها و مذاقها مثل المكرونة. وهذة ليست من الوصفات السهلة بل انها تتطلب مهارة و صبر (اذا كان موجود) و ان الخبرة لعامل مهم في نجاح اللازانيا

ثانيا مقادير العصاج (هذه الكمية تكفى ثمان أشخاص)

- ربع كوب زيت ذرة

- 2 ملعقة صغيرة ملح

- نصف ملعقة صغيرة فلفل أسود مطحون

- نصف كيلو لحم مفروم

- ثلاثة أرباع كيلو طماطم ( تسلق و تقشر ثم تقطع قطعا صغيرة)

2 بصلة كبيرة مبشورة

4 فصوص من الثوم مهروسة

4 ملاعق طعام صلصة طماطم

2 جزر متوسطة مبشورة

1 حزمة كرفس بلدي أو 2 عود كرفس افرنجي

1 طبق فطر(ماشروم) يغسل و يقطع شرا ئح أو علبة فطر محفوظ

4 ملعقة حلو جبن رومي مبشور

8 ملعقة حلو جبن موزاريللا مبشورة

2 ملعقة حلو زعتر

1 ملعقة مردقوش (مارجورام) من عند العطار

ثالثا مقادير البشامل

4 ملاعق حلو سمن

4 ملاعق حلو دقيق

4 كوب لبن ساخن ( يفضل لبن نيدو)

ربع ملعقة شاي فلفل أسود (يفضل أبيض)

نصف ملعقة شاي ملح

4 ورقات لاوره

رابعا الطريقة

1 عمل العصاج

- يوضع الزيت في حلة كبيرة و ترفع علي النار حتي يسخن الزيت

- يضاف البصل المبشور و الثوم ويقلب لمدة خمس دقائق ( يدبل البصل و لا ينتظر حتي يحمر ) ثم يضاف الجزر المبشور والكرفس المفروم ويقلبا لمدة خمس دقائق أخري

- يضاف اللحم المفروم و الملح و الفلفل

- يقلب اللحم من آن لآخر حتي يتشرب تماما ثم يضاف الفطر و يتم التقليب من آن لآخر حتي يعصج اللحم.

- تضاف الطماطم المقطعة و صلصة الطماطم و الزعتر و المردقوش

- تخفض الحرارة و تغطي الحلة و يقلب من آن لآخر حتي تتشرب كل المياه ( لمدة ساعة تقريبا)

2 عمل البشامل

- يسخن اللبن حتى درجة الغليان مع الملح و الفلفل و ورق اللاورة ثم يغطي لمدة عشرة دقائق

- في حلة أخري يسخن السمن ثم يضاف الدقيق و يقلب قليلا و لا يحمر

- تنشل أوراق اللاورة من اللبن

- يضاف اللبن مرة واحدة علي الدقيق ثم يقلب جيدا بملعقة خشبية

- يرفع البشامل علي النار و تقلب باستمرار حتى يغلي

- لا يجب أن يكون البشامل غليظا حيث أنه يغلظ عندما يبرد قليلا

3 سلق اللازانيا

- يوضع مقدار من الماء يكفي لملأ نصف حلة كبيرة مع ملعقتين من الملح و 4 ورقات غار (لاورة) و نصف كوب من الزيت ويرفع علي نار عالية حتى تغلى الماء

- توضع 6 شرائح من اللازانية واحدة فواحدة في الماء المغلي حتي لا تلتسق في بعضها و تسلق لمدة 10 دقائق ثم تنتشل بحرص و تسقط في اناء بة ماء بارد

- تكرر هذة العملية مرة أخرى

4 رص اللازانيا

- ترص طبقة واحدة من اللازانيا تكفي لتغطية قالب أو صينية اللازانيا

- يوضع فوقها نصف العصاج

- ترش ملعقتين من الجبن الرومي

- ترش ملعقتين من الجبن الموزاريللا

- يضاف حوالي ثلث البشامل و عليه ملعقة جبن موزاريللا

- ترص طبقتين من رقائق اللازانيا ثم نصف العصاج الثاني ثم باقي الجبنة الرومي و ملعقتان من الجبن الموزاريللا

