ديموقراطيتنا عسل ولمون .. ديموقراطيتهم هباب كانون

[أبو محمد]

قبل أن أبدأ أحب أشرح العنوان الفكاهى مع أنه عنوان لموضوع فى منتهى الجدية

زمااااااااان .. كنا بنتمرجح فى الأعياد والموالد .. وكنا نتبارى فى الوصول بالمراجيح إلى أعلى المستويات .. وكنا ننقسم إلى فريقين ونطلع اتنين اتنين على كل مرجيحة ونبدأ المباراة التى تطول إلى مرحلتين أو تلاتة حسب فلوسنا .. وكانت جماهير الفريق الكسبان فى كل مرحلة تنشد ذلك العنوان .. "يا مرجحيتنا عسل ولمون .. يا مرجحيتهم هباب كانون"

ندخل فى الجد

فى 2008 فاز أوباما بنسبة 53 % على ماكين الذى حصل على 46 % من أصوات الأمريكيين .. وبعد إعلان النتيجة ألقى ماكين خطابا "وطنيا" هنأ فيه منافسه وأعلن أن أمريكا كلها ستدعم رئيسها

بنفس النسبة تقريبا 52% فاز أولاند على ساركوزى بالأمس فى الانتخابات الفرنسية

يعنى تقريبا نصف الشعب الأمريكى ، ونصف الشعب الفرنسى كانوا يؤيدون الخاسر

لم نسمع عن دعوة من الخاسر الأمريكى إلى مليونية فى جميع ميادين أمريكا أو دعوة من الخاسر الفرنسى إلى مليونية فى جميع ميادين فرنسا للاحتجاج أو محاولة ضرب كرسى فى الكلوب .. مع أنها من المؤكد ستكون مليونية حقيقية وليست مئات من الآلاف تعد على أصابع اليد الواحدة ونطلق عليها – بما عرف عنا من صيغ منتهى المبالغة – لقب مليونيات

كان هذا مظهرا من مظاهر الديموقراطية فى الغرب الكافر ، العلمانى المتعفن ، الليبرالى الحقير (عذرا هذه أدبيات تيار سياسى معروف عندنا .. يعنى سلو بلدنا)

أما فى شرقنا الشريف العفيف العادل المتسامح فقد تبلورت مظاهر ديموقراطيتنا فى حلقة شاهدتها من برنامج القاهرة اليوم أنقل لكم ملخصها كما وجدته جاهزا على أحد المواقع :

الضيوف

الدكتور محمد البلتاجى النائب عن حزب الحرية والعدالة

نادر بكار المتحدث الرسمى باسم حزب النور

أكد النائب محمد البلتاجى عن حزب الحرية والعدالة، أنه لو تم حل البرلمان سننزل الشارع مرة أخرى، لأن البرلمان هو الشرعية الوحيدة الموجودة بمصر الآن، مشيرا إلى أن هناك خمسة خطوط حمراء، إذا يتجاوزها المجلس العسكرى فستكون هناك ثورة جديدة فى ميادين مصر، أولا تأجيل الانتخابات الرئاسية، ثانيا اللعب فى مؤشرات الانتخابات الرئاسية كما رأينا بأداء اللجنة العليا لانتخابات الرئاسة، ثالثا تزوير الانتخابات، رابعا حل البرلمان لأنه المؤسسة الوحيدة المنتخبة بعد الثورة وشرعيته هى قبل شرعية المجلس العسكرى والقول بحل البرلمان وتلبسه ثوبا قضائيا فهو اللعب بالنار، خامسا استمرار المجلس العسكرى فى إدارة شئون البلاد بعد 30 يونيه.

وأضاف البلتاجى أنه إذا تم حل مجلس الشعب سننزل مرة أخرى فى الميادين بشكل سلمى وبدون دعوة أو اتفاق، لأن البرلمان له قاعدة شعبية، ومن يوظف ذلك يهدف لإعادة وضع السلطة الوحيدة فى شخص المجلس العسكرى.

