هذا بلاغ للشعب!....مقال مهم جدا لبلال فضل

[fatfouta]

فلول نظام وبعض ضباط امن الدولة وبقايا حزب وطنى و إسرائيل

متوقع جداا وكلنا فاهمين وعارفين انهم ممكن او اكيد هما اللى يبقو ورا اللى بيحصلنا ده

فعلا سبوبة كانت بتدخلهم ملايين هل هيسيبوها بالساهل كده؟؟؟ لا طبعااااااااا

اكيد بيحاولوا بس ربنا موجود ومش هيضيعنا ان شاء الله

اقرأو المقال

هذا بلاغ للشعب!

بقلم بلال فضل ٩/ ٥/ ٢٠١١

والله العظيم أقول الحق. وقد تقول لى إنك تصدقنى من غير حلفان، لكنك بعد أن تقرأ ما أكتبه ستقول لى: طيب ممكن تحلف لكى أصدقك، ولا ألومك فقد أصبحنا فى حالة طائفية مزرية تجعل الحليم حيرانا.

كان ذلك ظهر أمس الأول السبت، عندما جاءتنى مكالمة من مواطن مصرى يقيم فى دولة عربية قريبة، كان عصبيا ومتوترا وهو ما أثار قلقى منه قبل أن يزداد قلقى أكثر بعد سماع كلامه الخطير: «أرجوك توصل صوتى لكل الناس فى مصر. أنا عندى معلومات عن حاجات خطيرة هتحصل فى مصر اليومين الجايين، الكلام اللى هاقولهولك ده عرفته بشكل شخصى من حد مرتبط بكل اللى هاحكى لك عليه ومش هاقدر أقولك هو مين ولا عرف إزاى..

فيه رجال أعمال من بتوع نظام مبارك بيشتغل معاهم ضباط أمن دولة سابقين هيعملوا مصايب فى البلد وإسرائيل مش بعيدة عن اللى هيحصل.. شوفوا مين الضباط اللى كانوا بيشتغلوا مع إسرائيل خلال الخدمة وحطوا عينكم عليهم.. أنا عرفت إن فيه بعض رجال الأعمال دول عندهم مخزن سلاح فى (وذكر اسم أحد الطرق خارج القاهرة) وبيوزعوا سلاح على بلطجية وكانوا عايزين يعملوا فتنة طائفية امبارح قدام الكاتدرائية بس الحكاية باظت لما السلفيين راحوا قدام السفارة الأمريكية بدل ما يروحوا الكاتدرائية، وكان المفروض أن يترتب إنه تحصل مواجهات بينهم وبين المسيحيين اللى قدام الكاتدرائية».

كان هذا ملخصا لما قاله وهو يكاد يصرخ فى التليفون، وربما لأننى اعتنقت منذ سنوات نظرية المؤامرة على يد المفكر الكبير د. جلال أمين، فقد كان ذلك كافيا لتصديق كل كلمة قالها الرجل، لكنه ليس كافيا لنشرها بالضرورة، مع أننى خلال متابعتى لحفل توقيع المصالحة الفلسطينية كان يطغى على شعورى بالفرح شعور عارم بالقلق وأنا أتساءل عن طبيعة الضربة التى ستحاول إسرائيل توجيهها لمصر فى التو واللحظة، كل المتابعين يعلمون أن هناك تنظيمات عصابية كانت تكسب المليارات من تجارة الأنفاق التى سيهدمها عملياً فتح معبر رفح،

وسيقضى عليها إلى الأبد عودة مصر لكى تلعب دورها الحتمى فى القضية الفلسطينية بنزاهة وشرف، ويعلمون أيضا أنه لا يوجد ميدان أكثر خصوبة وسهولة من ميدان الفتنة الطائفية لكى يتحرك فيه أى متآمر حتى لو كان أبلها، لأنه لن يتعب كثيرا فى تحريك المشاعر الطائفية البغيضة المرتبطة بفقدان روح الدين والجهل بتعاليمه، ضع أيضا فى الحسبان العلاقات الوثيقة التى كانت تربط عددا من قادة التيار السلفى بأجهزة أمن الدولة التى فرح البعض بقرار حلها ونقل ضباطها بدلا من اتخاذ الطريق الأصعب للتعامل مع العناصر الفاسدة فيه،

