إعلان شخصى هام

[disappointed]

يعلن السيّد محبط المحبطاوى (بعظيم الأسى و الحسرة cbyb: ) عن تغيير اللوجو الخاص به من :

إلى :

ورغم إعتزاز السيّد محبط المحبطاوى الشديد باللوجو السابق , و رغم أنه كان يتمنّى الإحتفاظ به ( للدرجة التى جعلته يستخدمه فى جميع المنتديات الأخرى التى يشارك بها) , فإنه يجد نفسه مضطرا لتغييره نظرا لقيام زميل فاضل من الأعضاء الجدد بإستخدام هذا اللوجو الذى كان قد أصبح علامة مميّزة لشخص السيّد محبط , ولمّا كان السيّد محبط قد أرسل رسالة خاصة للزميل الفاضل المشار إليه أعلاه منذ عدّة أيّام بهذا الخصوص يستسمحه فيها بشأن اللوجو معربا له عن خجله من إضطراره لعرض هذا المطلب و راجيا منه ألاّ يعتبر ذلك سماجة أو قلّة ذوق و معبّرا عن أن الزميل الفاضل لو رفض فإنه سيتفهّم ذلك و لن يتمنى حينئذ سوى ألاّ يؤدّى طلبه المشار إليه إلى حساسيّة من الزميل الفاضل تجاهه, ونظراً لأن الزميل الفاضل قد قام بتطنيش السيّد محبط المحبطاوى تماما :lol: ولم يكلّف نفسه حتّى عناء الرد على الرسالة الخاصة (ولو حتى بالرفض) و كأن الرسالة و صاحبها ليسا سوى كم مهمل - رغم الأسلوب الودّى و الدافئ الذى إستخدمه السيّد محبط فى رسالته الخاصّة -, فإن السيّد محبط يعلن عن تغييره للّوجو الخاص به و هو يأسف لذلك :lol: بعد أن كان ذلك اللوجو قد أصبح علامة مميّزة لشخصه منذ أمد بعيد

و إذ يقوم السيّد محبط بتغيير اللوجو الخاص به بناءا على هذه الظروف و المعطيات , فإنه يعلن أنه لا علاقة له بتاتا بأى مداخلات تحت اللوجو السابق (كونها لا تخصّه) , و يهيب بالسادة الأعضاء التأكّد من شخصه و عدم الوقوع فى أى لبس قد ينجم عن الإعتقاد - خطئاً- بأن المداخلات التى تنشر تحت اللوجو القديم تخصّه

هذا و سيتم نشر هذا الإعلان فى جميع الجرائد الرسميّة خلال أسبوع من فقد السيّد محبط لهويّة اللوجو الذى كان معروفا به , وذلك لتجنّب أى مسائلات قضائيّة أو محاوراتيّة قد تنشأ عن إستخدام غيره للّوجو القديم

رحم الله اللوجو القديم , و أسكنه فسيح جنّاته , و ألهم صاحبه (القديم) الصبر و السلوان

وما نجيلكوش فى حاجه وحشة أبدا

:lol: :D

تم تعديل 5 أكتوبر 2004 بواسطة disappointed

[Katamando]

سؤال طرأ على بالي وأنا أقرأ إعلانك.............ز

هو حضرتك بتشتغل محامي؟؟؟

[فــيــروز]

نشاطركم الاحزان يا محبط

بس حاجه جانبيه كده .. اللوجوهات مستخدمه ببراعه مدهشه حلوه جدا :lol: :lol: :lol:

[disappointed]

سؤال طرأ على بالي وأنا أقرأ إعلانك.............ز

هو حضرتك بتشتغل محامي؟؟؟

آآآآآه..... جيتلى على الجرح :lol:

أنا دكتور.... بس كان نفسى و منى عينى أكون محامى ( يعنى المهنة دى بصراحة كانت أمل حياتى) , و لهذا أقرأ كثيرا فى القانون ( طب تصدّق بالله... و أنا بأعمل عقد شقّتى من حوالى 5 سنوات كان معايا المحامى بتاعى و صاحب الشقّة كان معاه المحامى بتاعه , و أنا اللى أخذت بالى من الــ wording الخاص بأحد الكلمات فى بند من بنود العقد إنها ممكن تُقرأ على أنها مبنيّة للمجهول... فغيّروها مع إنهم كانوا شايفين إنه من الصعب جدا حد يأخذ باله أساسا من حاجه زى كده)

ما علينا....

