اذهب إلى المحتوى
إنشاء باب جديد بعنوان سد النهضة الإثيوبي لكل الموضوعات المتعلقة بسد النهضة ×

كيف كان عقابك المدرسى؟


MuslimaEgyptian

Recommended Posts

تكمله للمواضيع المفتوحه التى تسترجع ذكريات الماضى، ...كيف يكون إسترجاع ذكريات الماضى (وربما الحالى للبعض :) ) بدون ركن العقاب المدرسى...وبينما كنت أسترجع ذكرياتى، وجدتنى أتسائل، كان عقاب و تأديب ده ولا....عنف إجرامى... خاصه مع الإستخدام المتنوع للمسطره وباقى أسلحه الدمار الشامل :lol:

مع إنى كنت من الأوائل ولست من صناع المشاكل بالمره h): ويشهد الجميع على إحترامى للمدرسين، ولكننى حظيت بقدر لا بأس به من العقاب الموجع داخل الفصل :)

فليسرد الكل منا ذكرياته...الموجعه حول هذا الشأن mc:

تم تعديل بواسطة MuslimaEgyptian
رابط هذا التعليق
شارك

  • الردود 62
  • Created
  • اخر رد

Top Posters In This Topic

كى لا أفهم غلط، أنا لست مع التسيب الحالى وتراجع دور المدرسين فى تكمله دور الأسره فى بناء الفرد وتهذيبه وردع الإنحلال الاخلاقى...الا إن اللى حصل للبعض منا كان كتير أوى أوى h):

مثلا، أتذكر مره كنا المفروض نشتغل على واجب فى صمت بداخل الفصل...فقطعت ورقه عملت صوت بسيط وأنا بقطعها...أنا بجد محرجه أقول إنى أرغمت بالوقوف فوق الdesk ويدى لفوق كتذنيب...وده من مدرسه إنجليزى المفروض انها رهيفه المشاعر بحكم دراستها فى الأدب والشعر

مره تانيه...من مدرسه العربى...قمت علشان آخد الكراسه التى صححتها

وندهتلى علشان أخدها...الظاهر إنها مكانتش فى أفضل حالاتها النفسيه يوميها....لأنى مددت إيدى لكى أتسلم الكراسه...لقيت حاجه كده لبست فى وشى :)

حاجه تكسف :)

تم تعديل بواسطة MuslimaEgyptian
رابط هذا التعليق
شارك

الضرب بالعصا او الخرزانة كان اصعب عقاب وخصوصا على الايد

(افتح ايدك يا ولد) طبعا مع السقيع بتاع اسكندريه ايام المدرسه وخصوصا في حصص النصوص لاني مش من هواة الحفظ وسبحان الله كانت دايما تبقى الحصة اللي بعد الفسحةوطبعا الفسحه كلها مطر واحنا بنلعب في المطر والواحد مافاف من السقعه تطلع الفصل تلاقي ابله دولت (كان اسمها كده) واقفه بالخرزانة والمصيبه انهاكانت متعاقده معايا كل حصة سمع يا ياسو (يادي النيله على ياسو وسنين ياسو واللي جابو ياسو هو ما فيش غيري ) الظاهر كان عندها علم اني مش هحفظ ابداً

اذكر في سنة اولى ثانوي وكانت المدرسة مسائي وفضلنا مدة شهرين تقريبا بدون مدرس فرنساوي وكانت حصة الفرنساوي تعتبر العاب بالنسبة لينا

وفي يوم اغبر ما طلعت له شمس دخلت الفصل فوجدت جزار في ملابس مدرس وهات يا تلطيش في العيال بالايد والرجل

مين ده يا اخوانا طلع على السفاح مدرس الفرنساوي الجديد

ومن يومها ما حضرت ولا حصة فرنساوي لاخر العام

وطبعا طلعت سنتها بملحق فرنساوي

رابط هذا التعليق
شارك

اوافق حضرتك جداً علي موضوع العقاب الذي لا بد وان يكون له درجات ولا ارى ان يصل بأى حال من الاحوال للضرب المُبرح او مانسمع عنه هذه الأيام..رغم ان العيال كلها شقيه وسوسة بس مهما كان برضه دول أطفال يعنى h):

يعنى انا بتغاظ جداً لما مدرسه تضرب الفصل كله علشان سمعت دوشه ماأكيد فيه اطفال كانوا ساكتين بتظلمهم ودة اللي بيأثر عليهم ويكون لديهم فكره ان "كله محصل بعضه " وان الادب مامنوش فايده..ويفقدهم الثقه فيمن هم اكبر منهم..