أرجو هنا مراجعة الفيديوهات المنشورة على شبكة الإنترنت التى سجلت ما دار بين بعض السلفيين على إحدى غرف الشات وتناديهم للنزول سريعا لمحاصرة الكنيسة بل ومهاجمتهم بعض من طالب منهم بالتثبت والتبين ووصفوا ذلك بأنه ميوعة وتراخ، والحقيقة أننى لا ألومهم على هذا الشعور بالقوة وقد تركنا جميعا لهم الشارع لدرجة أننا نسمح لهم بمحاصرة الكنائس رافعين كلمة حق يراد بها باطل، واعتبر المجلس العسكرى والحكومة أن ذلك التصرف المقيت يدخل تحت بند التعبير عن حرية الرأى، مع أن ما قاموا به جريمة طائفية كاملة الأبعاد كان يجب التعامل معها بمنتهى الحسم الذى كان سيعامل به كل طائفى مسيحى يفكر فى محاصرة مسجد أيا كان نبل القضية التى يحملها.

هنا دعونى أقل إننى رغم كراهيتى لكل رخم يحب أن يقول للناس «سبق أن قلت لكم»، فإننى مضطر إلى أن أرجوك بمنتهى الرخامة أن تعود إلى الكثير مما كتبته فى هذه الصحيفة، وتعامل البعض معه باستخفاف واستسهلوا اتهامى بالهوس التآمرى بل ووصل بعضهم إلى اتهامى بأننى أقوم بتخويف الناس من أشياء لن تحدث، ويعلم الله أننى كنت دائما أتمنى أن أكون مخطئا، ومازلت، لكننى أتمنى على الجميع أن يتذكروا أننا لم نكن نتعامل مع نظام يمتلك مبادئ فاسدة إذا أثبت الواقع فسادها سينهار وسيستسلم، بل كنا ومازلنا نتعامل مع أكبر تشكيل عصابى فى التاريخ لا تكمن خطورته فقط فى رؤوس العصابة التى سقط بعضها، بل فى الحلقات الوسيطة فى العصابة التى تملك المال والسلاح والعلاقات، وإذا كانت يمكن أن تغفر سقوط قياداتها فى السجن فهى لن تقف صامتة أبدا على ضياع مصالحها.

على أية حال إيمانى بنظرية المؤامرة هو الذى جعلنى أسأل الرجل على الفور «هو حضرتك جبت تليفونى منين؟»، كتم الرجل انفعاله لأن السؤال بدا له غير متناسب مع ما يحكيه، لكنه قال لى «أنا قريبى مدير مركز كذا لحقوق الإنسان وخدت تليفونك منه»، قلت له «مع احترامى لحضرتك لكن ما تقوله أمر خطير ولا يحتاج إلى أن تتصل بكاتب بل يجب أن تتقدم أنت ومن أبلغك ببلاغ رسمى لإنقاذ البلاد ولكى تضع كل شخص أمام مسؤوليته»،

رد علىّ بأنه أبلغ السفير المصرى فى العاصمة التى يقيم بها بكل ما قاله لى وكان ذلك يوم الإثنين الماضى، (لذلك حجبت اسم الدولة إلى أن تبدأ الجهات المسؤولة التحقيق فى الأمر)، ثم قال لى إنه أبلغ السفير أيضا بأن هذه العصابات تقوم بالإعداد لهجمات على السجون فى الأسبوع المقبل، وعندما ألححت عليه أن يعطينى وسيلة للاتصال بالمصدر الذى أبلغه لكى آخذ منه معلومات أوسع طالما أنه لا يريد التقدم ببلاغ مباشرة لأسباب تخص أمنه، شعرت بأنه غضب لأننى تعاملت معه باستخفاف، فقلت له إننى لن أستطيع أن أنشر شيئا طالما لم تكن هناك معلومات أكثر دقة، وطلبت منه أن يعود إلى مصدره ليستوضح منه معلومات أكثر ويقوم بإبلاغى.

