" نفــــس الديبــــاجه "

[أشرف حسين]

و ك المجبور على المعتاد

نشفت صوابع بصمتي

ف مضيت ب أختام المُحال

و طبعة صورة للحقيقه ب تبتسم

و الرسمه على الوش الذبوُل

مُختال

اقسم ب ربي لم أكن يوماً

للأحتياج نشّال

انا ع البسيط شحات بقول حاضر

انا اللي الصبر صبرني و مش صابر

و الصبر سلعه و بايره في عُمري من بدري !

يا ريما امتى تفهمي

ان المساخه..مساخه

مش عاده قديمه

ضميت كروت اللعبه الي صدري

لا غمزة تحت الطاوله و لا خويت مُحتال

يلعن ابوك مليم حرام محروم من القيمه

الكُل قشّ الغنيمه و انفضت الليله

لكنه هو السؤال

لو كنت انا السكران

ليه من زمان رجفان م البرد بتخابط ؟

شوف البِدع يا جدع

لماكّ تكون ترزي و مش دفيان

و مش شاطر

أخيط عُمري و اعقدني منديل و رابط

على حدوة الحظ الغبي

على نقطتين التاء و شعر كل النسا

الغُرزه بِنسه و مشابك

و انا طبعي ع الطرحه حريري مُنساب و مش ثابت

و لا كنت بعرف أشدّ و لا كنت يوم شابك

ف مش غريبه كده..لماكّ يا أسمي تتنسا

الموضه في زمن الرجال

انك تفصل قميصك و الكوله ع البحري

عُرضه لقنص الظروف و رهن هدف الأغتيال

شيبكه تطريزي و ف المركز رميمه

شاهدين زبايني و الخلايق على قُبح الجريمه

بشلبّ ف ترتر مصفف ملّو العيون و الجراب

شوف قد ايه رخيص التراب !

خط العذاب ربي الرحيم ما تغيره

يمكن ضغوط الكُستبان تعدّل أبرتّي

جهة اليمين يوم الحساب

[نورالعين]

جميلة جدا

سلمت الأيادي

استخدمت لهجة صعبة اخر القصيدة

واضح انك متمكن من لهجات المهن

[أشرف حسين]

جميلة جدا

سلمت الأيادي

استخدمت لهجة صعبة اخر القصيدة

واضح انك متمكن من لهجات المهن

سبّع صنايع :)

كانت مجرد خربشه للتأمل والأستدراك سيدتي

قراءه سريعه في مرآة ذاتكِ

ربما تساوي نوم عميق بعد أن تبكي قليلا !

كوني بخير

تم تعديل 2 نوفمبر 2012 بواسطة أشرف حسين