بالنسبه للذكريات العقابيه فأنا اتعاقبت كتير جداً ظُلماً وزوراً وبُهتاناً :) لدرجه انى تأثرت نفسياً جداً وحتى الان أفتكر مرة كنت بعلم الكراسه عند الأبله والقلم الرصاص بتاعى وقع فأنا احتراماً للأبله مرضيتش أوطى أجيبه , وليه وليه بئي وبقت تضربنى في كل حتى وتقولى انتى مهمله ومش بتحافظى على حاجتك والكلام دة وانا والله كانت نيتى ماسيبهاش تتكلم واوطى اجيب القلم احتراماً ليها يعنى :)

رابط هذا التعليق
شارك

وموقف اثر نفسياً جداً : كان بيدينى في الفصل مدرسين (استاذ وابله) وانا أخدت درس عند الاستاذ ,وتسربت الانباء للأبله h): وكان يوم مهبب علي دماغى وفضلت تقررنى طووووول اليوم ( وانا كان عندى تنبيهات مسبقه :lol: ) بس مين استخدمت كل اساليب المخابرات معايا وبئت نازله علي وشي بالاقلام وساعتها انا كنت مدمرة نفسياً من المدرسه ع الاستاذ علي وزارة التربيه والتعليم كلها رغم ان جدى راح المدرسه وعمل مشكله معاها لكن ميين الله يسهالها والحمد لله انىطلعت منها علي خير :)

وفضلت انتقل من الحضانات وحضانة تجيبنى وحضانه تودينى لحد مادخلت المدرسه ودى بئي عاوزالها صفحة حوادث لوحدها بس فعلاً رغم انى كنت باضرب بس كنت ساكته وهاديه ومش بتشاقي وبكتم ف قلبى واسكت وحقيقي فعلاً بتأثر جداً بالمواقف دى لأن اكترها ماليش اي ذنب فيه..وبجد بقيت مشبعه بالخوف من الناس ومليئه بكتله من التردد والشك قبل اى فعل ..الله يجازيهم بئي ويكرم المدرسين التانين اللي ساعدونى ..لأن برضو كان في مدرسين كتير كانوا كويسين ربنا يكرمهم يارب :)

رابط هذا التعليق
شارك

ياخوانا عيب كده ... المفروض نلم حاجة لأختنا مسلمة إيجبشان ( أهو قولتها بالإنجليزي عشان محبط ما يزعلش ) وذلك تقديراً للمواضيع الجميلة اللي بتفتحها ..

وعلى فكرة الموضوع ده بالذات لما نيجي نناقشه وندلي بارائنا القصد منه مش نناقش ليه س س إنضرب أو فلان إتذنب وهو طفل لا يعي شيئاً ... ولكن عشان نناقش قضية مهمة جداً وهي البُعد النفسي للعقاب المدرسي وإزاي ممكن يكون بداية لتدمير مستقبل إنسان او على الأقل ترك أثار نفسية سيئة لدي المُعاقب حتى لو بلغ من العمر أرذلة ... نقطة أخرى مهمة وأكاد أقول بإنها من الأساطير في بلدنا ولا نسمع عنها من أساسة وهي .. هل كل المدرسين في المدارس والكليات المصرية مؤهلين نفسياً إنهم ينقلوا العلم لطلابه ؟

ولا في منهم شخصيات مكانها الطبيعي مستشفى المجانين عنبر ج بتاع الحالات الخطرة على نفسها وعلى المجتمع ؟

رابط هذا التعليق
شارك

أنا فاكرة وأنا فى خامسة ابتدائى، كان عندنا مدرسة عربى صعبة أوى... اكتشفت بعد فترة إنها كل لما تدخلنا، على نص الحصة أروح للحكيمة أقولها "بطنى بتوجعنى" تروح مديانى روح النعناع فى شوية مية. بعد فترة نزلت للحكيمة أقولها بطنى بتوجعنى... صرخت فيا "لاااااااااا. دى أكيد حالة نفسية...!!!" ساعتها أدركت فعلا أنا قد ايه بككره المدرسة دى.

