امرأة على شفا الانهيار العصبى

[butterflyspirit]

فكرت كيرا فى قصتك وخاصة فى عنوانها.... ارى انه انسب عنوان وانه معبر جدا ... و ان كنت ارى يا صديقتى العزيزة انها فعلا انهارت و تفككت و لكن ما زال عليها ان تواصل السعى و الهرولة و"الدهولة " فى نفس الطريق ...ربما هى لم تعد تعرف طريقا آخر ...او ربما ياتى يوما ترى فيه معنى لما يحدث من حولها

اسعدتينا و ادمعتى اعيننا

[Cleo]

اسعدتينا و ادمعتى اعيننا

ما عاش يا حياتى اللى يدمع عينيكى.... إنشالله أنا وإنتى لأ..... tth:

[Lancelot]

عجبتني أوي القصة بتاعتك يا كليو .... إسلوب جميل غير تقليدي ... و موضوع مؤثر رغم إنه بيعبر عن قصة كل يوم ... إلا إن اليوم ده هو وحدة بناء حياة كل إنسان ... و لو بصيت علي بطلة القصة هتلاقي إن حياتها كلها مبنية من اليوم ده ... و لو عايز تفسر سلوكها بعد كده لازم تنظر لليوم و أحداثه نظرة فاحصة علي إنه حدث مهم زي أي حدث مهم بيغير حياة الإنسان ...

الراجل ظلمتيه لو كان قصدك تعممي الصورة ديه علي كل الرجال ... لكنه مناسب أوي لأحداث القصة ...

إنتظرت لحظة الإنفجار ... و لاقيتها بعد تفكير ....

وبينما بدأ النوم يتسلل إلى عينيها، تسللت من عينيها دمعتين وصوت هتف فى أعماقها:

- آه يا زوجى العزيز.. كم أتمنى أن أراك رجلا..

برافو كليو ... :) rs:

[Cleo]

الراجل ظلمتيه لو كان قصدك تعممي الصورة ديه علي كل الرجال

مش قصدى أعمم طبعا يا لانس... بالعكس... فيه رجال كتير كويسين وفيه رجال مظلومين مع ستاتهم... إنما النموذج اللى فى القصة ده ابتدى ينتشر بشكل غريب ومقلق... يعنى أنا بشوفه فى حياة كتير من معارفى (وأعرف برضه ناس كويسين كتير :) )

برافو كليو

مووووش عايزة هتاف خاص.... rs:

عايزة هتاف عام.. rs:

rs:

[عوف]

بس اللى عايزة اضيفه ان الراجل هو كمان تعبان و الله و فى الظروف اللى احنا فيها الأتنين بقوا حالهم يصعب على الكافر هم الأتنين مظلومين ...ربنا على الظالم و المفترى و ابن الحرام

هذا المنطق الذي تتبناه للاسف بعض النساء هو الذي يشجع الكثير من الرجال على ان يصبحوا مثل بطل القصة

الرجولة لا تتجزأ

[Salwa]

روايتك لبعض احداث يوم فى حياة امرأة عاملة معبر بعض الشئ عن معاناة بعض النساء .....ولو انى اعتقد انك لو كتبتى باسهاب اكثر فسوف نجد احداث اكثر كثيرا من تلك ....

مسألة الرجل الطفل والرجل الرجل .....

انا اعتقد ان هذا يتحدد من يوم الميلاد ...وطريقة تنشئته....

حتى المثل عندنا يقول .( ده راجل من يومه ) ...بمعنى الرجولة بما فيها تحمل المسئولية والتصرف بشهامة والكرم و..و..و..الخ.

ايضا فعلا مسئولية الحياة المشتركة تقع على عاتق الزوج والزوجة ومفروض تقسيم الأعباء ..

انتى لم تحكى عن ذهابها لشراء مستلزمات بيتها ولا ذهابها لمدرسة ابنها ولا مصاحبتها له وهو يؤدى تمارينه الرياضية مثلا فى النادى .....ولا وهى بتخيط الشرابات الممزقة وهى قاعدة تتفرج على المسلسل الممل ..ولا وهى فى وقت فراغها ( بتعمل مربى ومخلل بيتى ) ...للتوفير وأصح طبعا.....لزوم السندوتشات واقتراب الشهر الفضيل ......ولا وهى بتشتغل بلوفر تريكو لزوجها او ابنها ...ولا وهى بتروح مع والدها او والده او ابنها للطبيب....والميزانية تتلخبط ....

