كاس العالم لليد

[kotoz9]

بعد انتهاء الدورى وهروب الزملكاوية من صفحة الرياضة وعملا بمقولة "يا بخت من قدر وعفى" مش حاتكلم فى خيبة الزمالك ولا فى تفوق الاهلى وحنقل الكلام لموضوع كرة اليد المصرية.

بطولة العالم ال19 انطلقت فى تونس من 3ايام ولعب المنتخب المصرى مبارتين الاولى مع المانيا وهزم 25-22 والثانية مع صربيا وفاز 24-22

المهم ان المنتخب ظهر بشكل افضل كثيرا مما ظهر عليه فى اثينا وده شئ جيد فهل يرتفع منحنى اداء منتخبنا من جديد بعد ان وصل لادنى درجاته فى اثينا

السؤال هل يستطيع المنتخب تحقيق مركز متقدم؟؟

[kotoz9]

انا يا جماعة مش عارف انتم ليه مهملين موضوع منتخب اليد المصرى مع انه المنتخب الجماعى الوحيد اللى حقق نتيجة مشرفة للكرة المصرية.

على العموم منتخب مصر فى اليومين اللى فاتوا حقق الفوز على البرازيل وقطر وقدم المنتخب عرض سيئ على عكس المبارتين اللى قبلهم اللى قدم فيهم المنتخب عرض جيد.

الواحد وهو بيتفرج على ماتش قطر مندهش من اللى بيحصل قطر اضعف فرق المجموعة تتعادل معنا وتكاد تفوز كمان العيبة المصريين اول ما وصل الفرق ل8 نقط سابوا الماتش خالص وبقى زيهم زى الجمهور اللى قاعد فى الاستاد خلاص كأنهم خلصوا الماتش.

المهم ان الفرق التانية ما بترحمش صربيا مثلا اللى غلبنها 24-22 غلبت البرازيل 33-19 بينما منتخب مصر غلب البرازيل بصعوبة 24-20

المنتخب ليه اخر ماتش يوم السبت مع النرويج لو فاز يتأهل لو انهزم يبقى فى الباى باى

[se_ Elsyed]

منتخبنا ماشي كويس بس عندهم عيب خطير جداً .. وهو قلة الطموح والإستهتار ..

فزي ما قولت يا قطز الفرق القوية اللي هما عمالقة اللعبة زي أسبانيا ، فرنسا ، السويد ، كرواتيا ، روسيا ، الدنمارك .. لما بتقابل فرق أقل منها في المستوى ما بترحمهاش وبتكرهها في كرة اليد ... وبالتالي نرى نتائج مباريات تتعدى الـ 50 بنط ..

اما أحنا لازم نقعد على أعصابنا وضغطنا يرتفع عندما نرى فريقنا يلعب على سبيل المثال أمام ألمانيا اللي هي ليست بالقوة التى كانت عليها سابقاً وكانوا بيلعبوا ناقصين في اوقات كتير من المباراة ومع ذلك إنهزمنا بسبب أخطاء ساذجة من الهجوم وبسبب خوف اللاعبين من المباراة اللي قدام فريق كبير ..

جينا قدام البرازيل واللي المفروض نكسبها بفارق كبير ومع ذلك في تهاون ويادوب المباراة لازم تطلع فرق بنط أو بنطين ... وحدث نفس الشيء أمام قطر وربنا ستر .

بس بإذن الله هانتأهل للدور الثاني ... وعلى الأقل لو في إصرار يبقى نتعادل مع النرويج زي ما المانيا أتعادلت معاها أمبارح 26-26 .

[kotoz9]

عندك كل الحق لاعبى مصر ينقصهم الطموح.اليوم تغلبت تونس على الدنمارك بطلة اوروبا فى مفاجأة غريبة لأ وغلبتها كام 25-22 ده كمان الفارق وصل فى بعض الاوقات فى الماتش الى 8 نقاط يعنى تونس بهدلت الدنمارك اخر بهدلة وتصدرت المجموعة وشكلها حاتعملها وتوصل لقبل النهائى.

اما نشوف بقى المنتخب بتاعنا حيعمل ايه مع النرويج ....ربنا يستر

[se_ Elsyed]

.اليوم تغلبت تونس على الدنمارك بطلة اوروبا فى مفاجأة غريبة لأ وغلبتها كام 25-22

لأ والأغرب من كده إتعادلت مع فريق الأسد المرعب اللي إسمه فرنسا ...

