ايه حكاية مدرستى وحده منتجه ؟؟؟؟؟ - وأخرة التجارب فينا ايه ؟

[semsemah2000]

النهاردة وانا فى طريقى للعمل لقيت أكتر من مدرسه حكومية كاتبه على الجدران شعارات كتير و منها شعار مدرستى وحدة منتجه و تدر دخلا !!!!!!!!! و تذكرت ان دى كانت أفكار جديدة و ناويين يطبقوها .....

حد فى الدنيا بيخلى المدرسه وحدة منتجه هم التلاميذ حايعملوا ايه و لا ايه ؟؟؟ و أخرة تخريف الراجل وزير التربية و التعليم ايه ؟؟؟؟ مش كفاية التعليم البايظ و مستوى المعلمين و مستوى المدارس و المصاريف الباهظه للمدارس الخاصه و حكاية المدارس النموذجيه و غيره و غيره .... حاجه تجنن

[NonSuperior]

اولا ما اكثر الشعارات التى تصدر ويكون مكانها الوحيد الجدران وتتلاشى مع اول ضربة بويه :) عشان كده احب اطمئنك يا سمسومه ان ده فى الغالب واحد من شعارات عده ترفعها الوزاره مثل القضاء على الدروس الخصوصيه وتطوير التعليم الى آخر هذه الخزعبلات الوزاريه :)

انا فاكره من زمااااااااان جدا كان على حوائط المدرسه حاجه اسمها مشروع الالف يوم باين وطبعا كل اللى فهمته بشان هذا الموضوع ان مصر هتبقى جنه بعد الالف يوم دول وصعب عليا اوى ان حد يحط نفسه فى الموقف ده عشان بعد ال 3 سنين الناس "انا شخصيا" كنت هاسال هى فين النتيجه :) وبعدين توالت الشعارات كالمطر زى حاجه كده كان اسمها صحوة مصر بس مش عارفه ليه نومها تقيل كده وماصحيتش لحد دلوقتى :) واكتشفت انها كلها اسطوانات :)

انما لو انا فاهمه غلط والمدرسه هتكون فعلا منتجه ليه لا :) يعنى لو هيعلموا العيال صنعه تنفعهم فى مستقبلهم المظلم يبقى فل جدا :) طبعا يتعلموا اشياء مناسبه لسنهم و قدراتهم و كده يعنى مش اى عك والسلام :)