عندما بدأت أخبار كارثة إمبابة تتوالى فى المساء شعرت بالندم لأننى لم أقم بتسجيل رقم الهاتف الذى اتصل بى منه الرجل لكى أعاود الاتصال به لسؤاله عن أى معلومات جديدة يكون قد حصل عليها، فى الواحدة فجرا اتصل بى ثانية، كان منهارا وأخذ يقول لى «شفت مش قلت لك النهارده الضهر فيه مصيبة هتحصل.. أرجوك أبوس على يدك ماتسكتش اكتب قول للناس إن كلاب النظام مش هتسكت.. الحكاية مش مبارك..

دى شبكات فساد كانت بتدخل لهم مليارات ومش هيسيبوها تضيع»، لم يكن كلامه هذه المرة يحمل معلومات جديدة لكنه كان يكاد يبكى وهو يقول لى إنه كتب هذه المعلومات على الإنترنت باسم (مصرى حر) لأنه يخشى أن يتعرض للأذى فى الدولة العربية التى يقيم بها، وأنه لولا ثقته فى السفير المصرى فى تلك الدولة لما كان قد قال هذه المعلومات وأنه يعلم أنه يمكن أن يتعرض للأذى والمساءلة بسبب ما قاله لكنه مستعد لأن يضحى بأى شىء مقابل ألا تضيع مصر التى استعادها المصريون من العصابة التى اختطفتها، قلت له إننى سأسجل رقم تليفونه لأتواصل معه، ورجوته بأن يوافينى بأى معلومات تصل إليه، واتصلت به فى الواحدة من ظهر أمس لمراجعة ما قاله لى قبل إرساله للنشر، وأحتفظ برقم هاتفه ورقم الأكاونت الخاص به على الفيس بوك الذى أعطاه لى لأضعه تحت تصرف أجهزة التحقيق.

والله على ما أقول شهيد.

[fatfouta]

رابط المقال فى المصرى اليوم

http://www.almasry-alyoum.com/article2.aspx?ArticleID=296193&IssueID=2130

[أحمد سيف]

والله العظيم كنت على وشك أعيط وأنا بأقرا هذا المقال.

حقائق تتكشف وتثبت الأيام صحتها ومازال البعض يكابر ويتهم ثوار التحرير بأنهم وراء خراب البلد إذا ما دعو لحماية ثورتهم من مؤامرات الفلول وتؤاطؤ الأمن وضعف الحكومة.

انزلوا لحماية ثورتكم ... ثروة إن لم تحموها كالرجال فستبكون عليها كالنساء.

وسيبكم من دعاة التثبيط والتشكيك والمستهزئين.

تم تعديل 9 مايو 2011 بواسطة أحمد سيف

[fatfouta]

ولسه امبارح والله العظيم على اون تى فى...ضبط كمية من الاسلحة دخلت من مطار القاهرة جاية من المانيا

المذيعة تسأل المسئول فى المطار اذاى عدت من مطار فرانكفورتر الحاجات دى وهى جاية على مصر يقولها ماعرفش

طب اذاى عدوها فى مطار القاهرة؟؟؟ ماردش عليها

وبيقولوا ان فيه مسئولين سابقين مخصصين مبلغ 7 ملياااااار دولار للسطو على الثورة ومحاولات كتيرة لفشلها

ياريت نفوق بقى مانتهمش بعض ونعرف مين هو عدونا بجد فى اللى احنا فيه ده

الله المستعان

[Howayda Ismail]

http://www.youtube.com/watch?v=3g3PD5cluK0

[مصطفى يونس]

