اليوم سيكون يوم تاريخي : جلسة النطق بالحكم على ضباط السيدة زينب المتهمين بقتل الثوار

[se_ Elsyed]

أعتقد والله أعلم إنه سيكون حكم تأسيسي يسترشد به المحامون أو رجال القانون بشكل عام في باقي القضايا المتنطورة هنا وهنا وعمالة تتأجل بشكل بشع

اللهم أحق الحق وأظهر العدل يارب العالمين

فرضت قوات الأمن إجراءات مشددة أمام محكمة القاهرة الجديدة بالتجمع الخامس، حيث قامت بعمل كردون أمنى قبل بدء جلسة محاكمة النطق بالحكم على الضباط المتهمين فى قضية قتل المتظاهرين بالسيدة زينب، بقسم شرطة السيدة، وهم كل من النقيب شادى محمد عبد الحميد والنقيب إيهاب عبد المنعم الصعيدى معاون المباحث، وعمر حمدى الخراط، معاون المباحث، والعقيد هشام لطفى محمد، مفتش مباحث شرطة جنوب، ومحمد شعبان متولى أمين الشرطة، متهمين بقتل 5 والشروع فى قتل 6 آخرين من المتظاهرين يومى 28 و29 يناير الماضى.

وقامت قوات الأمن بمنع كاميرات التليفزيون ومصورى الصحف من دخول المحكمة، كما منعت عدداً من أهالى الشهداء من دخول المحكمة.

[عصام أبوالفتح]

يوم منيل بستين نيلة .. استغفر الله العظيم ... براءة !!!!!!!!!

[ام سلمي]

أنا لله وانا اليه راجعون

كنت حاسة ان ده حيحصل

"الجنايات" تبرئ ضباط قسم السيدة زينب من قتل الثور

الخميس، 29 ديسمبر 2011 - 15:06

قضت محكمة جنايات القاهرة، فى جلستها المنعقدة ظهر اليوم، بتبرئة كافة الضباط وأفراد الشرطة المتهمين بقتل المتظاهرين أمام قسم السيدة زينب، وسنوافيكم بالتفاصيل لاحقاً..

اليوم السابع

[bodi]

يحيا العدل يعيش قضاء مصر النزيه

الله اكبر الله اكبر

يحيا النائب العام النزيه

يحيا قضاء مصر العظيم

يحيا النائب العام و القضاء اللذين حكموا علي متظاهر بلطجي بيوزع منشورات في العباسية بحكم سنه خلال اربعة ايام فقط

يحيا النائب العام النزيه و المجلس العسكري العظيم اللي اقتحموا اليوم المركز العربي لاستقلال القضاء بتاع ناصر امين

فيجب التنكيل بالثوار البلطجية و حبسهم و منع المؤسسات الحقوقية المأجورة من الدفاع عنهم و ان تم قتلهم يتم تبرئة من قتلهم

يحيا القضاءو المجلس و النائب العام و الشعب المصري العظيم

و عقبال الاخوان و السلفيين

تم تعديل 29 ديسمبر 2011 بواسطة bodi

[capitshino]

وبناء عليه

فقتلة المتظاهرين فى كل مكان براءة

لا حول ولا قوة الا بالله

[محمد عبدالعزيز]

طيب إذا الضباط اللى كانوا بيقتلوا بسلاحهم مباشرة بيطلعوا براءة!

يبقى اللى بيتحاكم بإنه أعطى الأوامر بالقتل ممكن يدان؟

طب هو أعطى أوامر لمين لما الضباط اللى المفروض ينفذوا الأمر براءة؟

مبروك البراءة ياريس

[نورالعين]

فعلا هذا الخبر تمهيدا لبراءة مبارك

وخاصة انه تم قتل مظاهرين اخرين في محمد محمود ومجلس الوزراء في وجود مبارك والعادلى بالسجن

ولهذا طالب محاميهم امس ضم التقارير عن محمد محمود ومجلس الوزراء

طبعا لازم نوجه الشكر لكل من شارك في جعل الثوار لقمة هنية في سبيل كراسي البرلمان

كما نتوجه بالشكر لابو الرجال على ادائه المميز

كده كلنا لازم نقدم اعتذار لمبارك

احنا اسفين يا ريس

[محمد حامد الغنام]

