مصر التى فى جيبى وفى فمى

[ragab2]

.

اخطف واجرى

وكله بينهش ويهبش

وحاميها حراميها

كلمات مأثورة وتطبق على الواقع

وحتكون أمثلة وحكم المستقبل

لازم نشدد القانون يااخوانا حبتين قبل ما نروح فى أبو نكلة وتخرب البلد

والوزير والمستشار والمحافظ والمدير والغفير كلهم سرقوا

والمصريين الشرفاء بيتفرجوا ومتمسكين بالمثل الشريف اللى بيقول

تموت العفيفة ولا تأكل ب .....!!!

طب وبعدين هانفضل ساكتين لحد ما يخربوها

ويقعدوا على تلها ولا نتحرك بسرعة

ونعالج الخلل ده

وهل الخلل ده من البيت ولا المدرسة ولا القوانين الغير رادعة

امتى السارق يتباهى بالسرقة

ابتدت تحصل دلوقت فى بلدنا

تصورا نواب القروض روحوا بيوتهم بزفة وطبل بلدى ذى الفاتحين

ديك النهار كنت فى حى شعبى

ولاقيت واحد بيقول لزميله عارف ياسمكة البتاعة اللى معاية دى

سرقتها منين .. من الحتة الفولانية

أنا مش عارف احنا فين بالظبط

يكونش جينا فى الزمن الغلط والا نزلنا من المريخ

فيه كتير مازال مصريين شرفاء وقلة لصوص

بس القلة دول ابتدوا يزيدو ويتوحشوا وبقى ليهم أنياب

ولسة الدنيا بخير

زى موظف المتحف الى رفض الملايين وغيره وغيره

بس عاوزين تصرف سريع لاستئصال الفساد قبل مايزيد أكترواكتر

فى مرة كنا عاوزين نصدر أمصال ولقاحات وأدوات طبية

من جهة حكومية لدولة عربية خليجية وندخل عملة صعبة لبلدنا

تتصوروا ان المسؤولين طلبوا عمولات ورشاوى رفضنا طبعا دفعها

واضطرينا نصدرلهم من الأردن للأسف وبأرخص من أسعار مصر

وهكذا تضيع على مصر فرص كتيرة وده مثل واحد

طب سيب حتى قلم جاف بنكلة على مكتب

فى أى شركة أو مصلحة حكومية لمدة خمس دقايق .. أتحداك لو لقيته

الشعوب كلها فيها حرامية وشرفاء ومنهم مصر

بس القانون عندنا طرى حبتين وكمان نايم وفيه تسيب

واللى معاه فلوس بيطلع لسانه للقانون وبيخرج زى الشعرة م العجين

والمحامين بيخلقلوا عشرين ثغرة فى القانون

عاجبكم الوضع المذرى ده

يا اخوانا والله احنا كنا أحسن ناس فى الأرض

وده مش كلام انشا ولا جرايد

واسألو أبهاتنا وجدودنا

ودى حاجات دخيلة علينا ومكناش كدة أبدا

كنت تلاقى الراجل راجل مايرجعش فى كلمته لو حايخسر رقبته

وكان أمانة الدنيا كلها فيه والدهب فى ايده يزيد ولا ينقص

فين راحت أخلاقنا وقيمنا الجميلة دى

مش لازم نعمل وقفة ومراجعة مع للنفس

صدقونى احنا شعب طيب

وبسهولة بنستجيب للخير بس نبدأ الاصلاح من دلوقت

أنا باناشد مجلس الشعب

اثارة هذا الموضوع لتشديد قوانين عقاب السارق

باناشد رئيس الدولة يشد على اللصوص كبير وصغير

وباناشد تطوير الأجهزة الرقابية لنفسها وتزيد حمالاتها أكتر

وزيادة ميزانيتها مع تقديرى لهم ولجهدهم

ونبدأ نشدد القانون ومانفرقش فى العقوبة بين المال العام والخاص

دى كلها سرقة وكله مال

والا هانكون بنقول للحرامى اسرق بس بعيد عن الحكومة

طب ماهو اللى هايسرق حتى من أبوه هايسرق بنك الحكومة

ولا نغير الأناشيد الوطنية ونقول ...

مصر التى فى جيبى وفى فمى

أو

يا أحلى هبرة فى الوجود .... يا مصر

و

يا أشهى البلاد يابلادى ... يا هبرتى يا مصر

أما الغلابة فلهم النشيد الوطنى لفوزى وهو ...