ولسه امبارح والله العظيم على اون تى فى...ضبط كمية من الاسلحة دخلت من مطار القاهرة جاية من المانيا

المذيعة تسأل المسئول فى المطار اذاى عدت من مطار فرانكفورتر الحاجات دى وهى جاية على مصر يقولها ماعرفش

طب اذاى عدوها فى مطار القاهرة؟؟؟ ماردش عليها

وبيقولوا ان فيه مسئولين سابقين مخصصين مبلغ 7 ملياااااار دولار للسطو على الثورة ومحاولات كتيرة لفشلها

ياريت نفوق بقى مانتهمش بعض ونعرف مين هو عدونا بجد فى اللى احنا فيه ده

الله المستعان

لا حول ولا قوة الا بالله

[se_ Elsyed]

عفواً

أنا ضد نظرية المؤامرة على طول الخط

مالم تكن هناك أدلة واضحة وملموسة على تلك المؤامرة مثلما حدث في موقعة الجمل وكان عندنا جريمة كاملة .. والكل طنش وصهين واستخف بالامر

غير كده بقى يبقى بنلزق كل حاجه لإسرائيل وللفلول و و و و

أه العوامل دي كلها موجودة على الأرض ... لكن لو كان عندك جبهة داخلية قوية .. يبقى كل ده هايتردد مليون مره قبل ما يعمل حاجه

وصوت اللي جابونا إتنبح وقولنا لازم الأمن يتكثف حول أقسام الشرطة ... وننزل أمن مركزي وحرس جمهوري وشرطة عسكرية إن شالله لو الدولة تستدعي جزء من إحتياطي الجنود اللي بالملايين لمدة شهرين أو تلاته وهذا حقها ..

وكل دول ينشتروا حوالين الأماكن الحيوية ...

وأي كلب يقرب من سجن أو قسم أو دار عبادة ويتجمهر مستخدماص سلاح أو عنف أو قوة .. يُضرب بالنار في الحال بدون مناقشة ..

كذلك الحال بالنسبة للمساجين اللي بيحرقوا السجون من الداخل ...

نجيب 5 او 10 من دول ويتعدموا امام الجميع ..

ودول بيبقوا مجرمين عتيدي الإجرام ومسجلين خطر ولا نفع لهم في المجتمع

-----------------

أمبارح وبعد ليلة سوداء في أمبابة

شوفت حاجه غريبة جداً العصر

شيء لا يُصدق

مجموعة من المسيحيين الغاضبين متجمعين عند دار القضاء العالي .. وتوجهوا نحو ماسبيرو للتظاهر ... وفجأة خرج عليهم عشرات من الكلاب الضالة عند ميدان عبد المنعم رياض وهاتك يا تحديف في الطوب .. اللي جابوه من تكسير الأرصفة والطرق المحيطة بالميدان .. وِكلهم أشكال والعياذ بالله .. لإنهم بلطجية رسميين ...

الغريب في الأمر .. لم ألمح عسكري شرطة يوحد ربنا .. ولا جيش حتى ..

بالرغم إن مركزهم الرئيسي وتجمعهم هناك عشان التظاهرات المختلفة اللي بتحصل ...

وفين وفين تدخل الجيش ونزلت كلمة النهاية المعتادة " وتم فض الإشتباك " .. زي الأفلام العربي اللي المطافي بتوصل فيها بعد الريقة ما تنطفي

يعني بقى عادي الإشتباك يتفض كده من غير ما يتم القبض عل 10 مثلاً ً من المعتدين وفي ثواني تتعمل محاكمة عسكرية في ميدان عبد المنعم رياض ونقطع إيدهم أمام الجميع خصوصاً إن في صور للجميع وهما بينفذوا جريمتهم ؟ .