مبررررروك البراءة للظباط الشرفاء الذين دافعوا على أقسام الشرطة فى ظل الأوقات العصيبة

عبال القضية الكبيرة بتاعتى

براءة جميع الظباط المتهمون فى قضية قتل البلطجية

[ابوهنا]

الكل زعلان وبيلطم الخدودو ويشق الجيوب وبيتحسبن ان الضباط طلعوا براءه

طيب يعنى القاضى اللى حكم بالبراءه مرتشى ام مضغوط عليه ام حرامى

ايه اللى يجبر القاضى انه يحكم بالبراءه لاناس مدانون

وسيبكم من كلام المصاطب بتاع المجلس العسكلرى ضغط على القاضى لان الضباط لو اتحاكموا هيجيبوا اسماء ناس كبيره

وحتى لو طلع مبارك براءه لابد ان نحترم ونحييى القضاء

لانه الان فيه حملة تشكيكي فى كل شئ فى مصر الا الثوار بتوع الحجاره والمولوتوف هم اشرف ناس فى مصر وماعاداهم فهم مرتشيين وخونه ومرتزقه

[capitshino]

الكل زعلان وبيلطم الخدودو ويشق الجيوب وبيتحسبن ان الضباط طلعوا براءه

طيب يعنى القاضى اللى حكم بالبراءه مرتشى ام مضغوط عليه ام حرامى

ايه اللى يجبر القاضى انه يحكم بالبراءه لاناس مدانون

اللى اعرفه ان القاضى بيحكم من خلال الاوراق والادلة اللى قدامه . وان جزء كبير من ورق القضية بيكون

مُقدم من وزارة الداخلية وطبعا الداخلية مش عاوز تدين حد من ولادها الابرار .

[ابوهنا]

الكل زعلان وبيلطم الخدودو ويشق الجيوب وبيتحسبن ان الضباط طلعوا براءه

طيب يعنى القاضى اللى حكم بالبراءه مرتشى ام مضغوط عليه ام حرامى

ايه اللى يجبر القاضى انه يحكم بالبراءه لاناس مدانون

اللى اعرفه ان القاضى بيحكم من خلال الاوراق والادلة اللى قدامه . وان جزء كبير من ورق القضية بيكون

مُقدم من وزارة الداخلية وطبعا الداخلية مش عاوز تدين حد من ولادها الابرار .

طيب ياباشا ايه الحل فى رأى حضرتك

[ابراهيم عبد العزيز]

الخطير في هذا الحكم أنه سيتم البناء عليه في كل الأحكام التي ستصدر مستقبلا في قضايا قتل المتظاهرين

عموما ما حدث كان متوقعا

بل أن الأسوء لم يأتي بعد

تم تعديل 29 ديسمبر 2011 بواسطة ابراهيم عبد العزيز

[se_ Elsyed]

أنا واحد ما درستش إلا قانون تجاري وشوية مباديء قانون عام

لكن تعالوا نتناقش بالعقل كده

- أولاً الثورة لم تغير او تمحو الفساد اللي كان موجود في جهاز العدالة .. وده شوفناه لما النايم العام كان نامي في الخط لعدة شهور ولم يتحرك في دعاوى ضد المفسدين إلا بعد عدة مليونيات للضغط

- نيجي لقضايا قتل الثوار الإبرار الي جابوا لنا الحرية .. وعفواً من يريد أن يظل عبداً فهو عبد مش حر ودي مشكلته ..

1- الناس اللي ماتوا دي ... هل تم تشريح جثثهم في مصلحة الطب الشرعي ؟ بالتأكيد ...

