المجلس العسكري يقبل إستقالة حكومة عصام شرف

[se_ Elsyed]

ولا فارق معايا الخبر

تماماً مثلما كان مبارك يفعل

يذهب قفا .. وياتي قفا

إذا لم تكن هناك حكومة ذات صلاحيات قوية وذات إستقلالية وذات رؤية وبرنامج ... يبقى عصام شرف زي أم مجدي زي أي واحد

ويظل المجرم الحقيقي موجود في الملعب وهو المشير وعصابتة

[se_ Elsyed]

وجدتها وجدتها

ههههههههههههههههههههههههه

بيلعبوا بنا الكرة

عارفين إستقال ليه ؟

البهوات الكلاب عملوا قانونا العزل السياسي لأعضاء الحززب الزفت اللي افسدوا الحياة السياسية ... وبعدين والمشير قاعد في الحمام قال إيه ده ؟

ده عصام شرف حزب وطني

وفايزة أبو النجا حزب وطني

وحسن يونس حزب وطني

و و و و و و و و

هههههههههههههههههه يبقى وقعوا في حيص بيص وكان لازم يتعزلوا .... فقال لهم قدموها بالذوق قبل ما تتجرجروا في المحاكم وتبقى بجميلة

[عصام أبوالفتح]

الانتخابات الى المجهول .. المخطط ماشى زى الفل

[se_ Elsyed]

يا أخي حرام عليك والله حرام

إنتخابات إيه وإنت شايف بعينك إن الزفت المجلس أصر على إصدار الوثيقة الملزمة للدستور قبل الإنتخابات بأيام وخلى منها 20 واحد من مجلسي الشعب والشورى فقط والباقي كان بيخطط يختارهم على مزاجه هو ... يبقى إنتخابات إيه ؟

يا اخي ياما كان عندنا مجالس نيابية في ظل ديكتاتوريات وكان قلتها أحسن

يا اخي إنتخابات إيه وكان الفلول عيني عينك وجهاراً نهاراً بيهددوا إنها هايخلوها دموية وهم لهم خبرة في إدارة مثل تلك العمليات وشوفنا حكم قضائي بيمنعهم من الإنتخابات .. ثم حكم يعيدهم ... والحزب القذر إتفك وبقى عندك 8 احزاب مأسسها الحزب الوطني

يا أخي السلاح بقى منتشر عندك بطريقة بشعة

يا أخي وزارة الداخلية ما بتعملش رجالة إلا على المدنيين .. أما البلطجية والفلول فمنتشرين وماليين الدنيا

يا أخي إنتخابات إيه وإنت لحد دلوقت في مفاجأة مدوية لا يوجد لديك قانون لإنتخابات الرئاسة ولا إشتراطات والعملية هلامية وضبابية

يا أخي المجلس العسكري وعلى لسان السلمي الطرطور كان على وشك جعل وثيقة السلمي بمثابة إعلان دستوري فوق الجميع وغصب عن الجميع

يبقى لما أجل الإنتخابات شهر ولا شهرين ويبقى عندي مجلس رئاسة محترم وحكومة بحق وحقيق ونعمل إنتخابات لمجلس تأسيسي زي تونس يعمل الدستور ويعمل الحكومة ويجهزل لإنتخابات الرئاسة

ولا يبقى عندي 800 طرطور ما يقدروش يهرشوا حتى ؟

[عماد حمدي]

المجلس العسكري : يبحث عن رئيس وزراء جديد بعد إستقالة شرف و حكومته ..

[se_ Elsyed]

العسكري يطلب من الأحزاب ترشيحاتها للحقائب الوزارية

للمرة المليون أي حد هايقبل حقيبة وزارية بدون صلاحيات وبدون برنامج وبدون معرفة المدة ... يبقى ده ترسيخ لحكم العسكر .. وكده بيرموا الكرة في ملعب الاحزاب اللي منها احزاب كارتونية .. واللي بالعربي بتخلي المجلس المسئول عن الجرائم التي أرتكبت خلال 10 شهور

للمرة المليون ومش عاوزين نرجع لورا نقول إن كلنا غلطنا لما جرينا ورا فتفوته التعديلات الدستورية اللي إعملت في مارس وكلنا أتلهينا وفرحنا وأتاريها كانت لعبة قذرة

لكن مازلت متفائل وبإذن الله القادم أفضل لان الشعب كله أصبح عنده وعي

ومرة أخرة لمن يخاف على نفسه او يخاف من المجهول نقول له إركن على جنب وشوف الججرح وهو بيتنضف صح

[se_ Elsyed]

مصر فيها ملايين الرجالة

ملايين الرجالة اللي واحد فيهم يطلع يقول دلوقت الإنتخابات هاتجرى في موعدها ... هاننزل نلم كل البلطجية المسجلين .... هانهيكل وزارة الداخلية ونستبعد كل من لا يحب هذا الوطن .... هانعبر المرحلة الحرجة .....