فيما أكد نادر بكار، المتحدث الإعلامى باسم حزب النور السلفى، على أن البرلمان هو المكتسب الوحيد بعد الثورة حتى الآن ومن الناحية العملية البرلمان مستند إلى شرعية جماهيرية، وحزب النور موكل من الجماهير التى اختارته وهننزل لصفوف الجماهير فى حالة حل مجلس الشعب ونؤكد على سلمية الثورة.

ولفت بكار إلى أنه من الناحية العملية، البرلمان جاء للمجلس عن طريق توافق شعبى، وله قاعدة جماهيرية عريضة، ولو المحكمة قضت بحل مجلس الشعب فستكون أزمة يتم ترحيلها للرئيس القادم وليس للمجلس العسكرى التوقيع على ذلك القرار.

على جانب آخر، وصف بكار تصريحات الشيخ حسن أبو الأشبال بشأن اقتحام وزارة الدفاع وإعدام المشير كلام غير مسئول ويدعو للفتنة قائلا: "أنت تدعو لاقتتال المصريين بعضهم ببعض وهو كلام متهور، وللأسف هذا الكلام يلصق بالتيار السلفى ككل، ويجب أن يخرج العلماء ويقولون كلمتهم فى تلك الدعوة.

وأضاف بكار: فإذا كنت مختلفا مع المجلس العسكرى، فهل يعقل أن تعدى وتدوس على جثث المصريين لتدخل للمجلس العسكرى وتعدم أعضاء المجلس العسكرى، مشيرا إلى انتقاد الشيخ محمد عبد المقصود لدعوة الشيخ حسن أبو الأشبال ووصفه أيضا بالتهور.

أعلق انا ولا تعلقوا انتم ؟

أنا باقول اتفضلوا حضراتكم أولا .. فأنا أبدو - كما وصفنى أخ فاضل عزيز فى مداخلة فجر اليوم – كأننى أكره التيار الإسلامى .. لا أرغب فى الرد على حكمه عليَّ ولكنى أنوه فقط إلى أننى لا أكره أحدا ، ولا أكره شيئا (حتى الباذنجان) .. أنا أرفض نعم وأحيانا قليلة بشراسة .. أعارض نعم وأحيانا قليلة بشراسة .. إنما أكره ؟ .. فلا وألف لا .. الكراهية ليست من أدبياتى أبدا

ثم لماذا أكره شيئا ليس موجودا أصلا .. لا وجود – فى اعتقادى – لتيار إسلامى .. لأنه لو كان موجودا فالآخرون غير إسلاميين وهذا غير حقيقى ، فأنا - مثلا - لست من ذلك التيار ولكننى إسلامى (إن كان ولابد من الوصف مثل أهلاوى وزملكاوى) .. لا وجود – فى اعتقادى – لإسلام يمكن وصفه بأنه سياسى .. فلو كان هناك "إسلام سياسى" لكان هناك - أيضا - إسلام ثقافى ، وإسلام اجتماعى ، وإسلام اشتراكى ، وإسلام رأسمالى ، وإسلام تاريخى ، وإسلام جغرافى .... وهكذا .... وكل هذا انتقاص من شأن الاسلام (دينى وعقيدتى) .. لأنه دين وعقيدة ولا وصف له سوى أنه دين وعقيدة

اللى فوق ده مش تعليق .. ده كان استهلالا لابد منه (مع الاعتذار للأستاذ عادل) :)

[hanzalah]

أعلق انا ولا تعلقوا انتم ؟

الفاضل أبو محمد

ممكن لو سمحت أعلق أنا

انا شايف انه كلام رائع لاغبار عليه

يعني ايه المجلس اللعسكري يحل البرلمان .. امال احنا دما شبع منه اسفلت السكك ليه وقمنا بثورة ليه

مش لرفضنا الديكتاتور

طب ما احنا انتخبنا مجلس الشعب بختيار حر وصندوق شفاف .. فين الاشكالية .. ومين يقدر يحله ويلتف على ارادة الشعب