ممتاز .. يبقى هما ماتوا بلطشة برد ولا بالأنفلونزا ولا بضرب الرصاص ؟

ماتوا بضرب رصاص طبعاً ... جميل قوي

2- كل سلاح بيبقى في الجيش او الشرطة هو عهدة .. وكذلك الرصاص وجميع أنواع التسليح ... يبقى هل تم فحص تلك الأسلحة ومضاهتها بالطلقات الموجودة في جثث الشهداء ؟

3- طيب هل تم جرد العهد اللي موجودة في قسم السيدة زينب ونشوف هل تم ضرب نار ولا لأ ؟

4- حتى لو دول بلطجية وكانوا بيحرقوا الأقسام ومغ إلى ذلك ... فهل مش من وظيفة الدولة بمؤسساتها القضائية والشُرطية إلخ إنها تجيب وتقدم المسئولين عن قتل أي نفس ولو حتى بالحق .؟

يعني قصدي لما ظابط بيقتل مجرم ولو دفاعاً عن النفس .. مش بيبقى في تحقيق برضوا ولا كلب وراح ؟.

مما لا شك فيه إن النيابة هي السبب لانها لم تقدم أدلة كافية ضد هؤلاء المجرمين .. وده شوفناه في أداء هزيل للنيابة في محاكمة المخلوع .. وعلى رأي إبراهيم عيسى اللي قال دي لو كانت محاكمة رئيس مجلس محلي كانت هاتبقى اوقع من كده والتُهم كانت هاتبقى أكثر من كده

وبالتالي مع ضياع الحق .. وعدم معرفة الجاني الحقيقي .... سنكون أمام مشكلة كبيرة . وسيلجأ الكثيرون إلى أخذ حقهم بإيدهم

أصل أعتقد إن ربنا أعطانا عقل نفكر به ..

نحن أمام عدة قضايا قتل

فلما الكل يطلع برأه ...

يبقى من الجاني ؟. ومن المسئول عن البحث عنه وتقديمة للعدالة ؟

ده لو كان في عدالة أساساً

[capitshino]

الكل زعلان وبيلطم الخدودو ويشق الجيوب وبيتحسبن ان الضباط طلعوا براءه

طيب يعنى القاضى اللى حكم بالبراءه مرتشى ام مضغوط عليه ام حرامى

ايه اللى يجبر القاضى انه يحكم بالبراءه لاناس مدانون

اللى اعرفه ان القاضى بيحكم من خلال الاوراق والادلة اللى قدامه . وان جزء كبير من ورق القضية بيكون

مُقدم من وزارة الداخلية وطبعا الداخلية مش عاوز تدين حد من ولادها الابرار .

طيب ياباشا ايه الحل فى رأى حضرتك

تفتكر ايه الحل لو قريب او اخ لك ممن قتلو فى هذه الاحداث .. قولى بقى انت ايه الحل ؟

[se_ Elsyed]

الحمد لله على ثبات المباديء

وزي ما كنت باكتب زمان وأقول إن كل الامور ستؤدي إلى ثورة على الفساد وخلعه

الان أرى أمامي بوادر أخرى لثورة على جسم النظظام الفاسد الذي أقتلعنا رأسه ثم فرحنا ورجعنا بيوتنا ونسينا أن الجسم مازال حياً

ربنا يستر على مصر

لان العدل مش موجود ..

ولو العدل موجود بالفعل ... فكان من الأولى أن يتم تكريس كل مؤسسات الدولة لكشف من قتل هؤلاء الشباب اللي كانوا بيدافعوا عنا ... ولكان العدل أسترجع حقوق مصر وثرواتها المنهوبة على الأقل الداخلية ... وما كانش يبقى في حثالة بشر يطلعوا يهتفوا للمخلوع ويقولوا لنا إحنا أسفين ... ولو كان في عدل كنا أعترفنا بالثورة وعملنا لها يوم نحتفل فيه بأكبر ثورة في تاريخنا ....

لكن ليس عندي أدنى شك في إيمان الشعب المصري بثورتة ... وما فيش أدنى شك إننا هانكمل الثورة ونكنس كل الزبالة المتبقية .

[محمد عبدالعزيز]

أعتقد ماحدش يقدر يلوم القضاء بنسبة 99.9%

حكم بالبراءة يعنى مفيش أى أوراق أو أدلة تدين المتهمين حتى إنهم يخدوا أى حكم.

والموضوع كده بقى واضح, عشان حتى لو هما اللى قتلوا فعلاً وطلعوا براءة بحجة إنهم دافعوا عن القسم فاللى بيدافع مش بيضرب فى أماكن قاتلة, ممكن يضرب فى الرجل مثلاً عشان يدافع عن نفسه.

