سياسة الهاء الأهالى

[Farida]

انا و صديقاتى و قريباتى و جيرانى كل يوم على الله نقضى حوالى من 4 الى 5 ساعات مذاكرة للأولاد و ايه كم المقررات ده انا عمرى ما شوفته قبل كده يعنى طفل فى تانيه ابتدائى ياخد كل يوم فى العربى عليه يطلع من كل جمله الالف اللينه و اللام الشمسيه و القمريه و الحروف المشدوده و الحروف الممدوده بالألف و الياء و الواو و المفرد و المثنى و الجمع و الفعل و الأسم يوميا 4 صفحات من اصل سطرين ده العربى

ندخل على الحساب MATH أخدوا الجمع و الطرح ماشى لكن اخد متتاليات عدديه و يجيب لى مسأله فيها جمع و طرح رقمين كل رقم مكون من ثلاث اعداد و يقعد يشيل رقم رقم منهم و يعمل مسأله علشان تتحل فى حاله الجمع و الطرح التلميذ يجيب الرقم المختفى مع العلم انه جمع و طرح مركب ....مش عارفه حا يستفيدوا ايه .....ده غير اللغه بس مقدور عليها

اللى عايزه افهمه هل دى سياسه لألهاء الناس و التشاغل عن القضايا من حولنا بنجاح اولادنا و عمل الواجب يوميا ...انا مش عارفه اروح للدكتور من اسبوع بسبب الواجبات يوميا و بسبب الأمتحانات الشهريه و الأسبوعيه و غيره ....و كل ده فى تانيه ابتدائى امال فى الأعداديه حا أعمل ايه ؟

[se_ Elsyed]

ما هي دي من ركائز سياسة الحكومة هي والأزمة الإقتصادي ..

- الناس تفضل تجري وتحارب بعض عشات الممً ... ولما ترجع بيتها اللي المفروض إنها تستريح فيها تلاقي المفاجاة في دراسة العيال والدروس الخصوصية والمناهج اللي تنفع تُدرس - لا مؤخذه - للحمير ونحشي بها عقولهم بس ويبقى العيل في نهاية دراستة كمثل الحمار يحمل أسفاراً ... أهو ما شاء الله عليه شايل وشاطر .. لكن إيه نوعية العليق او الحمولة اللي شايلها مش مهم نتكلم في الحاجات دي بعدين . اهم حاجة ينجعص الريس هو ووزرائة ويقولك في عه الرئيس مبارك الميمون زاد عدد المتعلمين عندنا مش عارف من كام لكام وبنينا مدراس قد إيه ... طب يا مولانا إيه نوعية التعليم دي وهل هو تعليم يستطيعوا أن يواجهوا به تحديات العصر من تكنولوجيا وعلوم وكمبيوتر ولغات وغيره ... مش مهم برضوا الحاجت دي فسافس بسيطة .

[se_ Elsyed]

لي زميل مصري جار لي ويسكن في نفس العمارة هنا .. وإبنه دلوقت وصل أولى إبتدائي ... وماشاء الله الولد في الإنجليزي والفرنساوي بقى زي البرابنت ... فمدرسة اللغات اللي هو فيها مشهورة بقوة مناهجها ... لكن تعالوا نشوف بقى من الناحية الثانية ...

- الواد والله يا جماعة إتوقف نموه من كثر العبء الثقيل اللي عليه ... بقى ينام من الساعة 6 المغرب لحد تاني يوم الصبح اللي هو ميعاد المدرسة من تعب ومذاكرة طول اليوم وبكده يبقى سلامو عليكم على وجبة العشاء او الحليب او ما إلى ذلك وظهر تحت عينه هالات سوداء .. وفعلاً بقى شكله وطريقة كلامه عامل زي المتخلفين عقلياً .. لأنه لا بقى يلعب زي العيال ولا يعيش حياته زيهم .. والبيت عندهم بقى مكهرب أبوه طول اليوم في الشغل .. وأمه مربوطه جنبه طول اليوم بتذاكر له ..

الاول كنت هادخل الواد عمر السنة جاية نفس المدرسة .. قولت والله العظيم ما يحصل ده أنا عندي أشغله منجد مراتب ولحفه احسن من العذاب ده ... بس الحمد لله لقيت مدرسة كويسة هنا إسمها " العروبة " وسمعت إن العيال بتعمل الواجب والمذاكرة وكله في المدرسة يعني نظام اليوم الكامل والطفل بياخد حاجته يوم الأربعاء فقط معاه البيت عشان يعمل الواجب اللي اخده ....

