تحبوا تعرفوا اية اللى حصل ؟؟

[ذهبية]

سمعت نصحيكم و اتصلت على اخويا ودة الحوار

انا

حمد الله على السلامة يا اخويا

هو اهلا الله يسلمك

انا

نورت الدنيا عايزة ازورك اسلم عليك

هو

معلش انا مش فاضى مسافر

انا

عموما لما تفضى ابقى قول علشان ازورك امال فين مراتك اسلم عليها

هو

مش فاضية مشغولة

انا

اكلم بنتك

هو

تعالى فية واحدة عايزة تكلمك

الووو انا عمتو

بنتة عمتو مين

قولت لها مش عارفة عمتو قالت اة

انتى خالتو كذااا سامعة ضحك من جتبها

قلت لها انا كذا

وحشتنيى بتعملى اية بالعب فى الموبايل

قولت لها ماما فين قالت مش فاضية

قولت لها سلمى عليها قالت طيب

سلامممممممممممممم

اية رايكم

لسة برضة بتقولى ليا كلمية و ابدا

انا باكتب دة و دموعى على خدى مش بتقف و حاسة لجرح كبير لكرامتى

جرح كبيرررر قوى

[نوران]

والله دموعك دي غاليه

وان شاء الله ربنا يأجرك علي محاولتك صلة الرحم في هده الأيام الطيبه

ادعو الله أن يهدي أخو حضرتك ويصلح ما بينكما

انه ولي دلك والقادر عليه

اللهم آمين

تم تعديل 21 يوليو 2011 بواسطة نوران

[ViralMind]

السلام عليكم..

انا هقول لك رأيى و بمنتهى الامانة..

لو انتى عديتى على حد و قلتى له السلام عليكم و مردش السلام.. ده يعيب مين؟ يعيب اللى بيفشى السلام و بيصل الرحم.. ام يعيب المتجاهل للسلام؟!

انا بقول سلام عليكم و خلاص..

حصل رد او محصلش مش قضيتى.. ببساطة لانى بقول سلام عليكم لكى احقق امر الله فى افشاء السلام.

ولا يأثر فيكى ولا يهمك ولا يفرق معاكى بقى.. طالما ان الهدف هو وجه الله.

بالطبع ممكن يكون فيه اعتبارات تانية.. بما انه اخوكى و الموضوع يحز فى نفسك.. و لكن take it easy و كبرى دماغك.

اذا كان هدفك من صلة الرحم.. هو ان تصلى الله.. فالقضية منتهية زى ما قلت لك.. و لا يهمك ولا يفرق معاكى رد الفعل... لانك بتقيمى امر الله.

[Alshiekh]

السلام عليكم

قال النبي صلى الله عليه وسلم ( لا يحل للمسلم أن يهجر أخاه فوق ثلاث يلتقيان فيعرض هذا ويعرض هذا وخيرهم الذي يبدأ بالسلام )

يكفيك أنك أنت كنت البادئة بالسلام

ولاتزعلي نفسك واتركيها على الله

ومن زرع الشوك سيجنيه ومن زرع الورد سيشم رائحة طيبة ولن يجرح يداه.

[عبير يونس]

سمعت نصحيكم و اتصلت على اخويا ودة الحوار

انا

حمد الله على السلامة يا اخويا

هو اهلا الله يسلمك

انا

نورت الدنيا عايزة ازورك اسلم عليك

هو

معلش انا مش فاضى مسافر

انا

عموما لما تفضى ابقى قول علشان ازورك امال فين مراتك اسلم عليها

هو

مش فاضية مشغولة

انا

اكلم بنتك

هو

تعالى فية واحدة عايزة تكلمك

الووو انا عمتو

بنتة عمتو مين

قولت لها مش عارفة عمتو قالت اة

انتى خالتو كذااا سامعة ضحك من جتبها

قلت لها انا كذا

وحشتنيى بتعملى اية بالعب فى الموبايل

قولت لها ماما فين قالت مش فاضية

قولت لها سلمى عليها قالت طيب

سلامممممممممممممم

اية رايكم

لسة برضة بتقولى ليا كلمية و ابدا

انا باكتب دة و دموعى على خدى مش بتقف و حاسة لجرح كبير لكرامتى

جرح كبيرررر قوى

اوعي تزعلي يا حبيبتي

اوعي تزعلي

اللي يقدم الحب و الخير حيحصدهم

صدقيني

ادعيله ربنا ينور بصيرته

و يشيل الغشاوة اللي على قلبه

كان نفسي تكون قدامي عشان آخدك في حضني

اوعي تزعلي

ربنا يصلح لك الحال يارب

و يسعد قلبك

آمين

[أمل حياتي]

أختي ذهبيه .....

