شراب العطش

[Abouhemeed]

بسم الله الرحمن الرحيم

يا كل جبار قادر و مستعفي

اسمع كلامي و ربنا يهدي

يمكن تختشي و لا تستكفي

أقعد ع البساط معايا

شوف اللي جوايا

حس بأسايا

دا أنت ما تضمنشي

تعيش بكره

موش كل واحد لازم يقعد على كرسي

الأرض يراح و اللي سبق أهو راح بكري

و تحت التراب نام و سره معاه مخفي

سرق الولايا

و أخذ العطايا

زي حداية

تخطف و تطير و تعلي

و تسقط على غفلة

رزقك مكتوب لك نصيب عليك يرسي

الحلال مبارك و البركة عليك تربي

و الحرام ياخد منك و لا يعطي

ملح في كوباية

و المية غلاية

تحرق الثنايا

تشرب عطش يشوي

بدون رأفة

أوع الغلبان من ظلمك عليك يدعي

اليوم يمكن لك و في الآخر راح تبكي

لا يفيدك ندم حتى الندم لا يكفي

الحسرة نهاية

لكل بداية

فيها و لاية

على خلق راح تحكي

و في قلبها حرقة

أبو حميد المصري ‏12‏‏/‏09‏‏/‏2004

[Abouhemeed]

حد عطشان يشرب ؟ tea))(: :unsure:

[hamo90]

قصيدة جميلة كما تعودنا منك دائما

بس كنت فين غيبت كده وقلت عدولي

دانا حتي سألت عليك

أبوحميييييييد؟

hamo

[Abouhemeed]

أخي العزيز حمو

السلام عليكم

أبدأ بشكر جزيل لشخصك العزيز لسؤالك عني

حقيقة أنا لم أبتعد عن المحاورات و لكن قلت مشاركاتي و لم تنقطع نظرا لإنشغالي في العمل هذه الأيام

هذا غير تدني مؤقت في المعنويات ..!

في المحاورات أرسل كتاباتي و لكن ردود الأفعال قليلة و عدد مرات القراءة لها قليلة و لا أحد يناقش ما أكتب إلا بعض الأخوة و عادة تنحصر الردود في الله ينور .. حلو الكلام .. لا نقد و لا تحليل و لا مناظرات ، و يهتم الأخوة الأعضاء بالمواضيع الخفيفة مما يجعلني أسأل : هل أنا في المكان الصحيح ؟

هذا غير تاثير ردود بعض الأعضاء في منتدى مواز و هؤلاء الأعضاء لهم إتجاهات فكرية و تعديات لفظية متكررة مما جعلني أنسحب من هذا المنتدى على الرغم من تواجد أخوة أحبهم و أحترمهم كثيرا ، و لكن تمت السيطرة عليه من المندسين و المطرودين من منتديات أخرى مما جعلني أرى أن كل ما أفعله أو يفعله مريدي الإصلاح غير ذي طائل ، يعني حالة إحباط معجونة بيأس مرشوش عليها خيبة أمل تقيلة.

و حقيقة رسالتك هذه جعلتني أخرج بعض الشيء من هذه الحالة قليلا ، جعلتني أقول .. هناك من يهتم، فلابد من أن أهتم أنا أيضا ..

فشكرا لك يا أخي العزيز ..

[Abouhemeed]

شفت يا حمو !!

صدقت إن روبي .. و المحمول .. و الأغاني لها جمهور و الشعر و الأدب ما لوش غير حمو و رجب و كليو .. hpc:!:

[bentmasria]

hpc:!:

انا ومحمد زعلانين

بيقولك يا شاعر ازاى تنسى مامى

البنت المصرية

اللى كل يوم تدخل مخصوص تدور على مشاركاتك الجديدة

تصدق ياشاعرنا

انا اول ما لقيت المحاورات فرحت

موقع للمصريين وحكايات ونغبشة ونكش فى المتاح والمحظور

ويااااااااااااااااااه حلمى القديم وكمان شعر

بس زى ما حضرتك قلت

القراء

الله ينور ده لو قروا اصلا

تصدق انت الوحيد اللى تصديت بالنقد لابياتى اللى نشرتها قبل كده

انا موش عاوزاك تتضايق او تزعل

ولو قارىء واحد بينتظر جديدك لازم تشارك

وانت اغلى واعلى من انك تنقطع او تقلل

واخيرا وليس آخرا

أوع الغلبان من ظلمك عليك يدعي

اليوم يمكن لك و في الآخر راح تبكي

لا يفيدك ندم حتى الندم لا يكفي

الحسرة نهاية

لكل بداية

فيها و لاية

على خلق راح تحكي

و في قلبها حرقة

الله يشيل الحرقة من قلب الغلابه

ويرسى البسمة ف عيون الطيابا

وان تهت ف السكة حقول يارب

تطرح حبوب الفرح ف شجر الملامة

خليتنى اكتب عامى ربنا يسعدك ويبارك فيك

منتظرين جديدك ....يااااااااااا شاعر وشاعر وشاعر

البنت المصرية

[hamo90]