وتلاقي وجهات نظر تانية - ومنها الحاج إبن مصر ربنا يرجعه بالسلامه - يقولي إنت خايب سيب الواد يتعلم ويقرصوا عليه التعليم في الصغر كالنقش على الحجر والعيل مش هايشتكي ... طب لما الحجر يتكسر ياخويا نلحمه إزاي ؟

الطفل له قدره معينة برضوا ومش معنى إنه متجاوب وبيفهم حتى الىن يبقى كل شيء تمام .. بالعكس هاييجي وقت وينفجر فيه ...

والله اللي مخلي الواحد واقف على حيله لحد دلوقت إني طول فترة دراستي ماكنت حارم نفسي من حاجة .. الدراسة دراسة واللعب لعب واروح سنيما ومسرح وماتشات كوره .

[Farida]

على فكرة يا سى السيد انا صديقتى اولادها فى مدرسه العروبه و بينطبق عليهم نفس اللى بينطبق على الأولاد المساكين :rolleyes: التانيين ....اذا كنت عايز مدرسه الأولاد بيخلصوا فيها الواجبات فى المدرسه و فيها انشطه و الأولاد منظرهم يفرح و تفكيرهم كويس عليك و على مدرسه الألسن فى الحرانيه السنه ب 20000جنيه.

...او اى انترناشيونال سكول بياخدوا مناهج مختلفه مش متخلفه زى بتاعتنا

[a_ragab_itp]

والله يا جماعة انتو جئتوا على الجرح الواحد مش عارف يعمل ايه او يدخل ابنه انهى مدرسة كويسة وتكون رخيصة نسبيا بس عملية اختيار مدرسة ليست بالأمر السهل

فانا المفروض ادخل ابنى السنه الجاية المدرسة ولغاية دلوقتى مش عارف ادخله فين

نارمر ولا دار التربية ولا ايه

يا ريت يا جماعة نفتح موضوع مستقل لكيفية اختيار مدرسة كويسة وكل واحد عنده ابن او بنت فى مدرسة يقول لنا ايه ميزات المدرسة وعيوبها ومصاريفها كام

على فكرة انا بفكر بجدية ادخله مدرسة دار التربية اللى فى الزمالك بتاعة نوال الدجوى بيقولوا اها كويسة وكمان مصاريفها رخيصة ب 3500 جنية شاملة الباص ووجبة يقدموها للعيال ولكن المشكلة ان امتحانات القبول بيها صعبة جدا بيمتحنوا الولد كأنه بيقدم فى الأمم المتحدة لكن ربنا ينفخ فى صورته

فما رايكم اطال الله عمركم

[se_ Elsyed]

على فكرة يا سى السيد انا صديقتى اولادها فى مدرسه العروبه و بينطبق عليهم نفس اللى بينطبق على الأولاد المساكين :lol: التانيين ....اذا كنت عايز مدرسه الأولاد بيخلصوا فيها الواجبات فى المدرسه و فيها انشطه و الأولاد منظرهم يفرح و تفكيرهم كويس عليك و على مدرسه الألسن فى الحرانيه السنه ب 20000جنيه.

...او اى انترناشيونال سكول بياخدوا مناهج مختلفه مش متخلفه زى بتاعتنا

صباح الخير يا فريده ..

أنا في السعودية يا ستي .. يبقى حرانية إيح وإمبابة إيه ؟ يكونش قصدك إني ممكن وانا في السعودية أقدم لعمر في مدرسة في مصر واوصل له بطيارتي كل يوم الصبح وأرجع اجيبه تاني الضهرية ؟

- هي مدرسة العروبة برضوا في مصر ؟ أصل انا سمعت هنا إن منهجها معتمد في مصر برضوا فأحتمال تكون فرع للي هناك

- اى انترناشيونال سكول بياخدوا مناهج مختلفه مش متخلفه زى بتاعتنا

ما هو معظم المدارس هنا إنترناشول والولد اللي باحكي لكم عليه في واحده منهم !!!!

[Farida]

معلهش يا سي السيد انا افتكرت ان الولد حا يدخل مدرسه فى مصر و انا يعنى با نجم لما اعرف ان ابنك حا يدخل مدرسه فى السعوديه و اسمها كمان العروبه ....عموما يا عم الف مبروك على المناهج الأنترناشيونال و جتنا نيله فى حظنا الهباب