يا ريتك كنتي حطيتي كلامك في نفس الموضوع أفضل عشان متابعة الموضوع

وبعدين ولا تزعلي نفسك انتي كده رايتك بيضه زي ما بيقولوا

عملتي اللي عليكي وأكتر .... الغربه ياما بتغير النفوس وده واقع موجود

لكن مسير الأسره تتجمع ... ادعي وان شاء الله ربنا يسهل أمورك

[لماضة مصرية جدا]

السلام عليكم و رحمة الله و بركاته

و الله حاسة بيكي

و كنت في نفس الموقف ده بالظبط

يعني فيه ايه من انك تكوني مسافرة و هو ميسلمشي عليكي و لما تخشي الاوضة يروح يطفي النور و يدور وشه الناحية التانية

انا مش مسافرة و هآجي بكرة

انا مسافرة بلد تانية غريبة و كل لحظة فيها بيبقي فيها ليا تحدي و كان نفسي أخد معايا القوة الروحانية اللي تطبطب عليا و احس انها في ضهري

شوفي

هوني علي نفسك

و خلي مشاعرك بالقطارة شوية

مش علشانه

لا علشانك انتي

افتكري دايما ان قطرة الميه

نقطة

نقطة

نقطة

هتفتت الصخر

و من غير ما تحسي

انتي بس كنتي متخيلة انك لما تتكلمي بالطريقة دي...يبقي هو خلاص هيقلب الصفحة و يتكلم بنفس طريقتك

احنا مش قولنا تتعاملي معاه ان انتي "ماما"

بس ماما تستحمل شوية

معلشي انا باجي عليكي

بس صدقيني انا سافرت و طول الطريق كنت ببكي جدا

كنت موجوعة جدا

لاني كنت حاسة ان اللي حصل ميستاهلشي كل ده

و طبعا صعبت عليا نفسي اوي

و صعبت عليا الغربة اكتر اللي محدش حاسس بيها و ابسط حاجة ممكن حد يقولك انتي اللي اخترتي

مش هقولك متزعليش نفسك

بس هقولك حاجة

قومي و اتوضي

و صلي ركعتين

و خليكي بين ايدين ربنا

و فوضي "المكالمة" اللي عملتيها دي لربنا

قوليله يا رب انا عملتها علشان مرضاتك انت

اديني بس القوة اني اكمل

و ادعي كتير

و انتي بتقولي السلام عليكم من الصلاة

سلمي كل امرك لله

و هتلاقي ابوبا الفرج بتتفتح من غير ما تحسي

بس خليكي

قطرة

قطرة

قطرة

بلاش تجري علي حد و انتي فاتحة دراعاتك و تلاقيه باصص عليكي وووشه قالب تلج

خليكي واحدة واحدة

و طمنينا عليكي

[الغريب]

عن عبدالله بن عمرو رضي الله عنه أن رسول الله صلى الله عليه وسلم قال: [ ليس الواصل بالمكافئ ، ولكن الواصل الذي إذا قطعت رحمه وصلها ]

ربنا يرزقك أجر صلة الرحلم ويبارك لك في عمرك ويبارك لك في رزقك وأهلك أجمعين

[Hisham]

عملتي اللي عليكي سيبي الزمن يعلمه الدرس

[Howayda Ismail]

بالله عليكى ماتزعلى نفسك

كلنا حاسين بيكى

بس فى حاجة عاوزة اقولها لك الحكاية كده مش حكاية شقة

لأ هو شكله زعلان من حاجة اكبر وانت مش واخدة بالك

مقلتيش علاقتك شكلها ايه مع زوجته قبل خلافكم مريحة ولا فيها تحفظات

لان الست بس هى اللى بتقدر تغير الواحد من اخواته واهله بالسوء او الجود

شوفى ممكن يكون حد نقله كلام عن لسانك ( وقيعة بينكم ) سبب له جرح مش قادر يسامحك عليه

ممكن تسألى اخوكى التانى سر الزعل الكبير ده ايه اكيد هو على صلة به وممكن يصلح مابينكم

وان شاء الله ربنا يزيح الغمة من على عنيه ويكون رمضان فرصة له يراجع نفسه

وزوجك وعيالك معاكى بالدنيا سيبى الزمان يداوى الجروح ويهدى العاصى هو وحده مقلب القلوب

[Simba]

الله يكون في حضرتك

ويكون في عون اخوكي علي اللي هو فيه

فيه حاجات كتير بتحصل مستحيل حد يستوعبهااو يفهمها

[رضوي]

