الأديب سين سين والريد كاربت الثمين

[se_ Elsyed]

المكان .... المكتب البيضاوي للأديب الكبير سين سين

الزمان ... الخامس من إيلول بعد طرح أول كتاب للأديب الكبير والذي ضم عصارة فكره وخبراته في عالم الأدب

الحدث ....

هانعرف بعد شوية

ذات مساء .. وأثناء أستغراقي في التأمل والفكر والهم ... لإستلهام افكار جديدة لكتب وقصص وحركات قادمة ... شق هذا الصمت الرهيب صوت الهاتف .... و

س س : الوووووو .. الأديب الكبير سين سين معاك يا فندم .. نقول له مين ؟

الطرف الأخر : إنت هاتصيع وتصدق نفسك يالا ؟

س س : إحترم نفسك يا فسل .. أنا أديب وكبير وعندي 39 سنة غصب عن اللي جابوك ... إنت مين ياض ؟

الطرف الأخر : أنا فاروق حُسني وزير الثقافة يا مُدعي ..

س س : فاروق بيه راعي الثقافة والمثقفين والناس التانيين اللي بين البينين .... يا سلام .. التليفون نور يا فندم والله .. أنا مُعجب جداً باعمال حضرتك – السودا – ونفسي من زمان اقابلك عشان تديني لوحة هدية من لوحك أعلقها في الحمام قصدي في الصالون

روقه : إسمع يابني أنا مش فاضي لك ... مش عارف لحُسن حظك ولا لسوء حظ الثقافة ..مش عارف أجيبها لك ازاي جتك نيله ... واحد سايح سويدي يا سيدي كان في مصر من كام يوم .. وشكله كان بيشتري طعمية فالراجل لف له الطعمية في ورقة .. طلعت الورقة مقطوعة من الكتاب بتاعك اللي أساساً ولا واحد إشتراه .. واللي إشتروه بتوع الفول والطعمية واللب ... المهم .. الراجل قرا الورقة وشكلُه كان نفسه حلوه وعجبه كلامك مش عارف على إيه .. راح دعبس وأتقطس لحد ما عرف إن العملة السودا دي بتاعتك . وأشترى الكتاب وأخده معاه السويد ... ومن سوء سوء حظ الحركة الثقافية .. الراجل كان قريب الملكة مارجريت ملكة السويد .. فحكى لها على اللي شافه في مصر وعلى الحناطير والحمير لا مؤخذه .. وطبعاً حكى لها على كتابك ... الست هي كمان أنطست في نظرها وعجبها الكتاب ... فقالت هاتوا لي الولد ده أديله جايزة السيخ الذهبي للعلوم و الأداب ... مصدق إنت الفيلم الهندي ده ؟

س س : أنا .. أنا لساني مش قادر يتكلم .. ومش قادر أعبر عن فرحتي باللي بأسمعه .. يا منت كريم يارب .. أتاري حضرتك الراجل صاحب المكتبة فاجئني من كام يوم وقال لي تعالى لك 5 جيني حق نُخسة من الكتاب واحد إشتراها بالغلط ... لكن توصل لمارجريت والسويد وكدهو .. أنا هايغمئن عليه .. مش صدق إني هاخد السيخ الذهبي ... الحمد لله الحمد لله

روقه : خلاص إنت هاتشحت ... شوف من الأخر كده .. بكره تيجي لي مكتبي ومعاك جواز سفرك وكام نسخة من الكتاب عشان هاقول لك تعمل إيه ..

س س : يا معالي الوزير أنا هاجي أبات قدام المكتب من دلوقت لإن مش هايجيلي نوم سواء من الناموس اللي في البيت أو من فرحتي بلقاك .

وعند الصباح يذهب سين سين هارعاً إلى مقر وزارة الثاقفة بالكيت كات ... ويقابل فاروق حُسني

روقه : إنت بقى سين سين ؟ ... طب ما أنت حلو أهو

س س : لأ حضرتك .. أنا مش بتاع الحاجات دي .. أنا أديب محترم وعايش بشرفي ...

