ثورة 25 ابريل ...!!!

[Simba]

للمرة التانية انا بحذر من اليوم ده بجد

انا متابع صفحتهم علي الفيس بوك وشايفهم جماعة انا اسف يا ريس بتنسق بين المحافظات التانية لليوم ده

وهما فعلا بيحاولوا يحشدوا من هنا وهناك وهيعملوها في ميدان التحرير

وطبعا فيه شباب من شباب الثورة مش هيعجبها الحال وهيبقي يوم محدش عارف نهايته

انا معرفش ايه لازمتها المظاهرات دي وهي بتطلب طلبات جنونية زي ان الريس يرجع

ومش عارف الناس دي عايزة تخربها ولا ايه

ناس كتير بتقلل من اليوم ده وبيقولوا مش هيكملوا 100 واحد ولا مش هيكون لهم تاثير

بس انا حاسس عكس كده خالص

خصوصا انهم بيحاولوا ينظموها من فترة مع البوسترات والدعاية علي النت

http://www.youtube.com/watch?v=0GXOmX4XgqM&feature=player_embedded#at=173

http://www.youtube.com/watch?v=8qC2nl6inkU&feature=related

[عبير يونس]

من نصرنا سيتم نصره علينا

{وَاصْبِرْ وَمَا صَبْرُكَ إِلاَّ بِاللّهِ وَلاَ تَحْزَنْ عَلَيْهِمْ وَلاَ تَكُ فِي ضَيْقٍ مِّمَّا يَمْكُرُونَ }النحل127

[ozoozo]

ياه كان نفسي اكون في مصر اليوم ده

وانزل

اتحرش

بالساده المعتصمين

والمعتصمات

وهاقول زي ماقال اخونا اسد

خلوهم يتسلوا

مش ملاحظ انهم بقوا اقليه

سبحان الله

مبارك المحظور عايز يعمل ثوره عشان يرجع

تم تعديل 19 أبريل 2011 بواسطة ozoozo

[capitshino]

الناس دى لازم يتقبض عليها بتهمة قلب نظام الحكم.

[Alattar]

يبكى الاحرار على شهدائهم...... ويبكى العبيد على جلاديهم..

[fatfouta]

ان شاء الله ربنا يخيب طنوننا ومايحصلش حاجة

ولا الواد اللى بيعيط ده....ده بيبكى بدل الدموع بسطرمة يا ضنايا :closedeyes:

[أحمد سيف]

انا معرفش ايه لازمتها المظاهرات دي وهي بتطلب طلبات جنونية زي ان الريس يرجع

هدف الثورة المضادة النهائي هو عودة النظام السابق بشخوص مختلفة (يعني أحمد شفيق مثلا)

فإن لم تستطع فعلى الأقل منع الثورة من استكمال مسيرة التطهير والإصلاح وتفكيك منظومة الفساد

[Simba]

بيقولوا الريس جاب جون :closedeyes:

http://www.youtube.com/watch?v=6eTp6Frosl4

[عنبو]

على فكره الثورات المضاده دى مفيده قوى

بتخلينا صاحين على طول وعلى طول ستاند باى

لكن لو مفيش ثورات مضاده هتلاقى الناس انتخت فى بيوتهم

الثوارت المضاده دى بتجمع الناس مش بتفرقهم يعنى

وبتخليهم ينسوا الفروق البسيطه اليى بينهم وبين بعض

هما لو بيفهموا يبطلوا يعملوا ثورات

تحياتى

عنبو

[ozoozo]

بيقولوا الريس جاب جون :closedeyes:

http://www.youtube.c...h?v=6eTp6Frosl4

مش عارف ليه كل الناس بتوع لامؤاخذه ياريس بيئه

بعكس بتوع التحرير بتلاقي معظمهم ستايل وشيك

[Howayda Ismail]

مش عارف ليه كل الناس بتوع لامؤاخذه ياريس بيئه

بعكس بتوع التحرير بتلاقي معظمهم ستايل وشيك

الايد البطالة نجسة

ماهو مافيش انتخابات دلوقت

ودى الوظيفة الجديدة بتاعة شراشيح الحزب الوطنى

[fatfouta]

ارجع يا ريس....كليب تعبيري من ميدان التحرير

http://www.youtube.com/watch?feature=player_embedded&v=DeQxnVd_Cio

[Simba]

انصار مبارك قاطعين طريق الكورنيش تماما قدام ماسبيرو

بيلزقوا استيكرات علي العربيات مكتوب عليها 25 ابريل انتفاضة شعب !

[ozoozo]

انصار مبارك قاطعين طريق الكورنيش تماما قدام ماسبيرو

بيلزقوا استيكرات علي العربيات مكتوب عليها 25 ابريل انتفاضة شعب !