- يضاف ثلث البشامل و عليه ملعقة جبن موزاريللا

- ترص طبقتين من رقائق اللازانيا و فوقها باقي الجبن الموزاريللا ثم باقي البشامل

- تزج في فرن حار لمدة حوالي نصف ساعة أو أن يحمر البشامل

بالهناء و الشفاء للآكلين و الصحة و العافية للصانعين

[Katamando]

اللحمة قصدي الرحمة حلوة

أول مرة ألاقي مداخلة نليانة دهون وكوليسترول وحاجات كلها جميلة وتسيل اللعاب وترمي أجدعها ريجيم في البحر

إلى اللازانيا وطز في الريجيم والأكل الماسخ

بلا هم

[bentmasria]

ا جماعة مليون هنا وشفا

مدام الاستاذ عادل اضاقت كل الاضافات الثرية

تحياتى سيدتى الفاضلة ربنا ما يحرمناش من مشاركاتك ابدا يارب

كتامندو

انت شكلك عامل رجيم وماينفعش الكلام ده مع اللازانيا ولا حتى محشى الكرنب rs:

سى السيد

اسكت موش طلعت رقائق بس بجد موش غالية معقوله وموجودة عندكم اكيد اكتر من القاهرة وان كانوا المصريين عملوها وضربوا المنتج ف السوق :blink:

الحمد لله ان مروركم الكريم جه ف موضوع اللازانيا

انا حروح اذاكر ابلة نظيرة وارجع عشان اشوفكم تانى :angry:

ربنا يسعد ايامكم يارب

محمد ومامى

[إبن مصر]

لا لا لا لاااااااااااااااااااااااااااااااا :o

كاتامندو تعالى جنبى هنا يا حبيبى.. :angry:

الناس دول وحشين!!!! :blink:

هايخشوا النار!!!!!!!!!!!! f((:

وخصوصا ام محمد :blink: ...لازانيا يا مفتريين...... ودلوقتى.........بعد ما ابتدينا الرجيم... rs:

تعالى معايا .. ha)

وجبه اليوم...

خيار مسلوق بشربه الطحالب واعشاب البحر الجافه.. ha)

منه له.............جاى رايح منه له!!!!!!!!!!!!!!

[drhusseinali]

بسم الله الرحمن الرحيم

ادي اخرة الي عايز ياكل لازانيا

انا اول ما قرات الموضوع ده عصافير بطني صوصوت

وقلت ما بدهاش كفاية العك اللي بناكله في الغربة لازم اعمل لازانيا

قمت اشتريت كل حاجة حسب الوصفة ما كانش ناقص غير البشاميل

قلت اشتريه النهاردة و انا راجع من المعمل

و لك ان تتخيل و انا شغال طول اليوم واعد امني نفسي باللزانيا بالبشامل

و اذ فجاة لما ارجع البيت الاقي مراتي عملالي......

لزانيا بالخضار المسلوق :angry:

و تقلي عندنا في اليابان بنعمل اللزانيا كده :blink:

ادي اخرة اللي يتجوز اجانب

و ضاع الحلم يا ولدي rs:

اخوكم حسين

[mohamed]

معلش يا جماعة

ممكن اسال سؤال صغير بس محدش يحدفني بطوبة ؟!!