كان الواجب عندها إنها تدينا درس القراءة تقسمه على باراجرافات.. وكل يوم نكتب باراجراف 3 مرات و مرة إملاء..!!!

كنت أحاول أعمل الواجب، ألاقينى بكتب الدرس مرة و نص و أزهق و يقتلنى الإحساس بعدم جدوى هذا الواجب المرهق والعقيم. فكنت أتمرد و ما أعملش الواجب.

مرة جت تفتش على الواجب، قالت كل مرة كتابة ناقصة بعصايتين... وقعدت تعد أنا ناقصلى كام مرة كتابة... وكان نصيبى 18 عصاية بخرزانة سمك 1سم و طول حوالى 40سم... وعلى فكرة الضرب كان بعزم، يعنى مش حاجة كدة دلع... لأ... كانت ترفع دراعها على قد ما تقدر و طااااخ..

أنا فاكرة يومها قعدت 3 ساعات مش قادرة أطبق كفى، ولا زلت لحد النهاردة أتسائل... هى الست دى مكانش عندها رحمة؟؟؟ خلاص خلصت وسائل العقاب وأصبح الضرب المبرح هو الوسيلة الوحيدة؟؟

رابط هذا التعليق
شارك

في ساعات الحكايه بتكون عقده نفسيه عند المدرس و ساعات بيكون البيت سبب في المشكله دي

يعني مش طبيعي مثلا ان مدرس او مدرسه يكون قرفان في عيشته في البيت و تخانق مع طوب الارض و ييجي يطلع همه على التلاميذ في المدرسه

و كمان زي ما قال سي السيد في ناس واخدين شهاده تربويه و لو جينا عملنا له اختبار نفسي هنلاقيه هو نفسه محتاج لخبير تربوي علشان يعالج له العقد و الترسيبات في حياته

و ساعات بعض البيوت بتفتكر ان الضرب هو نوع من انواع التربيه السليمه و العقاب التربوي فلما يروح الولد او البنت يشكو للاهل و ايده متورمه من الضرب تلاقوا الاب و الام يتعاملوا مع الموضوع بشكل عادي جدا قال ايه ده حق المدرس في تربيه التلاميذ و ده غلط لانه بيشجع المدرس او المدرسه على التمادي و في حالات العته النفسي الموجود عند بعض الاساتذه نلاقي الموضوع اتطور و سمعنا عن المدرس اللي جاب لتلميذ عاهه مستديمه ( وش واحد مذهوووووووووووووول )

بس بصراحه اسؤا انواع العقاب البدني على الاطلاق هو الضرب بالقلم على الوش بصراحه دي اكبر انواع الاهانه و متهيالي دي عامل اساسي في تكوين الطفل و ممكن تحوله لانسان منطوي و مهان على طول

رابط هذا التعليق
شارك

بالنسبة لي .. الحمد لله فترة إبتدائي مرت بدون أي خساير بشرية بل بالعكس كنت محل تقدير من جميع المدرسين وده دفعني إني اكون من الطلبة المتفوقين والمعروفين بالمدرسة كمان ...

-- دخلت إعدادي بقى وإبتدى التلطيش اللي لا ناقة ولا جمل لي فيه ... ويمكن انا حكيت قبل كده عن إنسانة شريرة كانت بتدرس لنا جغرافيا في اولى إعدادي وبهدلتني عشان سألتها في اول السنة .. هل إنجلترا هي بريطانيا ؟ وليه وليه وكأني نطقت كُفراً ذنبتني وخليتني أرفع إيدي ووشي في الحيط في آخر الفصل طول الحصة ولم ينقذني غير مرور موجه من المنطقة التعليمية في هذا اليوم.. مع إن كل اللي موجودين كانوا طراطير ومش فاهمين حاجة برضوا بس انا اللي تجرأت وسألت !!!! ولسه الموضوع ده تارك أثر نفسي عندي لحد دلوقت ..

