كنا رجالة ووقفنا وقفة رجالة!

[بنت شعنونة]

على فكره يا شانا انا مش با تكلم انهم بيعملوا حاجه بطاله لا سمح الله انا با تكلم انهم بيخرجوا و يتمشوا و يسوقوا العربيات و يشتروا ملابس و غيره و يشوفوا مسرحيات و سينما و مش قصدى حاجه تانيه

هما مش بيعملوا كدا في السعودية!! :blink:

[ابو يوسف]

كثيرا ما نتحدث عن عمل المرأة على اعتبار أنه مشاركة منها فى مجالات المجتمع و مساواةً بالرجال .. و اثباتاً للذات و كلاماً كبيراً من هذه النوعية ..

و لكن هناك الكثير من النساء و الفتيات يعملن من منطلق (اللى رماك على المر !!!! ) بمعنى أن ما دفعهن للعمل ليس أياً من الكلام الكبير و الشعارات الرنانة و القضايا الخلافية العظيمة بين موافق و معارض ...

ان ما دفعهن هو ببساطة ....

"الحاجة"

هناك الكثيرات يتمنين من قرارة أنفسهن أن يجدوا ابن الحلال لتصبح الفتاة زوجة و أم و يكون كل همها تربية الاطفال و تعليمهم .. و تجد من يتكفل بها مادياً ..

وتترحم من الصحيان بدرى و المواصلات ومعاناة التعامل مع اللى يسوى و اللى ......

ومن ترغب فى ذلك لا تبيع قضية بنى جنسها ...

لأنه ببساطة ليس هناك قضية !!!

القضية عندها هى مساعدة الأب المسكين فى أعباء الحياة .. من تعليم و جهاز و فرح و خلافه ...

[وليد صفوت]

الله يسلمك ياشانا

رغم اننا ناقشنا موضوع عمل المرأة مليون مرة في منتديات كتيرة ولم يحدث اي تغيير

بمعنى ان المقتنعة بجدوى عمل المرأة لم تجلس في البيت مباشرة بعد قرأة الموضوع ولا المقتنعة بعدم جدوى عمل المرأة هبت من بيتها وخرجت للعمل

فى هذة الحالة ...فأنا اقترح انكم تناقشوا السلبية و اثارها المدمرة فى حياة المرأة :blink: و ليس عمل المرأة !

[Lighthouse]

فى هذة الحالة ...فأنا اقترح انكم تناقشوا السلبية و اثارها المدمرة فى حياة المرأة  :huh:  و ليس عمل المرأة !

ياأستاذ Violinking

ماعلاقة السلبية بموضوعنا الحالي

انا قصدت ان المناقشات لم تغير من قناعات كل مقتنع وتحوله لقناعة غيره

هذا لاعلاقة له بالسلبية ولا الايجابية

وإذا كنا سنحول الموضوع للحديث عن سلبية النساء واثرها طيب اقترح عليك تكلمنا عن سلبية الرجال ونخلص من اثارها الاول وبعدين نشوف النساء

ولا ايه رأيك :blink:

[بنت شعنونة]

عقلي الباطن بيقولي

هوا ليييييييييييه محدش جاوب على الأسئلة اللي في اول مداخلة دي :huh:

استاذ ابو يوسف

انا معااااااااااااااااك قلبا وقالبا

و ها اخد نموذج مصغر

احنا 18 دكتورة

ال 18 بلا استثناااااااااااااااااء عاوزين يقعدوا في البيت بمجرد الزواج

وعملنا مش لحاجة مادية

انما اهو تضييع وقت... اكساب خبرة.. طريقة مشروعة للبحث عن عريس!!.. شوية فلوس نحوشها لو قدرنا.. استخسار لدراسة 7 سنين... واخيرا حبا في المهنة (ودي عند الاقلية)!!