حتسألنى : طب ما دام بتحب المحاماة قوى كده مادخلتش كلّية الحقوق ليه؟؟؟

حأقول لك فيه إجابتين

إجابة بأرد بيها على السؤال من باب المداعبة لمّا حد بيسألنى السؤال ده ... وهى : مجموعى هوّه اللى دخلنى كلّية الطب

بس الإجابة الحقيقيّة هى إنى ما إكتشفتش ميولى تجاه المحاماة و لم أشعر تجاه المحاماة بهذه العاطفة ولم أحس فى داخلى بأنى من الممكن أن أتفوّق فى مجال المحاماة إلا بعد 3 سنوات من دخولى لكلّية الطب , فكان الوقت قد فات ( البركة بقى فى الواد محبط جونيور.... أطلّعه محامى.....بس مش محامى خـُلع :lol: :lol:

تم تعديل 5 أكتوبر 2004 بواسطة disappointed

[عصام]

دكتور وليد ..

حدث نفس الشيء معى إن كنت قد لاحظت خلال الهجمة المصراوية الشرسة :lol:

وبالفعل قمت بإرسال رسالة شخصية لمن احتل اللوجو الخاص بى ..

ومن ثم قام هو بالتغيير المطلوب دون أيضا تكليف نفسه عناء الرد ..

هذا كان كلام الأعضاء ..

أما بقى كلام الإشراف ..:

دكتور وليد ..

نحن فى المحاورات نعتز بك تمام الاعتزاز ..

ونقر أن اللوجو الخاص بك قد أصبح علامة مميزة لك ..

وقد انتظرنا توقعا منا أن ترسل رسالة خاصة للزميل المذكور ..

والآن وقد حدث .. ولم يأت بنتيجة ..

إسمح لى (بعد موافقتك) أن نناقش فى الإدارة استرداد اللوجو الخاص بك ثانية وذلك نظرا لما تقدم ..

بانتظار موافقتك!!

الإدارة

[Modest]

تلغراف

السيد محبط المحبطاوي :lol:

نشاطركم الأحزان في مصابكم الأليم و نفيد سعادتكم بأن اللوجوهات بتروح و تيجي :lol: .... المهم الحشو

و يكفي انك زمالكاوي علشان أقرأ كوووووووووووووووول مواضيعك حتى لو من غير لوجو :lol:

[Cleo]

يا محبط اللوجو بتاعك كان مطمع من زمان...

(وكذلك الإسم الحركى بتاعى.... :lol: )

معنى كدة إن لو إنت غيرت اللوجو أبقى أغير أنا كمان اسمى.......!!!!!! :lol:

لأ.... بجد...

رجاء حار للإدغارة بلفت نظر الأعضاء الجدد أو وضع هذا فى شروط الكتابة فى المحاورات... نحن نحترمكم جميعا ونرحب بكل عضو جديد.. والمنتدى يوفر حرية التعبير لكل جديد منكم... ولكن أليس للأعضاء القدامى أيضا الحق فى أهم ما يميزهم فى المنتدى وهو الإسم الحركى والأفاتار؟؟؟ يعنى اسمك وصورتك؟؟

[disappointed]

عزيزى إسّو

إحقاقا للحق فأنا لا أعتبر ما حدث سطوا أو إحتلالا لا سمح الله , لسبب بسيط جدا , وهو أن اللوجو القديم موجود فى الدايريكتورى بتاع اللوجوهات بالمنتدى... يعنى مطروح للجميع من ضمن الإختيارات المعدّة سلفا , وبالتالى فهو من حق الجميع و ليس حكرا على أحد ( لو كنت انا جايب معايا اللوجو من برّه و حاطط الرابط بتاعه و جه واحد إستخدمه كان من الممكن يقال هذا الكلام , ولكن ماحدث هو أن أحدهم إختار نفس اللوجو الذى إخترته والذى هو مطروح للإختيار من قبل الجميع)

وبالتالى..... فإننى عندما طلبت من الزميل الفاضل إعطاء صبغة الخصوصيّة و التفرّد لى بخصوص إستعمال ذلك اللوجو فإننى كنت أعى تماما أننى لا أطالب بذلك من باب أنه من حقى , ولا يمكننى أن أقول أنه لو كان الزميل قد إستجاب لى فإن ذلك كان سيكون من باب أن ذلك حق لى , بل كان سيكون من باب الروح الحلوة و السلاسة فى التعامل و كرم الأخلاق و تفهّم الآخرين ( وهذه كلّها أشياء تظل ليست واجبا مفروضا على أحد بقدر ما هى أحد أشكال التواصل الإنسانى التى لا يوجد ما يجبر أحد عليها)

ولهذا... فإننى أرجو منك أن تجنّبنى الإحراج و أن تكفينى مؤونة الشعور بأننى أحاول الحصول على ماليس لى حق أصيل فى الحصول عليه ( أتفهّم تماما مشاعرك و أشكرك عليها بعنف , ولكننى أستسمحك فى ألاّ يتم من الأساس فى فريق الإشراف طرح موضوع قصر ذلك اللوجو على العبد للّه )

و بعدين ماله اللوجو الجديد؟؟؟

زى الفل آهوه :lol:

أحد لوحات سلفادور دالى ( إسمها "الجنين الجيوبولوتيكى" على فكره) , وهى معبّرة جدا و ذات معانى "كوزموبوليتانيّة" عميقة جدّا و ذات مغزى يتماشى مع حالة الإحباط و خيبة الأمل فى هذا العالم الذى أصبح يبدو مؤخّرا عبثيّا فى أحيان كثيرة

تم تعديل 5 أكتوبر 2004 بواسطة disappointed

[عصام]

دكتور وليد

إسمح لى أن أحييك على أدبك الجم الذى تعودناه منك ..

