السيارات .. تكنولوجيا وصيانة ..

[محمد شلبى]

الف شكر يا باشا :P :) :P rs: rs:

بس مش عارف ليه العفشجى المتخلف مصر انى اجيبهم استيراد(زى الكبالن اللى باظت بعد شهر) بس طبعا انا مش هاسمع كلامه لانه من الواضح انه بياخد نسبة من الراجل اللى عاوزنى اشتى منه(باين عليا وقعت فى شلة حرامية rs: :D )

ملحوظة اخيرة

انا باكلم من بيتنا مش من السايبر h): rs:

[عصام]

الصنايعية كلهم .. بيعتقدوا إنهم بيخدموك لما يجيبولك حاجة رخيصة .. ودا للأسف بيحصل كتير جدا .. لأن معظم الناس بتفرح بكدا.. أو لأنهم مش عارفين هو المستعمل يفرق إيه عن الجديد ..

وبما إنه بيثق فى الصنايعى .. وفى نفس الوقت عايز يوفر .. بيجيب "استيراد"

لكن فى الواقع .. الواحد لازم يسأل نفسه الحاجة دى رخيصة ليه؟ h):

أنا آسف بخصوص موضوع الناس اللى فى السايبر .. rs:

أنا كنت أقصد إن الجماعة فى البيت بيندهوا عليك ويستعجلوك علشان المكالمات rs:

[محمد شلبى]

ايوه كده rs:

بس يكون فى علمك انا سى السيد فى البيت ولا حدش يقدر يقوللى بم h):

للاسف معظم الصنايعية حرامية وانا لا اثق فى اى حد منهم على الاطلاق

[blbl]

معلش يعني سؤال غبي حبتين حكم عليا الزمن اشتري سياره وغالبا موديل اول التسعينات يعني 1990 وحواليها ايه الموديلات الكويسه وايه اهم حاجه ادور عليها السعر مش هيفرق كتير بين المركات وبعضها معلش انا طول عمري مبحبش القياده واول مره هشتري عربيهه وطبعا مش محترف قيادهالكم سلامي

[عصام]

معلش يعني سؤال غبي حبتين حكم عليا الزمن اشتري سياره  وغالبا موديل اول التسعينات يعني 1990 وحواليها ايه الموديلات الكويسه وايه اهم حاجه ادور عليها السعر مش هيفرق كتير بين المركات وبعضها  معلش انا طول عمري مبحبش القياده واول مره هشتري عربيهه وطبعا مش محترف قيادهالكم سلامي

1990 وحواليها .. et:( والفلوس مش مشكلة

السؤال كدا عايم جدا يا عم .. :P

طيب إشمعنى يعنى 1990 وحواليها؟

وليه طالما السعر مش مشكلة (الله أكبر :D ) ما تشتريش حاجة جديدة؟

طيب عايز حاجة عائلية وللا صغيرة وسبور؟

بدِمعة وللا من غير؟ tot::

nosb:

إسو .. سمسار ومدرس جغرافيا

[blbl]

يعني اي عربيه موديل اول التسعينات سعرها حوالي 6 الاف جنيه يقل شويه يزيد شويه انت وشطارتك يعني كان لسه قدامي تويتا كرولا موديل 91 وعامله 200 الف كم سعرها كان 6000 ولما تحول المبلغ ده لعملة الدوله هنا تلاقيه ولا حاجه يعني الفروق مش كبيره

طبعا انا عايزهاللاسره وطبعاهخبطها كتير ده احتراف وبعدين اول مبشوف الاعلانات بتلبخ يعني مبعرفش ادور علي اه اول حاجه بنت المانيه نصحتني بالمازدا قلتلي عموما هي بتستحمل كويس

هه اديني سهلة الامتحان يا رب نجاوب

[محمد شلبى]

استاذ عصام

عربيتى اللامبورجينى ال128 jmb-) بتاكل بنزين كتير قوى قوى,الاقيش عندك حل ولا مالكش خبرة فى اللامبورجينى؟

[m_eissa]

باشمهندس ارجو المساعدةعندى عربية رينو 9 موديل 83 (1400 cc) اوتوماتيك وهى على فكرة عربيات كويسة (او كانت زى الصورة قبل ماتروح لعم نور) المهم

العربية دى كنا جايبنها على الزيرو وكانت شغالة تمام وزى الفل ومابتكلش بنزين ولا زيت و تقريبا مابتحتجش صيانة لحد ما حصل لها مشكلة جوان وش السلندر ضرب وانت عارف دى شغلانة منيلة

