أخيراااااااااااا...نقلت لشقة تانية

[عبير يونس]

كل مرة أقول توبة اني أسكن في خروج الحج

وأرجع اتدبس فيه

ده كان استهلالا لابد منه

وخروج الحج لمن لا يعرفه

هو السكن في مباني فاخرة في منطقة العزيزية

ولكن لمدة عشرشهور فقط

و لازم نخلي السكن في آخر شهر شوال

و طبعا عشان ندور على سكن في الفترة دي في مكة

بتبقى دوخة ما بعدها دوخة

و تقريبا شبه مستحيل

و على آخرلحظة ننقل لشقة

ممكن نقعد فيها 6 شهور او سنة بالكتير

أكتر شقة عمرت فيها قعدت فيها اقل من 3 سنين

:sad:

كرهت نفسي من كتر النقل

النهاردة كان أصعب يوم في حياتي

كنا اتفقنا من اربعة ايام على شقة مؤقتة لحد بداية شهر محرم

و خلاص جهزنا نفسنا و دفعنا له الفلوس

و الراجل عارف اننا لازم ننقل الاربعاء بالليل

عشان لازم نسلم المفتاح الخميس الصبح

و رحت الشغل الاربعاء كالعادة و كنت عارفة ان المفروض يكون النقل شغال و انا في الشغل

و ان احنا حنروح نبات هناك

و تلقيت الخبر الصاعقة

الراجل قال ايه مش حيقدر ينقل دلوقت قدامه 10 أيام اصل مراته عاملة عملية و مفيش شغالة و فيلم كده :protest:

طيب ايه العمل؟؟

الراجل مدير فندق

قام قال لنا استضيفكم 4 أيام و انتوا تدفعوا الباقي

طبعا ازبهلينا

يعني ندفع عنده

و ندفع في الفندق!!!

:blink:

لا و المهم انه بيقول انتوا والله صعبانين عليا انكوا تدفعوا هنا و هناك!!!

يعني هي دي مش ظروفه هو ؟؟؟

احنا ليه نتحملها؟؟؟

طبعا لغينا الفكرة و خدنا فلوسنا

وطبعا من كبستي جيت البيت بعد المهاترات دي

و سبت كل حاجة تضرب تقلب و نمت لحد الصبح

بس كان مريح ان الحارس قال لنا سلموا المفتاح الجمعة

الصبح حوالي 9 كده

لقيت زوجي بيصحينا و بيقوللي قطعوا علينا المية

يا نهار

طب ليه كده ؟؟

ده احنا عفشنا مربط و حنمشي

لا و ايه

قالوا العصر حيقطعوا الكهرباء كمان

صراحة دي اول مرة تحصل معانا

طبعا هو نزل ع المكاتب و انا اشتغلت تيلفونات

و طبعا ما يجيبها الا حريمها

واحدة صاحبتي ربنا يكرمها يارب

في خلال ساعة دلتني على شقة

و اخدنا الشقة

و نقلنا

و اديني باكتب لكم اهو منها

اللي حصل ده معجزة بكل المقاييس

الهي ما أكرمك

دايما كارمني و ابدا ما خذلتني يارب

استراحة قصيرة

و لي عودة

عشان احكيلكم عن حمام الساونا لمدة 3 ساعات متواصل

:unsure:

[م تيمور المراغي]

حمد الله على السلامه يا عبير

بس يابنتي انتي نقلتي ازاي وانتي تعبانه كده :happy:

وحش الشاشه الشرقاوي :happy:

[عبير يونس]

ميرسي يا تيمور

و حاعمل ايه يافندم

لازم انقل

و بعدين ما انا بانزل الشغل عادي

ومديرتي بتقوللي اوعي تعيشي لي في الدور انك حامل بقى والأفلام دي

دي مش أول مرة يا حبيبتي

:blink:

قلتلها ما تخافيش

انا باشتغل لحد يوم الولادة

انا القعدة الكتير بتنرفزني أصلا

و بابقى عصبية

و واخدة بالي من كل كبيرة وصغيرة

و ده ليه و عشان ايه

و وضبوا اوضكم

شيلوا اللعب اللي في كل حتة

الشغل بيعمل لي توازن

وبيخلليني اوحشهم

و خصوصا سلافة تجري عليا و انا داخلة من الباب و تديني حتة حضن

اللي زيي لازم تفضل شغالة على طول

و ما تفصلش الا ع النوم

عشان بجد بابقى متعبة اوي

و مبعرفش اسكت و اطنش

و الدتي كانت كده

بس مكنتش بتشتغل

فكانت متعبة جدا جدا جدا

الله يرحمها كانت طاقة جبارة

عندها هوايات كتيييييييييييير

و بتهتم بينا

و باكلنا

و بلبسنا (كانت بيتفصل لي كل هدومي)

وكانت بترسم

وجبارة في كل فنون التطريزو الكروشيه و التريكو و الاوبيسون و الكانفاه و الايتامين

وطباخة بريمو تخصص عزومات جبارة

من اللي بواقيها تاكلنا أسبوع بعد العزومة

وكانت بتقرأ

و تسع الراديو

و تفلي الجرايد وتتناقش فيها مع بابا

متهيألي لوكان في منتديات على أيامها

كانت تبقى أنشط عضوة فيها

و كل ده وكانت قاعدة لنا بقى ع الواحدة

هههههههههههه

يااااااااااه

ايه كل الرغي ده؟

:blink:

مش معقول كده يا تيمور الرغي ده

:P

[أبو يمنى]

مبروك يا مدام عبير السكن الجديد .

ربنا يجعله مبارك عليكي وعلى العائلة .

زرت مرة صديق لي في يسكن بنظام خروج حج ، وهو فعلا سكن فاخر لكنّه قد يكون غير مريح من الجانب الذي ذكرتيه .

أغبطكم على قربكم من الحرم .

تحياتي .

:)

تم تعديل 29 سبتمبر 2011 بواسطة تامر حسن محمد

[م تيمور المراغي]

ربنا يحميكم جميعا ويكتب لكم كل فرحه و سعاده وسلام

[عبير يونس]

أشكرك يا باشمهندس

و ربنا يكتبلك القرب من الحرم

آمين

مكة نعمة حقيقية رغم أي شيء

و مهما كانت المصاعب فيها

بصراحة أعشقها و أعشق أهلها

و لا أشعر فيها بأي غربة

[رضوي]

حمداً لله علي سلامتك ياحبيبتي

والف مبروك الشقة الجديدة

[بركة]

ألف مبروك ياجميل

والله فرحت اوي ...

[عبير يونس]

ميرسي على دعواتك يا تيمور

و ميرسي يا رودي يا حبيبتي ربنا يكرمك يارب

احكيلكم بقى على حمام الساونا

احنا بنسكن دايم في شقق مكيفة

يعني تكييفاتها فيها

الشقة اللي خدناها مفيهاش مكيفات

طبعا نقلنا و زوجي قال حانزل اشتري مكيفات

وكنت فاكرة الموضوع بسيط يعني

ايه المشكلة كام ساعة من غير مكيف

و الا حتى بكره يعني الدنيا ما طارتش

:blush2:

طبعا مش قادرة اوصفلكم الحر الموجود

لدرجة البنات كانوا بيعيطوا من الحر

و العرق نازل انهار

كاننا في ساونا

من 6 مساء لحد 9 مساء

ياااااااااااااااااه

ايه ده

ده احنا داخلين على اكتوبر :blink:

يعني هو معروف ان مكة مفيهاش شتاء

اقصاها خريف

بس بجد الحر النهاردة برطوبة كده و ملعلع

الحمد لله

عدى

يا نهار ابيض

ده انا مكنتش خايفة من قطع الكهرباء الا عشان المكيفات

هههههههههههههههه

اللي يخاف من العفريت يطلع له

وش عادل امام و هو بيقول انا يطلع لي أسد

:)

[عبير يونس]

ألف مبروك ياجميل

والله فرحت اوي ...