مع إن تونس دي بنغلبها وإحنا مرتاحين ..

[kotoz9]

وانتهى منتخب مصر ...انهزم من النرويج بفارق 5 نقط وخرج من البطولة مبكرا..

انا عن نفسى اتفرجت على الشوط الاول بس واتحرق دمى

فريق من المعوقين ده انسب وصف لهؤلاء اللعيبة بل انى والله اظلم المعوقين لان المعوقين عندهم روح والرغبة فى الفوز اما هؤلاء فلا......

يضيعوا الفرصة وراء الفرصة وكأنهم يريدون من النرويج ان تتغلبلهم

[theblackpirate2005]

اولا منتخب اليد بصراحه مكنش متوقع انه هيعدى من الدور اللى اول اساسا قبل البطوله متبتدى

ثانيا من اول ماتش والمنتخب لعبه بيقول انه مش هيعدى مش عشان وحش بس عشان مفيش خبره ولو حته الخصم جاب فى نفسه اجوان

ثالثا المنتخب ده من الاشبال وده بدايه منتخب جديد وانا متفائل ان المنتخب ده البطوله الجايه هيعمل حاجه عشان القرعه بجد ظلمتنا

رابعا لازم مننساش اداء المنتخب فى الاولمبياد وكان مستواه زفت بمعنى كلمه زفت ومستواه دلوقتى بعد 3 شهور بس

خامسا بيتهيالى ان حسن مصطفى معدش فاضى للاتحاد بعد منجح فى الانتخبات بتاعت الاتحاد الدولى فمفروض يختار بين الاتحادين

وانا عارف ان مفيش حد هيقتنع بكلامى وهيتقال عنى خلف خلاف

بس ده مجرد راى me0:

[se_ Elsyed]

للأسف إحنا تعلقنا بأحبال الوهم الواهية .. وطالبنا المنتخب بأكثر من قدراته ... يا جماعة الخير القماشة كده ... ما ينفعش تجيب قماشه متر ونص وتقول عايز أعمل منها بدلة سموكن .... يا عم إنت وهو شوف منتحب ألمانيا أو النرويج او فرنسا ( مش هاقول أسبانيا أو السويد ) وشوف التنظيم والإرادة ... ماكينات بتلعب قدامك لأخر لحظة ... لا تراخي .. لا تهاون ....... ده أمبارح وفي ماتش ألمانيا جت فرص لنا والفريق اللي قدامك ناقص كانت كفيلة بإنه تعمل فرق على الأقل 3 أهادف لينا ولكن كل سنة وإنت طيب ... هجوم ضعيف ... اجنحة متقصقصة ... لاعب دائيرة بنسمع عنه ما بنشوفوش ... حماده النقيب ولو حطينا العارضة كانت تعمل شغله عنه ... كل الكرات التي تم تسديدها عليه من الخارج جت إجوان بالصلاتو عالنبي ... وكل ما الفارق يضيق ويبقى هدف واحد أروح واخد حباية ضغط وأقول فُرجت ... هـــــــــــــب يقوم بقدرة قادر راجع 3 اهداف زي ما كان .. واللاعيبه ولا هي هنا وكأنها بتلعب عشان تطلع بأقل خسائر .. مش عشان تكسب ...

المدرب لوميل ده كويس .. بس اللاعبيين مش مساعدينه ....

يا قرصان يا أسود .. صوتنا إتنبح من زمان ونحن نطالب بتكوين جيل ثاني من القيادات ومش لازم في ( إستغفر الله العظيم .. كنت هاقول كلمة مش ظريفة ) البلد اللي ربنا رزقنا بها دي كل واحد يبقى مكوش على 1000 منصب ... رئيس الإتحاد الدولي .. ورئيس الإتحاد المصر لكرة اليد .. ورجل اعمال ... وبيصلح بوابير الجاز ... ومشارك على تاكس بالنفر ....

يا راجل حاجة تقرف ... لا يختلف إثنين على كفاءة ومهارة حسن مصطفى وكنت طول عمري بأتمنى يتعين رئيس إتحاد كورة عندنا او حتى رئيس جمهورية ... بجد ...

لكن مش معنى كده إنه يكوش على كل حاجة ... فما جعل الله لشخص من قلبين في صدره ... ده إيه ده ؟!!!!