[se_ Elsyed]

ولسه امبارح والله العظيم على اون تى فى...ضبط كمية من الاسلحة دخلت من مطار القاهرة جاية من المانيا

المذيعة تسأل المسئول فى المطار اذاى عدت من مطار فرانكفورتر الحاجات دى وهى جاية على مصر يقولها ماعرفش

طب اذاى عدوها فى مطار القاهرة؟؟؟ ماردش عليها

وبيقولوا ان فيه مسئولين سابقين مخصصين مبلغ 7 ملياااااار دولار للسطو على الثورة ومحاولات كتيرة لفشلها

ياريت نفوق بقى مانتهمش بعض ونعرف مين هو عدونا بجد فى اللى احنا فيه ده

الله المستعان

لأ يا فتفوته

كل ما في الأمر إن دول إتنين ألمان كانوا جايين على مصر للطيران من فرانكفورت .. واريحين الغردقة ترانزيت

يعني نزلوا القاهرة الأول وأخدوا طائرة داخلية ووصلوا الغردقة .. ومامور الجمرك هناك هو اللي إكشتف الأسلحة

وكانت بسيطة مش كتير

- إتنين رشاش ألي متطور وصغير الحجم

- إتنين مسدس

- إتنين سترة واقية للرصاص

- 4000 رصاصة

وقالوا إنهم شغالين أمن على أحد السفن .. والسفينة كانت هاتعدي تاخدهم من الغردقة

يعني مش أسلحة كتير ولا حاجه

والقصة كلها فيلم هندي طبعاً وحتى لو هما أمن .. عادي كده يسافر بسلاح ؟

والمصيبة تقع على مطار فرانكفورت ... لإن هناك المفروض في إكس راي بيكشف عن الشنط اللي طالعة الطيارة ...

وللأسف في صالات الوصول في مطارات القاهرة ليس لدينا إكسر راي والكشف بيتم يدوي بشكل إختيار عشوائي لو شك في شنطة أو حاجه ...

[fatfouta]

ولسه امبارح والله العظيم على اون تى فى...ضبط كمية من الاسلحة دخلت من مطار القاهرة جاية من المانيا

المذيعة تسأل المسئول فى المطار اذاى عدت من مطار فرانكفورتر الحاجات دى وهى جاية على مصر يقولها ماعرفش

طب اذاى عدوها فى مطار القاهرة؟؟؟ ماردش عليها

وبيقولوا ان فيه مسئولين سابقين مخصصين مبلغ 7 ملياااااار دولار للسطو على الثورة ومحاولات كتيرة لفشلها

ياريت نفوق بقى مانتهمش بعض ونعرف مين هو عدونا بجد فى اللى احنا فيه ده

الله المستعان

لأ يا فتفوته

كل ما في الأمر إن دول إتنين ألمان كانوا جايين على مصر للطيران من فرانكفورت .. واريحين الغردقة ترانزيت

يعني نزلوا القاهرة الأول وأخدوا طائرة داخلية ووصلوا الغردقة .. ومامور الجمرك هناك هو اللي إكشتف الأسلحة

وكانت بسيطة مش كتير

- إتنين رشاش ألي متطور وصغير الحجم

- إتنين مسدس

- إتنين سترة واقية للرصاص

- 4000 رصاصة

وقالوا إنهم شغالين أمن على أحد السفن .. والسفينة كانت هاتعدي تاخدهم من الغردقة

يعني مش أسلحة كتير ولا حاجه

والقصة كلها فيلم هندي طبعاً وحتى لو هما أمن .. عادي كده يسافر بسلاح ؟

والمصيبة تقع على مطار فرانكفورت ... لإن هناك المفروض في إكس راي بيكشف عن الشنط اللي طالعة الطيارة ...

وللأسف في صالات الوصول في مطارات القاهرة ليس لدينا إكسر راي والكشف بيتم يدوي بشكل إختيار عشوائي لو شك في شنطة أو حاجه ...

شكرا يا سى السيد على توضيح الموضوع ماكنتش اعرف ان هما امن

[se_ Elsyed]

من تأكيدات الجميع .. ومن اقوالة هو نفسة ..

