كنت النهاردة في القسم

[abobakr]

النهاردة قلت بقى خلاص لازم اجاهد مش ينفع البطاقة ضايعة بقالها اربع شهور ومش طلعت غيرها افرضوا اتمسكت في كمين مش ليا حجة ساعتها ومش ينفع اروح اقول الظابط سب ليا الدين

المهم نرجع لموضوعنا رحت القسم عشان اعمل محضر فقد

لاقيت فيه سلبيات من غمز الأمين بخمساية من تحت لتحت و الطلب اشتريه من مكتبة تبعهم الورقة بشلن وبيبعها ب 3 جنيه

بس المعاملة يا جماعة غير

صحيح الحمد لله مدخلتش اقسام الا مرة او اتنين وكان لازم اعمل شوية مكالمات قبل ما اروح

بس النهاردة يا جماعة كانت كل المعاملة حضرتك واتفضل وفي الاخر شرفت ونورت

بجد الواحد لما يلاقي فيه ايجابية لازم يقولها ويشهد بيها

[ViralMind]

السلام عليكم...

بما انى رد سجون - احم احم.. فعلا المعاملة اتغيرت فى الاقسام بشكل كبير و ملحوظ.. و يا رب كده دايما.

بس مكانش لازم انك تعمل محضر ولا حاجة.. كنت تروح تطلع البطاقة على طول من العباسية او القسم اللى انتا تبعه..

انا طلعتها من العباسية لانه تقريبا المكان الوحيد اللى تقدر تعمل البطاقة فيه مستعجلة و تاخدها بعد 3 ايام.

[abobakr]

لالا لازم اعمل محضر عشان لما بتيجي تغير بيانات او تجددها بياخدوا منك البطاقة القديمة

[ViralMind]

هههههههههههه طيب ايه رأيك ان البطاقة القديمة لسه معايا :blink:

انتا بتمضى على اقرار انك هتسلمها لما تاخد الجديدة.. لكن لما بتقول لهم انها ضاعت, كله بيطلع عالسيستم و بيقرروا اذا كنت محتاج صورة و جديدة ولا لا.

المودام كانت البطاقة ضايعة منها و طلعناها من غير اى مشكلة.

[رضوي]

السلام عليكم ورحمة الله وبركاته

لأ حضرتك مش لازم محضر

لما بتعمل البطاقة الجديدة فيه كذا خانة فوق ......اختار منها حضرتك بدل فاقد , وبتكتب اقرار ان البطاقة القيمة فقدت , بيتتوقف البطاقة القديمة وبتصدر البطاقة الجديدة

من غير اي محاضر ولا غيره

وممكن كمان تغير البيانات في الجديدة عادي , حضرتك بتعلم علي الخانتين خانة بدل فاقد وخانة تغيير البيانات

ومافيش اي مشاكل

[Ahmed Anwer]

معاملتهم بقت أحسن فعلا

بس تحس أنه من ورا قلبه

آخر مرة كنت رايح أوصل أخويا المطار

و بقول للأمين الركن هنا مسموح ( و أنا شايفه بيكتب النمر اللي واقفه )

قالي ممنوع للأسف يا أفندم بابتسامة

و متنساش برده إن إحنا مصنفين ضمن (( أولاد الناس )) اللي يستاهلوا معاملة محترمة

كأن فيه ناس مش (( ولاد ناس ))

إن شاء الله تدوم المعاملة الممتازة و الأهم للجميع

[شرف الدين]

ايه رأيكم بقى إني رحت عملت تعديل بيانات من حوالي شهر

كنت بضيف اسم العائلة في البطاقة

وعملت البطاقة ومستعجلة ( ومكنتش من العباسية على فكرة ) ... وطلعت بعد يومين واخدتها .. ولا حد طلب مني البطاقة القديمة ولا مضوني على إقرارات ولا أي حاجة ...

لدرجة إن اديت البطاقة القديمة لأختي .. وقلت لها خليها معاكي لو احتجتيها .. في أي أوراق باسمي ولا حاجة

والبطاقتين طالعين بنفس الرقم ... والاتنين صلاحيتهم شغالة .. القديمة لسه فيها 6 سنين ..