والله يا عمنا لوكنت أعرف أنقد الشعر وأحلله كنت عملتها وشجعتك عشان تكتب أكتر

بس للاسف أنا مجرد قاريء للشعر

اه قولي صحيح الا من روبي دي hpc:!:

hamo

[Abouhemeed]

بنت مصرية

أنا ما قدرش على زعلك و لا على زعل نور عيني محمد

طبعا أنا عارف إنك من قراء الشعر و متذوقيه

و كلامك العادي في المحاورات أحب قراءته لأنه صادق و أمين

كلام أم مصرية و ربنا يخللي لك نور العين محمد و يطرح البركة فيه و حواليه و أكمل على ما كتبتي

الله يشيل الحرقة من قلب الغلابه

ويرسى البسمة ف عيون الطيابا

وان تهت ف السكة حقول يارب

تطرح حبوب الفرح ف شجر الملامة

الغلابة عايشين في غابة

كثرت فيها الكلاب و الديابة

و نسي الضمير الرقابة

طلب المال زاد الحياة رتابة

محظوظ من لطريق الحق آب

و ربنا مع كل من عاد و تاب

[Abouhemeed]

ياه يا حمو ما تعرفش مين روبي؟! :rolleyes:

طيب الشعر و قولنا ماشي ... :angry:

أما روبي ؟؟!!

ياراجل ما لكش حق ... hpc:!:

طيب إبحث في إنسكلوبيديا إيجيبشينكا تحت حرف " الراء "

باب " هز يا وز "

قسم " تحرير الصبايا و خلع الملايا "

و لا أقول لك ...

إفتح التليفزيون ... eey:: mfb:

[ragab2]

مش بس بالمية

جسمك يرتوى

ولا المال يسعدك

ولا بفلوسك تحتوى

والهم يهد الحيل

ويخلى عودك يلتوى

ياشارب الكاس

سيب الناس ترتوى

لا الغنى نافع

ولا الفقر عاجب

وبعد الصحة

لا تتعاجب

الدنيا دى عمارة

عبارة عن طبقات

فيها اللى فى العلالى

وبرده بيقولوا هات

أما اللى فى الوسط

شوية منهم فوق

والباقى فى المتاهات

ناس البدروم

ناس شقيانين

ياكلوا طقة

ويناموا جعانين

راحة بالهم ساعة

بتزود فى العمر سنين

لقمة وبصلة تشبعهم

لا تقول كباب

ولا سمين

مالها الحارة

مش ربت جدعان

راحوا أمريكا

ومنسيوش البتنجان

منهم علما وخبرا

ومنهم خدوا صولجان

قليل الأصل

يتبرا من أصله

وعمر الأصيل

مانسى أصله

يرجع للحارة

ويسأل عن زمايله

ويزور فصله

يبوس إيد معلمه

حتى لو كان فصله

هى دى مصر والمصريين

ودة الكلام من أصله

[Abouhemeed]

الله ... الله ... الله ...

أيوه كده يا أستاذ رجب ..

طلع المستخبي ..

يا عم دا الكلام دا ما يطلعشي إلا من الناس المتان قوي ..

يا عم ربنا يزيدك و يبارك فيك ..

آدي الكلام الحلو و الشغل التمام ..

طب خد دي و رد عليا

سكان العمارة أجروا السلم

لما لقوا الدنيا بترمرم و تلملم

كل واحد في شقته عمال يحلم

بالمال و العز و لا يمكن يفهم

إنه في حلمة إتحبس تحت السلم

السلم عليه تطلع لفوق و تعلا

أو تنزل تحت و ع الرزق تسعى

درجاته محسوبة بالدرجة و المعني

السلم أخلاق و أساس كل مبنى

يسكنه ناس على الرب متكلة

...

هيه و بعدين ؟!

[bentmasria]

ارمى حمولك ورا ضهرك يللى وهم

ده الحمل زى الحجر لو فيه ناس تهتم

واطلع سلالم مبدأك وسلوكك

تنور الضلمة فى وش العزول الهم

كمل طريقك يامصرى بكره الهموم تتلم

والفرح يسكن دروبك والماية تبقى دم

وان هم بيك مفترى ....حسبن عليه يتلم

البنت المصرية تستأذن الاساتذة فى المشاركة المتواضعه

وحمادة :rolleyes: بيقولكوا fsh::

بلاش التقد اوى دى ماما بتقاوح

hpc:!:

[Abouhemeed]