اي حاجا من دول ممكن تكون السبب او كلهم مجتمعين

انما واحدا بتشتغل عشان عاوزة تشتغل؟

انا شخصيا لم اقابلها بعد

ممكن حد يعرفنا عليها؟ :blink:

[bentmasria]

"و ها اخد نموذج مصغر

احنا 18 دكتورة

ال 18 بلا استثناااااااااااااااااء عاوزين يقعدوا في البيت بمجرد الزواج

وعملنا مش لحاجة مادية

انما اهو تضييع وقت... اكساب خبرة.. طريقة مشروعة للبحث عن عريس!!.. شوية فلوس نحوشها لو قدرنا.. استخسار لدراسة 7 سنين... واخيرا حبا في المهنة (ودي عند الاقلية)!!

اي حاجا من دول ممكن تكون السبب او كلهم مجتمعين

انما واحدا بتشتغل عشان عاوزة تشتغل؟

انا شخصيا لم اقابلها بعد"

طبعا صعب تقابليها يا شانا

اولا كل سنة وانتى طيبة

ثانيا

انتم 18 دكتورة وشغلكم موش لحاجة مادية

هناك 180.000 دكتورة يلزمهم دخلهم يمكن موش للاكل والشرب ولكن لتحسين مستوى اسرتهم المعيشى ملابس افضل للاولاد تعليم مميز الخ وغيرهم ممن يجاورون حد الفقر بس ربك ستار

شانا قصة زميلتك فيها تنويه

بلاش تشتغلوا بعيد عن بيوتكم اوى كده ربما

لكن لااااااااااااا للعمل لا نستطيع

قبل سنوات كنت السيدة التى تبحثين عنها اعمل لانى اعشق ما اعمل فيه ومجال دراستى راااااااائع وتميزت فيه سابقا والحمد لله لذا لم انقطع عن عملى الا يوم علمت انى حامل ولمدة 14 عاما متواصلة هناك من يحب عمله ومجاله ويحترم تواجده ويحقق ذاته من خلاله بلا ابتذال او استرجال

وكليو انت وانا وغيرنا من يختار ان يلعب الدورين لا احد يفرض هذا علينا الا اذاااااااااااااااااا

بعد الشر عليكم انا ترملت وصرت مسئولة بشكل كامل عن طفلى وغيرى الكثيرات من الامهات فى شتى بقاع الارض ومنهن الكثير من المتزمات المتدينات لم ينقص هذا من تدينهم او احترامهم بالعكس نلن تقدير المجتمع كله

شانا بصراحة شكلك كسلانة وعاوزة تتجوزى وتقعدى ف البيت بس احذرك بعد كم سنة جواز ستتلاشى فى كينونة كبرى

ولن تجدى شانا ابدااااااااااااااااااااا كما احببتها

ام محمد

ممكن حد يعرفنا عليها؟

[Farida]

يا شانا بقه انا أقولك ايام الرسول عليه الصلاة و السلام و ايام سيدنا عمر تقومى تقولى لى ادخلى على الsite الفلانى .....فيه ايه لو الأصل تفسه مش مقتنعين بيه يبقى مالوش لازمه الكلام ؟

ايام الرسول كانت النساء تذهب للصلاة خلف رسول الله و تحضر الدروس و

كانت تصحح للخلفاء انفسهم كما قالت المرأه لعمر و كانت تعمل فى مجتمع اسلامى قوى كل فرد فيه عليه واجبات و كانت تبايع رسول الله كل ده اسمه اختلاط و لكن بضوابط و شروط ....لكن اللى بيحصل لما واحده تشتغل فى مكان او تخرج هى و زميل و يروحو كوفى شوب او يوصلها بعربيته مثلا او يقعدوا يحكوا فى مواضيع حساسه و شخصيه ده ما أسموش اختلاط ده اسمه حاجه تانيه ....