إما بقى اللى اتقدموا للمحاكمة ليس لهم علاقة بالقضية والجناة الحقيقيين تم التستر عليهم من الداخلية.

[aimen]

كدة الموضوع واضح جدا

شيطنة التحرير

,القبض على النشطاء

,تخوين الاعلاميين

,استقطاب قوي سياسيه

ترويع المراكز الحقوقيه

براءة قتله الثوار

[se_ Elsyed]

اليومين اللي فاتوا لم أخذ تهديد أهالي السويس الباسلة المدينة التي لا تترك حقها .. بيهددوا بزحف السوايسة كلهم بالتذامن مع أهالي الشهداء في جميع المحافظات هايزحفوا في إتجاه سجن طره ويجيبوا المجرمين من جوه ينفذوا فيهم حكم الله

وأنا ضد كل هذا تماماً

لكن إديني عقلك

كل المتهمين يُخلى سبيلهم ... ويرجعوا لنفس مراكزهم أمام ضحاياهم وعادي خالص

بل منهم من يترقى ... وياخد مكافأت وينقل لمكان أفضل زي وائل الكومي وزي المجرم مدير امن البحيرة ..

وتفض القضايا تتأجل وكأنها قضية سرقة حبل غسيل او نشل محفظة ويفضل الأستفزاز لأهالي المصابين والضحايا ويُعاملوا أسوء معاملة حد يتخيلها بل يتم إعتقال بعضهم كما حدث في فخ مسرح البالون ....

عارفين كل ده ليه ؟

عشان الطبقة اللي فوق لم تعترف بالثورة أو تؤمن بها ولو لدقيقة واحده .... بالمناسبة هو ده اللي حصل في رومانيا ...

وأقسم بالله لن نترك حقوقنا .. ولن نتخلى عن ثورتنا ولن نكون رومانيا أخرى ... ولن نسمح لمخلوق على الأرض بإفشال ثورتنا ... أنا واثق من ده تماماً زي ما كنت واثق من نهاية مبارك ونظامه .. وزي ما كنت واثق من نجاح ثورة 25 يناير بالرغم من دعاوي الإحباط والبكاء المخدوع بكلام من ثعبان عجوز

[se_ Elsyed]

أتحدى إنها تكون صدفة أن يتم اليوم هجوم بربري بقوات ضخمة من الشرطة والنيابة وتشميع عدة ماركز حقوقية زي جمعية إستقلال القضاء ويرأسها ناصر أمين .. المضحك الدولة إختارته عضو في لجنة حقوق الإنسان .... وتم مصادرة جميع المستندات الموجودة داخل الجمعية بصورة فجة لم تحدث أيام مبارك

[ViralMind]

السلام عليكم..

مصر متغيرتش و مش هتتغير.. عالاقل فى ال10 سنين اللى جايين.

امكانية حدوث ثورة اخرى بحجم ثورة يناير, الامكانية دى فراكشن fraction لان خلاص الناس نفست و طلعت اللى عندها و مساحة الحرية "الشكلية" الخاصة بديكور الديموقراطية بقت كبيرة قوى لدرجة انى مثلا ممكن مخافش انى اطالب باعدام سيادة المشير طنطاوى فى قلب الازهر -زى ما حصل فى جنازة الشيخ عماد-, او ان اى حد يقدر يطلع فى الفضائيات و يسب مية ملة لاطخن بينى آدم فى مصر. (زى ما احمد فؤاد نجم عمل)

و كمان لان الناس عايزة تعيش.. مش مهم العيشة مهينة.. مش مهم العيشة عيشة حيوانات.. المهم ان محدش يهدد بقائهم بغض النظر عن الوضع.

لما مصر تبقى نضيفة, و لما المصريين يتوقفوا عن الغش و الخداع و التدليس, و لما نركب وسيلة مواصلات آدمية و نمشى فى شوارع تليق ببنى آدمين, و ميكونش فيه اولاد شوارع, و نكون فى بلد بتحترم القانون و النظام, ساعتها بقى نبقى نزعل لما ظابط يتحكم عليه بالبرائة, او حرامى مرتشى يمسك رئيس وزرا, او بنت تتسحل و تتضرب فى ميدان عام.