شعار جديد للقناة الفضائية المصرية

[Alshiekh]

سيد مرزوق

هذا الشعار إستفزني فعلا لدرجة أنني قررت أن أقوم بتصميم شعار جديد وأقدمه لهم مجانا هدية مني

وهذ من ضمن طبيعة عملي وعندما أنتهي منه سأعرضه عليكم هنا للإطلاع قبل إرساله إن شاء الله

اتأخرت قوى لعل المانع خيرا. !

وعلى فكرة تصميمك ممكن يقبلوه لو لك واسطة عند العصابة.!

[Sherief AbdelWahab]

إقرا الفشحااااااط .. آخر أخبار الفشحاااااااط! :)

في الأهرام الرياضي فيه تقرير بيقول إن الفقي شاف الفضائية ، وما استحملش يا حبة عيني خمس دقايق من كمية التفاهة والهبل اللي شغالين عرض مستمر على القناة البائسة ، وقرر إنه حياخد إجراءات عنيفة بخصوص شكل القناة وبرامجها ، والشعار البعبعبعبعبعبعلي بتاعها..

بكرة نشوف ، ويا خبر بفلوس!

خلص الكلام

[se_ Elsyed]

هـــــــــــــــــــــيه

صحيح يا ولاد وعلى رأي عم عماد حمدي " أيام العمر معضوضه ... يا نينه "

عامين مرا الأن على موضوعي هذا بخصوص الفشحاط البعبولي الشهير بــ " شعار الفضائية المصرية "

وبالرغم من تعالي صرخات المصريين المشاهدين للفضائية المصرية إلا إن الحكومة وعلى رأسها أنس بك الفقي قالوا لنا " إضربوا راسكو في أقرب حيط "

وبعد ما راسنا بقت نُصين وما بقاش فيها حته سليمة

إذ بنا نستيقظ وخير اللهم أجعله خير يوم الثلاثاء الماضي على تغيير الفشاحط الحالي بفشحاط بعبولي أخر ولكنه أفحط من الفشحاط السابق

فلقد تم تغيير شعار القناة الفضائية المصرية الموجود بالمداخلة

بفشحاط أزبل منه .. ويعبر عن تمادي وأزدياد حالة قلة الذوق الموجودة لدى المسئولين عن الإعلام ويُمكننا أن نقول الان بالفُُم المليان " ما فيش فايدة يا حمديه "

والفشحاط الجديد أيها السادة ( ما رضتش أضع صورته دلوقت وقلت أمهد لكم الأول مراعاة لظروف مرضى القلب والضغط والسعال الديكي )

عبارة عن مربع متوازي الأضلاع مكتوب فيه كلمة مصر .. مفرطة م ص ر .. وبعدين الصورة بتتحرك وتحس كإن الحروف هاتتلخبط وبعدين تيجي كلمة " المصرية "

وأتحدى أي واحد مش مصري او مصري ومش عارف إن دي القناة الرسمية لمصر .. يقدر يقول إن دي كلمة مصر .

واعتقد إن السبب هو إن مسئولي الإعلام عايزين ينمو ذكائنا على طريقة " البازل puzzle ولاول وهلة سيسأل المشاهد نفسه :

- يا ترى دي كلمة ... صرم ... ولا رمص .... ولا مرص .... ولا صمر .... ولا مصر ..... ولا بلا أزرق على دماغهم

أنا الأول قلت دي حاجة فانتازيا كده بمناسبة إحتفالات تحرير سينا وكل سنة وإحنا مسينيين والوضع هايرجع إلى ما كان عليه

لكن بعيد عن السماعين سمعت أخبار إن ده هايبقى شعار الفضائية من هنا ورايح ولحين فشحاط أخر

لا حول ولا قوة إلا بالله

ما هي لو قناة خاصة كنا قلنا معليش إن شالله يعملو شعارهم " الخازوق الفرنسي الشهير " أو راس كلب ميت .. إنما لما تبقى قناة رسمية ملك لكل المصريين .. هنا لازم نعترض ونقولهم يا ناس خلو عند أهاليكو دم .. عيب كده الناس بقت تضحك علينا ...

وكلنا نشاهد قنوات زي السي إن إن والجزيرة والبي بي سي

أو حتى قنوات أخرى عربية بتقوم بتسجيل شعارها كعلامة تجارية لكي تكون منفردة بإستخدام هذا الشعار .. وبالتالي مش كل شويه تغيره كإنه فردة شراب .. وياريته شراب نضيف .. إلا إن ما يحدث عندنا هو تغيير فردة الشراب المقطعة بواحده مهربدة

يا جماعة يا إعلاميين عيب عليكو .. عيب وخلو عندكو ذوق ..

سأقوم اليوم بتنزيل صور الفشحاط وماليش دعوة باللي هايحصل

[Sherief AbdelWahab]

عمرك أطول من عمري يا أبا السيد .. كنت لسة ح أكتب في الموضوع دة..

يبدو أن انعدام الذوق بقى عادة وطبع يغلب كل تطبع في ماسبيرو .. ودة استمرار لثقافة ازدراء الصورة واحتقار الجمال في الميديا والفن المصريين بكل أسف..