سمبا ...لما بتشوف كلب بيهوهو في الشارع بتفتح عنه موضوع علي النت

ولا مابتاخدش بالك منه اساسا

[Simba]

انصار مبارك قاطعين طريق الكورنيش تماما قدام ماسبيرو

بيلزقوا استيكرات علي العربيات مكتوب عليها 25 ابريل انتفاضة شعب !

سمبا ...لما بتشوف كلب بيهوهو في الشارع بتفتح عنه موضوع علي النت

ولا مابتاخدش بالك منه اساسا

لما يهوهو دي حاجة

ولما يحاول يعض فعلا دي حاجة تانية

[Simba]

أنا: شقة إيه دى اللى بـ 150 ألف جنيه؟ إنتى فاكرانى إيه؟ حرامى؟

هى: مش إنت بتشتغل فى الحزب الوطنى؟

أنا: أيوه! بشتغل عند حرامية .. لكن أنا على قد حالى وماتنسيش إنى بشتغل باليومية

هى: مش بتاخد 200 جنيه فى اليوم بقالك ييجى تلت سنين

أنا: وفكرك دول يطلعوا كام؟ أنا كل اللى محوشه مايجيش 35 ألف جنيه .. ماتدورى فى منطقة شعبية مؤقتاً

هى (غاضبة): أمال إنت فاكر اللى بـ 150 ألف دى فين يا روح خالتك؟ فى الزمالك ولا المعادى؟

أنا (ضاحكاً): طب هدّى نفسك بس .. ماتشوفى إيجار

هى: إنت كل ماتلاقى الكلام بجد تقلبه لهزار؟.. أنا مش هستحمل الوضع ده كتير .. لو مش قادر على الجواز غيرك يقدر

أنا: طب حِملك عليا بس .. أنا هحاول أتصرف

هى: إعمل ما بدالك لكن ماتكلمنيش تانى إلا وإنت عندك حل

أنا: أوكى .. بس ......

قفلت السكه بنت الكلب .. أصلى كنت ناقصها على الصبح وأنا لسه بقول يا فتاح يا عليم .. بنت الصرمة فاكرة إنى عشان بشتغل عند حرامية يبأه لازم أكون حرامى زيهم؟ والغريبة إن باين من كلامها إن ماعندهاش مانع! وحتى الشغلانه اللى "بتنق" عليها أهى قربت تطير من ساعة ثورة 25 "خساير" الملعونة ومصادرة الحكومة للمقر "اللوز" اللى كنا محتلينه فى جامعة القاهرة، بس المصيبة لو صدر حكم بحل الحزب نهائياً .. ساعتها هبأه فى الشارع وهتسول بجد، فى الحزب كنت باخد ييجى خمس تلاف جنيه فى الشهر، هما صحيح بيدفعوا باليوم والفلوس بتتعفرت، لكن كانوا كويسين وكنت بعرف أحوّش، وبشتغل فى مكتب مكيف ومديينى لاب توب وكارت "إنترنت" هما اللى بيدفعوه والعيشة فل، عشان ييجى الأوباش يدرمغوها ويقولوا "عيش .. حريه .. عدالة إجتماعية" وأى هبل فى الجبل.

أخيراً وصلت للمكتب اللى نقلونى ليه فى شركة واحد من حرامية الحزب، ربنا يكرمه خصصلى مكتب كويس مع السكرتارية بتاعته، ووظيفتى ويوميتى هى هى، وظيفة تحفة غيرى ممكن يدفع عليها فلوس، كل اللى عليا إنى كل يوم أعمل حساب على الفيس بوك بإسم مختلف وأضيف إليه شوية ناس ماتعرفش انا مين أصلاً، غير إنى عبر السنين بأه عندى ييجى 300 حساب على الفيسبوك وبأيت شغال على نفسى، كل ما أعمل حساب جديد أبعت دعاوى لباقى حساباتى وبكده أكتسب شرعية الإنتشار وأى حد أعملله "أد" يوافق لما يلاقى عندى أكتر من 300 "فريند" معظمهم "مزز" (جايب صورهم من على الفيس بوك برضه)، وبكده أمارس مهام عملى وأنا مستريح.

فتحت "اللاب توب" وبدأت بحماس عشان ناوى أكلمهم على زيادة النهاردة، أه .. هما بيكسبوا مليارات وإحنا اللى بنحارب عشان مصالحهم ومع ذلك لسه على باب الله، بس والله ناس محترمين وطيبين ولولاهم كان واحد خريج خدمة اجتماعية زيى كان زمانه بيكنس كوبرى مايو، والله الريّس كان عنده حق (ربنا يفك ضيقته) لما قال مره فى خطبة تاريخية "لازم يكون فيه ناس أغنيا عشان الفقرا يشتغلوا"، صدقت يا ريس والله .. كل كلامك حكم يا كبير.

