المحافظ مش عاوز يدينى شقة مشروع مبارك اعمل ايه ؟؟؟

[بحار الغربة]

السلام عليكم

كل عام وانتم طيبين

انا كنت عاوز رأيكم ومشورتكم فى مشكلتى وهى باختصار انى قمت بحجز شقة فى مشروع مبارك للاسكان فى احد مراكز كفر الشيخ من 5 سنين

كان عدد الوحدات اللى مخطط انشائها 70 وحدة و مجلس المدينة كانوا بيدوروا على اى حد يشترك وماحدش كان عاوز

المهم انى كنت اول المشتركين

وبعد ما تم انشاء العمارات وارتفعت اسعار العقارات من سنتين اتغير محافظ كفر الشيخ وجالنا واحد اسمه احمد زكى عابدين ( اسأل الله تعالى ان يعامله بما يستحق )

المهم قال اللى يستحق هو اللى ياخد واللى ما يستحقش مالوش ويسحب فلوسه

ده بعد ما عدا 4 سنين على التقديم

انا قالى انت لا تستحق لانك بتسافر برا مصر

رفعت شكوى ضده ولكنه اقنع الناس انها تقدم فينا ( اللى مايستحقوش من وجهة نظره ) شكاوى علشان يبقى ماشى قانونى وطبعا الناس فى مصر ماقلكوش ماصدقوا وبعتوا فيا انا وبعد الشباب شكاوى وهو عملها حجة وقالك انا ماشى قانونى

المهم رحت له المكتب ودار بنا نقاش حاد وقالى مش هاديك الشقة طول ما انت بتسافر فطلعت له جواز السفر وقلت له احرقه وادينى الشقة قالى بردو مش هاتاخدها

المهم فى اخر الحوار قالى هانبقى نبنى 800 وحدة فى المستقبل ابقى خد فيهم

طبعا المستقبل ده كمان 20 سنة ان شاء الله

المهم بعد الثورة وكنت متعشم انه يغور فى ستين داهية للاسف لسه موجود

المهم هو سلم كل شقق العمارة ماعدا 8 شقق بتوع الناس اللى هو شايف انها لا تستحق ومش راضى يسلمها لحد

عاوز رأيكم مع العلم انه المحامى اللى رفع لى القضية ماعندوش ضمير وسمعت انهم ادوله شقة فى العمارات دى مقابل انه يموت القضية

طبعا هو استبعد حوالى 30 شخص من الناس اللى لا تستحق ودخل مكانهم 22 شخص وباقى 8 شقق مش عارف يتصرف فيهم لانه احنا كنا رافعين قضية وخايف يسلمهم لحد فيلبس القضية فقال اوقف حالهم وادينى مش خسران حاجة ...... محافظين نظام مبارك الله ينتقم منه ومنهم

هل فيه برنامج اتصل بيه يسمع شكوتى ؟؟؟؟

هل اروح اعمل شكوى تانية وانتظر دورها سنوات

افيدونى افادكم الله

تم تعديل 10 أغسطس 2011 بواسطة بحار الغربة