ومين هو المجلس العسكري .. 19 رجل .. يريدون ارجاع عقارب الساعه للوراء

طب لو حلينا مجلس العشب هنكسب ايه

وبقاءه على حاله هيضرنا في ايه

وانت موقفك ورأيك - بعد الاستهلال - ايه

احتراماتي

[التونسى]

معنديش بصراحه تحفظات على كلام البلتاجى ((الاخوان)) او بكار ((السلفيين)) .. بالعكس دى تصريحات تحسب لهم خصوصا تصريح بكار ورفضه لاقتحام وزارة الدفاع .. عكس الايحاءات اللى انا استقتها من هنا وهناك ان احداث العباسيه السبب فيها التيار الاسلامى وعلى رأسهم السلفيين

انا اللى لفت نظرى وعايز أركز عليه واللى شايفه هو اللى محتاج موضوع قائم بذاته ..هى النقطه المهمه اللى أثارها البلتاجى وهى ما معناها ..(( ازاى نضمن شفافية ونزاهة الانتخابات وعدم التلاعب بنتائجها)) .. هنا المحك الرئيسى .. عايزين نعرف الشعب عايز ايه .. عايز فلول والا اخوان .. والا توافقى .. والا اشتراكى

موصلنيش اللى انت عايزه تقوله اخى الفاضل ابو محمد من الموضوع ده .. وللمره الثانيه فى يوم واحد ((مفهمتهاش وهى طايره))وطبعا العيب فيا بدون شك

عروستى!!!؟

تم تعديل 7 مايو 2012 بواسطة محمود البصيلى

[MZohairy]

عليا الحرام من ديني

لو كان البرلمان ده بدون غالبيه اسلامية لتبارى الإسلاميون في مدح العسكر على قراره الحكيم بحل المجلس

الموضوع لا يزيد عن شهوة الحكم و الكرسي

و اي حاجه تيجي بعد كده حتى الوطن نفسه

[ssmaly]

عليا الحرام من ديني

لو كان البرلمان ده بدون غالبيه اسلامية لتبارى الإسلاميون في مدح العسكر على قراره الحكيم بحل المجلس

الموضوع لا يزيد عن شهوة الحكم و الكرسي

و اي حاجه تيجي بعد كده حتى الوطن نفسه

من غير حلفان على اييييدى كانت المادة 28 هنا والليبرالين قاعدين هنا بقولوا( لا )للاستفتاء وكان الاسلاميين قاعدين هنا على كلمة واحدة (نعم) يابابا (نعم) يابابا( وش فؤاد المهندس)

[Alshiekh]

ردا على فكرة حل مجلس الشعب والحكم ببطلانه

يمكن الكثير من الاعضاء لم تمر عليهم مثل هذه الواقعة

في 1987 تم تعديل قانون الانتخاب لمجلس الشعب وتم تحديد عدد دوائر الجمهورية وتحديد نائب فردي واحد عن كل دائرة ( يعني التنافس على مقعد فردي واحد ) والباقي للقائمة الحزبية، وتمت الانتخابات وفاز من فاز وخسر من خسر.

إلا أن واحدا او اكثر من المتضررين من تلك القسمة رفع قضية اما القضاء الاداري الذي حكم بعدم الاختصاص وتم تصعيد القضية للمحكمة الدستورية العليا وبالطبع كانت الدولة هي الخصم.