فتحت "فايل" وورد على اليمين فيه أسامى الحسابات وكلمات السر (أه .. مانا عقلى مش دفتر عشان أحفظ بيانات 300 حساب) وفى الناحية الشمال فتحت مواقع الدستور، والشروق، والمصرى اليوم وبدأت الشغل بالترتيب اللى اتعلمته من سنين، الأول مقال إبراهيم عيسى لأنه أكتر واحد الريس بيكرهه "هما قالولى كده"، وبعدين بلال فضل، علاء الاسوانى، جمال فهمى، أسامة غريب، جلال عامر، فهمى هويدى، وائل قنديل، أحمد خالد توفيق، أى واحد من دول أصطادله أى مقاله جديده ليه وأشتغل بأه، فيه زمايل ليا عندهم قوائم تانيه فى جرايد تانيه شغالين عليها، يعنى زميلى "محمود" معاه عبد الحليم قنديل، ومحمد أبو الغار ووائل الإبراشى وعادل حموده وناس تانيه كده مش فاكرهم لأنهم مش تبعى، المهم.

أنا أحسن واحد إشتغل مع العالم دى لأنى مش بشتغل "جهجهونى" كده وأدخل أشتم وخلاص، وعشان كده كتير مشيوا. لكن أنا بحكم الخبرة الطويله كنت عامل فايل "وورد" تانى مسّجل عليه إتهامات جاهزة تناسب كل كاتب عشان ما أقعدش أفتى وأتعب دماغى كل يوم. أدخل على مقالة إبراهيم عيسى أكتبله كام كلمة بما معناه أنه عميل لحزب الله وإيران ومنين جاب المرسيدس والكلام ده والحمد لله إننا شعب لسه فيه ناس كتير بتحب تزيط مع الزيطة وأبدأ انا كرة الثلج وأسيب غيرى يكمل. بلال فضل قفل التعليقات من كتر الشتايم! مافيش مشكلة خالص .. أبعتله إيميل على حسب الحالة، لدرجة إنى بعتله مرتين ورا بعض مره إتهمته إنه وهابى وبيقبض من السعودية، وفى التانى أتهمته أنه علمانى وبيقبض من الأمريكان (كل مره من حساب مختلف)، وعلاء الأسوانى مجرد بس إنى أكتبله الكلمتين بتوع أنه بيدافع عن الشواذ وعمارة يعقوبيان والليلة دى وعلى طول ألاقى ورايا عشرات زى القطيع، بل وكمان فيه ناس بتوحيلى بأفكار، يعنى ألاقيهم بيربطوا بينه وبين خالد أبو النجا والبرادعى بكلام أنا نفسى أتكسف أكتبه وإن كنت ساعات بكتشف إن اللى كاتب زميل ليا حب يتطوع ويخدم، وهكذا .. القائمة طويلة والاتهامات موجوده والناس الحمد لله بتصدق (إذا كان فيه ناس مفترض انها مثقفة زى "سيد على" و"هناء السمرى" قالوا فى حلقة من البرنامج بتاعهم إن "حزب الله" و"حماس" فى التحرير، وبعدين جابوا "زميلة" قالت إن الموساد والأمريكان هما اللى دربوا بتوع التحرير!!! والناس شربت الإتنين عادى!!!). وأهو كلنا شغالين وبتجبر .. وأى واحد يشمت فى مبارك أو يجيب سيرة محاكمة أو حساب أنا جاهز بكام آيه على كام حديث "لا تشمت فى أخيك .. فيرحمه الله ويبتليك" وكلام من ده يعنى أو جمله مؤثرة "ده راجل كبير أد أبونا" أو "ارحموا عزيز قوم ذل" أو "اللى مابيحبش مبارك مايركبش المترو اللى عمله أو يشرب المياه اللى دخلها" وكلام (بصراحة يعنى) خايب كده .. يعنى هو كان بيعمل كده من جيب أبوه .. لكن أكل العيش بأه .. التليفون بيرن .. إستر يا رب.. ده الراجل اللى مشّغلنا!

أنا: صباح الفل يا "إبراهيم" بيه

هو: صباح الزفت على دماغك .. إنت فى المخروب دلوقتى؟

أنا: أيوه يا باشا .. إيه اللى جرى؟

هو: ماتعرفش اللى جرى إزاى .. أُمال إنت بتعمل إيه عندك يا روح أمك؟

أنا: أنا بقرا مقالات "حضرتك" مش أخبار .. حصل إيه بس "سيادتك"؟

هو: المحكمة أمرت بحل الحزب، حل وسطك إنت والنحس اللى ودانا فى داهية، لم حاجتك وغور فى داهية، ولما نحتاجلك مش هنقوللك، جاتكوا البلا ..