السلام عليكم ورحمة الله وبركاته

حبيبتي ذهبية

هوني علي نفسك .......... أحياناً بننجرح من أقرب الناس لينا ......... أحياناً القسوة بتدبحنا ببطيء شديد وتقتل فينا كل جميل

عايزة أقولك علي حاجة ....... عارفة ايه اللي جرحك اوي ......... مش رد أخوكي ........ بس توقعاتك انتي ........ إنتي كنتي متوقعة رد فعل مختلف وهو صدمك برد الفعل دة

عايزاكي دايماً تعملي اي حاجة علشان ربنا مش علشان البشر أبداً

ماتتوقعيش حاجة من البشر ........ ماتستنيش منهم حاجة ابداً أبداً

عارفة هو اد ايه احساس صعب اوي وجرح كبريائك واعتزازك بنفسك

بس عايزاكي تحسبيها بطريقة مختلفة

الرسول ( عليه أفضل الصلاه والسلام ) لما كان بيصبر علي إيذاء الناس ليه وكمان بيصر علي أن يحسن معاملتهم ........ ليه ماكانش بيقول كرامتي وكبريائي وعزة نفسي ؟؟؟؟ لأنه هو اللي في موقف قوة ياحبيبتي مش موقف ضعف

هو احنا لما نكون زعلانين من بعض وانا اجي وابداْ واقولك ازيك ياذهبية وحشتيني ونفسي اتكلم معاكي ........ يبقي أنا في موقف ضعف ولا قوة ؟؟؟؟؟؟؟ أكيد موقفي دة قوي مش ضعيف ........ طيب لو انتي قابلتي دعوتي دي بطريقة غير لائقة ؟؟؟

يبقى الحق عليكي طبعاً وأنا عملت اللي عليا وكونك حتى ماقبلتيش دعوتي دي ورفضتي ......... يبقي انتي حتى ماقدرتيش تنالي من كبريائي وكرامتي وعزة نفسي ....... بالعكس طبعاً دة انتي كدة حطيتي نفسك في موقف وحش اوي ادامي وادام نفسك والاهم ادام ربنا سبحانه وتعالي

تحسبي كل دة عند ربنا سبحانه وتعالى وربنا يجازيكي خير عنه ياحبيبتي

وماتخافيش كرامتك مصونة جداً وماحدش يقدر يقربلها ......... وكفاية مرتبتك عند ربنا سبحانه وتعالي ومحاولتك في صلة الرحم

[hOuSsAm]

لا حول ولا قوة الا بالله العلى العظيم

اختى ذهبية لا اجد ما اقوله زيادة عن الاخوة غير ان ربنا يصبرك ويقويكى وكفاية انك صلتى رحمك

ادعو ربنا ان يقك كربك ويفرج همك ويهدي اخيكى - ويهديكم لبعضكما

------------

مريت بنفس موقفك بالظبط وكان مع خالى وكنت حزين جدا لانه محضرش خطوبتى وهو خالى الوحيد (عشان كدة حاسس بكمية الالم وان سؤالنا هو ايه اللى حصل عشان يجرى كل ده) بس عزانا اننا بنحاول مرة ورا التانية لحد مربنا يجمع شملنا من تانى ويهدى النفوس.

نصيحتى ليكى (مع انى بقولها من تحت ضرسى ) متستلميش عن حب اخوكى وحاولى معاه تانى وتالت ورابع وفى نفس الوقت متتنازليش عن كرامتك وادعى ربنا كتير فى السجود فهو الوحيد القادر على تاليف القلوب وباذن الله تلاقيه هو اللى جاى عليكى بيقولك سامحينى وانت تقابليه بصدر رحب

[rewsha]

ذهبية حبيبتي

مش هاقول لك ماتزعليش نفسك والكلام ده .

من حقك تتضايقي طبعا وتزعلي وتعيطي ,ده رد فعل طبيعي للي حصل (وكان غير متوقع)

خصوصا ان كلنا هنا في المنتدى اديناكي الامل واوحينا لك ان الطبيعي جدا هوه ان اخوكي هايكون رد فعله غير اللي حصل

بس عاوزه اقول لك ....ماتياْسيش.