أولاً .. ليه اتغير الشعار بس؟ هل لاحظ أبو أنس أن وعوده بتغيير القناة وتخليصها من برامج التخلف العقلي (90% من برامج القناة) طارت في الهوا شاشي واحنا ما ندراشي؟ يا جدع! :closedeyes:

ثانياً .. كراهية الجمال وصلت لأقصاها في اللوك كله .. حكاية التنويهات اللي بتظهر في أعلى الشاشة مقتبسة من كذا قناة ، والصور بتفكرني بتجارب التليفزيون الأولى في النقل التليفزيوني الرقمي لمباريات كرة القدم في أوائل التسعينيات..

ثالثاً .. المزيكا أعلى وأجمل وخسارة في المنظر المتخلف للوك القناة.. حتى البروموهات بدائية طحن ، دة يمكن يكون لوك القناة الأولى وبروموهاتها أقل سوءاً بكثير من لوك القناة الكارثة..

الظاهر إن الغرض من عمل هذا الشعار عمل حالة "حراك ذهني" زي "الحراك السياسي" كدة .. والاتنين لا ليهم لا لون ولا رائحة ولا طعم ولا أي حاجة..

ثقافة القبح حتى في الميديا بقت شيء لا يمكن السكوت عليه..

خلص الكلام

[se_ Elsyed]

شكراً يا شريف

كنت منتظر مداخلتك في هذا الموضوع الهام في تلك المرحلة الحرجة التي تمر بها مصر :blush2:

--------------

وسسسسسسسسسسسسسع وسسسسسسسسسسسسع للفشحاط

حاط حاط

أرقص غني يا نطاط

طاط طاط

[وليد صفوت]

صور أوضح للبعرور الشلفطاحى الأحمر الجديد:

[drhouba]

يا سنه كبيسه و نهار مش فايت و ليله بكل الألوان الغامقه

منك لله يا سيكو خللتنى أعكنن على العيال و أغير قناة الكارتون و أدور فى الريسيفر على قناتنا الفشحاطيه و بعد ما فوقونى و عملوا لى

الإسعافات الأوليه من مهدئات و الذى منه أنقذوا منى التلفزيون بالعافيه .

هو خلاص ما عدش فيه دم و لا إحساس و لا نظر عند الناس دى ؟

عموما القناه الفشحاطيه المصريه مسئولية كل مشاهد و أنا كطبيب أحذر من مشاهدتها حتى و لو قرعه ( يا ريت ) من غير فشحاط

بس إنت تستاهل إنك بتشوف الأحافير دى و تستاهل كل اللى يجرى لك

حسبى الله و نعم الوكيل

بس خلاص

أشهد أن لا إله إلا الله و أن محمد رسول الله

[العمرلحظة]

أنا مش فاهم

زمان كانوا قناتين يحملوا أسم الفضائية المصرية 1 و 2 وكانت العلامة هى النسر ومحدش بيشوفهم

مع إنهم غيروا الشعار وعملوه الأهرامات قلنا وماله أهى مصر برده

أم لما لقوا أن ماحدش بيشوفهم عملوهم واحده بس وبيرضوا محدش بيشوفها

دا طبعا لسوء فى التغذية

دلوقتى شالو الأهرامات وحطوا حاجة كده صعب أوصفها

قلولى يا جماعة هو إحنا بنتسرق ولا نظام لو مش عاجبك إتنيل على عينك واتفرج وانت ساكت :blush2: :blush2:

[se_ Elsyed]

يعني عمال أهاتي من إمبارح وأقول إوعى الفشحاط ... حاسب الكهربا وتيجوا برضوا تلعبو في الفشحاط البعبولي وتتكهربوا وتقولوا منك لله يا سين سين ...

كل واحد مسئول عن تصرفاته أنا ماليش دعوة ..

بجد حاجه تقرف ... مش كده ؟

[drhouba]

بجد حاجه تقرف ... مش كده ؟

حاجه تقرف ؟ بجد إنت كده بتجاملهم أنا مش لاقى كلمه فى المجمع اللغوى و الله توفيهم حقهم

ده شئ لا يسدكه عكل و الله .... بس الميزه إن هم مالهومش قفله كل مره تقول مفيش بعد كده فشحطه بس يخيب ظنك و دايما هناك

المزيد و الحمد لله ... بس أهى برضه دعايه كويسه و بيفرجوا علينا الناس :blush2:

[Abdulaziz Omar]

ايه الجمال ده.....ايه الحلاوة دي

انا شوفت الشعار في الصور اللي انتوا حطيتوها

لامؤاخذة الشعار جميل جدا ومافيش احلي من كده :P :P :P

انتوا بس اللي موش عارفين الفن التجريدي والتكعيبي والتحشيشي واللذي منه :blink:

ده انتوا تغيظوا :lol:

[se_ Elsyed]

هي الناس دي معندهاش إخوات صُبيان ؟

عُمري ما شوفت قنوات تقعد تلعب في الشعار كل يومين تلاته وتغير وتحير وتدور فيه كإنه شراب بتغيره كل يوم ... بدون سابق إنذار وبذوق رديء وفج ومعفن .. وكإن المصممين بتوعهم قاعدين في الحمام وما عندهمش أي حس او جمال أو تذوق فني

صورت لكم صورة الفشحاط بتاع اول إمبارح قبل ما يغيروه بفشحاط أخر ..

برضوا عبارة عن صورة خازوق أبيض رمزاً للطُهر والعفاف .. هما كانوا يقصدوا هرم .. بس طلع معاهم كده عشان نيتهم السودا