وانا متفهم انكم هتعذروني حيث اننى من الطبقة العاملة اللى بيقولوا عليها البروليتاريا ايوة هى دى :angry:

واخر معلوماتى فى المطبخ الرز والمكرونة ويا لحم يا فراخ

ممكن اعرف من حضراتكم مين اللازنيا دى ؟

وهل هى اكلة دخيلة علينا ولا حاجة معروفة بس انا اللى ابو جهل

اصل الموضوع ده هيترتب عليه حاجات كتييييييييييير

لان على اساس اجابتكم هتحصل خناقات في البيت هنا ازاى معرفش اللازنيا ؟!!!!!!!!!!!!!!!!!!!!! rs:

وكمان ده ممكن يأثر عليه لما اجى اتجوز تخيلو منظري وخطيبتي بتقولي اكلنا لازانيا النهاردة اقوم انا فاتح بقى كده :blink: ويبقى شكلي اهببببببببببل :blink:

اخوكم الجعان والمعذب

محمد

[وليد صفوت]

و يطلع إيه إكليل الجبل ده كمان ؟؟؟؟

ده إقراص و لا ( تيت ) ؟؟؟؟

[mohamed]

و يطلع إيه إكليل الجبل ده كمان ؟؟؟؟

ده إقراص و لا ( تيت ) ؟؟؟؟

تصدق نسيت اسال علي الجبل ده

تعالى جنبي هنا يا واد يا فيو

هات الكمنجة واديني حتة فى الحزين

الناس دى خلاص مبقاش لينا معاهم كلام دول طلعو ناس من علية القوم واحنا غلاااااااابة اوى

ده حتى محدش فيهم راضي يرد علينا

<_< cbyb:

[se_ Elsyed]

معلش يا جماعة

ممكن اسال سؤال صغير بس محدش يحدفني بطوبة ؟!!

معقوله في حد في الدنيا ما يعرفش اللازنيا ؟!!!!

إنت قولتيلي إنت منين يا محمد ؟

قصدي يعني إنت عايش لغاية دلوقت إزاي ؟ وهل ما سمعتش عن المثل البولندي اللي بيقول " كيف يحيا الإنسان بدون اللازنيا ؟ "

<_<

خلاص خلاص ما تعطيتش وتعالى خد حته ..

اللازنيا يا عزيزي بيني وبينك ماعرفنهاش إلا هنا لما ربنا فتحها علينا فتوح العارفين ... لإن الواحد في مصر كان اخرة صينية البطاطس أو المكرونة أم بشمل ، اللهم إلا بعض المناسبات السعيدة القليلة اللي كنا بنشوف فيها اكل ، بناكله ونخاف نسأل عن إسمه احسن نتعور ..

هي بإختصار حاجة كده زي المكرونة بالبشامل بس ألذذذذذذذذذذذذذذذذ وأطعم واخف منها ..

يعني ممكن تقعد تضرب نص صنية كمسح زور أو عربون محبه ... غيرالمكرونة اللي لو كلت خارطة واحده منها تيلكمك ...

شد حيلك وخد الليسانس وسافر بره .. وخلي طموحك دائماً إنك لازم تسافر دولة من الدول المتقدمة عشان

تاكل لازنيا ...

[se_ Elsyed]

بسم الله الرحمن الرحيم

ادي اخرة الي عايز ياكل لازانيا

انا اول ما قرات الموضوع ده عصافير بطني صوصوت

مرحب يا دكتور حسين ...

هات يابني هنا طبق لازنيا وكثر الدقه والشطا عشان الدكتور ( ما تخافش على حسابي ) ...

معليش يا دكتور سؤال بره اللازنيا : إنت تعرف الدكتور صعيدي أو الدكتور محمد صابر ؟

أصلهم كانوا زملاء أفاضل ومعانا في المنتدى وكانوا معاك برضوا في اليابان بيدرسوا الدكتوراه .

أخونا الصعيدي أخد الدكتوراة في السيراميك ومشتقاته وزمانه فتح محل أدوات صحية وماحدش هايعرف يكلمه .. ومن ساعتها كِبر علينا وما بقاش ييجي .

والدكتور صابر خلص الدكتوراة ونزل مصر ييجي من سنة وشكله لسه مش لاقي نت كافيه يدخل مها ويأنسنا زي الأول ...

عامة مرحب بيك مرة ثانية اخ عزيز وغالي ... وخلص اللازنيا وإحكي لنا شوية عن اليابان وحلاوة اليابان .