وجاء حكم المحكمة الدستورية العليا كالتالي:

لما كان ذلك، وكانت انتخابات مجلس الشعب قد أجريت بناء على نص تشريعى ثبت عدم دستوريته بالحكم الذى انتهت إليه المحكمة فى الدعوى الماثلة، فإن مؤدى هذا الحكم ولازمه أن تكوين المجلس المذكور يكون باطلاً منذ انتخابه، إلا أن هذا البطلان لا يؤدى البتة إلى ما ذهب إليه المدعى من وقوع انهيار دستورى ولا يستتبع إسقاط ما أقره المجلس من قوانين وقرارات وما اتخذه من إجراءات خلال الفترة السابقة وحتى تاريخ نشر هذا الحكم فى الجريدة الرسمية، بل تظل تلك القوانين والقرارات والإجراءات قائمة على أصلها من الصحة، ومن ثم تبقى صحيحة ونافذة، وذلك ما لم يتقرر إلغاؤها أو تعديلها من الجهة المختصة دستورياً أو يقضى بعدم دستورية نصوصها التشريعية بحكم من المحكمة الدستورية العليا إن كان لذلك ثمة وجه آخر غير ما بنى عليه هذا الحكم.

"لهذه الأسباب"حكمت المحكمة بعدم دستورية المادة الخامسة مكرراً من القانون رقم 38 لسنة 1972 فى شأن مجلس الشعب المعدل بالقانون رقم 188 لسنة 1986 فيما تضمنته من النص على أن يكون لكل دائرة عضو واحد يتم انتخابه عن طريق الانتخاب الفردى ويكون انتخاب باقى الأعضاء الممثلين للدائرة عن طريق الانتخاب بالقوائم الحزبية.

وبناءا عليه فالمفروض ان الخبراء القانونيين يتخذوا من هذا الحكم مرجعية ولا يحاولوا ان يستخدموا نفس الطريقة مرة أخرى،

ولكن خبراء قانون المجلس العسكري ومعهم خبراء قانونيين محسوبين على التيارات المتأسلمة قالوا نجرب المرة دي وعملوا بالضبط زي ابو اسماعيل لما جرب موضوع جنسية امه وقال يمكن تعدي، معتمدا على ثغرة في نص القانون.

اللي عايز أقوله للبلتاجي أفندي، انه لو صدر حكم الدستورية العليا ببطلان انتخابات الشعب، فالحكم سيكون صحيحا استنادا إلى سابقة قانونية، ولو غضت الطرف، فأعتقد ان أي متضرر آخر بإمكانه الطعن في دستورية القانون ورفعه للدستورية مرة أخرى استنادا على الحكم السابق والذي نقلته كاملا في باب القوانين والقضايا.

سابقة الحكم ببطلان مجلش الشعب 1987 بسبب التقسيم الفردي والقائمة

[التونسى]

لو القصد من الموضوع زى ما تفضل الاخوه الافاضل النقطه بتاعة حل مجلس الشعب .. فلو تم ده بشكى تعسفى ومغرض وغير قانونى فطبعا بيمثل انتهاك صارخ لاختيار وارادة الشعب .. ووللاخوان وغيرهم الحق فى الرفض والنزول الى الشارع هم وأتباعهم .. تعبيرا عن رفضهم لهذا الغبن الواضح ..والسافر

ولو تم ده بشكل قانونى .. من المتوقع ايضا (ونظرا للفوضى التى نحياها وعدم وجود كبير معتبر ومحترم ومسموع له كلمه فى البلد)) من المتوقع ان ينزل الاخوان للشارع ايضا .. متشككين فى الحكم .. ومستغلين الفوضى التى تعج بها مصر .. مثلهم مثل من استغل نقطة الضعف تلك (( فلتان عيار البلد)) .. والسوابق على هذا كثيره وقام بها كل أطراف اللعبه السياسيه بمصر سواء ليبراليين او ((مؤخرا)) الاسلاميين .. او حتى الشعب الغير منتمى لاى اطراف سياسيه ولكن فى شكل وقفات واعتصامات فئويه

اشمعنى يعنى الاخوان يتحرموا من تناول نصيبهم من تورتة الفوضى !!!!!؟

طبعا كل دى أسوء التقديرات والافتراضات وليست افتراءات .. وان شاء الله الاخوان يكونوا احكم واعقل من الانزلاق بالبلد الى هذا المنعطف .. اتمنى .. رغم توقعاتى التشاؤميه

تم تعديل 7 مايو 2012 بواسطة محمود البصيلى

[م تيمور المراغي]

ببساطة شديده تعالوا نحسبها ...