صرح الشيخ محمد عبد المقصود كبير شيوخ السلفية بمنطقة أمبابة .. إن رئيس مباحث أمبابة تحدث إليه هاتفياً وقال له بالنص : إنه جاي ومعاه شخص جاي من أسيوط بيدعي إن زوجته تم إختطافها بعد ان أعلنت إسلامها وإنها محتجزة داخل الكنيسة وإنهم طالبين وسطاة للتأكد من صحة القصة دي .. وبالفعل جاء بعض ضباط المباحث مع الشخص ده وبينهم لواء شرطة كمان - غريبة دي مش كده ؟ - وأضاف الشيخ إنه شعر بإن الشخص ده كذاب وإنها حكاية ملفقة .. لكن لقطع الشك باليقين قرروا التوجه للكنيسة وهم مجموعة صغيرة ومعهم ضباط الشرطة لكي يتأكدوا ... وما فيش دقايق إلا وتجمع عدد كبير من اهالي المنطقة . سلفيين على ناس عادية على بلطجية .. وعاجلهم صاحب المقهمى وهو مسيحي ومقبوض عليه حالياً المجاور للكنيسة بضرب النار ظناً منه أنهم جاءوا ليقتحموا الكنيسة .. ثم توالت الأحداث

أنا مصدق القصة دي

لكن هل مش في خلال ثواني معدودة نقد نجيب ضباط المباحث دول . ومعاهم الواد بتاع أسيوط اللي إخترع القصة ... ونشوف حكايتهم السودا إيه ؟

ولا صعبة دي كمان ؟

[أحمد سيف]

صرح الشيخ محمد عبد المقصود كبير شيوخ السلفية بمنطقة أمبابة .. إن رئيس مباحث أمبابة تحدث إليه هاتفياً وقال له بالنص : إنه جاي ومعاه شخص جاي من أسيوط بيدعي إن زوجته تم إختطافها بعد ان أعلنت إسلامها وإنها محتجزة داخل الكنيسة وإنهم طالبين وسطاة للتأكد من صحة القصة دي .. وبالفعل جاء بعض ضباط المباحث مع الشخص ده وبينهم لواء شرطة كمان - غريبة دي مش كده ؟ - وأضاف الشيخ إنه شعر بإن الشخص ده كذاب وإنها حكاية ملفقة .. لكن لقطع الشك باليقين قرروا التوجه للكنيسة وهم مجموعة صغيرة ومعهم ضباط الشرطة لكي يتأكدوا ... وما فيش دقايق إلا وتجمع عدد كبير من اهالي المنطقة . سلفيين على ناس عادية على بلطجية .. وعاجلهم صاحب المقهمى وهو مسيحي ومقبوض عليه حالياً المجاور للكنيسة بضرب النار ظناً منه أنهم جاءوا ليقتحموا الكنيسة .. ثم توالت الأحداث

ما أنا قلت لكم من البداية

هذه هي باكورة أعمال جهاز الأمن الوطني

والبقية في الطريق

والعيسوي ما يقدرش ييجي جنبهم ولا له دعوه بيهم أساسا ... دول بيتلقوا تعليماتهم مباشرة من العادلي

[se_ Elsyed]

شكرا يا سى السيد على توضيح الموضوع ماكنتش اعرف ان هما امن

لأ .. هما كذابين طبعاً .. هما بيدعوا ذلك . ومعمهمش أي إثبات إنهم أمن ولا غيره

وبرضوا حتى لو أمن .. فممنوع عالمياً السفر بأسلحة اياً كانت على متن الطائرات

-----------------

اقول لك على حكاية مضحكة

من كام يوم كنت معزوم عند واحد صاحبي على الغدا .. فبعد الغدا جاب سبرتايه نحاس - لسه من حوالي شهر جايبها من مصر معاه - اللي بيعملوا عليها القهوة زي بتوع المعاشات كده وهما قاعدين جنب الدفاية وضربنا أحلى كام فنجان قهوة تركي

المهم بأسألة : إنت جبت سبرتو منين من الرياض ؟

والله يا جماعة قال لي : رياض مين والناس نايمين ؟

أنا جبت 4 قزازيز كبيرة مليانين سبرتو من مصر ...