[bentmasria]

يا محمد ياكبير

اللازانيا بنت عم المعجنات يعنى عجينة بسيطة زى اللى كل الامهات بتحشيها جبنة وسبانخ ف البيوت وشكلها او طكريقة تقطيعها هى اللى مختلفه وغالبا الفرق الرئيسى فى مكسبات الطعم والتوابل الطليانى لول سعادتك شفت المكرونة بتاعة زمان هى عريضة زى الاسباجيتى القديم وتخينة شوية

وياسيدى ان شاء الله لما اغتنى طالما اصبحت الاكلة الشعبية الايطالية اكل اغنياء اعزمك عليها

دكتور حسين

ان شاء الله اللازانيا بالسوتيه وعليهم شوية رواقة وراحة بال اطعم بكتير من ام شطه

ابن مصر وسى السيد

شكلى حبطل لازانيا قريب سى السيد بروحه المرحة خلى الموضوع زى العسل

ربنا مايحرمنا منكم

نفسكم ف ايه المرة الجاية

ام محمد

[drhusseinali]

بسم الله الرحمن الرحيم

سي السيد شكرا علشان ترحيبك بيا و يا رب اكون ضيف خفيف عليكم

انا متابع المنتدى من زمان بس الي كان مانعني الكتابة بالعربي علشان ما عنديش كيبورد عربي

عموما اتحلت خلاص باستخدام الكيبورد بتاع الموقع

انا فاضلي سنتين ان شاء الله علشان اخلص الدكتوراة ربنا يعديهم على خير و ادور انا كمان علي نت كافيه مع الدكتور صابر والدكتور صعيدي <_<

اخوكم حسين

[se_ Elsyed]

ربنا يسامحك يا بنت مصرية سابقاً وام محمد حالياً ... إنت اللي فتحتي علينا فاتوحة وعدوى اللازنيا انتشرت في اوساط المجتمع المصري ...

هاحكي الحكاية من الأول

- اول إمبارح راجع البيت من الغيط ساعت القيلولة ( لا سيستا ) لا بيه ولا عليه وبأفتح باب الشقة ولسه داخل روحت متكعبل في كمية اكياس ورا الباب بأبص بعيني كده لقيتها مليانة زيت وسمنة وحاجات بقالة ... أستغربت وقولت مين اللي جاب الحاجات دي ؟ وهل السماء تمطر بقالة وخضروات ؟ر ..

- دخلت الشقة لقيت زوجتي العزيزة واقفه وقفت رجالة في المطبخ وبتقولي غير هدومك بسرعة يا سي السيد عشان تنزل معايا الملاحة ... ليه يا أمينة ؟ قالت لي عشان تعمل معايا اللازنيا .. !!!! clp:: :ph34r:

قولتها لازنييت إيه ولا تانيت إيه ؟... إيه كل اكياس البقالة دي .؟ هو في ضيوف جايين لنا من سوهاج النهاردة وهايتغدوا معانا ؟ وبعدين مين اللي جاب الحاجات دي ؟

فقالت انا ؟

قولتلها : نزلتي البقالة من غير إذني يا امينة ؟ ده انت أول مره تعمليها من ساعة ما اتجوزنا ؟

فقالت لي : معليش يا سي السيد أصل سيدنا العُثيم ناداني فلبيته ( العثيم ده زي مترو وكارفور كده ) ... أصل وانا راجعه من المدرسة بعد الظهر ( مدرسة تحفيظ القرآن ) قلت لسواق الباص نزلني قدام العثيم انا وواحده صديقتي وأشتريت الحاجات دي عشان اعملك الطبق اللي بتحبه ( لأول مره واخر مره بإذن الله ... اتمنى ذلك ) وبعدين اخدنا تاكسي انا وصديقتي ورجعنا على البيت ( العثيم يبعُد بالظبط 350 متر عن البيت )

فقولت لها : يعني أصرف لي قد 200 أو 300 ريال عشان صنينة لازنيا ؟ يا بنت الناس شرا العبد ولا تربيته ..