شرعية مجلس الشعب تعلو على شرعية الاستفتاء صح كده !

طيب .. الشعب المصري باجمعه وكل مندوبين عنه ليعيدوا هيكلة الدولة بعد ثورة تعلو شرعيتها على الدستور و القانون ..

وقبل ماحد يهاجمني ويقول ازاي الشرعية الثورية تعلو فوق الدستور والقانون حرد واقول :

النظم السياسية في اغلب دول العالم التي قامت بها الثورات نجحت في اسقاط النظم الفاسدة سواء ملكية او غيرها واستبدلت بها نظام آخر استقرت عليه جموعا لشعب الذي قام بالثورة ..

فاذا كانت الدساتير بها تنص على ان الدولة ملكية يحكمها الملك مثلا واستتبع ذلك قوانين اقطاعيه وعنصرية تنظم ذلك الهراء فان الثورة قد اسقطت هذا الدستور ومايتبعه من قوانين

الخلاصة ..

الشرعية الشعبية الثورية الممنوحه للبرلمان تفوق نصوص الدستور والقانون وحتى اصنام المجلس العسكري لانها اتت بنواب استفتى عليهم الشعب المصري بكامله ومنحوهم سلطة الرقابة والتشريع واصدار القرار ...

ورغم ذلك !

انا شمتان في الاسلاميين وخصوصا الاخوان المتأسلمين لاننا من اول يوم حذرناهم من غدر العسكر وطلبنا منهم اداء رجولي وثوري ولكنهم انبطحوا فاكل عليهم العسكر وشرب ...

وكما يقول الفيلسوف ...

البس يا برلمان عشان خارجين ... :happy:

[adrianocrespo]

انا اللى لفت نظرى وعايز أركز عليه واللى شايفه هو اللى محتاج موضوع قائم بذاته ..هى النقطه المهمه اللى أثارها البلتاجى وهى ما معناها ..(( ازاى نضمن شفافية ونزاهة الانتخابات وعدم التلاعب بنتائجها)) .. هنا المحك الرئيسى .. عايزين نعرف الشعب عايز ايه .. عايز فلول والا اخوان .. والا توافقى .. والا اشتراكى

المشكله من وجهه نظري انه لا يوجد قياس حقيقي للرأي العام في مصر

يعني شوف حضرتك الاستفتاءات الموجوده علي الانترنت علي اشهر المواقع

تجد نتائجها متباينه بشده

علي العكس من الدول الغربيه فتجد المؤشرات المرصوده قبل الانتخابات قريبه جدا من النتائج

فتجد بعض الاشخاص مؤمنين ايمانا راسخا انه لو نجح شخصا بعينه فسيكون من خلال التزوير

عاصم عبد الماجد قال من يومين ان شفيق او عمرو موسي لو نجحوا يبقوا بالتزوير و حينزل مع انصاره الميدان لعزلهم

[أبو محمد]

أولا .. إلى أستاذ الشعر العامودى والأفقى والمايل "محمود البصيلى"

معاذ الله ان يكون العيب فيك .. أكيد العيب فى إنى لم أعلق على الموضوع .. وده يمكن اللى خلاك وخلى الأخ الفاضل "حنظلة" مش شايفين أى حاجة غلط فى ديموقراطيتنا كما عبر عنها البلتاجى وبكار

ثانيا .. أشكر أخى الفاضل "محمد" على أنه أورد حكم عدم دستورية مجلس 87

ثالثا .. أشكر إخوانى الأفاضل حنظلة وزوهيرى و إس سمايلى على مشاركاتهم الحترمة

ولكن

يا عزيزى حنظلة ، ويا عزيزى محمود ، ويا عزيزى زوهيرى .. إنتم ليه بتأكدوا إن الثورة دى فعلا فشلت فى إنها تغير تفكيرنا "كشعب" .. ليه بتفكروا فى إن المجلس العسكرى هو اللى حيحل مجلس الشعب ؟ ..

