الوان الفساد فى التجمع الخامس

[ahmed abolhol]

مرة من المرات كنت رايح جهاز مدينة التجمع الاول وكنت مع واحد من اصحاب الاراضى فى البنفسج اللى كانت مشكلتة ان كابلات الكهرباء الرئيسية داخلة عندة فى الارض وحصل مشاكل فى الحفر ومقاول الحفر هرب ومعاة بونات الحفر وبعدين صاحب الارض بنا فلتة وخلص وعايز يسترد قيمة تامين الحفر . دخلنا عند الكبير اوى قالنا منفعش تاخد فلوسك علشان انت قطعت كابلات كهربا وانت شغال فى الحفر .رد المالك وقالة ماهى الكبلات عندى غلط يعنى مش زنبى ان مقاول الكهربا علشان يختصر المسافة ويوفر لنفسة يدخل فى ارضى . قال الكبير اوى معلش حظك كدة وانا عن نفسى مقدرش اعملك حاجة . وفى نفس اللحظة دخل واحد تانى قالة اية ياعم دا عيزين ياخدوا التامين بتاعى علشان مانقلتش الردم وخليتة فى الجناين اللى جنبى . رد الكبير اوى وقالة يا فندم استريح سعتك . وطلبلة قهوة ورفع سماعة التليفون وقال اعملوا الواجب مع الباشا وقفل التليفون وبص للراجل وقالة اى خدمة سعتك.

[ahmed abolhol]

الثانية

سألت نفسى فى صبح يوم جميل ومشرق لية مفيش ولا مرة قريت عن مناقصة مطروحة من القاهرة الجديدة وقولت لنفسى طيب ماتروح تسأل فى العقود والمشتريات فى التجمع الخامس عن مناقصات تكون مطروحة . روحت هناك وقابلت الكبير خالص قولتلوة انا فلان الفلانى ومهندس ومقاول مشترك اتحاد . ولسة بكمل بقى اللستة ......... قالى روح يا استاذ تابع الجرايد وانت تعرف اللى بينزل من عندنا. رديت وقولت ما انا بتابع ومش لاقى من عندكم شغل .. قالى يعنى انا حخبية فبتنا ..

طبعا مشيت وانا نازل على السلم لقيت واحد بيقولى من ورايا بصوت واطى انسى انك تاخد شغل من هنا يا باشا الشغل لية ناسة هنا ومش بيدخلوا مقاولين جديدة

[ahmed abolhol]

3-

قصة الاربعة عشر عمارة الموجودين خلف منطقة جولف القطامية والقطامية هايتس .

لو انت رايح التجمع وعديت على منطقة منطقة الجولف وقبل ما تدخل الصنية اللى فيها الجهاز ادخل يمين المتجه الى القطامية ومساكن الزلزال .وعلى بعد 600 متر فقط حتلاقى مساكن اسمها مساكن الزلزال وسكنها من متضررى زلازال اكتوبر 92

المهم حتلاقى خلف الجولف 14 عمارة على الخرسانة والطوب وطبعا دول 14 بلوك وكل بلوك 4 عمارات .شوف بقى يكونو كام . العمارات دى مبنية من سنة 90 تقريبا ومهجورة تمام وسكنها الحيوانات . تم ذلك عمدا علشان خاطر عيون سكان الجولف والقطامية هايتس . ولو سألت اى واحد هناك يقولك ....هما عملوا كدة علشان مش عايزين حد يبص عليهم .....مع ان الجولف والقطامية هايتس اعلى بحوالى 20 متر عن هذة العمارات ويبان كمان من اسمها ( هايتس )

الصحافة كتب كتير عن الموضوع واعضاء مجلس الشعب اتكلموا والاهالى اعتصموا ولكن..... لا حياة لمن تنادى

[raouf]

الاجهزة والمحليات مازالت عزب بدون صاحب يا استاذ احمد

ان شاء الله مع حل المحليات وتطهيرها تعود الامور لمجاريها بس للاسف بعد خراب مالطة

[ahmed abolhol]

4-

بعد الثورة حصل احتلال على الشقق والمحلات المقفولة وفى التجمع الخامس قام الاخوة الصعايدة بفتح محلات فى جميع العمارات السكنية التابعة لبنك الاسكان وعملوا جميع الانشطة وجميع المهن ومفيش حاجة اسمها ضرر او غلط على البيئة والصحة

المهم انهم يبيعوا ويشتروا وطبعا الوضع حتى الان قائم مع ان فى ادارة اسمها التنمية لما كانت تلاقى واحد بيشطب شقتة ومنزل شوية تراب على الرصيف امام العمارة يعملوا محضر بـ 202 جنية .انما دلوقتى مين بياخد من مين؟؟