قالت : بطل رغي وتعالى خد لك غطس معايا ..

طبعاً سمعت الكلام ولبست هدوم الشغل ( العفريتة والجزمة أم رقبة طويلة والكازلك في جنبي والعمه على راسي ) ودخلت المطبخ لقيت منظر ماقولش لعدوينكم عليه ....

والله العظيم شيء أشبه بغرفة الغسيل بتاعت زمان ... لقيت حاجات منشورة في كل حته ودربكة وقلبان ..فقلت لها بكل حسن نية وأنا كاظم الساهر قصدي كاظم غيظي ... إيه الحاجات المنشورة دي ؟ وبعدين ما عندك بلكونة بتنشري فيها الغسيل ليه تنشريها في المطبخ ...

قالت : غسيل إيه وعجين إيه ؟.. دي إسم الله على مقامك ألواح اللازنيا .

قلت : لا حول ولا قوة إلا بالله ... طب بتنشريها ليه ؟ .

قالت : هما قالوا لي كده ... قالوا لي إسلوقيها الاول وبعدين سيبيها تنشف ... يالله قصر ولم الغسيل .. قصدي لم الالوح وحطها في الصينية البايركس اللي هناك دي .

طبعاً سمعت الكلام على طول بينما امينة بتجهز في خلطة الباشمل ( دي الحاجة الوحيدة اللي عرفتها من المكونات )

فلقيتها بتسألني : يا س س هو البشامل بيتحط الاول على الألواح ولا اللحمة المفرومة .. وبعدين هو البيض بيتحط على الباشمل ولا بيندهن على وش الصينية؟

قلت : وانا إشعرفني أنا باكل اللازنيا في المحل أو الفندق كمنتج نهائي وماليش دعوة بالكومبوننتس ... ( ده إيه الهم اللي إحنا فيه ده ... قلت كده في سري طبعاً )

المهم خلصنا تستيف الصينية وحطيتها في الفرن ، وقولت أروح أضرب لي أي برنامج مفيد في التليفزيون .. ولكن على مين ده ولا في الاحلام ... كل دقيقتين .. ألاقي صوت قادم من الاعماق .. قوم يا س س بص على الصينية في الفرن ... طب وانا مال اهلي .. انا عايز أكل يا ناس ( برضوا في سري ) المهم بعد اكثر من نص ساعة رايح جاي من المطبخ لغرفة المعيشة ... طلعت الصينية وجيت بأقطعها لقيت بعيد عنكم وعن السامعين في حاجات بتتقطع بسهولة وحاجات تانية مزرجنة ... واكتشفت إن بعض الألواح اللي إتسلقت في الاول كانت مسوقة كويس ودي مشي حالها في الصينية والبعض الاخر مش راضي يتقطع فتيجي تطلع خرطة لازنيا في الطبق تلاقي مقاومة عكسية من بتوع إسحاق نيوتن وعايزلك معادلة فيزيقية عشان تحسب مقدار المقاومة على كتلة المادة وبعدين تضرب كل ده في المحصلة النهائية للمعادلة الكيميائية بتاعة اللازنيا ...ولإني كنت أدبي فكانت النتيجة إن خرطات اللازنيا معظمها إتفرفت وبقى شكلها مش عاطفي ..

سكتت طبعاً وتقبلت الوضع كما هو عليه ... وكظمت غيظي وقولت مرة تاني ( الله يسامحك يا ام محمد يا صاحبة الشورى ... على فكرة زوجتي لا تقرأ مواضيع المنتدى ولكن شكلها كده عملت الأختراع ده بالإيحاء من كثر كلامي على حلاوه اللازنيا - بس اللي باكلها بره - ) ولقيت بقى امينة عماله ترص في اطباق وتغلفها ..

فقلت لها : إيه إنتي بتعملي إيه .. هي الحاجت دي للتصدير ؟

قالت : هأوزع على الجيران عشان يذوقوا عمايل إيدي ..

