النحلة زينة .. جت طلت علينا

[se_ Elsyed]

هي البتاعة دي كنا بندرسها في إبتدائي ولا كانت قصة قصيرة بنشتريها زي ميكو ( ميكي . بس عبد الرحمن إبني بيقول عليه ميكو من باب الدلع ) ؟

- ترجع أحداث القصة إلى يومين مضوا .... حيث إني كنت قاعد في أمان الله عمال أفكر في مستقبل مصر وفي عصام شرف وفي الأحداث الجارية على الصعيد السياسي المحلي والعالمي ...

وفجأتن لقيت المدام بتصوت وهي تصرخ .. نحل نحل نحل ...

جريت جري وإذ بي أجد في البلكونة اللي ما بنفتحهاش بالأيام والاسابيع عشان الحر الفظيع اللي بيشوينا اليومين دول .. وجدت خلية نحل كبيرة تحت التكييف الصحراوي ...

أنا أفتكرتها الأول دبابير مش عارف ليه

والله لحد دلوقت مش عارف الفرق بين النحلة والدبور

يعني النحل بتدينا عسل نحل وكدهوت ..

طب الدبور له شغلانه تانية غير إنه يأذي النحل ويهجم على الخلايا بتاعتهم عشان يسرق العسل ويقرصنا طبعاً ولا إيه بالظبط ؟

المهم روحت مطلع الكاميرا ومصور الخلية دي عشان أقدر أدرس الموقف وأتعامل معاها

وكنت مشغول بحاجات تانية ومر يوم .. وامبارح قررت إني أقتحم الموقف

وكنت شفت زمان الناس اللي بيشتغلوا في تربية النحل بيعلموا دخان قرب الخلية عشان يطفشوا النحل وبعدين ياخدوا العسل على الجاهز فقولت أعمل زيهم ونبقى طلعنا بحاجه في الأيام اللي ما يعلم بها إلا ربنا دي

قولت بسيطة ... روحت مولع فحم وجايب المبخرة وحاطط فحم كتير وبخور كتير ومتسحب وحاطط المبخرة تحت الخلية وفضلت اراقبهم

إني الاقي نحلايه إتحركت ... ابداً

وشكلهم عملوا دماغ بخور وأتكيفوا تمام ولزقوا أكتر في الخلية والظاهر إنهم فكروا إني بأبخرهم من الحسد ومن عين أم مجدي جارتنا

- روحت جايب عصاية مقشة طويلة وقولت أقعد أقول لهم هش هش هش .. يمكن يتكسفوا ويطيروا ... ولا الهوا

- قولت ما بدهاش ... روحت جايب العصايا وفضلت اضرب فيهم - من بعيد طبعاً - وبقوا ينزلوا على الأرض كتل كتل وهما ماسكين في بعض في منظر غريبة

- بس في ثواني يرجعوا تاني أكثر تماسكاً

- أثناء ده كله .. إكتشفت إن النحل هنا مستأنس جداً .. ومش شيريس زي نحل مصر اللي بيقرص ... زمان وأنا صغير وفي إحدى زياراتي لقريتي بالريف ... عملت فيها مغامر وروحت جايب عصايا وضارب بها خلية نحل .. وعينك ما تشوف إلا النور .. كنت هاموت والله .. زي أفلام الكارتون كده لما النحل بيجري ورا توم وجيري ويقعد يقرص فيهم . وفضلت أتنطط زي اللي متكهرب لحد ما أنقذوني .. ولقيت البلد كلها عمالة تجيب طين من الأرض وتغطينا به .. قولت دول هايدفنوني بالحيا .. أتاري ده العلاج الفعال لقرص النحل .. سبحان الله

- وأخيراً قولت أخر العلاج الكي ... لإننا مش عارفين نفتح شباك البلكونة والعيال خايفه .. وللاسف روحت جايب علبة المبيد الحشري وزو زو زو زو ... لحد ما قضيت عليهم ... وطبعاً الخلية إتلوثت بالمبيد .. وروحت زاققها بالعصايا ووقعت والأرض إتغرقت عسل وأنا دموعي بتنزل على خسارتي لمحصول العسل الصيفي

- بعد المهرجان ده كله .. باكلم أخويا بالليل فلقيته بيقول لي : يابني حرام عليك .. حد يبوظ النعمة .. الحل كان بسيط .. إنت كنت تدور على ملكة النحل . ولو موتتها أو طفشتها . الكل هايهرب وراها ويسيبوا لك الخلية ...