استني فتره وعلى اول رمضان اتصلي تاني .قولي له كل سنه وانت طيب .وحاولي تاني

وفي نقطه مهمه قوي هند قالت عليها .....علاقتك بمرات اخوكي (ايه)

هيه اكتر واحده هاتاْثر عليه

لو علاقتكم تسمح بانك تكلميها هيه وتكون هيه الواسطه بينك وبينه ...يبقى حلو قوي

ولو علاقتكم مش ولابد ,وكانت هيه من النوع اللي بيسخن اخوكي عليكي

حاولي تكسبيها هيه الاول

ولو كسبتيها يبقى كسبتي اخوكي بالتبعيه

لو انت نفسك مش طويل .يبقى سُكي على الموضوع

لو نفسك نفسك نص نص ...حاوي تدربي نفسك على النفس الطويل

لو نفسك طويل ....(زيي كده)...يقى خير وهاتنجحي ان شاء الله

لو نفسك في الاكل حلو ..يبقى يوم ما تتصالحوا ان شاء الله تعملي لنا حلة مكرونه بالباشاميل وتعزمي المحاورات عليها ;)

وصدقيني انت الكسبانه في كل الحالات

يمكن ربنا عاوز يديكي حسنات اكتر .واللي حصل ده خير

انت كده اخدتي ثواب صلة الرحم

بس نصيحه ما تياْسيش بسرعه

انا لو مكانك

هاعمل كمان محاوله في اول رمضان

ولو مانفعتش ,يبقى التالته تابته في نص رمضان

ولو كل المحاولات بائت بالفشل (لا قدر الله)

يبقى هاعمل حسابي السنه الجايه اني اعيد نفس المحاوله

صدقيني كله بثوابه

وانت الكسبانه في كل الحالات ,ومسيره هايلين في يوم من الايام

ماتنسيش حلة المكرونه بالبشاميل :P

تم تعديل 21 يوليو 2011 بواسطة rewsha

[أمل حياتي]

اختي ذهبيه ....

اعتذر إستعجالي لاني بالبدايه كتبت يا ريتك كنتي حطيتي كلامك في نفس الموضوع أفضل عشان متابعة الموضوع

قبل ما اكتب اني فعلا زعلانه عشانك ....هوه انا علشان كنت عايزه الناس اللي زعلت عشانك

انها تتابع معاكي تطورات الموضوع .... وتدعيلك وصدقيني كله خير صحيح صلة الرحم مؤلمه في جرحها

لكن عندي يقين ان الموضوع حينتهي خير مفيش اجمل من سند الأخ لأخته ولا أي رابطه تانيه

تغني عن الأخ او الأخت ... مسير الأيام تخفف كل شي وعندي احساس انه حيوصلك في رمضان شهر الخير

تحياتي عزيزتي ....

[Dreamwithme]

معلش يا ذهبية احتسبي كل ده عند ربنا

وكرامتك مصانة يا حبيبة قلبي لأنك عملتي كده عشان ربنا مش عشان أنتي عايزة حاجة من أخوك مثلا

ومعنديش كلام أكثر من كل اللي قالوا أخواننا وأخواتنا هنا

كل اللي أقدر أقولك عليه إنك خدي وقتك خالص ولما تصفي وتهدي خالص حاولي تاني وربنا يهديهولك يارب

[arkan]

حبيبتي هوني عليكي

تلاقيه اتفاجا بمكالمتك ومعرفش يرد عليكي افضل من كده

بس على الاقل انتى طرقتي الباب اعطتيه فرصة التواصل

مش بعيد هيتناقش هو واخوكي التاني او احد من الاهل بانطباعه عن المكالمة لعل يصلك كلام يهديكي

صدقيني الجاي اسهل ان شاء الله... خد راحة من التفكير دلوقتي

ربنا يصلح لكم الحال

تم تعديل 21 يوليو 2011 بواسطة arkan

[عادل أبو عمر]

الفاضلة ذهبية

عاوز بس أوضح لحضرتك نقطة .. الأخت إحساسها يختلف عن الأخ في النظر لعلاقة الإخوة ...

فالأخت بتكون حاسة بمسئولية تجاه الأخ سواء هي أصغر أو أكبر منه ... سبحان الله لا أرى ذلك إلا أمومة فطرية مبكرة ..

ولو البنت مالقيتش الفرصة دي مع أخوها تلاقيها بتمارس هذه الفطرة مع والدها و تنافس أمها في تلبية طلباته فيرى الأب من إبنته حنانا يفتقده مع بعدها عنه ..

رأيي إن حضرتك أصلا مش غضبانة .. حضرتك زعلانة

و زعلانة عليه مش منه ...

زعلانة ... لإنه محروم من حنانك ..

زعلانة .. لأنه حارمك من أمومتك الفطرية تجاهه .. و كأنه ابنك البكري قبل أبنائك ..

تماما كما كنتي تفعلي معه و انتم صغارا في بيتكم الكبير ... بيت العيلة ..