وطبعاً إبتدى الإستئصاد والشغل القذر من بعض ضعاف النفوس ممن يطلقون عليهم مدرسين ومربي اجيال عشان ناخد عندهم دروس خصوصية وكانوا لا يتوانون عن إنزال أشد العقاب لمن لا يستجيب لهم وينفعهم ...

لكن الحمد لله عديت الإعدادية وبمجموع كبير كمان ..

دخلت على المعمة بقى المُسماه بالثانوية العامية ... وإخترت إني ألتحق بفصول اللغة الألمانية القسم العلمي .. ولكن بعد أسبوع حولت فرنساوي وأدبي .. لأن ماليش في الرياضة ولا العلوم ..

وبالصلاتو عالنبي من اول حصة يا فرنساوي أتذكر هذا المُدرس جيداً وإسمه مسيو حسانين ( توفي بمرض القلب في نفس العام ... الظاهر كان الدعاء عليه مستجاب ويا عالم هو فين دلوقت ) مسك كل الفصل وخدنا وش محترم وهات يا تهزيء وسقطنا كلنا في أول إمتحان ... مع إنها مادة جديدة علينا ولازم يدرس لنا بالهداوة ... والعبد لله رفع الراية البيضا ودخلت درس عنده .. والحمد لله كنت من المتفوقين في الفرنساوي ..... والراجل بصراحة كان مُبدع جداً جداً في الدرس الخصوصي .. وبيكروت البشر في الحصة الرسمية وإن شالله عن اهاليهم ما إتعلموا..

ومازالت أتذكر زميلي في هذه الفصل وإسمه محمد عبد الله .... الولد ده كان دمث الخُلق وفي منتهى التفوق والادب ... والوحيد اللي قاوم ومادخلش درس خصوصي وبقى ينجح في الإختبارات الشهرية وشكله كان في حد عنده في البيت بيدرس له فرنساوي لإنه كان غير طبيعي ومتمكن جداً من اللغة بالنسبة لتلك المرحلة السنية ... الولد ده خلي حسانين ( كنا مسميينوه حسانين قُطه .. مش عارف ليه ) خلاه يعيط والله العظيم وفي الآخر سقف له .. لما طلعه مره قدام الفصل وعصره عصر وكان بيفكرني بمناقشة الدكتوراة بتاعت طه حسين ... والولد عقده في حياته لما جاوب على كل الأسئلة اللي كلنا كنا بنبص لها على إنها هلامية بالنسبة لطلبة في أولى ثانوية ...

- كان عندنا برضوا مُدرس إنجليزي ومدرس تاريخ في سنة ثانية والله العظيم وقسماً بالله الأتنين دول مختلين عقلياً رسمي ومش ناقصهم إلا القمصان ....

- في سنة ثانية ربنا رزقنا بمسيو فرنساوي ثاني إسمه خليل - كنا مسميينوه خليل باباز - وصاحبنا كان ماشي على نفس نهج حسانين ... وطلبت منه إني اخد درس فرنساوي عنده فرفض وقالي بالحرف الواحد .. يابني ده انت أستاذ .. ولكن صممت واخدت درس برضوا عشان أبقى متميز في اللغة الفرنسية ..

- في مرحلة الثانوي كان في مُدرس تربية رياضية - كنا بنمسع عنها بس - مهمته تنظيم الطوابير وحفظ النظام بالمدرسة ... الراجل ده يا جماعة كانت لا تفارق يده شومه زي بتاعت الصعايدة كده بالظبط ولا يتوانى إنه ينزل على أي طالب ضرب لحد ما يبان له صحاب ... وكان عنده أسلوب ظريف في العقاب .. في الحقيقي هو أسلوب مبتكر وجديد .... فإذا سمع عن فصل فيه شغب كان يدخل الفصل ويقوم رئيس الفصل بتاعه - كان س س في سنة اولى وثالثة - ويقول له .. نقي لي 10 طلاب أعاقبهم ظُلم ... آه والله بنفس اللفظ كده ... ويا ويله ويا سواد ليله لو رئيس الفصل طلع عنده كرامه وما أختارش 10 طلاب .. وكان شخص دموي وفي منتهى القسوة وينزل في العيال ضرب بالشومة ولا كأنه بيتخانق في سوق الخضار ...