[se_ Elsyed]

لازم يتعين وزير عدل محترم من خارج المنظومة

ونائب عام من خارج المنظومة

ويطلع يقول إن هاتبقى محاكمات عادلة وعاجلة لكل من اخطأ في حق الشعب المصري حتى لو كان المشير وعصابتة

وسيتم إعادة ثروات الشعب المصري اللي إتنهبت على مدار 60 سنة على الاقل الداخلية

يا ناس يا هو عمركم شوفتم مجرم مسجون كلب نهب الشعب وبلغت ثروته زيادة عن 40 مليار جنية من دمنا يهددنا من داخل سجنه إنه هايسحب إستثماراته ويطرد العمال في الشارع إذا تم التحقيق في موضوع مصانع الصلب اللي نهباها مننا ؟

في كده في الدنيا .. في كده يا ناس ؟

[عماد حمدي]

عاش يا أبو حميد .. تسجيل متابعة ..

[رضوي]

التليفزيون المصري نقلا عن مصدر عسكري :

المجلس العسكري لم يقبل استقالة حكومة شرف

[عصام أبوالفتح]

زى تونس! . . مجلس رئاسى! . . الله يوفقك

قبل ما اضغط ارسل طلع لسه فى كلام عن دراسة قبول الاستقالة . . لا زلت مستعدا لفرض الاحكام العرفية والطوارئ وحظر التجول 12 ساعة يوميا واعمل الانتخابات فى ميعادها . .

على قناة التحرير واحد مصاب واخد شريط ترامادول وهو بيتكلم

[عماد حمدي]

التليفزيون المصري نقلا عن مصدر عسكري :

المجلس العسكري لم يقبل استقالة حكومة شرف

التليفزيون المصري دا عايز أولع فيه أولع في النايل سات من اصله علشان خاطر التليفزيون المهبب دا

متجننونييييييييييييييييييييييييش

تم تعديل 21 نوفمبر 2011 بواسطة omda2006

[ابراهيم عبد العزيز]

يا أخي حرام عليك والله حرام

إنتخابات إيه وإنت شايف بعينك إن الزفت المجلس أصر على إصدار الوثيقة الملزمة للدستور قبل الإنتخابات بأيام وخلى منها 20 واحد من مجلسي الشعب والشورى فقط والباقي كان بيخطط يختارهم على مزاجه هو ... يبقى إنتخابات إيه ؟

ضيف على ذلك يا أخي سي السيد إصدار قانون إفساد الحياه السياسية ( الذي جف حلق الثوار من كثر المطالبة به ) قبل بدء الإنتخابات بأيام معدودة !! وبعد أن تقدم الفلول بأوراق ترشحهم وأنفقوا على حملاتهم الكثير من الأموال وأصبح يحدوهم الأمل بالرجوع للبرلمان مرة أخرى , الان وبعد كل هذا يصدر لهم المجلس العسكري قرارا بالعزل فهل تعتقد أنهم سيصمتون ؟؟؟

لو كان تم إصدار قرار العزل السياسيي بعد تنحي الرئيس السابق مباشرة لكان إنتهى الأمر وقتها لأن الثورة كانت في أوج قوتها , ولكن للأسف تم تعظيم الأمل عند الفلول حتى يتم مفأجأتهم في أخر لحظة وبالتالي وارد جدا أن تحدوهم الرغبة في الإنتقام ناهيك عن إمكانية الطعن في الإنتخابات برمتها إذا تم إستبعادهم الأن .

تم تعديل 21 نوفمبر 2011 بواسطة ابراهيم عبد العزيز

[se_ Elsyed]

تصدقوا بالله ؟

كنت باجهز موضوع دلوقت هاسميه " ماذا لو كان المجلس العسكري من الشرفاء ؟"

على قد تفكيري يعني وواحده واحده وبأسرح بخيالي :

2- في شهر مارس أو إبريل على ما أتذكر أصدر القضاء حكماً بسحب 3 الاف فدان من أجود المزارع من رجال المخابرات كانت ممنوحه لهم هدايا في مدينة العياط لإنهم سقعوها وكانوا ناويين يبيعوها مباني ...