عموما جايز تكون مرسى مطروح مكان بعيد فعلا عن بيتك و انت لا تأمنى على نفسك هناك و ضميرك مؤنبك كده فبلاش تروحى بس انصحك تصارحى نفسك بدل ما تبررى عدم رغبتك فى الذهاب هناك بتبرير دينى و انك كده بتغضبى ربنا قوليها صريحه وواضحه انك مش حابه شغلتك دى و خلاص

و أخيرا و للمرة الخمستلاف مش كل امرأه زى التانيه و بلاش تعميم و مش كل امرأه متزوجه و مش كل متزوجه عندها

اولاد و مش كل واحده عندها اولاد يبقوا محتاجينها ليل و نهار جنبهم ....ما حدش قال واحده ترمى عيالها الصغار و تشتغل فيه ستات كتير قاعدين فى البيت و مش مربيين عيالهم كويس

بس كل شويه نقول عايزين نبقى زى الدول المتقدمه عايزين نبقى و نبقى

...لو فعلا كده يبقى لازم نستغل امكانيات كل فرد فينا رجل او امرأه و كل واحد سيؤجر على عمله

بلاش علشان نريح نفسنا وننام أكتر و نتنبل اكتر من كده نفضل نبغبغ بلاش الستات تشتغل الستات ما تخلقتش للشغل الستات جنس ناعم حرام يبهدل نفسه و كأن لما واحده بيموت عائلها او بيمرض او بيسيبها خالص بتلاقى اللى بيجيبلها المم لحد عندها و يطبطب عليها لله فى لله من غير بهدله و ساعتها مش بتبقى راجل واحد بتبقى عشرة.....و كأن اللى بتشتغل انتفت عنها صفه الأنوثه او زوجها ما عندوش دم اللى سايبها تتبهدل

الأنوثه دى فى البيت مع الزوج لكن بره البيت لو هى مؤهله فعليها واجبات ولازم تساعد من حولها بنية خالصه لله انها بتعمل حاجه مهمه او بتساعد اسرتها او مجتمعها النيه مهمه قوى ...الأسلام عايزنا أقوياء ...

وبعدين ما تعريف الرجوله لو هى القدرة على تحمل المسئوليه و مواجهة المشاكل و محاوله حلها و عدم التخلى عن واجبات الفرد و معرفه هدفه فى الحياة يبقى ستات كتير اعرفهم يبقوا رجاله بقى و العكس بالعكس رجاله كتييييير اعرفها تبقى ستات ...

تم تعديل 21 أكتوبر 2004 بواسطة Farida

[فــيــروز]

يا شانا

المقدمات الخطا تقود الى نهايات خطا

وفى هذه الحاله المقدمات الخطا هى افتراض ان ما يحدث لزميلتك يحدث لانها طبيبه .. انثى !!

وافتراض انه لو لم تكن طبيبه وكان طبيبا هو من يتعرض لهذا الموقف كان الوضع اختلف

وهذا افتراض لا دليل على صحته

ولو لم يكن الهدف من القصه التى ذكرتيها هو التدليل على صحة هذه الافتراضات يبقى السؤال المتبقى لدىّ هو : ما الهدف من طرحها اصلا اذا لم يكن التدليل على صحة الافتراض !!

المشكله الحقيقيه فى رايى -وارجو الاتغضبى منه- انت شخصتيها فى مداخلات تاليه

وهى فى ان هناك طبيبات لا يحببن مهنتهن ولم يحببن دراستهن !! والاسباب التى دفعتهن للالتحاق بعمل لا يحببنه معروفه ..

على راسها اغراء المركز الاجتماعى للطبيب .. خاصة ان من يلتحق بكلية الطب لا يستطيع ان يقول مكتب التنسيق اختار لى وانما فى الغالب هو -او هى- اختار لنفسه.. واعتقد ان هذا كان من اسباب شعورك بالضيق مؤخرا و تفكيرك فى الالتحاق بمهنه اخرى ودراسه جديده تختاريها بنفسك بعيدا عن ضغوط الاهل و المجتمع .. الانسان الذى لا يحب عمله فى الغالب يتحين اى فرصه للخلاص منه .. رجلا كان او امراه .. وليس بمستبعد ان تجدى اطباء ذكور لديهم نفس شعور زميلاتك الطبيبات تجاه المهنه لانهم لم يلتحقوا بها عن حب و رغبه صادقه ..