صدقونى .. العيب مش فى المجلس العسكرى .. العيب فينا احنا اللى لسه لم نتخلص من العقدة التى رسخها فينا مبارك ومن قبله .. وهى أنه لا شئ يتم إلا بتوجهيات السيد الرئيس ، وتعليمات السيد الرئيس .. فإذا كانت المادية الجدلية تقول إن كل نظام يحمل فى طياته عوامل فنائه.. فاسمحوا لى أن أقول إن عوامل فناء هذه الثورة ستتفاعل لكى تفنيها بأسرع مما يتوقعه البلتاجى وبكار وغيرهم ممن يخشون عليها

من طعن فى دستورية المجلس عضو - طول عمره معارض – من أعضاء مجلس الشعب نفسه ومعه آخرون .. وهو الآن مرشح من مرشحى الرئاسة .. أقصد أبو العز الحريرى الذى لا يمكن بأى حال من الأحوال تصور أنه ممسوك بخيوط تنتهى عند أصابع المجلس العسكرى .. هو بس عيبه إنه مش من التيار السياسى المتدين أو المتأسلم .. وده عيب خللى الكتاتنى يعامله بطريقة لا تليق برئيس سلطة تشريع القوانين .. نشوف كده

http://www.youtube.com/watch?v=aCY-xjIDI3Q

ما علينا من "الحريرى" و "الكتاتنى" اللى لسه جايين من عند "القطان" :) ..

خلونا فى ديموقراطيتنا اللى – للأسف – الناس بتحصرها فى الصندوق .. الصندوق يا جماعة مجرد "آلية" من "آليات الديموقراطية" .. ولكنه ليس هو الديموقراطية فللديموقراطية عناصر أهمها الفصل بين السلطات واستقلاليتها وتداول السلطة والحكم للأغلبية فى نطاق عقد اجتماعى لا خروج عنه .... إلى آخر العناصر وآليات تطبيق العناصر ..

مجلس الشعب سلطة يتم انتخاب أعضاؤه طبقا للدستور والقانون المنظم للانتخابات .. القانون مطعون على دستوريته .. والمحكمة الدستورية العليا (سلطة قضائية مستقلة) تنظر الطعن .. وطبقا للدستور (أى دستور فى العالم) أحكام القضاء تسرى على كل السلطات

فلماذ انصرف ذهن الفاضل حنظلة والفاضل زوهيرى إلى أن المجلس العسكرى هو من سيحل مجلس الشعب ؟..

والكارثة هى أن عضو برلمان يستعمل حقه القانونى والدستورى ويطعن فى دستورية قانون الانتخابات - وهو الحريرى - وعضو برلمان آخر يرى أن المجلس العسكرى هو من سيحل مجلس الشعب وهو البلتاجى وعشرات مثله .. كارثة فعلا .. لأن ده معناه إننا ما تغيرناش .. أو إن عمر سليمان كان عنده حق لما قال إنه مع الديموقراطية ولكن عندما يكون الشعب مستعدا لها

وللعلم بقى .. الإعلان الدستورى لا يحتوى على نص يتيح للمجلس العسكرى حل مجلس الشعب .. وفى مقابل هذا فلا يوجد فيه – أيضا – نص يتيح لمجلس الشعب إسقاط الحكومة بسحب الثقة .. وأنا – شخصيا – أعتقد إن ده توازن مرغوب فى فترة انتقالية لضمان عدم حدوث ما أدخلنا فيه الحنجوريون وقليلو الخبرة الديموقراطية ومنهم أعضاء فى مجلس الشعب (ودول أنا باعتبرهم من ضمن الطرف التالت)

وهنا دليل آخر على أننا لم نتغير .. فرئيس السلطة التشريعية يطلق تصريحات عنترية بأنه سيسقط الحكومة ولازم سحب الثقة .. وبعدين يتراجع ويقول الحكومة لازم تستقيل .. وبعدين يتراجع ويقول المجلس العسكرى لازم يقيل الحكومة .. كل ده واحنا عارفين إنه كان لازم أعضاء البرلمان يبقوا نص أعضاء الجمعية التأسيسية .. وطبعا فيه كمان لازم حازم ....