ما زالت أتذكر أستاذ تاريخ في سنة اولى ... من الغرائب والعجائب في الحياة التعليمية برضوا ... تعرفوا كان بيعاقب الطلبة إزاي .... Believe it or not !!!!!!! الطالب اللي ماكنش يعرف يجاوب السؤال يقوم واحد بداله يجاوب ... ولو جاوب صح يخليه يبصُق في وجه اللي ماجاوبش ...... مش ممكن ...... ده جنان رسمي ويترك في نفسي أثار سيئة إلى الآن مع إني الحمد لله لم اتعرض يوماً لمثل هذا العقاب لكنني رأيته وشاركت فيه في بعض الأحيان ، وعلى فكرة لو الطالب اللي جاوب رفض بيخلي واحد تاني يبصق في وش الأتنين ...

كفاية كده أحسن كرهت نفسي ...

رابط هذا التعليق
شارك

موضوع العقاب المدرسي او الاثر النفسي للعقاب المدرسي ده عندي ليه مواقف كتيره جدا كان اولها علي ما اذكر في الابتدائي كانت مدرستي في الزمالك وانا ساكن في الهرم ف طبعا كنت كل يوم بتأخر وكان عندنا تقليد جميل جدا او عاده كان بيعملها مدرس الالعاب فاكر اسمه محمود كان معاه خرزانه حتي الان هي دي بالنسبه ليا الخرازانه المثاليه كانت غير طبيعي وتدخل كده تتمختر وانت متأخر وتشوفك الست الناظره كان اسمها اقبال فاكر شكلها والله وتروح بصه بصه لمسرور السياف (مستر محمود ) يروح رقعك 4 خرازانات mc: حلاوه :lol: وخد عندك ده كل يوم الموضوع بقه اختلف 180 درجه لما ابويا وامي قررو يدخلونا 2 و3 ثاناوي في مدرسه الساعيديه قلعه الابطال عشان اللل ايه التعليم الخاص بيعلم الفساد :) B) :) والتعليم الحكومي محترم :) :) وعنها ودخلنا انا والغلبان اخويا المدرسه اخويا كمل علي نفس الخط لا تناقش ولا تجادل يا اخ علي انا الموضوع اختلف معايا اوي اوي ربنا رزقني بكام صاحب معايا في الفصل كانو من قاده ثوره التصحيح في حياتي بس كفايه اقول اني اترفدت 18 مره والله العدد ده صحيح وعملت اعاده قيد 3 مرات ((الواصطه اشتغلت )) ودفعت تبرعات للمدرسه 1000 جنيه بس العقاب في المدرسه الثانويه كان بقه احنا اللي بنعاقب المدرسين والله العظيم ده كان بيحصل يعني كان عندنا مدرس عربي اسمه محمود تمام ده كان بيستأذن قبل ما يدخل وكان بيسألنا ادخل اناهرده ولا لا واعمال السنه احنا اللي كنا بحطها اشد عقاب شفته في المدرسه دي ان الفصل بتاعنا اترفد 3 ايام ((والله قفلو الفصل 3 ايام )) عشان واحد من الفصل رمي علبه ورنيش فيها بارود بمب من الدور التالت h): ووكيل الوزاره كان في المبني وتخيلو بقه الباقي ا

رابط هذا التعليق
شارك

إن شاء الله ناوي أفتح موضوع جديد بعنوان " هل من تعرض للظلم ممكن يكون ظالم ؟ "

وده لإني حتى بعد الحكاوي الخرافية اللي حكيتها عن أساليب التعذيب في المدارس واللي شوفتها وعاصرتها ومع ذلك فأثناء عملي كمُدرس لفترة قصيرة أصبحت زي بانية الجحيم دول وبقيت أعذب العيال .... بش مش عايز ضحك ...

بعد ما خلصت الجامعة قولت أخذ دورات لغة إنجليزية في الجامعة الامريكية مع كمبيوتر .. طب فترة المساء أنا فاضي .. فقولت أشتغل مدرس خصوصي من منازلهم .. وكانوا مجموعة من الاطفال لكن كان من بينهم تحديداً ثلاثة اخوات ولد وبنتين في خامسة وتالتة واولى إبتدائي .. بس إيه كانوا كلهم مييييييييييييح ومايعرفوش الألف من كوز البطاطا ...

