إذا لم تكن هذه هي السُخرة والجبروت .. فماذا تكون ؟

[se_ Elsyed]

من موقع كلنا خالد سعيد

مجموعة صور التقطتها عدسات واحد من أعضاء الصفحة في مدينة نصر لضابط بجوار مقر سكنه يكلف أمين شرطة ومخبر بتنضيف عربيته .. التصرف ده موجود وللأسف في كتير من مؤسسات الدولة ومش مقصور على الضابط اللي حرص صاحب الصور على عدم إظهار وشه بشكل كامل .. يمكن ناس كتير تقول ايه المشكلة لكن قانونيا دي جريمة اسمها استغلال السلطة .. أمين الشرطة أو المخبر اللي بيتم إجبارهم على العمل ده مع الوقت بيعملوا نفس الموضوع مع غيرهم من اللي أضعف منهم وغالبا بيكونوا المواطنين .. ايه رأيكم؟

[se_ Elsyed]

هي الناس دي لا التربية ولا الانسانية ولا الاخلاق مروا عليهم نص ساعه بس في حياتهم ؟

يعني إيه أسخر إنسان موظف زيي زيه مش ده شغله ولا وظيفته في مثل هذه الاعمال الدنيئة ؟.. لأ وبعد الثورة وبعد كسر أنف وكبرياء هؤلاء الحثالة

وإزاي اتخيل إن ما يحدث قبل الثورة يستمر بنفس المنهجية بعد الثورة ؟

انا مبسوط جداً بنشر مثل تلك الصور بل وبفضح هؤلاء الحثالة بالأسم والعنوان بل وكامل التفاصيل

أصل أنا شوفت بعيني حاجات زي دي

ولن أنسى زمان قوي وأنا في الكلية ... باتكلم مع ولد بسيط بيشتغل بياع انابيب .. فبيحكي لي إنه دخل طبعاً امن مركزي عشان مش بيعرف يقرا ولا يكتب .. بالرغم من إنه صايع ومن القاهرة ولافف الدنيا .. فجه حظه إنه يبقى مراسلة عند واحد من الباشوات اللواءات بتوع الداخلية .. وأشتغل عنده في البيت خدام ... بالعربي كده ... وبعد ما طلع عين اللي خلفوه 3 سنين .. الباشا - بقى محافظ لأسيوط بعد كده - حلف يمين غليظ ما هو موافق له على منحه شهادة الخدمة إلا لو وافق إنه يشتغل عنده في معرض السيارات اللي يملكه ... لحد ما الواد بكى زي الأطفال واتحايل عليه شهور طويلة عشان يعتقه لوجه الله ويتفك من السجن ده ويشوف مستقبلة .... وتعطف عليه الجبار اللي ما يعرفش ربنا واعطى له الشهادة .

ناهيك عن جيراني من ظباط شرطة ... وللأسف في بعض الاحيان جيش ... وتسخيرهم لما يعرف بعساكر المراسلة اللي تقريباً بيعملوا كل حاجه من أمور خدمة وتقضية مشاوير وطلبات وغسل ومسح وكنس بل ويعملوا مثل ذلك للأولاد كمان .. يعني خدام عنده وعند اللي خلفوه

ما هذا الذُل والهوان والجبروت من فئة المفروض تبقى مثال للالتزام والانضباط والعدل ؟

أنا اتمنى إن يكون فيه جهات محترمة داخل الجيش وداخل جهاز الشرطة تحارب مثل تلك الظواهر الشاذة .. وتعمل كرامة للناس الغلابة دي عاشن تخليهم يؤدوا خدمتهم بكرامة وراس مرفوعة عشان يبقى مواطن صالح مش ناقم على المجتمع ومن فيه

وحسبي الله ونعم الوكيل في كل من يستفيد من مركزة او سلطتة بهذا الشكل ويذل ناس ربنا اكرمهم وخلقهم أحرار

[ابو محمود]

دي ثقافة مجتمع يعنى هتلاقى واحد صاحب شركة عندة عربات كتير وعندة موظفين مش مهم قطاع عام او خاص المهم الفعل يؤمر يجاب تلاقى موظف او مستخدم عندة بيمسح ة العربية او اتنين واهو يوفر حق البنزيمة والغسيل ويبان قدام الخلق انة مشغل عندة خداميين يا عمنا الشعب كلة تربى على عقدة من انت او انت ماتعرفش انا مين هههههههههههههههههههههههههههههه واللي بيقدر على حاجة بيعملها انت جايب صور للشرطة وانا عندى مواقف وصور ذهنية للكثير من فظاعات الاهمال والتحكم فى النفس البشرية بسلطة المال والعوز

المفروض اننا نحاول نتخلص من كل الصور دى ليس بفضحهم بل بتغيير المفاهيم مش عيب تشتغل منادى فى موقف الشغل موش عيب مادام شريف المهم محدش يستغلك علشان انت فقير او بتشتغل زبال او بواب او مش متعلم كويس

ممكن تلاقى مثلآ ناس بتحكى على شقق تملكها وسط ناس مش لاقية تأكل وناس تتكلم عن وضع اجتماعى ومصتلحات وسط ناس بيسألو ربنا انهم يسترو المهم ما يكونش الكلام من اجل المنظرة ويكون محسبوب وبحساب المجتمع نشأ على عادات كثيرة سيئة وعلشان تتغير مش هينفع فى شهور او كام سنة علشان نطلع اجيال سوية لازم نتعب وندفع الثمن مين بقى اللي هيحاسب على المشاريب ؟؟؟؟؟؟

[Om Zayd]

التوصيف الوظيفي ..و الالتزام به

الرقابة الصارمة+

لا بد مما سبق حتى نقلل استغلال صاحب السلطة

و ايضا تملق المرءوسين (فيه معندوش مانع يبقى خدام لو ده هيديه بعض المزايا او سيعفيه من واجبات يراها أصعب)

[رضوي]

هي بس بتيجي على تنضيف العربيات ؟؟؟

لا كمان بيشتغلوا في البيوت خدامين كمان ........ ومش بس الشرطة كدة علشان نكون منصفين .......... ظباط الجيش بيعملوا اكتر من كدة ........ والنيابة والقضاء وكل واحد في ايده سلطة وتحت ايده ناس بيشتغلوا تحت مسمى قانوني بيحولها هو لتحت مسمى استغلالي ( الا من رحم ربي )

بس ملعش لازم اقف شوية

لما الظابط يستغل مجند او عسكري مثلاً ........ هقول اصل العسكري غلبان ومابيقدرش ينطق ولا يعترض .

لكن بقى لما نفس الموضوع يحصل مع امين الشرطة !!!!!!!!!!!!!!!!!!!!!!!!!!!

لا معلش بقي ....... دة يقدر يتكلم ويرفض ويقول لأ ..... دة يقدر كويس اوي ياخد حقه

فيه ناس كتير بتفتكر ان سلطته تتضمن اذلال الناس اللي حواليه ..... ودة بيديله بيريستيج اكبر طبعاً

وفيه ناس اتربت واتعلمت انه مايقدرش يذل مخلوق .... وان احترامه للي قدامه مهما كان وضعه ..... هو بالظبط من احترامه لذاته ولنفسه ..... وعلى الاساس دة تلاقيه بيحترم كل بني ادم ادمه ........ ومهما كبر هيفضل كدة

الموضوع كله ثقافة وبيئة .... مش بس رجال الشرطة اللي بيعملوا كدة والباقي ملايكة ......... ومش كل رجال الشرطة شياطين ومايعرفوش الرحمة