وبالفعل أنا أتفهم مسبقا ما تطرحه ..

وكل ما كنت أطلبه منك أن تسمح لى بتجنيبك هذا الإحراج ..

وأنا عند رأييى ..

ثم إنه فيه حاجة إسمها "حق مكتسب" فى القانون :lol:

تحياتى

[disappointed]

عزيزتى فيروز :

نشاطركم الاحزان يا محبط

مانجيلكيش فى حاجة وحشة أبدا يا فيروز ياخـتــشـــى cbyb:

بس حاجه جانبيه كده .. اللوجوهات مستخدمه ببراعه مدهشه

شغل محاميين بقى :lol:

حاجه كده زى :

"أنظروا إلى هذا المتهم الماثل أمامكم..... أنظروا إلى هذا الوجه الملائكى......bla bl bla bla... "

:D

عزيزى موديست :

و نفيد سعادتكم بأن اللوجوهات بتروح و تيجي

على رأيك.... المهم الصحّة... و الستر :lol:

و يكفي انك زمالكاوي علشان أقرأ كوووووووووووووووول مواضيعك حتى لو من غير لوجو

أهلاااااااا... إنت زملكاوى؟؟

طب جهّز بقى نفسك يا حلو لـــ"سيزون" مليان معاناة مع الزمالك اللى بقى من غير "لوجو" يخلّى ليه هويّة كرويّة مميّزة السنة دى

عزيزتى "كليو"

يا محبط اللوجو بتاعك كان مطمع من زمان...

:D

بجد؟؟؟؟

وسايبينى على عمايا كده يا جدعان من غير ما حد يقول لى أو ينبّهنى؟؟؟

طب كنتو قولوا

أقلّها كنت "أكهرب" اللوجو أو أحطّ حواليه أسوار شائكة :lol:

ولكن أليس للأعضاء القدامى أيضا الحق فى أهم ما يميزهم فى المنتدى وهو الإسم الحركى والأفاتار؟؟؟

ممممم...

هوّه ممكن يكون عُرف...... بس عمره ما يرقى لمرتبة القانون ( طالما كان اللوجو متاح للجميع فى إختيارات الدايريكتورى).. وإلا فمن المنطقى أن يسأل البعض : أمّال سايبينه ليه طيّب معروض فى الإختيارات؟؟ وألاّ هوّه للعرض فقط؟؟

(وطبعا حيكون معاهم حق فى كده بالتأكيد)

هوّه الموضوع مش قانون ولا إجبارى طبعا... هو لا يعدو كونه "سنس" مش أكثر

[disappointed]

وأنا عند رأييى ..

ثم إنه فيه حاجة إسمها "حق مكتسب" فى القانون  :lol:

ممممم....

يا عم "إسّو" بلاااااااااش....... بدال ما يقولوا على النت إن فيه واحد فى محاورات المصريين تم "تمكينه" من لوجو بإستخدام "حق الشفعة" :D :lol: :D :lol:

بلاش الله يخلّيك..

همّه الكلمتين كانوا زانقينى بس و خلاص فكّيت عن نفسى و حأعمل أحلى شغل مع الجنين الجيوبولوتيكى و المعلّم سلفادور دالى :D :D

تم تعديل 5 أكتوبر 2004 بواسطة disappointed

[Katamando]

أدي مشكلة اللوجوهات القطاع العام متاحة ومستباحة للجميع

أما لوجوهات القطاع الخاص زي لوجو الأستاذ عادل أبوزيد وهشام عبد الوهاب وأنا لوجوهات قطاع خاص يعني عليها كوبيرايت مش ممكن حد تاني يستغلها

وعلشان كده السياسة الحالية هي إعطاء المزيد من الحرية للقطاع الخاص

[se_ Elsyed]

وأنا شخصياً قد قمت بتوجيه رسالة للزميل Yasovinas وطلبت منه فضلاً وليس أمراً إذا كان هناك إمكانية لتغيير اللوجو .. حيث أنني عن نفسي إتلخبطت عدة مرات وظننت إن محبط هو صاحب تلك المداخلات او المواضيع ..