[abobakr]

انا مكنتش اعرف انها مش لازم

بس كل واحد كان يقولي لالا مش هايعملوا ليك اي حاجة الا لما يستلموا البطاقة القديمة او محضر

[ViralMind]

هى البطاقة بتطلع بنفس الرقم فعلا و نفس البيانات و الصورة الا لو طلبت تعديلها او هما قرروا ان شكلك اتغير و محتاج صورة جديدة.

الفكرة فى نفس الرقم انه رقم قومى.. مش مرتبط بس بالبطاقة و لكن شهادة الميلاد و قسيمة الجواز و اعتقد التأمين الصحى و كل حاجة.

[شيدوان]

يخافوا ميختشوش...والسؤال الآن ..ياترى الى متى سوف يستمر خوفهم ؟ ..وهل لو توقفت المظاهرات والاعتصامات وحرق الاقسام و...الخ وعادت الحياه طبيعيه ، سوف يخلعون القناع وتعود لنا وجوهم الكئيبه الكريهه التى كنا نصادفها فى كل مكان نضطر الى مقابلتهم فيه ؟

[ابو محمود]

مبروك عليك البطاقة الجديدة فى عصر ما بعد مبارك اية رأيك مش بذمتك تحس وانت داخل القسم ان هناك جرأة من المصريين

انا بقى كنت بطلع صور من شهادة ميلاد ابنى محمود الصغير علشان الاعدادية رآيت فى القسم ناس بتصرخ فى وش الموظفين آومت ضحكت ضحكة سمعت كل من حولى وقلت لهم دة نتاج الثورة شعب بيكرة ان يكون لة فرصة استمرار تعامل الموظفين لة باحترام لان مهما حدث ستنتهى كسرة النفس لدى الشرطة وموظفينها من كثرة ان الناس تدايقهم لية ما بنستخدمش العقل وبنعامل بعض باحترام حتى يستمر التغيير الى الابد دةبقى انا بعتبرة نمردة

[hOuSsAm]

هههههههههههه طيب ايه رأيك ان البطاقة القديمة لسه معايا :blink:

انتا بتمضى على اقرار انك هتسلمها لما تاخد الجديدة.. لكن لما بتقول لهم انها ضاعت, كله بيطلع عالسيستم و بيقرروا اذا كنت محتاج صورة و جديدة ولا لا.

المودام كانت البطاقة ضايعة منها و طلعناها من غير اى مشكلة.

انا اعرف ان فيه قانون بيعاقب اللى بيمشى ببطاقيتين بخمس سنين (ياريت تاخدوا بالكوا او تتاكدوا)

------------------

سؤال بما بما انكوا خبرة بالبطاقات

كان مكتوب فى البطاقة القديمة حاصل على بكالريوس تجارة وكان شكلها شيك ولذيذ

غيرتها بقت مكتوب فيها مهنتى وبالخارج لحد مبقى شكلها يخنقنى

يمفع ارجعها تانى تبقى بكالريوس تجارة وارجعها لشياكتها واناقتها :closedeyes:

[ابو محمود]

هههههههههههه طيب ايه رأيك ان البطاقة القديمة لسه معايا :blink:

انتا بتمضى على اقرار انك هتسلمها لما تاخد الجديدة.. لكن لما بتقول لهم انها ضاعت, كله بيطلع عالسيستم و بيقرروا اذا كنت محتاج صورة و جديدة ولا لا.

المودام كانت البطاقة ضايعة منها و طلعناها من غير اى مشكلة.

انا اعرف ان فيه قانون بيعاقب اللى بيمشى ببطاقيتين بخمس سنين (ياريت تاخدوا بالكوا او تتاكدوا)

------------------

سؤال بما بما انكوا خبرة بالبطاقات

كان مكتوب فى البطاقة القديمة حاصل على بكالريوس تجارة وكان شكلها شيك ولذيذ

غيرتها بقت مكتوب فيها مهنتى وبالخارج لحد مبقى شكلها يخنقنى

يمفع ارجعها تانى تبقى بكالريوس تجارة وارجعها لشياكتها واناقتها :closedeyes:

هتدفع كام يا صديقى حسام وعايز اية كمان غير حاصل على