بالله عليكم .. لو المساحة الرهيبة دي إتوزعت على 600 مسجل خطر أو مجرم تائب وعايز يعيش حياة شريفة في وسط المجتمع بضمانات قانونية ضده طبعاً وكان ده ضمن جمعية زراعية محترمة وتتزرع كل المساحة دي ضمن برنامج زراعي مدروس من الخبراء ؟

كان إيه اللي حصل ؟

2- لو عندك وزير داخلية مدني ذو خلفية قانونية قام بإعادة هيكلة وتغيير زي الشرطة الكئيب اللي بيفكرنا بالايام السودا وضم خريجين حقوق وقضاة للجهاز ... وأصدر قانون بالعفو عن كل سجين هارب من الـ 23 الف اللي هربوا من السجون واللي راعبين الدنيا ليل نهار وقال إنه سيُسقط عنهم ربع المدة إذا سلموا انفسهم خلال شهر مثلاً .... ماذا كان سيحدث ؟ وماذا لو أصدرنا قانون بإعدام كل من يمتلك سلاحاً او يستخدمة وإعدام كل مفسد في الأرض يروع الناس ويستبيح دماءهم خلال 6 شهور ؟

3- لو المجلس العسكري وما يحتوية من إدارات هندسية بالتعاون مع شركات المقاولات العامة والخاصة عملوا خطة سريعة لن تكلف شيئاً وبالتعاون أيضاً مع شركات الحديد والأسمنت اللي بالكوم ... وقالوا إن كل تبرعاتكم ستكون مخصومة من الضرائب ... وكل تبرعاتكم ستجعل لكم إمتيازات في أي مشروعات حكومية ... ونزلوا يطوروف ويفوروا مئات العشوائيات المترامية الاطراف وفي أرقى المناطق وإحنا عارفين وشوفنا البهدلة اللي خلف ماسبيرو والبهدلة اللي في مدينة نصر في الكيلو 4 ونص والسيدة زينب ولمينا الناس دي كلها في عماير محترمة ادمية .. وأستغلينا باقي الأراضي في مشروعات إنتاجية لهم وتوفير فرص عمل ... تخيلوا إيه اللي كان هايحصل ؟

4- تخيلوا لو كنا شكلنا لجنة من الشرفاء والخبراء في الزراعة ودرسنا في الحال مشاكل الفلاح ومشاكل الزراعة في مصر ؟ يا ناس ياهو الصوامع والشون اللي بيخزنوا فيها القطن والقمح واللي بتخلي الفاقد اللي بياكله العصافير وبيروح في الوبا شيء يحزن ... تخيلوا - أنا أصولي واجدادي من الفلاحين وبأفتخر مع إني انا مش فلاح لكن متابع وعارف الدنيا هناك فيها إيه - تخيلوا إن محصول القطن دلوقت الفلاح بيعيط وواقف على باب الجمعية التعاونية الحكومية عشان ياخدوها منه وبيماطلوا فيهم شهور لحد ما الندى والمطر ينزل على الاجولة والمحصول وكل ده هايروح في الزبالة وتعب موسم كامل بيضيع قدام عينه .. تخيلوا لو بدأنا خطة في تطوير الشون دي ؟ تخيلوا لو خلينا الخمسة مليون جنيه اللي إتصرفت في حفل المشير بعيد الفلاح في أستاد القاهرة وتم حشر موظفي الجمعيات التعاونية من مختلف انحاء الجمهورية كالحيوانات في اتوبيسات إلى الاستاذ عشان يهتفوا بحياة المشير .. تخيلوا لو كنا خصصنا المبلغ ده مش أكتر عشان نفرج عن الاف الفلاحين المسجونين حالياً عشان الفلاح الغلبان واخد قرض بخمسة او عشرة الاف جنية عشان يجيب تقاوي أو سماد وجه المحصول إتبهدل او باظ او الحكومة زي ما بتعمل دلوقت ما رضيتش تشتريه منه فبنك التسليف الزراعي سجنه في الحال .. تخيلوا لو دفعنا كفالات للناس دي وخرجناهم وقولنا لهم حقكم علينا ؟

5- تخيلوا لو إستغلينا حماسة العلماء المصريين اللي في الخارج وطلبهم المساعدة في أي حاجة حتى لو يمسك فاس ويعمل اللي يُطلب منه ويطور ويعمر في بلدة ولو نطور شارع بس يا جماعة نحسس الناس إن في ثورة ؟