وبعدين انا لو مُنضم حديثاً لأي منتدى او كوميونتي سوف أحرص على أن تكون لي شخصيتي المُستقلة في كل حاجة وسأحاول أن أكون إضافة جديدة ...

وطبعاً لم يرد على الأستاذ Yaso وبالتالي فمحبط من نفسه تنازل له عن اللوجو وأنتقى أخر جديد له ...

بس حلوه قوي الجنين الميتافيزيقي دي يا محبط ... مع إن سلفادور دالي نفسه شكله مش عاطفي بالشنب الرفيع اللي كان عامله وبيفكرني بالممثليين الهزليين .

والموضوع ده بيفكرني بحكاية حصلت زمان بين اختنا Farida والزميلة الغائبة من زمـــــــــــــــــــــــــــــان إلهام .. فهما الأثنين أختاروا في نفس الوقت الأفتار بتاع واحده إسكندرانية لابسه ملايه لف ( إسم الله ) وماسكه طرف الملايا ومداريه بها وشها من الكسوف .... المهم دخلوا في حوار وعراك ثنائي ( وإحنا كنا واقفين نتفرج ) لكي تجبر واحده الأخرى على التنازل ... وفجأة آن آن آن

مالقيناش إلهام ... وقامت أختنا فريدة بعملية نظيفة 100% ولم تترك وراها أي أثر ... وبكده فازت بالأفتار وأستأثرته لنفسها ..

وصحيح كما قال الشاعر

وما نيلُ الأفتارات بالتمني ....... ولكن تؤخذ الدنيا بالدراع

وعجبي .

[kfaya]

فعلا يا محبط زى ما قالت كليو ... اللوجو بتاعك فعلا كان مطمع و دى على ما أعتقد تانى مرة حد يستعملة .....

لكن الغريب ان الواحد من كتر ما اللوجو ده مميز بيخش عليه يقرأ على طول ... وطبعا بعد سطرين تلاته بيلاقى الأسلوب مش محبطاوى ...نضطر نرجوع للأسم , يتم التأكد من أختلاف الشخصيات ....

اللوجو الجديد برضك لذيذ و بعد شوية كلنا هنتعود عليه ......

تعجبنى صراحتك و توقعاتك بموسم كله معاناة و ألم من لاعبى و ادارييى الزمالك على يد ولاد عمهم الكبار قوى ..... قوى .....

[حشيش]

أخى العزيز محبط

بركة ياجامع إنك غيرت اللوجو.....ولا يهمك أنا حشوف لك كام لوجو كده بنفس المعنى اللى هوه أيهما أقوى العقل أم العضلات p-:3:

تم تعديل 5 أكتوبر 2004 بواسطة se_ Elsyed

[حشيش]

إيه رأيك فى ده :lol:

[Contra Mundum]

انا لقيت الموضوع فرصة للاستفسار عن :

1- ما المغزى وراء اللوجو الجديد للسيد الفاضل محبط ?

2- السيد محبط زملكاوى بجد و لا اوشاعة خبيثة ?

[ragab2]

بصراحة

اللوجو من حق الدكتور وليد

لأنه أول من حجز واستعمل هذا اللوجو

ولابد للادارة من نزع هذا اللوجو من العضو المحترم

وحتى لو اللوجوهات متاحة فيجب احترام اختيار الغير

وحتى لا نشجع عضو على التعدى على شيئ اختاره قبله غيره

والا ستتكرر الأسماء وتتشابه مثلما حدث مع اللوجو بدعوى أنها أيضا متاحة

[DARWEEN]

انا لقيت الموضوع فرصة للاستفسار عن :

1-  ما المغزى وراء اللوجو الجديد للسيد الفاضل محبط ?

المغزى ياسيدي ...

هو لحظة ميلاد الإنسان ميتافيزيقيا من خلف جدران الوهم المستحكمه في الأنسان الذي يستظل بظل من المآسي المستعصية ... فاهم حاجه

الخلاصه هي حاجه شكلها كده جايلها إحباط من الشديد قوي

2- السيد محبط زملكاوى بجد و لا اوشاعة خبيثة ?

سؤالك في غير محله ... أمال هو جاله إحباط منين ؟؟ :lol: lo::

[hamo90]

نفس الموقف الي حصل مع الاخ محبط حصل معايا فقد تم الاستيلاء علي اللوجو الاحمر بتاعي من أحد الزملاء الجدد ولكني أثرت السلامة وغيرت اللوجو بس الغريب في الموضوع أن الاخ هو كمان راح مغير اللوجو وفي الاخر قررت أن أفضل اللوجو الجديد بما أن الجديد والقديم الاتنين كده كده رمز للمجد الاحمر s-:

سؤالك في غير محله ... أمال هو جاله إحباط منين ؟؟  :

lo:: :P :P :D :D

:lol:

( الحدق يفهم )

حمو