فولى أحببتك يافولى

حبا فى العدس وفى الفولى

مش كدة والا ايه

[bansia]

كدة ياسيدى

وحسبنا اللة ونعم الوكيل

[الأفوكاتو]

عزيزى رجب,

سوف أطلق على أشعارك عنوان:  " رجبيات رجب"

بالمناسبة, هل ستنشر هذه الدرر فى كتاب؟؟

لو فعلت, سأشتريه. ونحن جميعا نقدر موهبتك.

[ragab2]

شكرا ياأستاذنا العظيم الأفوكاتو

والفضل الكبير يرجع ليكم وللاخوان جميعا فى هذا المنتدى

والذين استفدت من آرائهم وأفكارهم ونقدهم البناء وتعلمت منهم الكثير

 وصلحت أخطائى بفضلهم

ومازلت باتعلم من الاخوة كل يوم الجديد

والكاتب بدون قراء مثقفين مثلكم ومتفهمين لمايكتبه

ونقدهم الذى يستفيد منه وتشجيعهم له

يبقى ولا حاجة ومايسواش حاجة

ويبقى زى اللى بيدن فى مالطة ويصاب بالاحباط

مرة أخرى شكرا يامتر

وشكرا لاخوانى جميعا فى هذا المنتدى العامر

أعاننا الله جميعا لاصلاح مجتمعنا المصرى والعربى

(Edited by ragab2 at 5:14 am on June 18, 2001)

[Ramsis]

السيدالأخ رجب .. بعد التحية

لقدفتحت موضوع فى غاية الأهميّة .. ألا وهو ... أهبر و أعبر

و المشكلة هنا ان أى فرد يهبرله هبرة ... و يفلسع على برّه ، وسيادة القانون بيقول:الجريمة تسقط بمضىالمدة ، والمدة كام .. ؟  3 سنوات فقط لاغير ، يعنى ممكن أى فرد ينصب أو يختلس أو يسرق ويسافر الخارج و بعد 3 سنوات يرجع مصر و يطلّع لسانه للسيد القانون ..حتى لو صدر ضده حكم غيابى بالسجن .. و الأمثلة من النوع ده كثيرة .. وعلى سبيل المثال :ابن لواء معروف ومشهور فى مصر ، نصب على ناس و أعطاهم شيكات بدون رصيد و صدر أمرمن النيابة بالقبض عليه ..و بقدرة قادر ..خرج برّة مصر واتحكم عليه  بالسجن ومازال موجود للآن فى الخارج يمارس مهنة النصب و الأحتيال ..مع ان الحكم سقط بمضى المدة ..مع اننا ماهرين فى تفصيل القوانين المليئة بالثقوب لتسهيل الهرب منها

فيه واحد من العصابة التى سرقت قطار لندن فى أواخر الستينات هرب فى جنوب أمريكا وظل هناك لم يستطيع أن يعود الى انجلترا طوال هذه السنين حتىأخذه الحنين الى وطنه وهو يدرى انه سوف يذهب الى السجن لينفذ العقوبة .. مع انه جاوز السبعين من العمر ..لكن احناعندنا لازم نترك على الأقل باب مفتوح علشان الوزير والمحافظ و ابن المحافظ وابن اللواء يقدروا يهبروا و  

يعبروا خارج مصر  ..مع ان الحكومة لو عايزة تجيب اللى فىالخارج تأكدوا انها ممكن تجيبهم

ولك الله يا مصر

                        رمسيس

[زائر]

اشعار  جميلة  يا  اخى  رجب  نتمنى  الاستمرار  والمزيد    

اخوك     الرايق

[ragab2]

شكرا للاخوة

الذين واسونى فى سرقة بلدنا

واتعشم من اللصوص أن يخفوا السرقة شوية

[ragab2]

محاكمة الغريب والجندى اراحتنا بعض الشيئ  والبقية تأتى ان شاء الله

(Edited by ragab2 at 7:18 pm on Nov. 11, 2001)

[ragab2]

[b:post_uid0]

نأمل محاكمة باقى المسؤولين اللى سرقوا مصر

ومنهم عبد الحميد حسن ومحافظ المنوفية السابق[/b:post_uid0]

[ragab2]

ولولا الفساد والاهمال

لكان للمصريين شأنا كبيرا

ولكانت مصر من أغنى البلاد العربية ومن دول العالم المتحضر

[achnaton]

والله إنت سكر .. يا أخ رجب ..  :inlove:  :inlove:

[wahed_masry]