المهم قعدت ادور على ميكانيكى كويس والناس دلونى على الاسطى نورالله لا يسامحه الى فى صقر قريش ومن هنا بدات نهاية العربية على ايد عم نور و محمد بلية

بعد تغيير الجوان (و تم كشط الوش) لقيت العربية مدربكة ومابتسحبش رجعت تانى لعم نوروقالى الموتور تعبان ياستاذ ولازمله عمرة ودى هتتكلف 2000 ل 3000 جنيه وقال لى يفضل تشترى موتور استيراد على بعضه و لكن ده هايقرفك على بال م ترخصه و شغلانة معقدة المهم قال انا عندى موتور عربية رينو رينبو(1300 cc) ممتاز وهو نفس البلوكة الفرق الوحيد ان شاميزه قطرها الداخلى اصغر هو كان حصل له حريق صغير و ال كاربريتر بتاعه باظ (ساح منه جزء) و الراجل اشترى موتو تانى فانا هاغيرلك قلب المتور كله (الشمايز و البساتم و الكرنكووش السلندر ....) وهاناخد من عندك بس البلوكة القديمة الى عليها رقم الموتور بتاعك و الكاربراتير القديم و هاخد منك 800 جنيه بس تمن الحاجات دى غير الجوانات والمصنعيات الخ يعنى الموضوع كله هيقفلة 1200- 1500 جنيه و هيبقى موتور تمام وزى الجديد بالضبط.

المهم قلت ماشى مادام اسطى الرينو المتخصص بيقول كده و الناس بتقول انه كان شغال فى التوكيل يبقى اكيد كلامه تمام!!!!!!!!!!

المهم ياسيدى قعدت عنده العربية حوالى شهرين و اكتشفت انه مش عارف يدورها و لايص لوصة منيلة المهم لما دارت لقيته شايل فيوز لمبة اوتوماتيك الفتيس لانها نورت ومش عارف يطفيها هو و الكهربائى بتاعه و دمروا الضفيرة تدميرا(الله لا يوريك) المهم اخدت العربية تقريبا مابتمشيش (شغالة على التالت بس) ووصلت انى اخليها تمشى ظبطنا موضوع الكمبيوتر بتاع الفتيس ومشيت بس الكاربراتير القديم ماعرفش نيل فيه ايه بقت بتدخن دخنة سودا ولا محل عم احمد الكبابجى ومارديش يتظبط مع العلم دى مشكلة ماكانتش موجودة اساسا و اشتريت كاربراتير استيراد ب 400 ج لان الجديد بعيد عنك ب 2300 جنيه

النتيجة الاخيرة العربية مابتسحبش خالص - الكهربا شكلها مش مظبوطة و العربية مركونة من ساعتها مش محصلة موتوسيكل موديل 1940 مش عارف اعمل فيها ايه ومش لاقى حد يفيدنى لما ميكانيكى الرينو عمل فيها كده امال لو رحت لحد تانى هايحصل ايه دى حكايتى مع ال...

معلش طولت عليك قوى

- هل تعرف ميكانيكى فى مصر بيفهم فى الرينو او بيفهم اصلا

- ياترى الكاربراتير الاصلى ممكن الاقى حد يصلحة لانه بصراحة كان احسن مليون مرة من الى ركبته

- ياترى عندك اى اقتراح ربنا يخليك قلبى بيتقطع كل يوم وانا شايف العربية متلقحة فى الشارع

ضحية من ضحايا اسطى نور

تم تعديل 14 مايو 2006 بواسطة m_eissa

[kimookonoo]

السلاموا عليكو يا باشا انا عندى مشكلة طلعت عينى انا معايا عربية كيا شوما موديل 2000 اشتريتها السنة الى فاتت وكانت بتعمل فى صفيحة البنزين يعنى 20 لتر حوالى 190 كيلو الكلام دة ى وسط البلد السنة دى بتعمل فى التنك كلة يعنى حوالى 45 لتر حوالى 250 كيلو جوة البلد بردو غيرت فلتر الهوا وكشفت على الرشاشات بتاعت البنزين طلعت تمام وراجعت على سير الكتينة تمام المكنيكى وديتها البنزينة اشوف حرق الموتور قالولى مظبوط لاكن دة طبعا فى السلنسية لكن لما بكبس بنزين واكتم الشكمان بايدى بلائى ان البنزين خارج نى زى مبيقولو المكنيكى بتاعى بيقولى هنغير طرمبة البنزين ونديها وحدة اصغر على شان نقلل البنزين الى رايح للموتور ودة مش هيقصر فى حاجة وبيقول انة جربها فى هيونداى قبل كدة والمكانيكى بتاعى التانى بيقولى لاء دة كدة هيقصر على سحب العربية وهيكتفها معلش طولت عليك بس مش عارف اعمل اية متعرفش حل ولا حاجة جديدة افكر فيها وشكراااااااااااا يا بااااشا