دي حقيقة على فكرة

فقلت له : الصلاة عالزين الصلاة عالزين .. جبت الذكاء ده كله منين ؟ يعني وسط الاف النحل اللي في الخلية هاقعد أنا أدور على المكلة فين من ده كله ؟

المهم .. هاشيلك للخلية الجاية وإبقى تعالى ورينا ذكاوتك يا واد

[Alattar]

كيف صديج انت ما في معلوم ملكة..؟

بقي أبو الأسيان علي سن و رمح..ميعرفش الملكة من الشغالة من صبي القهوة؟.

بص يا معلمي..أنا جبتلك شوية صور توضيحية عشان الموسم الجاي ان شاء الله تبقي تشوفنا بكيلو عسل كده..علي كام كيلو بقسماط..

الملكة بتبقي طويلة عن باقي النحل..كده

ودي صورة حقيقية أكثر توضيحا

أو هتلاقيها حاجة مأنتخة..زي كده

ودي وهي قاعدة بتتفرج علي مسلسل هند و الباشمهندس نعمان

و أي خدمة يا ريس..و ياريت ما تنساش أخوك

[Diab]

في الغالب ده بيبقي نجل هربان من مزرعة قريبة من عندكم وشكلهم رموا الهلب تحت المكيف

حصلت زماااااان واحنا صغيرين في البلد ومسكنا الكرابيج السوداني انا وبن عمي

زو

زو

" ده صوت الكرباج " :closedeyes:

مات نصهم وشكلنا موتنا الملكة إليزابيث

فكله بعد شوية مشي

ممكن تستعين بشركة مبيدات ترشك لك تحت المكيف ويجي الواد يقولك 800 ريال صديج

ماتدفع بقي أفدع ادفع :happy:

تم تعديل 25 يونيو 2011 بواسطة Diab

[abobakr]

ياااه اخيرا هارد على موضوع للاستاذ س س بعيد عن دوشة الدستور الاول ولا الانتخابات الاول

انا مش عارف انت محير ليه نفسك يا استاذ س س

انت كنت تسمع الكلام وتدور على الملكة

واكيد اكيد اكيد

هاتكون لابسة التاج على راسها مش سايباه في البيت :closedeyes:

[نورالعين]

خلية عملاقة!!

فعلا مرعبة

خسارة محصول العسل الصيفي

أكيد كان فيه طريقة لتهريبهم

بس يمكن حضرتك استعجلت

لكن موضوع الملكة فعلا كان مستحيل

مش معقول تفتح الخلية وتبحث عنها

عموما الحمد لله انكم تمام

وهذا هو المهم

:)

[Damo]

اقول حمد لله على سلامة حضرتك ؟

هي الملكة هتتعرف بسهولة تبقى اكبر من الباقي بمراحل مفيش اتنين يختلفو عليها .بس بتعيش في اعمق غرزة في الخلية استحالة توصلها بدون خسائر تتضمن العسل

البخار اللي بيستخدموه ده قصة لوحده. هو عبارة عن كوكتيل أنواع وقود و الدخان بتاعها ليه كذا تأثير:

1) اهم واحد انه بيدي ايحاء للنحل ان في حريقة وهيضطروا يعزلوا. الطبيعي بتاعهم قبل مايهجروا أي خلية انهم بياكلو اللي يقدروا عليه منها. زي مااحنا ريقنا بيجري أول مانشم ريحة الاكل هما بطنهم بتنفخ أول مايشموا ريحة تعزيل . ولما بطنهم تتنفخ مبيعرفوش يتنو (اللي هي الثني - fold) جسمهم عدل عشان يعرفو يقرصوا زي الناس .

2) بيشوش على ريحة فيرمون بـيفرزه الحرس (أو أي نحل اصيب ) اوقات الخطر لتحذير باقي الخلية. كده بيسهل اقتحام الخلية و هما النت عندهم واقع

3) بيقولو لسه مشعرفين التفسير العلمي بالظبط الدخان بيهدي النحل خالص أو بيدوخه يمكن. (يعني بيعمل دماغ زي ماحضرتك لاحظت بالظبط).

(كله من ويكيبيديا)

في كل الاحوال النحل مش بيسيب الخلية يعني أثناء تأثير حبوب الهلوسة واللحظات الحرجة في تاريخ الخلية اللي ورا البنزينة تحت التكييف كان مفروض حضرتك ....

.

.

.

.

.

.

.

.

.

.

.

متقربش للخلية طبعا احنا مش مستغنين عن حضرتك

لو كانت العملية سهلة مكنش يبقلها مهنة مخصوصة

بس أنا عندي سؤال بقى. هو النحل بيتغرب علطول أول ماالملكة تمشي بجد ؟؟؟ يعني لما بتموت زي الناس كل شوية هيعزلوا ولا هما بيعملو الدستور الأول ولا إيه نظامهم بالظبط؟؟؟

تم تعديل 28 يونيو 2011 بواسطة Damo