لهذا ربما بالفعل قد لا تصادفى كثيرين يحبون مهنتهم لان كثيرين -رجالا و نساء- لم يلتحقوا بها باختيارهم الكامل ولم يختبروا حبهم الحقيقى لهذه المهنه وتلك الدراسه

مع تمنياتى لكن جميعا بمستقبل مشرق و سعيد و رمضان كريم :blink:

[بنت شعنونة]

مش عارفا ليه الموضوع يلف يلف ويرجع تاااااااني ويتكلموا عن شغلي! ;)

ما انا لو عاوزة اكتب موضوع عن اني قرفانا من شغلي اكيد مش ها الف وادور عشان اقول كدا!! خاصة واني اكتر واااااحدا صريحة مع نفسها في الكوارث دي ;)

انا موضوعي او هدفي من الموضوع هوا الكام سؤال اللي كتبتهم في اخر اول مداخلة

"هل كنا صح والا غلط لما طلعنا اشتغلنا؟

تفتكروا شكل الحياة ها يبقى ايه لو الست اشتغلت في مصر زي الست في السعودية؟

مدرسة بنات او دكتورة بنات وبسسسسسسسسسس!!!!

تفتكروا كاااااااااام وظيفة ها تفضى؟

تفتكروا الحياة ها تبقى اهدى؟

"

على راسها اغراء المركز الاجتماعى للطبيب .. خاصة ان من يلتحق بكلية الطب لا يستطيع ان يقول مكتب التنسيق اختار لى وانما فى الغالب هو -او هى- اختار لنفسه

دا ايه الحقد الطبقي داااااااااااااا :)

يا محممممممممممددددد

هات البخور وعين الغزااااااااال يا وللللللدددددد

وبخر الريشششششششششة :D

حييييييييييييييييييييييييي :huh:

طب نرجع للأسئلة تاني

ايام الرسول " وراااااكم وراااااااكم برضه :D "

هل المرأة كانت تعمل من 8 الصبح لحد 8 بالليل مثلا؟

والا لحد الساعا 2 الضهر

والا نص يوم والا ازااااااي يعني

طبعا ها يبان سؤال عبيط

انما انا قصدي منه توضيح كيفية وكينونة "كلام كبير" عمل المرأة اللي شايفا الكل بيقول انها اشتغلت ايام الرسول

طب حد يوردلي اشتغلت ازاي

يمكن نستفيد :blink:

[amir]

انا موضوعي او هدفي من الموضوع هوا الكام سؤال اللي كتبتهم في اخر اول مداخلة

"هل كنا صح والا غلط لما طلعنا اشتغلنا؟

تفتكروا شكل الحياة ها يبقى ايه لو الست اشتغلت في مصر زي الست في السعودية؟

مدرسة بنات او دكتورة بنات وبسسسسسسسسسس!!!!

تفتكروا كاااااااااام وظيفة ها تفضى؟

تفتكروا الحياة ها تبقى اهدى؟

"

يا ست الكل

اولا خلينا نتفق على أن عمل المرأه ليس محرم شرعا ... أتفقنا ؟

اذا كنا متفقين يبقى نقدر نوصل لثانيا

ُثانيا :

اذا كان العمل فى حد ذاته غير محرم يبقى من حق المرأه أن تقرر اذا كانت تحتاج للعمل ام لا ... و كل واحده لها ظروفها الخاصه

ثالثا :

اذا كانت المرأه تحتاج للعمل لظروفها الخاصه يبقى من حقها أن تختار العمل الذى يناسبها ... و هذه ايضا تختلف من واحده للتانيه

اما أن نلزم كل سيده بأن تعمل فقط فى مجال التدريس أو الطب الخاص بالنساء , فأعتقد أن ده حجر على المرأه لأن هناك من ترغب ( و تقدر ) على العمل كمهندسه و منهم من تجد القدره و الرغبه فى العمل تحت اقسى الظروف و التحديات .