[The Cavalier]

شكراً ليك أستاذ عصام على الموضوع الرائع ده وإفادة الناس

[سمير محمد]

ان اشتريت سيارة كيا سيفيا 1996 ماتور مسكر (دبل كم شفط) بعد اربع ايام اصبح يخرج دخان ابيض كثيف من عادم السيارة , حيث ان السيارة كانت في المنطقه الحره قبل 20 يوم من شراء السيارة من معرض سيارات ,وبعد خروج الدخان قمت بتغيير الزيت وفلتر الزيت والبواجي وكشاط التايم , حيث ان الميكانيكي قال ان هناك دخان ازرق خفيف يكاد لا يلاحظ يخرج من العادم ,وفي ذالك الوقت لم يكن يخرج الدخان الابيض , حيث قال ممكن ان يكون الكرنك وبحاجه الى عمل نصف افرهول ارجو الافادة وبشكل ضروري جداً عن المشكله والحلو

[عصام]

ان اشتريت سيارة كيا سيفيا 1996 ماتور مسكر (دبل كم شفط) بعد اربع ايام اصبح يخرج دخان ابيض كثيف من عادم السيارة , حيث ان السيارة كانت في المنطقه الحره قبل 20 يوم من شراء السيارة من معرض سيارات ,وبعد خروج الدخان قمت بتغيير الزيت وفلتر الزيت والبواجي وكشاط التايم , حيث ان الميكانيكي قال ان هناك دخان ازرق خفيف يكاد لا يلاحظ يخرج من العادم ,وفي ذالك الوقت لم يكن يخرج الدخان الابيض , حيث قال ممكن ان يكون الكرنك وبحاجه الى عمل نصف افرهول ارجو الافادة وبشكل ضروري جداً عن المشكله والحلو

الأخ الفاضل .. مرحبا بك فى محاورات المصريين ..

أطمع فى مزيد من التوضيح .. يعنى فى النهاية المشكلة لا تزال قائمة بعد تغيير الزيوت وخلافه؟

وهل معنى "نصف أوفر هول" هو نصف عَمرة (بالمصرى)؟

تحياتى

[Diab]

للمحافظة علي نظافة السيارة يفضل ان تكون فرشاة تنظيف العجلات حاجة وتكون قطعة تنظيف الزجاج غير قطعة تنظيف بودي السيالرة وان تكون قطع القماش نظيفة تماما

[سمير محمد]

نعم اخي ما زالت موجوده

نصف أفر هول هو نصف عَمرة

وشكراً

[عصام]

أخى العزيز

الدخان الأبيض فى أغلب الأحيان ينتج عن احتراق زيت المحرك والاحتراق قد يحدث لأحد سببين .. أحدهما هين وسهل علاجه والآخر صعب بعض الشيء ..

أما الهين فهو زيادة مستوى الزيت فى المحرك بشكل كبير عن المطلوب مما يتسب فى دخول بعضه إلى الكاربيوراتور (الكاربيراتير) أحيانا ومنه إلى غرف الاحتراق .. فيحترق مسببا ذلك الدخان الأبيض وعلاجه بسيط وهو ضبط مستوى الزيت ..

أما السبب الثانى فهو تأكل فى الشنابر .. وهو ما ينتج عنه أيضا تسرب الزيت إلى داخل المكابس (السلندرات) أو بمعنى أوضح دخول الزيت إلى عرف الاحتراق .. مما يجعله يتحد مع خليط الهواء والوقود فيحترق معهما ويخرج الدخان الأبيض الناتج عن الاحتراق مع العادم ..

فى تلك الحالة فأنت بالفعل تحتاج لنصف عمرة يتم فيها تغيير الشنابر وإعادة خرط الشمايز وقد تحتاج إلى تغيير السلندرات أيضا ..