إمسكوا أعصابكم ... وحطيتهم في شنطة وشلتها على كتفي وطلعت بهم الطيارة من القاهرة للرياض .. وماحدش قال لي تلت التلاتة كام

جاااااااااااااااااااااااااااااااااااااااااااااااااااااااااااااااااااااااااااااااي

تخيلوا لو قزازة من دول وقعت في الطيارة ؟

أو واحد مسك قزازة من دول في إيد وفي الإيد التانية ولاعه وهدد الكابتن إنه لو ما توجهش بالطيارة إلى تورا بورا .. فهايولع في الباروكة بتاعت المضيفة ؟

او واحد خمورجي شاف الأربع قزايز دول وطمع فيهم وشربهم وإتدهول وبقى حالته حاله هههههههههه ؟

[Howayda Ismail]

حجز الالمان المتهمين بادخال اسلحه عن طريق مطار الغردقه

قررت النيابة العسكرية فى ساعة متأخرة من مساء امس، الأحد، حجز الألمان الثلاثة المتهمين بمحاولة إدخال أسلحة آلية وذخيرة عن طريق مطار الغردقة الدولى إلى باكر، الاثنين، لاستكمال التحقيقات معهم وهم سيفين ديريمان 40 سنة، دانيال شنيدر 37 سنة، لانج كريستيان 32 سنة. وكانت قوات أمن الموانئ بمطار الغردقة الدولى بقيادة اللواء سامح قوطة قد قامت بإلقاء القبض على المتهمين الثلاثة أثناء محاولتهم تهريب 3 بنادق آلية و4 مخازن مملوءة وعدد 500 طلقة وعدد 2 طبنجة 9 مم و2 خزنة و200 طلقة وعدد 2 سترة واقية. وبسؤالهم قرروا أنهم يعملون بشركة أمن ألمانية خاصة، وأنهم حضروا لتأمين مركب سياحى من القراصنة كانت ستصل إلى ميناء سفاجا البحرى يوم11 مايو وأنهم أحضروا الأسلحة لهذا الغرض ولم يبرروا عدم حملهم لتصاريح أمنية لهذه الأسلحة.

[fatfouta]

يا لهووووى سبرتو عالطيارة يا سى السيد دى مصيبة وربنا

ماهو ده بقى هيرجعنا للاهمال فى المطارات اللى الواحد بيعانى منه ومن اللى بيعملوه الناس الى بيقعدوا يحملوا حاجات مالهاش لازمة!!!

وبعدين المفروض السوايل ممنوعة فى الامتعة ده حتى الهاند باج المفروض بتتفتش ولو فيها ازازة مياة كبيرة بطلعها وامسكها فى ايدى عشان يعرف انها للشرب بس

كانت تبقى نصيبة بقى لو حط الازازيز بتاعة السبرتو اللى معاه مع العفش جوا .....ده ربنا سترها معاهم

الا هو مافيش سبرتو فى الرياض بجد؟؟

[fatfouta]

كلام مهم ايضا للمسلمانى تعليقا على ما يحدث فى مصر

http://www.youtube.com/watch?v=qDWjDP0KGpE&feature=player_embedded

[شرف الدين]

الا هو مافيش سبرتو فى الرياض بجد؟؟

أيوة يا فتفوتة مفيش سبرتو في الرياض

حتى المسحات الطبية اللي موجودة في الصيدليات .. الكحول اللي موجود فيها أيزو بروبيل .. مش ايثانول ( اللي هو السبرتو ) ...