يا سادة .. الديموقراطية مافيهاش حاجة إسمها لازم .. كل شئ فى الديموقراطية بيبقى عبر آليات .. انتهى عصر لازم .. وانتهى عصر تعليمات السيد الرئيس وتوجيهات السيد الرئيس .. إحنا بقى اللى لازم نمارس ده .. نمارس الديموقراطية بحلوها ومرها ما دمنا قد ارتضيناها ورفضنا أن نسير فى طريق الشرعية الثورية التى كانت الدجاجة التى تبيض ذهبا للفوضويين المتثورين

كل اللى فوق ده وانا لسه ما علقتش على عدم قبول ديموقراطيتنا اللى بتبقى عسل ولمون لو فى صالحنا وبتبقى هباب كانون لو فى صالح حد تانى ..

فإلى اللقاء بعد القيام بواجب زيارة ضرورى جدا

[أبو محمد]

انا اللى لفت نظرى وعايز أركز عليه واللى شايفه هو اللى محتاج موضوع قائم بذاته ..هى النقطه المهمه اللى أثارها البلتاجى وهى ما معناها ..(( ازاى نضمن شفافية ونزاهة الانتخابات وعدم التلاعب بنتائجها)) .. هنا المحك الرئيسى .. عايزين نعرف الشعب عايز ايه .. عايز فلول والا اخوان .. والا توافقى .. والا اشتراكى

المشكله من وجهه نظري انه لا يوجد قياس حقيقي للرأي العام في مصر

يعني شوف حضرتك الاستفتاءات الموجوده علي الانترنت علي اشهر المواقع

تجد نتائجها متباينه بشده

علي العكس من الدول الغربيه فتجد المؤشرات المرصوده قبل الانتخابات قريبه جدا من النتائج

فتجد بعض الاشخاص مؤمنين ايمانا راسخا انه لو نجح شخصا بعينه فسيكون من خلال التزوير

عاصم عبد الماجد قال من يومين ان شفيق او عمرو موسي لو نجحوا يبقوا بالتزوير و حينزل مع انصاره الميدان لعزلهم

عزيزى أدريانوكريسبو

آسف أنى لم أر مداخلتك .. موعدنا بعد عودتى من الزيارة إن شاء الله

شكرا

[أبو محمد]

معنديش بصراحه تحفظات على كلام البلتاجى ((الاخوان)) او بكار ((السلفيين)) .. بالعكس دى تصريحات تحسب لهم خصوصا تصريح بكار ورفضه لاقتحام وزارة الدفاع .. عكس الايحاءات اللى انا استقتها من هنا وهناك ان احداث العباسيه السبب فيها التيار الاسلامى وعلى رأسهم السلفيين

انا اللى لفت نظرى وعايز أركز عليه واللى شايفه هو اللى محتاج موضوع قائم بذاته ..هى النقطه المهمه اللى أثارها البلتاجى وهى ما معناها ..(( ازاى نضمن شفافية ونزاهة الانتخابات وعدم التلاعب بنتائجها)) .. هنا المحك الرئيسى .. عايزين نعرف الشعب عايز ايه .. عايز فلول والا اخوان .. والا توافقى .. والا اشتراكى

موصلنيش اللى انت عايزه تقوله اخى الفاضل ابو محمد من الموضوع ده .. وللمره الثانيه فى يوم واحد ((مفهمتهاش وهى طايره))وطبعا العيب فيا بدون شك

عروستى!!!؟

ياخبر يا أستاذ محمود :o إزاى يفوتنى أرد على سؤالك لى .. العفو والسماح يا سيدى الجاضى :)

شوف يا سيدى .. كلام البلتاجى وبكار خلونى أقارن بين ديموقراطيتنا (اللى هى عسل ولمون لو فى صالحنا ، وهباب الكانون لو مش فى صالحنا) وديموقراطية أمريكا وأوروبا والدول المتقدمة (وش ابو سمرة فى الارهاب والكباب)

يعنى ماكين كان معاه تقريبا نص الشعب الأمريكانى .. وساركوزى كان معاه تقريبا نص الشعب الفرنسى ..