المهم قولت أبدا على مية بيضا وامشي معاهم زي الكتاب ما بيقول .. وصرفت من جيبي الشيء الفلاني إشي حلاويات وفوندام وهدايا وألعاب وكله حسب الكتاب .. بصراحة جابت نتيجة مع العيال التانية وبقوا مية فُل .. إلا الثلاثة دول كانوا في منتهىالإهمال والغباء ولا واجب بيتعمل ولا كلام بيتسمع وتعبوني جداً في الفترة الاولانية .. لحد ما كشرت عن أنيابي وبقيت اعجن فيهم عجن ماحصلش ...

المهم إتعدلوا وبقوا زي الارانب وبيسمعوا الكلام لدرجة والدتهم في الأخر سألتني إنت عملت فيهم إيه ... ده ولا السحر ؟ .. دي العيال إتغيروا وبقوا حاجة تانية بس يا خسارة أُصيبوا كلهم بحالة تبول لا آرادي بالليل :) ...

قولت قشطة .. كِملت .. من ساعتها إعتزلت التدريس وسبت لهم مصر كلها ..

يمكن حكيت لكم قبل كده .. إن في أثناء وجودي في مصر من سنتين لقيت واحدة جاية ناحيتي ومبتسمة وشكلها زي بائعات الهوى .. ماكياج وفانلة مبينة نص بطنها وميني جيب وأخر بهرجة .. أنا قولت يمكن غلطانة في العنوان ولقيتها بتسلم عليه بحرارة ويمكن كان ناقص تاخدني بالحضن .. إيه يا ست إنت مين ؟ قالتلي إنت مش فاكرني يا أستاذ حماده ؟ والله زي مابقولكم كده .. قولت وكمان بتدلعني ؟ ده ام عمر مابتعملهاش !!!! - طب إحنا ليلتنا بيضا ولا حاجة ؟!!!- فقولتلها لأ بصراحة مش فاكرك لإني كبرت في السن والظاهر إني خرفت .. فقالت لي انا فلانه اللي كنت بتديني درس في إبتدائي انا واخواتي ... يخرب عقلك .. وإيه اللي عمل فيكي كده .. فقالت لي الحمد لله انا دلوقت في معهد تجاري وإتجوزت كمان ... طب إيه اللي إنتي عاملاه في نفسك ده يابنتي ؟ فقالت لي إنها عدت دلوقت وبقت حاجة تانية وأشتغلت فتاحة في كبارية هي واختها .... :) ... يا نهار مش فايت ... أيوه أيوه أنا بأشوفكم في الأفلام ... طب مامتك فين ؟.... فقالت لي إن مامتها شغالها معاهم كمان ... فتاحة برضوا h):

قلت قشطة عليك يا س س يا مُربي الاجيال يا مدرسة .. كويس إني إعتزلت في السن المبكر ده وإلا كان زمان شارع الهرم مليان طالبات من اللي بوردهم ...

بس يا خسارة نسيت اخد منها كارت يمكن احب أقدم للواد عمر في كلية الشرطة ولا حاجة ....

يعني العقاب المدرسي ساعات بيجيب نتيجة اهو ..... بطلوابقى إشاعات على المدرسي .... :lol:

رابط هذا التعليق
شارك

قلت قشطة عليك يا س س يا مُربي الاجيال يا مدرسة .. كويس إني إعتزلت في السن المبكر ده وإلا كان زمان شارع الهرم مليان طالبات من اللي بوردهم ...

بس يا خسارة نسيت اخد منها كارت يمكن احب أقدم للواد عمر في كلية الشرطة ولا حاجة ....

;) lo:: lo:: :D ;) :P lo:: lo:: :P :P

رابط هذا التعليق
شارك

ليه بس كده يا مسلمه ;)

ده انا لحد دلوقت باحاول انسى الموضوع ده مش قادره

اقسى عقاب كدرسى تعرضت له "رغم انه لم يكن الاكثر ايلاما من الناحيه النفسيه" كان فى الاعداديه اما غبت يوم و رحت المدرسه من غير اى ورقه تثبت سبب تغيبى لقيت الناظره واقفه مستنيه الناس اللى غابت فى اليوم السابق و ...