تحياتى

[Brave hurt]

السلام عليكم ورحمة الله وبركاته

بداية أحب أشكر حضرتك شكراً جزيلاً لأن الموضوع مهم ويهم شريحة كبيرة من الناس أنا عندي سؤالين

بداية أنا كان عندي سيارة نيسان باثفيندر 2003 وكانت 3500 سي سي وكانت ماشية زي الفل لكن كان نفسي أوي في البرادو وفعلاً اشتريت برادو 2005 بس أربعة سلندر يعني 2700 سي سي وطبعاً حاسس بفرق بينها وبين الباثفيندر في السحب وثانياً عند وضع الجير على N في الإشارة يكون هناك رجفة بسيط وأيضاً عند تغيره من N إلى D يحصل نفس الرجفة بالإضافة إلى عندك الفتيس الخاص بالدفع الرباعي عند ضغط دواسة البنزين وتضع يدك على الفتيس بتحس باهتزاز أو زنة هل تعرف ما هو السبب . هل ممكن يكون عشان السيارة أربعة سلندر مثلاً أم هناك أسباب أخرى

وطبعاً لك كثير الشكر والامتنان

[عصام]

السلام عليكم ورحمة الله وبركاته

بداية أحب أشكر حضرتك شكراً جزيلاً لأن الموضوع مهم ويهم شريحة كبيرة من الناس أنا عندي سؤالين

بداية أنا كان عندي سيارة نيسان باثفيندر 2003 وكانت 3500 سي سي وكانت ماشية زي الفل لكن كان نفسي أوي في البرادو وفعلاً اشتريت برادو 2005 بس أربعة سلندر يعني 2700 سي سي وطبعاً حاسس بفرق بينها وبين الباثفيندر في السحب وثانياً عند وضع الجير على N في الإشارة يكون هناك رجفة بسيط وأيضاً عند تغيره من N إلى D يحصل نفس الرجفة بالإضافة إلى عندك الفتيس الخاص بالدفع الرباعي عند ضغط دواسة البنزين وتضع يدك على الفتيس بتحس باهتزاز أو زنة هل تعرف ما هو السبب . هل ممكن يكون عشان السيارة أربعة سلندر مثلاً أم هناك أسباب أخرى

وطبعاً لك كثير الشكر والامتنان

الأخ العزيز .. أشكرك على إطراءك

طبعا لا خلاف أن تشعر بالفارق الكبير الذى سببه اختلاف سعات المحركات .. لكن لدى سؤال قبل أن اجيبك وهو نوع الوقود المستخدم فى كلتا السيارتين .. من حيث كونه سولار أو بنزين

تحياتى

[Modest]

السلام عليكم ورحمة الله وبركاته

عند وضع الجير على N في الإشارة يكون هناك رجفة بسيط وأيضاً عند تغيره من N إلى D يحصل نفس الرجفة بالإضافة إلى عندك الفتيس الخاص بالدفع الرباعي عند ضغط دواسة البنزين وتضع يدك على الفتيس بتحس باهتزاز أو زنة هل تعرف ما هو السبب . هل ممكن يكون عشان السيارة أربعة سلندر مثلاً أم هناك أسباب أخرى

وطبعاً لك كثير الشكر والامتنان

بعد إذنك يا عصام هاخد العربية دي على الورشة عندي

الرجفة إذا كانت بسيطة لا تقلق خصوصاً إذا كانت بتحصل مرة آه و عشرة لأ .. ده كلام بتوع الصيانة عند عبد اللطيف جميل (وكيل تويوتا بالسعودية) بعد عرض المشكلة عليهم منذ فترة و كانت السيارة محل الشكوى 4 سلندر فتيس أوتوماتيك موديل 2005 .

و رجفة فتيس الدفع الرباعي عادية بتحس بيها لما تضع يدك على الفتيس حتى و البرادو على الزيرو.

موضوع السحب طبعاً تفرق كتير بين الأربعة سلندر و الستة سلندر لكن تذكّر دائماً إن الـ 4x4 للتحمل أكثر منها للتسارع.

[عصام]

الاسطى مودست هنا ؟

يا مرحب ... فارغة ماتور يابنى للراجل يقعد .. وابعت هات خمسينة

يبقى أن أضيف إن الرج والخشونة بتبقى أزيد شوية فى محركات السولار لدرجة إنها بتكون محسوسة بشكل كبير ودا فى كل محركات السولار بشكل عام .. دا إذا كانت العربية سولار طبعا

صباح جميل الساعة 4 العصر

[سمير محمد]

مشكور اخي على الاجابة

نسيت اضيف ان السيارة تشتغل على البخاخات

وايضاً الدخنه بتطلع بكثافه عند تحمية السيارة كل مرة عند عدم تشغيل السيارة لعدة ساعات مع رائحة كريهة

وشكراً

وهل للطقس الشتوي تاثير

تم تعديل 6 ديسمبر 2007 بواسطة سمير محمد