خسر ماكين فألقى خطابا "وطنيا" يهنئ فيه الفائز ويعلن أنه بانتهاء المعركة الانتخابية يعود الجميع أمريكان ولا يهمهم سوى مصلحة أمريكا خلف الرئيس .. ماكين كان مرشح رئاسة وسقط فى انتخابات

وساركوزى كان رئيس (مش بس مرشح للرئاسة) خسر ساركوزى وبعد سقوطه ألقى كلمة "وطنية" قال فيها : "كنت رئيسا فرنسيا .. والآن أصبحت فرنسيا فقط لا أهتم سوى بمصلحة فرنسا خلف رئيس جديد" .. ساركوزى كان رئيس مش مجرد مرشح مستبعد

ما شفناش "ولاد ماكين" ولا أعضاء حملة "لازم ماكين" طلعوا عملوا اعتصام فى ميدان المسلة فى كابيتول هيل أو أمام البنتاجون

وما شفناش "ولاد ساركوزى" ولا أعضاء حملة "لازم ساركوزى" طلعو عملوا اعتصام قدام وزارة الدفاع الفرنسية أو قفلوا شارع الإليزيه من أول قوس النصر لغاية برج إيفل

وماشفناش أثناء الحملات الانتخابية مستر بلتاجى أو مستر بكار فالأمريكيين .. أو مسيو بلتاجى أو مسيو بكار فالفرنسيين بيقولوا لو فاز مرشح تانى غير مرشحنا حنعمل ثورة فرنسية جديدة أو حرب أهلية أمريكية جديدة

ده باختصار اللى عاوز أقوله يا فنان

ممكن بقى "كسيدة" على الموضوع ده :wub:

[eslam elmasre]

البلتاجي اكيد عنده خبرة كبير في السياسة وخبرته تقول انهم (اي الاخوان ) لن ينجحو في تحقيق فوز لمرشحهم لاعتبارات كثير منها على سبيل المثال الانقسام الشديد بين اصحاب الاسلام السياسي وان هذا يصب في مصلحة المرشحين الاخرين ولان مرشحهم كان مجرد استبن للمرشح الاكثر اهمية والاكثر حضورا ولانهم فقدو كثيرا الفتر الماضي من رصيدهم لدى الشعب والثوار

ولانهم ولانهم

لذلك اخذ خطوة استباقية في حالة رسوب مرشحهم (وهو مؤكد والا ما كان لمح لمثل هذا الكلام ) ان المظاهرات ستشتعل مرة اخرى

وكان هذا اخر امل يتمسكون به للتواجد في الحكم الذي يسعون اليه على مدار ثمانين عاما من الحيل والمكر والدهاء والتحالف مع طوب الارض من اجل ذلك لان حكم المحكمة الدستورية سيصدر بعدم دستورية هذا المجلس وسيصبح وجوده غير دستوري وكل القوانين التي ستسن في تلك الفترة ستلغى بالتبعية

نعم ان ليس من حق المجلس العسكري حل مجلس الشعب لكن كيف يتواجد مجلس نعلم جميعنا ساعتها انه غير دستوري واعتقد انه في هذه الحالة سيصدر رئيس الجمهورية الجديد اول قراراته بحل هذا المجلس الغير دستوري وبكدة هايبقى البلتاجي ورفاقه في الشارع ولا طالو عنب الشام ولا بلح اليمن ويبقو خرجو من المولد بلا حمص

يعني تفتكرو انهم هايعدو الموضوع بالساهل بعد ما ياخد ما اقترفته اياديهم

كل واحد ونيته وبياخد عليها نصيبه في الدنيا