6- تخيلوا لو إستغلينا حماسة الشباب في بداية الثورة وأبتدينا ننضف بلدنا وننشأ شركات نضافة فورية ونعمل مناقصات ودعوات عالمية لإنشاء مصانع معالجة للمخلفات دي ؟

7- تخيلوا يا جماعة لو فعلنا دور مراقبة وزارة التموين ولا التضامن على الأسواق والأسعار وما خلناش الناس تمشي تكلم نفسها ؟

8- تخيلوا لو في شفافية وقولنا للناس الاف رؤوس الماشية اللي جت لنا هدية من السودان واثيوبيا راحت فين ؟

9- تخيلوا لو بتينا في معاقبة كل الفلول بما يرضي الله .. وأسترجعنا كل ثرواتنا الداخلية والمدن الكاملة اللي إحنا عارفين حصل عليها اللصوص إزاي وتم إعادتها للشعب .. كان إيه اللي حصل ؟

الأفكار كثيرة .. وحاجات بسيطة مش عاوزه سنين .. أقسم بالله كانت محتاجه أيام فقط .. ايام أحسس الناس إن في ثورة .. يا ناس مهاتير محمد طور المحليات اللي خلت ماليزيا تبرق في 3 شهور .... وأقتبس الفكرة منه أردوغان ... صعبة دي ؟ مستحيلة دي ؟

[se_ Elsyed]

ههههههههههههههههههههههههههههههههههههه

يا حلاوة ام المجلس العسكري

خبر عاجل

العيسوي مستقيل من الصبح وروح بيتهم وكتموا على الخبر

والشرطة العسكرية هي من تدير وزارة الداخلية

سلامتها أم حسن

[se_ Elsyed]

خبر عاجل

يا نهار إسود

مصدر عسكري يصرح الان إن ما يتناولة الإعلام بخصوص إستقالة حكومة شرف هو تكهنات إعلامية

في مكان لسه فاضل في طره للمشير وعصابة الأربعين حرامي يا جماعة ؟

[se_ Elsyed]

العيسوي نط من السفينة بدري .. لكن هايروح فين ؟ وهو دم الشهداء بالساهل ومالوش ثمن ؟

[se_ Elsyed]

التلفزيون المصري: المجلس العسكري المصري يرفض استقالة حكومة شرف

الإثنين 21 تشرين الثاني 2011، آخر تحديث 22:03

بعدما اشارت بعض المعلومات الى ان المجلس العسكري المصري قبِل استقالة الحكومة المصرية التي يترأسها عصام شرف، عاد التلفزيون المصري للتأكيد ان المجلس العسكري رفض استقالة حكومة شرف.

نفس الخطوات

لا زيادة شلوت ولا نقص شلوت ... نفس غباء مبارك بالظبط

لكن أعتقد وأكاد أُجزم إن كثير من الوزراء سيستقيل بشكل فردي .. لان المقصلة مش هاترحم حد ... والمرة الجاية وهي بإذن الله خلال أيام .. ماحدش هايلاقي محامي يدافع عنه والكل هايتعدم في ميدان التحرير .. وبالتالي الجميع سيتساقط واحد تلو الاخر وبدأت بوزير الثقافة أمس واليوم وزير الداخلية ووضعوهم امام الامر الواقع وجلسوا في بيوتهم

[مغتربة]

على وزن الاغنيه

موفقش لسه

و عجبى :sad:

[se_ Elsyed]

التلفزيون المصري: المجلس العسكري المصري يرفض استقالة حكومة شرف

الإثنين 21 تشرين الثاني 2011، آخر تحديث 22:03

بعدما اشارت بعض المعلومات الى ان المجلس العسكري المصري قبِل استقالة الحكومة المصرية التي يترأسها عصام شرف، عاد التلفزيون المصري للتأكيد ان المجلس العسكري رفض استقالة حكومة شرف.

نفس الخطوات

لا زيادة شلوت ولا نقص شلوت ... نفس غباء مبارك بالظبط

لكن أعتقد وأكاد أُجزم إن كثير من الوزراء سيستقيل بشكل فردي .. لان المقصلة مش هاترحم حد ... والمرة الجاية وهي بإذن الله خلال أيام .. ماحدش هايلاقي محامي يدافع عنه والكل هايتعدم في ميدان التحرير .. وبالتالي الجميع سيتساقط واحد تلو الاخر وبدأت بوزير الثقافة أمس واليوم وزير الداخلية ووضعوهم امام الامر الواقع وجلسوا في بيوتهم