الموضوع سخن يا جدعان

البنت المصرية فصيحة البيان

و محمد نور العين غاوي كمان

وسع يا جدع إسمع شعر زمان

كان فيه واحد صوته من الزعيط مبحوح

حزنان على حالنا و من سلطة اللحلوح

الكل يقول بأحب الوطن بس الوطن قنزوح

يعطي من كان كل شيي كان و ينسى كل طموح

شق الطريق بالعرق و بكدا منا يضيع و يروح

كره الميه و الهوا و غنوة يا ساكني مطروح

الحزن في قلبه سكن بعد ما كان بحبوح

و على أول مركب طفش و قلبه كله جروح

كل اللي طلبه كرامة و رزق يكون مفتوح

و صرنا نحاكمه و حكمنا علي المدبوح

يعني نحاكم الضحية و على حالنا ننزل نوح

و كل همنا رضا سعادة صاحب اللحلوح

ناس مننا في الوهم تايهة و ناس ساكنه سطوح

بينها و بين ربنا عمار و باب السما مفتوح

دعوه واحدة منهم تصبح كدعوة نوح

الطوفان يأخذنا و نغرق و ما تنقذ روح

إلابعملنا لنرضي الرب و قلبنا مشروح

[bentmasria]

حزين ولا حزينة فى زمان النوح

دفنوا عشق المدينة فى الجراح مدبوح

كنتى السكن والوطن والب الب البوح

قبل العيال اولادك ما يعبدوا اللحلوح

يا امى ياللى السكن على شط نيلك هدية

واشم ريحك دفا فى كل روحة وجاية

ليه الحروف عاصيانى لو قلت .... بيكى اعيش

و قبل قبل الزمن .......كنتى الحنين والنفيس

عاشقاكى ..... فكرة وذكرى ومجد كان له زمان

بس الحكاية ياغالية ......ختموها قبل الاوان

خنقونى حرف فحكاية......كتبونى قصة ورواية

مع ان كل الحكاية .........ابن ف وطن ...بيبووووح

[ragab2]

وايه يفيد الصراخ

والصوت مبحوح

عمر المصالح ما تخلص

الا باللحلوح

والكل يقول هات

وخليك بحبوح

والله ماتلاقى بلد

زى بلدك

مهما تروح

دة الغربة تقل الأصل

للراجل السنكوح

ولو واحد أصيل

يبقى على أصله

مهما يروح

فيه بلاد

الرزق فيها مفتوح

وبلاد

تبكى على حالها وتنوح

وبلاد فقرية

حكامها مفترية

ومش عاوز أبوح

[Abouhemeed]

و الله يا جماعة أسعتوني

بكل كلمة كتبتوها غلبتوني

حب الوطن فيكم لونه زيتوني

بهجة و فرحة بكل لون

يا مصر ياللي بنتك صبية مصرية

و إبنك رجب قال وجب بحث القضية

نحوا الهموم و شافوكي عروسة محنية

إفرحي و عيشي في هنا جوه عينيا

[حشيش]

الأخ العزيز أبو حميد

أعتدت أن أقرأ بعضاً من أشعارك أو بمعنى أدق أزجالك هنا وفى شئون مصرية...يعجبنى أسلوبك السهل الممتنع الذى يذكرنى بأزجال بيرم التونسى وأحمد فؤاد نجم...أعترف أننا مقصرون فى كتابة تعليق ولو بسيط على كتاباتك حتى تعرف أن ما تكتبه يقرأ ولكن لأننا لسنا متخصصين نكتفى بالمتابعة من بعيد...أرجو ألا تحرمنا من مداخلاتك القيمة...تحياتى :D :D :D

[Abouhemeed]

أخي العزيز حشيش

يشرفني أن تقرأ لي ما أكتب و تجد فيه ما يسرك

كذلك أقرأ لك فأنت كاتب موهوب فعلا ، و لك أسلوب يجعل من الموقف قصة جميلة ، السخرية فيها محكومة بالفكرة و هذا يا عزيزي يستعصي على الكثير من الكتاب.

أرجو أن تستمر في الكتابة و لا تتوقف فأنا أرى و أسمع الكلمات و احس بها أحاسيس جميلة و ذكية ..

و لك يا أخي العزيز أقدم لك هذه الهدية

قالوا أهل مصر نهارهم كله على موقف الأوتوبيس

رحت أبحث عن سبب التجمهر لقيته أخونا حشيش

لم الناس و قعد يحكي كيف تكشف السرقة و التدليس

الناس مشدوهة و بتبحلق ساكتين واخدين ع التهميش

جه الأوتوبيس مليان زحمة ناس طلعوا خفر و بوليس

شالوا حشيش بيلا و كل الناس ركبت و تركوا حشيش

قالوا منعرفهوش دا الإسم وحده تهمة فاكرينه عريس

مع تحياتي بس ما تجيبش إسمي في المحضر و لو تهويش

[حشيش]

تعيش يابو حميد ويسلم لنا ذوقك

وتثرى المحاورات بفن على ذوقك

ومعاك أخونا رجب والبنت مصرية

يتملى باب الأدب بكنوزعربية

أوعى تبطل كتابة وتقول خلاص مليت

إحنا معاك بنتابع كل ما خطت إيديك

حشيش

(أديب ومفكر :) )

حاول بقى يابطل تبدأ من أخر حرف فى قصديتى العصماء :)

[Cleo]

كان غيرك أشطر يا حشيش

فى الشعر أبو حميد زيه مافيش

وزى فصاحته وخفة دمه ماتلاقيش

يا أبو حميد انشالله تعيش.. :o