فتبسمت وانفرجت أساريري وقولت لها عين العقل ( إشمعنى انا اللي اتعذب لوحدي ) وأضفت قائلاً وودي طبق لصحبتك اللي راحت معاكي السوبر ماركت ( عشان تحرم )

فلقيتها بتسألني بكل إهتمام : بالله عليك يا شيخ مش عمايل إيديه أحسن من الحاجات اللي بتاكلها بره وولا بتسري ولا بتمري ؟.

قلت وانا أستغفر الله في سري عسى ان يغفر لي كذبي : طبعاً يا حبيبتي يا سلام لو كل الستات زيك ( ماكنش في حد عمر فيها ) بس حاولي ما تتعبيش نفسك في الأكلات اللي بتستنزف وقتك ومجهودك واعملي الحاجات السريعة المعروفة ...

ودي كانت نهاية اكلت لازنيا ......والله يسامحك ياللي في بالي ..

[Salwa]

صباح الخير

بيتهيألى ان مفيش فايدة معاكم ياجماعة ........؟؟

يعنى لى سنين اقول لكم ان فيه حاجات بلاش تشتروها ؟؟ الأسهل والأنظف والأصح انها تتعمل فى البيت ........!!!!

موضوع المكرونة واللازانيا وكل ده ...........

ماكينة المكرونة (( ياسى السيد )) بتتباع فى المدينة والرياض ب150 ريال ..........بس.

وايضا بتتباع فى مصر اعتقد بأقل من 250 جنيه ...........

اى نوع من المكرونة او اللازانيا ......اسهل طريقة واصح كل 100 جرام دقيق عليه بيضة واحدة ........ثم تمر فى الماكينة

(( على فكرة دى ماكينة سهلة ومش بالكهربا )) ومفيش بيت فى ايطاليا مفيهوش الماكينة دى .....(( صح يا اسكوربيو ؟؟ ))

تعملوا الواح اللازانيا بالضبط برضه زى الواح السمبوسك المشهور فى السعودية والمغرب وايضا فى سوريا ولبنان ...اعتقد اسمه عرايس ..

اللحمة العصاج تتعمل كما سبق ان ذكرتم الطريقة او يحمر البصل

المبشور كبير شوية ثم يضاف اللحم ....

باقى المكونات التى تريدون اضافتها ....كل حسب رغبته ...

بالنسبة للازانيا السبانخ ...فهى تضاف بدلا من اللحم او ممكن تضاف مع اللحم ...

ممكن اضافة جبنة موزاريللا على الوجه او ممكن فقط بيضة مخفوقة ........وبالهنا والشفاء

على فكرة ممكن صنع المكرونة وتقطيعها فى الماكينة وعمل كل الاشكال الموجودة ..(( اسهل واوفر واصح كما سبق ان قلت ))

شكلى كدة بعمل دعاية لشركة معرفهاش !!!!!!!!!!

صباح الخير

[se_ Elsyed]

صباح الخير يا مدام سلوى ...

الله لا يسيئك ما تفتحيش جروح قد اوشكت ان تندمل ..

بقى انا ما صدقت احاول انسى التجربة وحضرتك بتقولي هات ماكينة تدخل فيها العجين من الناحية دي يطلع لك سوسيس من الناحية الثانية ... وعشان بدل ما ناكل إحنا لوحدنا نقوم نصدر لدول الجوار ..

وبعدين الماكينة دي عندنا من ييجي أكثر من 5 سنوات بس أنا أشتريتها لوالدتي عشان بتعمل حاجة كده في الفلاحين بيسموها مخروطة ... هي زي الشعرية بس اتخن شوية وبيتحط عليها لبن سخن وسكر وبعدين تتاكل .. بس عمري ما أكلتها ...

يا حاجة سلوى إحنا أخرنا محشي ورق العنب وكفى الله المؤمنين القتال أنا ما عنديش إستعداد أروح شهيد التجارب النووية دي ...