أنا: طب .....

قفل إبن الكلب! يا داهية دقى، وأهى خربت أهو عشان بتوع يناير يستريحوا! حسبى الله .. إستفادوا ايه دلوقتى بخراب بيت وقطع عيش الغلابة اللى زيى .. حسبى الله .. حسبى الله.

على القهوة قابلت "محمود" وأنا أحبس دموعى بالعافية، سألته بجزع:

أنا: هنعمل إيه دلوقتى

هو: العمل عمل ربنا .. لسه فيه أمل

أنا: فين الأمل ده .. ماهى خربت وأتهدت على دماغنا خلاص وهنشحت

هو: لأ .. فيه أمل

أنا: إزاى؟

هو: يوم 25 إبريل .. إحنا محتاجين أكبر عدد ممكن من البلطجية والمسجلين خطر .. دى مهمتنا الجاية، إننا ندافع عن اللى فاضل بكل إستماته .. دى بقت مسألة حياة أو موت

أنا: وهناخد كام؟

هو: ولا مليم .. دى معركتنا إحنا دلوقتى لأننا بندافع عن وجودنا .. ومش بعيد ندفع كمان بس المهم لازم ننتصر المره دى .. بس قول يا رب

أنا: يا رب

http://www.dostor.org/opinion/11/april/24/40671?fb_comment_id=fbc_10150157925988148_15882007_10150158269918148

تم تعديل 24 أبريل 2011 بواسطة سمبا

[ozoozo]

مظاهرة لاتزيد عن خمسون شخص أمام ماسبيرو تطالب المجلس العسكري بالعفو عن مـبـارك بما له من رصيد الضربة الجوية وتقدم ونمو وإذهار البلاد

يامسهل

المليونيه تبدأ بخمسين

[Alattar]

نظم ما يزيد عن عشرين مواطناً وقفة احتجاجية على رصيف الكورنيش المواجه لمبني الإذاعة والتليفزيون، مساء الأحد، معبرين عن رفضهم الشديد لما أسموه إهانة الرئيس السابق حسني مبارك.

وحمل متظاهرو "عشرينية دعم مبارك" لافتات مكتوب عليها: "بنقولها بأمانة .. مبارك حمانا"، "كما رفعوا صور للرئيس السابق، مرددين : "بنحبك يا مبارك"، "البرادعي مين.. مبارك تاريخ سنين".

وأبدى أحد المؤيدين للرئيس السابق المحبوس على ذمة التحقيقات في اتهامات موجه إليه بشأن تحريضه على قتل المتظاهرين، استهجانه الشديد من حبس الرجل الذي خدم مصر على مدار 62 عاماً على حد قوله، مضيفاً: "حسني مبارك خدم في العسكرية المصرية وأعطى الكثير لمصر والمصريين، كيف بعد تاريخه الطويل نقوم الآن بإهانته".

كما استنكر الشاب الذي يبدو في العشرينيات من عمره ويحمل على صدره سلسلةً بها صورة الرئيس السابق، ما أسماه التضليل الإعلامي الذي يسعى لتشويه صورة حسني مبارك من أجل أهداف خاصة حسبما قال، مشدداً على ضرورة اعتذار الإعلام وثوار 25 يناير للرجل الذي حكم مصر على مدار ثلاثين عاماً بدلاً من محاسبته وحبسه.

واضح يا جماعة ان الموضوع دخل في الجد..و اتجمع أهه أكثر من 20 مواطن...يعني مش 20 بس..لأ..الخبر بيقول ما يزيد عن 20 مواطنا

دول مش محتاجين خراطيم مية...بالمناظر دي..و الواد اللي لابس سلسلة عليها صورة مبارك ده..دول عاوزين بخاخة مية اللي هي بتاعة المكوة دي..وهتلاقي كله روح بيتهم علطول

أنا أقترح لو عددهم وصل 22 يقسموا فريقين...ويلعبوا علي السندوتشات و المواصلات..

تم تعديل 25 أبريل 2011 بواسطة Alattar

[jasmin hamed]

نظم

: "بنقولها بأمانة .. مبارك حمانا"

:blink:

يا سيدى مستغرب ليه بس مبارك حمانا

و الى يتجوزامى اقوله يا عمى و كدهوت ما تضقش

ايه العلاقه مش عارفه باين عليا لسه نايمه اروح اكمل فنجان القهوه يمكن يبقو ٢٥

[fatfouta]

هى فين بقى الثورة دى؟؟؟؟؟

ده بيقولوا 20 واحد واقفين ادام ماسبيرو....يا حرااااااااام

عشرينية دعم مبارك ترفض إهانة ''اللي ضحى لأجل بلده''