وده عشان السبرتو زي ما قال سي السيد ... ممكن يستخدم ويعمل أحلى دماغ ... فهما هنا مريحين دماغهم ومانعينه.

لكن لو عايزة ... بلغيني بس ........... هههههههههههه

[ابراهيم عبد العزيز]

فى الحقيقة شىء يبكى ويجعل الواحد يبكى بدل الدموع دما

عموما لا نملك إلا أن نقول ( الله يجعل كيدهم فى نحره ) ونسال الله أن يحفظ مصر من كل سوء وان يجعل لنا امر رشد يعز فيه اهل طاعته ويذل فيه اهل معصيته .

ولله الامر من قبل ومن بعد

[fatfouta]

الا هو مافيش سبرتو فى الرياض بجد؟؟

أيوة يا فتفوتة مفيش سبرتو في الرياض

حتى المسحات الطبية اللي موجودة في الصيدليات .. الكحول اللي موجود فيها أيزو بروبيل .. مش ايثانول ( اللي هو السبرتو ) ...

وده عشان السبرتو زي ما قال سي السيد ... ممكن يستخدم ويعمل أحلى دماغ ... فهما هنا مريحين دماغهم ومانعينه.

لكن لو عايزة ... بلغيني بس ........... هههههههههههه

لا انا كنت بسأل بس يا شرف

بس انا بتهيألى ان فيه كحول ايثيلى....مش هو ده السبرتو الابيض؟؟؟

شكلى هنطرد من الموضوع عشان بغير مساره :closedeyes:

[abdulmuttaleb]

مع احترامي لبلال فضل اللي واضح أنه تخصص تلفونات مؤامرات، زي لما نشر عن تهديدات بالاغتيال للبرادعي وغيره، وظهر على أون تيفي مع واحد اسمه حسام عيسى أستاذ قانون هو اللي كان مبلغ بلال فضل،

الطريف أن لما حد من الجيش اتصل ومسح بيهم البلاط وقاللهم بالذوق الكلام بتاعكم ده هبل في هبل، فقام د.حسام عيسى قال والله اللي اتصل بي جايز ينكر أنه وصل لي أي حاجة،

وفي الحقيقة بلال فضل سقط من عيني بعد موضوع كلية الإعلام والمظاهرات ضد العميد، حيث إنه تقريبا خريج للكلية وكان أسلوبه غير حيادي وغير مهني وكل اللي عاوز تقوله قوله، واللي كان منرفزني أياميها إنه وأمثاله كان عايشين كأن كل مشاكل مصر اتحلت واقتصادها زي الفل واللي ناقصنا بس هو إن عميد إعلام القاهرة يتشال،

تم تعديل 9 مايو 2011 بواسطة abdulmuttaleb

[أحمد سيف]

مع احترامي لبلال فضل اللي واضح أنه تخصص تلفونات مؤامرات، زي لما نشر عن تهديدات بالاغتيال للبرادعي وغيره، وظهر على أون تيفي مع واحد اسمه حسام عيسى أستاذ قانون هو اللي كان مبلغ بلال فضل،

الطريف أن لما حد من الجيش اتصل ومسح بيهم البلاط وقاللهم بالذوق الكلام بتاعكم ده هبل في هبل، فقام د.حسام عيسى قال والله اللي اتصل بي جايز ينكر أنه وصل لي أي حاجة،

وفي الحقيقة بلال فضل سقط من عيني بعد موضوع كلية الإعلام والمظاهرات ضد العميد، حيث إنه تقريبا خريج للكلية وكان أسلوبه غير حيادي وغير مهني وكل اللي عاوز تقوله قوله، واللي كان منرفزني أياميها إنه وأمثاله كان عايشين كأن كل مشاكل مصر اتحلت واقتصادها زي الفل واللي ناقصنا بس هو إن عميد إعلام القاهرة يتشال،

يا استاذي سيبك من بلال فضل وركز على المحتوى

مش اللي بيقوله ده هو اللي بيحصل بالحرف الواحد