مش قادره اقول من الكسوف والله :P

قولوا عملت فيا ايه :D

شدت لى شعرى :P

وقتها فعلا حسيت انى اتهزأت الهزأه اللى مش هاشوف لا قبلها ولا بعدها .. حسبىّ الله ونعم الوكيل :P

يلى هذا التذنيب امام الفصل بالكامل .. بجد كنت باحس بهلع من فكرة ان اقف امام كل التلاميذ كده ;) خصوصا ان هذا كان امر نادر الحدوث جدا بالنسبة لى ..

طبعا الحاجات التقليديه اللى زى الضرب بالعصا دى كلنا مرينا بيها لدرجة انها تقريبا لم تعد تستحق الذكر .. lo::

تم تعديل بواسطة فــيــروز
رابط هذا التعليق
شارك

  • الزوار
Guest النسر المصري

الحقيقة انا لايمكن أنسى فترة الدراسة

بابا كان مدرس في الكويت وكنا معاه

وكانت الوحيد اللي في اخواتي اللي مش الأول على فصله لاني كنت بحب الرسم

ورغم ذلك كانت خناقاتي كلها مع مدرسين الألعاب والموسيقى والرسم

وفضلت كدة لحد لما جيت مصر فترة الغزو في الثانوي

وكانوا بيلقبوني بالمطفشاتي

حيث اني بخلي أي مدرس مايعجبنيش شكله أطفشه من نص الحصه

كنت بقلد أصوات حيوانات وأقلد المدرسين والطلبه التانين لحد لما عملت عصابة تطفيش

واتذكر انحنا كنا بناخد دروس عند المدرسين كلهم لقدرتنا المادية

علشان نعمل اللي احنا عايزينه في المدرسة

إلا مدرس يمسيه بالخير اسمه عادل هوجان

مدرس كيمياء كان فعلا أطول وأضخم جثه متحركه وشعره ودقنه نفس نفس شكل هوجان بالظبط

والوحيد اللي كان لسانه زفر جدا وبيضرب بس في الأماكن الحساسه

ورغم ذلك كنا كلنا بنموت فيه وبنحبه جدا

وذكرلنا مرة موقف في عمره انه جاله واحد راجل

قاله استاذ عادل انت فاكرني

قاله مين ؟؟

قاله انا فلان كنت بتدرسني من ??سنة

لاوالله مش فاكر

قاله انا كنت بدور عليك من سنتين لحد لما لقيتك عشان أشكرك

على اية يابني

عشان القلم اللي ادتهوني وانا في الثانوي لما كنت صايع ومفيش حد عارف يلمني حتى البوليس

لحد لما رزعتني القلم اياه وفوقني

وآديني أنا مهندس كبير ومتفوق وعندي أولاد وحالي متهني رغم صغري

ونزل يبوس ايدة

وضحكنا قوي لما قالنا قمت قلتله طب يابني ولادك مش عايزين ياخدوا كام قلب كدة أظبطهملك

والقلم بعشرة جنية

قلت اية موافق؟؟؟!!!

وسخسخنا على روحنا من الضحك

ومازلت اذكر المدرس دة رغم كرهي للكيميا واللي خلفوها

رابط هذا التعليق
شارك

على

أيامنا كان العقاب قاسى

يبدأ من الضرب بسن المسطرة على ظهر أصابع اليد الى العبْط والضرب بالخرزانة على المؤخرة

والعبْطْ هو أن يحمل أكبر وأقوى طالب فى الفصل الضحية المطلوب ضربه وكان اسمه أبو خليل ويتولى المدرس العزف بالخرزانة

أما التأخير صباحا فكان عقابه خرزنتين فى عز الشتاء على راحة اليد وكان يتولى هذه العملية مدرس الألعاب وكان يسمى ضابط المدرسة

وفى بعض السنين تفرض غرامة حوالى شلن أو بريزة وقتها

كانت أيام

رابط هذا التعليق
شارك

ياه مين اللى فتح السيرة دى بس؟ :D

بصراحة انا ليا افلام مع المدرسين ورغم انى كنت الالفا طول عمرى :P<!--emo&:P-->book.gif<!--endemo--> ,لكن كل المدرسين كانوا مجتمعين انى مستفز جدا رغم انى طيب وغلبان والله