يا أساتذة يا أفاضل

جزاكم الله خيرأ على غيرتكم على مصر المحروسة

السبب الرئيسي في نظري هو أثر متراكم لغياب قيمتي الحساب والعدل

أن غياب قيمة العدل هو السبب الأول

فشعور الأنسان بالظلم والقهر عندما يتأكد أنه لا يمكن أن يحصل على حقوقه بالطرق المشروعة ، يشجعه بل ويدفعه دفعأ إلى تجربة الطرق الأخرى

وعندما تنجح الطرق الأخرى ، وعندما لا يجد من يحاسبه ـ تحدثه نفسه الأمارة بالسوء (وكذلك الظروف وأحيانا الفقر ، ودائما نجاح الأخرين الذين يتبعون هذه الطرق دون أن يحاسبهم أحد) على أن يتوسع في هذه الطرق حتي يصبح من أمثال كل من هبر هبرة بمئات الملايين و فلسع ، ويمكنكم مراجعة مساهمتي في موضوع رامي لكح...

وهكذا تدور الأحداث في مصر المحروسة

(أنا لا أدري كيف تكون محروسة ويفر منها كل يوم حملة الملايين ، مصر تحتاج أن تكون فعلا محروسة)

تحياتي

واحد مصري

[ragab2]

ومازال

اللصوص يرتعون وينعمون بما سرقوه من أموال الشعب

ولم يحاسب الا القلة القليلة منهم وننتظر محاكمة الباقين

ومازال البعض يغنى .. ياحبيبتى يامصر .. لأنها أحلى هبرة فى الوجود

متى يحاسب كل من سرق مصر ولو حتى باهماله

[kokowawa1979]

أشعار جميله بالفعل على الرغم من انه بتإلم بحق

محاكمة الغريب والجندى اراحتنا بعض الشيئ  والبقية تأتى ان شاء الله

وادعي وقول يارب معانا يادكتور رجب لأنهم هيتحاكموا من جديد لأن قضية أمن الدولة بتاعنهم غير أمن الدولة بتاعة الغلابة!!! يعني فيها استئناف لكن الغلابة مالهمش!!!! وكفاية إن لهم ربنا

[ragab2]

وامتد

الفساد الى الموظفين والمديرين والوزراء

وأصبح غولا يهدد أمن مصر الاقتصادى

ولابد من مضاعفة العقوبة للرلشى والمرتشى

[الأفوكاتو]

وحشتنا أزجالك الرائعة يا دكتور رجب, و خاصة الزجل الذى كتبته عنى, و مازلت أحتفظ به.

إتحفنا باستمرار , فنحن فى حاجة الى مهرب من همومنا.

[achnaton]

لن تغفر ابيات شعر او زجل الدكتور رجب

إن هو الوحيد اللى كان السبب ..

شد رجلى .. للكتابة فى هذا المنتدى

وشفت أزجاله .. عجب العجب ..

-----------------------------

مره تلاقيه .. بيوصف حريمنا كالدنجوان

ومرة تلاقيه .. منسق كبير كالبهلوان

ومرة تالته ينتقد .. وتقد مر .. فى سلاسة

ولا مطرقة حداد معلم نازلة على السندان

----------------------------

نقول له إيه..؟؟ غير الله يبارك لك ...

اخناتون المنيا [/color

[الأفوكاتو]

الف هنــــــــــا,

ربنا يزيد و يبارك لنا فيكم و فى أزجالكم.

[ragab2]

شكرا

أخوتى الأعزاء الأفوكاتو واخناتون ملك الصعيد

والله سدت نفسى عن اقراض الزجل منذ أن صرنا ملطشة لأمريكا وفئران تجارب لصدام وغيره من الحكام السفاحين وصرت أقرب للعمل بقول عمنا سعد ..

غطينى ياصفية مافيش فايدة

الناس حماسها وقلوبها باردة

راحت العراق واتفرض علينا فردة

فئران تجارب احنا والا حتى قردة

كان العرب زمان ودلوقت .. خردة

فاكر لما كنا عرب أمجاد

نفتح بلد ونحكم بلاد

ولما دب فينا الفساد

لا حصلنا عرب ولا أوغاد

قالوا علينا رعاع وأحط العباد

ونسيوا التاريخ وعظمة الأجداد

قالوا عربى انتحارى تبع الجهاد

يقتل ويفجر ... وياكل جراد

مجد الجدود ضيعه الأحفاد

وآه لو صلاح الدين .. عاد

كانت تبقى غاية المراد

[الأفوكاتو]

أخى العزيز رجب,

رغم كل البلاوى, أنت ما زلت فى قمة الزجل,

لا تتوقف يا رجل, فالزجل هو صوت الشعب.