الله يبارك فيكي يا قمر

ميرسي على رقة مشاعرك و تعاطفك

ربنا يكرمك و يجعل لك أوفر الحظ من اسمك

يا بركة انتي يا بركة

[باهى الطائر الحزين]

مبروك مدام / عبير

عتبة خير على الأسره الكريمه

( إن شاء الله }

[عبير يونس]

مبروك مدام / عبير

عتبة خير على الأسره الكريمه

( إن شاء الله }

ميرسي يا فندم

على ذوقك

[Om Zayd]

مبارك .. مبارك .. مبارك

(متقلقيش.. ما نقلتش مصطفى محمود

العربي بس بيصعب عليا نبهدله بسبب المخلوع

:closedeyes:

يا رب تكون خير و يرزقكم خيرها و يبعد عنكم شرها

فكرتيني لما نقلنا في انجلترا

و توتر ناس لسة واصلة و بتدور على بيت

اييييييييييييه

ايام و عشناها

المهم خلي بالك من نفسك

[abobakr]

الف مبروك يا مدام عبير

وربنا يجعل فيها البركة

[Alshiekh]

و اخدنا الشقة

و نقلنا

و اديني باكتب لكم اهو منها

اللي حصل ده معجزة بكل المقاييس

الهي ما أكرمك

دايما كارمني و ابدا ما خذلتني يارب

استراحة قصيرة

و لي عودة

عشان احكيلكم عن حمام الساونا لمدة 3 ساعات متواصل

:unsure:

الحمد لله أن أخيرا استريحتي

بس ياترى حتنقلي تاني بعد انهاء الحج؟

[عبير يونس]

مبارك .. مبارك .. مبارك

(متقلقيش.. ما نقلتش مصطفى محمود

العربي بس بيصعب عليا نبهدله بسبب المخلوع

:closedeyes:

يا رب تكون خير و يرزقكم خيرها و يبعد عنكم شرها

فكرتيني لما نقلنا في انجلترا

و توتر ناس لسة واصلة و بتدور على بيت

اييييييييييييه

ايام و عشناها

المهم خلي بالك من نفسك

كده برضه يا أم زيد

" تخلعي " قلبي بالكلمة دي

;)

عموما الله يبارك فيكي و في عمرك يا ست الكل

وياريت تكملي موضوعك بتاع أيام و عشناها

بليييييييييييييز

[عبير يونس]

أستاذ أبو بكر

الله يبارك فيك يارب

أستاذ محمد

الشقة دي الحمد لله ايجارسنوي

كوني انقل دي فالله أعلم

اما خروج الحج تاني على جثتي :protest:

[Salwa]

مليون مبروك ياعبير الخير ويارب تكون بداية سعيدة وخير لكل الأيام اللى جايا.

هى علقة لمدة فترة قليلة وبعدها ترتاحى ..

ربنا يبارك ف المكان واللى ساكنين فيه ويابختك ياعبير كفاية انك ف مكة .

انتى عايزة ايه تانى ؟

ده اكبر رضا .

عقبالنا احنا لما نروحها حتى زيارة قريب .

تيجى نعمل تبادل ف السكن؟؟؟ :clappingrose: :clappingrose: :clappingrose:

[عبير يونس]

مليون مبروك ياعبير الخير ويارب تكون بداية سعيدة وخير لكل الأيام اللى جايا.

هى علقة لمدة فترة قليلة وبعدها ترتاحى ..

ربنا يبارك ف المكان واللى ساكنين فيه ويابختك ياعبير كفاية انك ف مكة .

انتى عايزة ايه تانى ؟

ده اكبر رضا .

عقبالنا احنا لما نروحها حتى زيارة قريب .

تيجى نعمل تبادل ف السكن؟؟؟ :clappingrose: :clappingrose: :clappingrose:

ميرسي يا ماما سلوى ربنا يبارك في حضرتك

و بإذن الله ربنا يرزقك بالزيارة قريبا جدا عشان أشوف حضرتك

اما من جهة عرض تبادل السكن فهو عرض مغري الحقيقة

بس اوعى تكوني حضرتك ساكنة خروج حج :blink:

[Rock]

بمناسبة النقل من مكان لمكان كل حين و اخر :)

و شعور انك كل مرة بتنقلي ,كأنك بتمسحي ضحكاتك و دمعاتك من علي الحيطان و كأنك بتعبي ذكرياتك في كراتين..

http://www.youtube.com/watch?v=eil9Dw2flcE