اما سؤالك عن عدد الوظائف التى يمكن توفيرها للرجل اذا لم تعمل المرأه فطبعا الاجابه انها ستكون بالملايين و لكن السؤال هو ... و ماذا عن المرأه التى لا يوجد لديها رجل ليتحمل عنها المسئوليه ؟؟ ... بنت وحيده بعد وفاة والدها أو ارمله لديها اطفال و تحتاج لتربيتهم بشرف

لا تقولى لى أن رجال العائله يجب أن يتكفلوا بمثل تلك الحالات لأن الواقع أنه لا احد يتحمل احد لمده طويله , و توجد سيدات يرفضون أن يتكفل غريب باولادها و يتحكم فيها و فى طريقه معيشتها

الحياه مش ورديه أو مثاليه كما يتوقعها البعض

كلنا بتقابلنا مشاكل فى شغلنا واذا فكرنا بالانسحاب يبقى الحياه مش حتتقدم خطوه للامام

[ابو يوسف]

استاذ ابو يوسف

انا معااااااااااااااااك قلبا وقالبا

و ها اخد نموذج مصغر

احنا 18 دكتورة

ال 18 بلا استثناااااااااااااااااء عاوزين يقعدوا في البيت بمجرد الزواج

صراحتك تحسدين عليها !!

و لكن فى مجتمعنا يصعب على الفتاة الاعتراف بذلك بسهولة ..

هى لا تستطيع أن تقول أنا أعمل لأساعد والدى (و هذا شرف لها وهدف نبيل تحترم عليه ) و لا تستطيع أن تقول أنها تعمل لتبحث عن عريس هرباً من جواز الصالونات و هرباً من ترشيحات الاهل ..

و لكنهن يقفن قائلات :

أنا أعمل ..... اذن أنا موجودة !!

أنا أعمل .... اذن أنا أساوى الرجل ..

عفواً ...

فى ظروفنا تلك أشك ..

لأن الرجالة أصلاً مش لاقية شغل !!

[فــيــروز]

على راسها اغراء المركز الاجتماعى للطبيب .. خاصة ان من يلتحق بكلية الطب لا يستطيع ان يقول مكتب التنسيق اختار لى وانما فى الغالب هو -او هى- اختار لنفسه

دا ايه الحقد الطبقي داااااااااااااا ;)

يا محممممممممممددددد

هات البخور وعين الغزااااااااال يا وللللللدددددد

وبخر الريشششششششششة ;)

حييييييييييييييييييييييييي :angry:

لا والله مش حقد طبقى :angry: بل يمكن ان تقولى هو شعور بالحزن ان فتيات على درجه كبيره من العلم يكون هذا هو شعورهن بعد كل هذه السنين فى الدراسه و تعب القلب .. يعنى احساس المرء انه انفق من عمره سبع سنوات على دراسه لا يحبها ويقضى سنوات اخرى فى عمل لا يحبه احساس لا يستثير اى حقد الحقيقه :)

انا فهمت انك لا تحبى عملك من كلامك فى اكتر من موضوع .. وهو انك لا تحبى عملك كطبيبه واسرتك ترفض تركك للعمل .. وبالتالى المشكله الحقيقيه ليست مرتبطه بعمل المراه او جلوسها فى المنزل وانما هى مرتبطه فقط بان يعمل الانسان فى المهنه التى يحبها والتى اختارها لانها تشبع هواياته و ميوله وليس لانها مرموقه اجتماعيا .. وطبعا كلامى ليس فقط عن حالتك الشخصيه بل هو محاوله لفهم لماذا لا تحب 18 طبيبه مهنتها !!