واهم حاجة ........ولا وهى ماسكة آلة حاسبة وبتكلم نفسها حاتقضى الشهر ازاى ؟؟؟

معلش ياكليو ....سامحينى ......حطلع شوية برة قصتك ...

امس فى برنامج الظل الأحمر ...كانت سناء منصور مستضيفة واحد اسمه اللواء محمد فؤاد عمر .وهو مساعد وزير الداخلية السابق ...كان يتحدث عن الارهاب .والشباب .وقال بالحرف الواحد ....

ان الشباب عندما يدخلوا القصب ...(( انا مش فاهمة يعنى ايه ؟؟ بجد بجد مش فاهمة بس اعتقد هو قصده انهم ينخرطوا فى طريق الارهاب )) لأنه قال ....

من الاستحالة يخرجوا .......طيب حايخرجوا ليه ؟؟ وليه يرجعوا بيوتهم ...مش حايلاقوا لبس ولا اكل ولاحاجة ....

والله ياكليو هو قال كدة ..........

تخيلى لما مسئول .......سابق او لاحق.....مش مهم .

يعترف ان الشباب مش لاقية مأكل او ملبس ....!!!!

اذن........

هؤلاء الشباب لما يفتحوا بيوت ........بالكاد يعرفوا يعيشوا ...

وحتى ان فضلوا بجانب الحائط .وملهمش دعوة بالسياسة ولا الاقتصاد .......بالتأكيد محتاجين لحد ( يرموا المسئولية عليه )

ومين الحد ده ؟؟؟؟؟؟؟؟

واحدة ست عاوزة تتجوز وتتستر ....

وتيجى كليو هانم تصور ...بعض من معاناتها ......

فى انتظار الجزء الثانى ......

[Cleo]

ولله يا مدام سلوى وأنا بكتب... كنت عمالة أتخيل حياة بعض صديقاتى وزميلاتى فى العمل... وأكتب... وأتخيل .... وأكتب... وأفتكر حاجات كانوا بيحكوها.... وأكتب...

الصراحة وأنا بكتب .... حسيت إنى اتخنقت... ومش عارفة أتنفس... ونفسى أخلص القصة دى بأى شكل لأنى تعبت من اللى كنت حاساه و متخيلاه...

فعلا كان ناقص أكتب إن وهى راجعة من الشغل بالمواصلات ومعاها طفل صغير تعبان من اليوم الدراسى وشايل شنطة أثقل من وزنه مرتين، عدت تجيب طلبات البيت من خضار و خلافه...

بس ماقدرتش...

تعبت... واتخنقت...

مشكلة الراجل مش إنه مش لاقى ياكل... مشكلة الراجل فى تربيته منذ الصغر... ماتعودش عالمسئولية... عايز مراته تقوم بدور أمه... تأكله وتشربه وسهر على راحته من غير ما يكون لها أى حقوق أو التزامات عليه.. مع إن المفروض العكس... الراجل هو اللى المفروض يكون مسئول عن زوجته و يريحها عشان كدة ربنا إداله حق القوامة... ولو ماعملش كدة يبقى قوامته تسقط بحسب كلام الشيوخ.

كتير من الرجالة بتنفق مرتباتها على متهتها الشخصية (مصروف إيده يعنى) ولما تخلص يقول أصل المرتب ما بيكفيش ويطالبها هى إنها "تساعده" فى مصروف البيت..!!

ومع كدة يا ريته بيساعدها هو فى أى حاجة سواء ماديا أو معنويا..

بصراحة ربنا يكون فى عون الستات اللى عايشين كدة وربنا ما يكتب علينا نبقى زيهم.

[yasovinas]

القصة جميلة ويجد منها الكثير منهذه النماذج ولكن السؤال واوجهه لبنات حوا بداية

هل هذا الزوج السيء جدا لم تعرفيه قبل الزواج ؟؟؟

لا اظن فحسب الظروف الحاليه والاوضاع الاجتماعيه في بلدنا الحبيبة المنكوبة الخطوبة ومن بعدها كتب الكتاب وحتى نصل الى الزواج تستغرق على الاقل سنتين او ثلاثه واظنانها فترة كافيه جدا لتحديد ولو على الاقل معالم شخصية هذا الشريك المنتظر

معلش مجرد راي

اذا اخطات الاختيار فلا تلومن الا نفسك