ياريت ما قامت ثورة ... يا سنين ارجعي لورا

[عبير يونس]

ياريت ما قامت ثورة

يا سنين ارجعي لورا

كل حاجة خلاص

بسهولة بقت تنداس

خرجت عن السيطرة

الناس والاحداث

بقوا حاجة تانية خلاص

المشاعر والأخلاق

وسطوة زيف النفاق

كل حاجة انفجرت

مافضلش غير اشلاء

و الحق تاه و الظلم عم

و زادت حياتنا هم و غم

تعبت م التفكير

قال بيقولوا تغيير

ده طلع حلم عسير

واخدنا للمقبرة

ياريت ما قامت ثورة

يا سنين ارجعي لورا

كنت عايشة

كنت راضية

كنت ساكتة وصابرة

وعاملة مش فاضية

متغربة كنت

و لسه متغربة

م الماضي متهربة

والحاضر كئيب و عليل

والمستقبل ايه ياترى

في أرض النيل؟

نوح وعويل

في ليل طويل

تفوقنا منه

صعقة الكهربا

ياريت ما قامت ثورة

يا سنين ارجعي لورا

[أشرف حسين]

ثلاثين سنه من القمع و التجهيل الممنهج للاسف يا مدام عبير خلقة من المواطن المصري البسيط تركيبه مشوهه..

يا إما خانع ذليلا يرضى بالفتات أو مخرب فوضوي لا يستصيغ طعم النظام ..

و عشان العقليه دي تتغير لازم كلنا ندفع الثمن..و ثمن غالي كمان و هو ده اللي بيحصل دلوقتي بالظبط ....بنسدد !!

كل مكان في العالم فيه مستنفعين و غوغاء و اللى بيحصل النهارده

شئ طبيعي نتيجة انعدام الامن و العداله مش اكتر و لفتره مؤقته انشاء الله ..

مصر عافيه و شافت ايام أحلكّ من كده و قامت بالسلامه

لكن اقول ياريت السنين ترجع تاني لا اعذريني ده كده اسمه يأس و احباط

لما انا اقول كده من خارج الحدود يبقى عليه العوض في اخواتي داخل البلد بقى

عارف اني طولت عليكي و متفهم تماما حالة الاحباط اللي خانقه مصر كلها ..

لكنها خلاص هانت احنا حالياً على المحك و فاضل (تكه) على صدام اخير لابد منه

و بغض النظر عن ماهية القياده المستقبليه .. الامن هيعود و بالتالي النظام و الاستقرار انشاء الله

و ياريت القصيده الجايه تكون فيها جرعة تفائليه عاليه كلنا محتاجينها

تفائلي بالخير تجديه يا ست الكل ...

وسمعينا نهارنا نادي و نهار الندل مش باين :)

خُدي دي عشانك

[عبير يونس]

حاضر يافندم

نهارنا نادي ونهار الندل مش باين

:)

الثورة ماقامتش بس في التحرير

قامت جوانا كلنا

كلنا حلمنا بالتغيير

وعدوى الشجاعة

صابت الكل

م الباشا للغفير

نبتت لنا أجنحة

وقلنا خلاص حا نطير

رفرفنا فوق في السما

فتحنا ...سبنا العمى

شفنا بعيوننا

زيف النظام الحقير

دب ما بيننا الشقاق

وغرقنا في بحر النفاق

كل فرقة خدت لها إله

فرعون جديد

والحق تاه

ولما تواجه كل فريق

يقول لك الشر

برة وبعيد!

صوتنا اتنبح و راح

يقول لك العيشة براح

استحملتوا سنين السفاح

صعبان عليكوا شهور؟!

بينيمونا كانوا

شعب تايه مخمور

ما يصدق يلاقي

حاجة تطمنه

تلقاه يرش بخور

احنا ميت فل كده

يا شيطان فارقنا و غور

سيبونا نشوف أشغالنا

ده الحال بقى ضنك و بور

و فجأة واحنا نايمين في العسل

ناس كانت بتلعب في الروقان

ماشية بثقة ميعرفوش الكسل

وقت اما كنا

ملهيين

على نايمين

على تايهين

على حزانى ومكلومين

همة مكانوش معانا في المطحنة

كانوا براها بيخططوا

و بيضبطوا

وخللوا لنا احنا الطنطنة

شوية أمل ؟؟؟

حاضر

دقوا لي يللا العود

ويحلى صباحنا

بشوية دندنة

ونهارنا نادي بالهنا

و الندل ملوش مكان هنا

[عبير يونس]

مش وقت قولة ما قولنا

ولا انت هنا ولا سمعت

مش وقتها دلوقت

مش هو ده وقت

ياريتني قلت والا عملت

ده وقت قولة يارب

انجدنا وفك الكرب