بلغة الاطباء التى لا افقه فيها شئ طبعا ;) الاهم هو تشخيص اسباب الداء صح قبل البدء فى البحث عن علاج

[G.G]

انما واحدا بتشتغل عشان عاوزة تشتغل؟

انا شخصيا لم اقابلها بعد

ممكن حد يعرفنا عليها؟

هناك كثيرات يشتغلن من أجل العمل فقط ..ليس في بالهن مناطحة الرجال أو تكنيز مال أو حب ظهور أو حتى مسترجلات ..و انما الموضوع كله إن في كثير من الأحيان يرتقي العمل ليقوم بدور مماثل لدورالهواية للحياة النفسية : إحداث نوع من أنواع التوازن النفسي اللازم لمواجهة باقي مطلبات الحياة من اسرة و زوج ..

"هل كنا صح والا غلط لما طلعنا اشتغلنا؟

تفتكروا شكل الحياة ها يبقى ايه لو الست اشتغلت في مصر زي الست في السعودية؟

مدرسة بنات او دكتورة بنات وبسسسسسسسسسس!!!!

لو بنتكلم عن النساء "القوارير" على الإطلاق..يبقى حتى المنطق ده خطأ ..

- لأن مدرسة البنات تقضي طوال يومها في النرفزة و الزعيق للتلاميذ ..و عادة ما تكتسب هذه الصفة في التعامل مع الزوج بعد الظهر.. و قد تسئ معاملة تلميذة بغير قصد فينتظرها أبوها على باب بيتها ليقتص منها كما فيحال صديقتك..و لن ينفعها هنا أنها ارتضت عمل مدرسة أطفال لتبعد عن المشاكل..

- أما دكتورة النساء ,,فطبيبة النساء تحتاج لقوة عضلية و نفسية إلا حد ما ..ربما طبيبة التحاليل تكون اليق للمرأة كقارورة...

خلاصة قولي ..ان الموضوع ليس نوع عمل تنتهجه المرأة للحفاظ على "نوعها"..لأن المشاكل موجودة في أي عمل.و انما الفيصل هو تطور المجتمع من حيث نظرة الرجل للمرأة ,,فالرجل الذي يعتبر المرأة "ملك خالص" له اينما تكون ..سيسيئ اليها لو طبيبة في وحدة في مرسى مطروح, لو مدرسة لإبنته في ابتدائى..لو طبيبة لزوجته ..أو لو حتى ست بيت و قادها حظها العثر في الخروج من بيتها لحالة طارئة ..

[بنت شعنونة]

عفواً ...

فى ظروفنا تلك أشك ..

لأن الرجالة أصلاً مش لاقية شغل !!

:angry: :angry:

[فــيــروز]

..ربما طبيبة التحاليل تكون اليق للمرأة  كقارورة...

:angry: :angry: :)

هايله ;)

[الباشمهندس ياسر]

أنا فاهمة شعنونة وحاسة بيها...

شعنونة...

المجتمع كله....

أنا تعبت...

مشكلتنا إن احنا بنقنع نفسنا... وأهالينا بيقنعونا والمجتمع كله بيقنعنا إن دى شطارة و جدعنة و استقلالية واعتماد على النفس بدل الحوجة لسؤال اللئيم.. إن البنت تكون راجل.. جدعة.. تشيل همهاو هم أهلها...

لكن...

إحنا.. و أهالينا و المجتمع كله نسينا إن "كل ميسر لما خلق له"...

وإحنا ماتخلقناش رجال...

اتخلقنا ستات...

قوارير...

ربنا لما حب يكرمن و يرحمن قال "الرجال قوامون على النساء بما فضل الله بعضهم على بعض... و بما أنفقوا من أموالهم"

إحنا وأهالينا والمجتمع خرجنا عن قانون ربنا... فلازم نذوق وبال أمرنا...

لكن عشان نخرج من دائرة جلد الذات..