من اروع النساء اللواتي ذكرن في التاريخ و في الأدب العربي ... الخنساء .. بسبب حنينها لأخيها

طب ممكن تسامحني أطول على حضرتك شوية

حضرتك شوفي الآيات دي وهي من أروع ما يمكن للمؤمن أن يراه من دليل على إن اليقين بالله هو النجاة

(وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلا تَخَافِي وَلا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ )

ليه الآيات دي بالذات ...

عشان عاوز من حضرتك تكملي القصة و تراجعي و تشوفي إزاي سيدنا موسى رجع لأمه كما وعدها الله ...

(وَقَالَتْ لِأُخْتِهِ قُصِّيهِ فَبَصُرَتْ بِهِ عَنْ جُنُبٍ وَهُمْ لَا يَشْعُرُونَ * وَحَرَّمْنَا عَلَيْهِ المَرَاضِعَ مِنْ قَبْلُ فَقَالَتْ هَلْ أَدُلُّكُمْ عَلَى أَهْلِ بَيْتٍ يَكْفُلُونَهُ لَكُمْ وَهُمْ لَهُ نَاصِحُونَ * فَرَدَدْنَاهُ إِلَى أُمِّهِ كَيْ تَقَرَّ عَيْنُهَا وَلَا تَحْزَنَ وَلِتَعْلَمَ أَنَّ وَعْدَ الله حَقٌّ وَلَكِنَّ أَكْثَرَهُمْ لَا يَعْلَمُونَ)[القصص: 13]

عرفتي ليه بقول لحضرتك الأخت حنانها فطري و شوفي ممكن تعمل إيه ... إقرأي الآيات و فكري الأم طلبت إيه و الأخت اتصرفت إزاي :

الأخت نفذت الطلب ( قصيه ) لكنها لم تكتفي ... فكان منها سؤال .. هل أدلكم ... و نهايته الحكيمة ... ناصحون ) فكانت سببا في رجوع سيدنا موسى لأمه و كانت سببا لأن يتحقق على يديها وعد الله لأم سيدنا موسى.. كي تقر عينها و لا تحزن ..

حاليا و بالتأكيد لن أنصحك بمقابلة السيئة بمثلها فلن تقدري حتى لو حاولتي ...

هناك من أصحاب الفطرة السليمة من تجديهم يطبقون في حياتهم قول الله عز و جل .. ( ادفع بالتي هي أحسن فإذا الذي بينك و بينه عداوة كأنه ولي حميم )

يبقى حضرتك مطلوب منك الاستمرار في الإحسان ابتغاء مرضات الله قبل أي شيء و لكن هذا لا يكون إلا بالصبر و الاستعاذة بالله من الشيطان الرجيم

كل دعواتنا لكما بان يصلح الله بينكما و ان يهدينا و إياه سواء السبيل ..

[simpleDeveloper]

و خيرهما من يبدأ بالسلام

أقل تقدير ضعي في بالك و اعتبارك إنك قمتى بما عليكى و تذكري إنك لست مخطأءه و انت من بدأت بالسلام و الوصال. لايوجد مايستحق الحزن من نفسك فهو لم يعطى اى اعتبار لدوره و مسئوليته تجاهك.لا اريد تطويل الحوار لكن لو كنت في موقفك كنت أكيد هااكون متأثر جدا, لكن على الأقل تحاولي تتغلبي على أي إحساس بالزعل. و على فكرة اللي حصل ده يزودك كتير, مش يقلل منك في أي شيء.

[عماد حمدي]

السلام عليكم و رحمه الله و بركاته ..

متتصوريش حضرتك لما قريت الحوار دا أنا نفسي زعلت قد اية في نفس الوقت بقول ، يا بختك أيو يا بختك ..

خيركم من بدأ بالسلام .. و أنتي بدأتي و نيتك صافية أنك عاوزة صلح و صله رحم و مهما كان دا أخوكي ..

ثوابك عند ربنا ..

و أنا لو مكان حضرتك هحاول تاني و تالت و رابع و عاشر لحد ما أموت ..

علشان يوم الحساب لما نقف بين ايدين ربنا سبحانه و تعالي و نتحاسب علي صله الرحم ..

ربنا سبحانه و تعالي قال في سورة البقرة { وَاعْبُدُواْ اللّهَ وَلاَ تُشْرِكُواْ بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى }

أوعي تخلي الشيطان يضحك عليكي و يقولك طالما انتي كلمتيه مرة و اتنين وتلاتة وهوه مقبلش و كان بيعاملك ببجفاء يبقي تكلميه تاني .. فين كرامتك فين مش عارف اية !!

اوعي و بحذرك ،،

حاولي زي ما قولتلك تاني و ربنا يهدي النفوس ان شاء الله ..

و متزعليش انا لو مكانك هكون فرحان و الله العظيم ..