هاحكيلكم على الموقف الاكثر ايلاما فى حياتى

المدرسة بتاعتى كانت مشتركة ايام الثانوى ,كنا 10 صبيان فى الفصل وحوالى 27 بنت,وكان عندنا مدرس عربى اسمه محفوظ وكان قمة الغلاسة والرخامة وكان متخيل نفسه عبقرى فى اللغة العربية رغم انه كان حمار والله لانه كان مستقيل لمدة 15 سنة وبعدين رجع على ايامى لاجل حظى الهباب

فى يوم اغبر دخل الاستاذ محفظة وكان بيشرح نحو وبعدين افتى البيه ان ماذا بتسال عن السبب فرفعت ايدى وقولتله لوسمحت يا استاذ :لماذا هيا اللى بتسال عن السبب.

قاللى وحياة ودنك الشمال اللى اكبر من ودنك اليمين(هى كده فعلا)انا قلت لماذا,قلتله بس انا سمعتها ماذا,قرب منى وطااااااااااااااااااااااااااااااااااااااااااخ رزعنى حتة قلم ,صرخت وقلتله فيه ايه,راح طاااااااااااااااااااااااااااااااااااااااخ مدينى التانى,والله العظيم رغم مرور 7 سنين على الكلام ده انا لسه فاكر الموضوع ده كأنه الوقتى,وتخيلوا حالتى النفسية فى هذه اللحظة,حالة شاب مراهق فى السادسة عشرة من عمره اهين باللفظ اولا ثم انضرب بالقلم مرتين امام الفصل وامام مين؟

امام البنت اللى كنت باعيش عشانها أعنف قصة حب فى التاريخ(كما كنت أسميها).

احكموا انتم.

نسيت أقولكم الاستاذ محفوظ ساكن عندنا فى الشارع وكل يوم الصبح وانا رايح الكلية وانا معدى عليه اروح باصصله من شباك عربيتى واقول له صباح الخير يا محفظة **********

معلش ا جماعة اعذرونى ,بس دى اقل حاجة اعملها فيه ;)

تم تعديل بواسطة se_ Elsyed
رابط هذا التعليق
شارك

والعبْطْ هو أن يحمل أكبر وأقوى طالب فى الفصل الضحية المطلوب ضربه وكان اسمه أبو خليل ويتولى المدرس العزف بالخرزانة

واما يبقى مفروض اقوى طالب فى الففصل يتعبط مين كان بيشيله؟ ;) ولا ده كان حمايه زى بتوع الشرطه دلوقت كده :D ده تلاقيه كان مكروه اوى من زملائه :P

رابط هذا التعليق
شارك

بعد ما سبت المدرسة بتاعت ال18 عصاية، رحت مدرسة تانية بتاعت راهبات..

كانت مديرة المدرسة راهبة سورية. كانت زى العسل...

بس كانت تيجى كل سنة تانى يوم بعد حفل شم النسيم بتاع نادى الشمس.... تدخل الطابور، تطلع البنات اللى كانوا بيرقصوا فى الحفلة، تشدهم من الكرافات زى الحيوانات و توقفهم فى وسط الطابور و هات يا أقلام على وشهم قدام الكل...!!!!

ماعرفش كانت بتعرفهم بالشكل إزاى.... يعنى مش بتنده أساميهم، لأ... تخش الطابور من سكات و تجر الزاحدة من دول و هات يا تلطيش ...

صحيح كانوا بيصعبوا عليا و اتمنى إن عمرى ما اتحط فى الموقف ده، بس فى نفس الوقت كنت أحس انهم مجرمين و يستاهلوا...

رابط هذا التعليق
شارك

انشئ حساب جديد او قم بتسجيل دخولك لتتمكن من إضافة تعليق جديد

يجب ان تكون عضوا لدينا لتتمكن من التعليق

انشئ حساب جديد

سجل حسابك الجديد لدينا في الموقع بمنتهي السهوله .

سجل حساب جديد

تسجيل دخول

هل تمتلك حساب بالفعل؟ سجل دخولك من هنا.

سجل دخولك الان
  • المتواجدون الآن   0 أعضاء متواجدين الان

    • لايوجد أعضاء مسجلون يتصفحون هذه الصفحة

×
×
  • أضف...