تعالوا نسأل.. إيه اللى يشيلنا الهم؟؟ إيه اللى يخلينا نعمل كدة؟؟؟

نرجع تااااااااااااااانى لموضوع أزمة الرجولة بتاع غريب فى الظلمات و موضوع الرجل الحقيقى واحنا نعرف السبب... فاكرين القصة بتاعت امرأة على شفا الانهيار العصبى؟؟ القصة دى مش تأليفى... دى مشاهدتى لبيوت ناس كتير من أصحابى و معارفى...

أيوة.... إحنا مش رجالة... وتعبنا بجد من لعب الدورين... يعنى الواحدة مننا بنى أدم بلاس... اتنين فى واحد...

لا يكلف الله نفسا إلا وسعها...

معلش أفكار كتير متناثرة مش مرتبة...

اعتبروها هذيان...

mfb:

ليست بالهذيان ..بل هي الحقيقة

أتذكر اني قراءت للدكتور مصطفي محمود رحمه الله مقالا يتحدث عن هذه الاشكالية

و اوضح رحمه الله ان المجتمع الحديث يستغ المرأة أبشع استغلال

[hanzalah]

انا فعلا في حيرة من أمري

الاستاذة كليوباترا والاستاذة شعنونه من أفضل من تقرأ لهم في هذا المنتدى الجميل

وكان هذا ارأيهم بلا رتوش في العام 2004

مالذي حدث في مجتمعنا خلال تلك السنوات القليلة

وهل هذا الاتجاه بين نساء مصر في ازدياد او انحدار

هل يوجد اليوم من يقف ويقول اني امرأة واريد ان اعيش ارمرأة فقط

هل لو عرضنا وجهة النظر الصريحة الحرة تلك على أمثال مشيرة خطاب وشلتها وامثال نوال السعداوي وحزبها راح يحصل ايه

هل سنسمع منهم قائمة الاتهامات الجاهزة بالرجعية وخلافه ..

بصراحة شديدة

الفاضلة شعنونه

الفاضلة كليوباترا

ازداد احترامي لكما

[Mr MAGED]

انا من المؤيدين جدا لعمل المرأة .... وشايف انها فعلا تفوقت في مجالات كتيرة

ومعني كلمة تفوقت هنا مش باقصد بيها انها تفوقت علي الرجل ..

ولكن أقصد انها فعلا بتأدي عملها بكفاءة ... ومش لازم يعني لما الست تتفوق

يكون معناها ان الراجل أصبح فاشل والعكس .. لأن دي بتكون مقارنة متخلفة

أنا عن نفسي لو باعمل مقابلة والوظيفة متقدملها راجل وست هاختار الأصلح والأكفأ

بغض النظر عن جنسه ... وفيه مجالات مهمة جدا فعلا الستات عملوا فيها نجاحات كبيرة

زي المبيعات والتسويق والديكور ... بالاضافة طبعا للتدريس والطب

واللي عملته الطبيبة هو الصح .. وكان هيعمله غيرها أي حد غيور شريف عنده ضمير

ولازم تقدم شكوي ضد الرجل انه بيتحرش بيها وبيهددها والشرطة عليها حمايتها

يا ريت نبطل النظرات المتخلفة اللي جابتنا لورا ... لأن لو انت راجل فاشل

مش هايجيلك الشغل لحد البيت لأن الست سابت شغلها وعايزينك تحل محلها

علي كل شخص رجل أو امرأة أن يسعي ويجتهد ويثبت نفسه انه جدير بالعمل

ووقتها لازم يكون متأكد أن الله لا يضيع أجر من أحسن عملا

تحياتي

[لماضة مصرية جدا]

السلام عليكم و رحمة الله وبركاته

عجبني انا اسم التوبيك "كنا رجالة"

يعني في الزمن الماضي

مع اني بشوف ان فيه بيوت كتير دلوقتي عشان تفضل ماشية و مستقرة و محافظة علي الوجاهة الاجتماعية الست بتضطر فيها انها تلعب دورين.... الراجل و الست....و بحب ااكد انها بتضطر تعمل كده مش باختيارها

الست عمرها ما فكرت انها تسحب البساط من الراجل متعمدة بس هو الراجل اللي بيهرب من مسئوليته....و بيرمي الحمل علي طرف واحد مع ان القوفة ام ودنين لازم يشيلوها اتنين

و النتيجة ان الست بقت تشيل القوفة لوحدها.....و لان هي طبيعتها متقدرشي بقي فيه مشاكل

مش هتكلم عن المشاكل اللي ممكن تقابلها بره البيت

هتكلم عن مشاكل الكركبة الي بتحصل جواها هي شخصيا جوه الست نفسها

علي اد ما هي كانت راكبة حصان و عايزة تطير بيه عشان تحقق طموحاتها....بس خلاص بقت مش قادرة و في اول فرصة القوفة تقلت عليها....و لازم تنزل منها شوية و اول حاجة بتنزلها هي شغلها و طموحها

انا مؤمنة جدا ان كل واحد ليه دور و مينفعشي حد يلعب الدورين

بس ليه منفكرشي في شغل الست من ناحية تانية

غير الفريق اللي بيخنقني بتاع "حرية المرأة" اللي اخدوا و اهانوا المراة اكتر من انهم يدافعوا عنها.

انا بشوف نموذج غربي المرأة ممكن بتشتغل فيه بعض المهن المعينة من البيت بدءا من الترجمة ووصولا لحد التجارة الالكترونية

كمان بيبقي فيه بعض المهن اللي بتبقي بدوام عمل جزئي.....و دي الحقيقة انا بشجعها جدا او بحس انها تتناسب جدا مع ضرورة تواجد المراة في البيت اكتر من تواجدها في الشارع.....و كمان بتديها الخبرة اللي بتحتاجها

و دي وجهة نظري

تحياتي

[hOuSsAm]

السلام عليكم

الاول انا شايف ان الموضوع ليه شقين

الشق الاول اللى هو عمل المراة فانا شايف انه مش مشكلة (مش عيب ولا حرام) بل انه مفيد ولكن فى وجود ضوابط تحكمه ويكون عن احتياج بغض النظر عن نوع الاحتياج سواء مادى او معنوى او نفسى او فكرى او خبرات او اشغال وقت او اى حاجة فى الدنيا بس تكون النية خالصة لله لاعمار الارض واننا نكون خليفته فى الكون.

الشق التانى الا وهو ماهو البديل لعمل المراة يعنى هى فايدة الست ايه فى مجتمعنا لو هى مشتغلتش؟

انتوا نسيتوا يا جماعة ان المراة نص المجتمع وانها فى حالة ان تكون متزوجة عندها مسئولية انشاء جيل على تربية اسسلامية صحيحة ممزوجة بتحضر وفكر يقوى على الاضافة للمجتمع ويكون بقوة لأن يصبح اداة منتجة للمجتمع وليس مستهلكة

هو احنا مش حاسين اننا عندنا مشكلة فى مصر الا وهى الشكوى المستمرة من الاجيال الجديدة انها مش شايلة مسئولية وعندهم الكثير من السهوات غير طبعا الفتور الفكرى وضياع الاهداف والمبادئ.( مش ده تزامن مع خروج الكثير من السيدات وراء لقمة العيش مع انهيار الكثير من الاخلاق والمبادئ وده بسبب عدم المتابعة الكافية) طبعا دى مش قاعدة بس يمكن سبب.

طيب يا جماعة مش فيه فى مصر دلوقتى عمل تطوعى بيفيد البلد كلها وفعلا غير كتير وهتلاقى 70% من العمل التطوعى فى مصر اللى بيعلوه بناتنا واخوتنا

الخلاصة

هى تحديد الاولويات بمعنى لو عمل المراة بضوابط زى مقلوت فى الشق الاول ومش هيجى على بيتها خلاص يبقى كويس

وفى الاول والاخر نصلى الاستخارة ثم نستفتى قلوبنا

وبالتوفيق باذن الله