روقه : طب يا عم المحترم .. فين جوازك ؟

س س وهو يرمي له الجواز من بعيد : أهو يا فندم

روقه : شوف .. إجراءات التاشيرة هاتاخد لها يومين تلاتة .. وفاضل إسبوع على حفلة توزيع الجوايز ... أنا هاخليهم هنا في الوزارة يظبطوا أمر التاشيرة وتذكرة السفر وحجز الفندق ليه وليك . ما أنا هامثل مصر ومسافر معاك .. وفي الفترة دي حاول تستضنف لك بدلة عليها القيمة بدل اللبس المزيت اللي إنت لابسه ده .. وتحضر كلمتين تلاتة تقول لهم قدام الملكة ..

س س : يااااااااااه .. ده أنا في كلام كتير عاوزه اقولهولها .. وأوله إني كنت بأوضب شقتي الصيف اللي فات واشتريت شوية بيبان خشي سويدي .. وعلى ما جيت أدهنهم لقيت الخشب فلق حضرتك .. فعاوز اشتكي للملكة من بتوع الخشب دول وكدهوت

روقه : اللهم إني لا أسألك رد القضاء ... ولكن اسألك اللطف فيه ... بقى هاتروح تقول لملكة السويد بيبان خشب .. وفلقت قبل ما تدهنها .؟؟؟؟؟؟؟؟؟؟؟؟؟ شوف يابني .. أنا هاقول للملكة الراجل ما صدقش نفسه وجت له سكتة قلبية ومات .. وهاطلب منها تطلع قيمة الجايزة رحمة ونور على روحك .. وكفايه فضايح

س س : لأ لأ خلاص والله . أنا هاسكت وهاقول اللي إنتو عاوزينه بس أسافر ...

روقه : طب إمشي إنجر روح أشتري لك بدلة حلوه وجهز نفسك

وهنا أُسقط في يد سين سين ولم يدري ماذا يفعل .. فأتصل بصديقة الفنان العالمي زُهيري ..

س س : ولا يا زيزو إنت فين ؟

زهيري : أنا قاعد في قهوة المطربين في شارع محمد علي ... في حاجه ؟

س س : طب قابلني عند مسمط آل البيت اللي في الحسين وأعزمني على كوارع

زهيري : إنت جاي ترمي الهلب عليه ؟ لأ يا عم أنا عندي سبوبة كمان شوية واحد طالع من مؤبد .. وأهله قصدوني ودفعوا لي قرشين كويسين عشان نعمله زفة قدام اللومان بمناسبة البراءة

س س : يالا لومان إيه .. أجل الموضوع ده شوية وخليهم ينتظروك مش هأخرك والله عندي لك سبوبة سوقع ..

ويتقابل الإثنان في الموعد ويقص عليه سين سين الحكاية من البداية ...

زيزو : يا نهارك مش فايت . مارجريت مره واحده .. يابن الإيه ؟ وأنا اللي أفنيت عُمري في الفن ولحد دلوقت لسه بأستلف ثمن السجاير ... صحيح ... تيجي مع الهوبل دوبل

س س : يا عم دوبل إيه وتروبل إيه .. أنا جايللك تدبرني دلوقت أنا مُرتبك وفيري كونفيوسد ... إسمع يا زيزو .. أنا بأجهز كلمة هاقولها قدام ملكة مارجريت .. وفكرت برضوا أفاجئها بحاجه جديدة و غير متوقعة ... غنوة سويدي مثلاً .. ومالقيتش غيرك يفتكس لي الغنوة دي

زيزو : يابني أنا بألف عربي بالعافية .. جاي تقول لي سويدي ...

س س : والنبي والنبي .. أنا عاوزك ترفع راسي .. إفتكس بس أي حاجه وترجمها حتى على جوجل وبعدين لحمها لحم غربي كده وخلي الليلة تعدي

زيزو : تصدق إنت إبن حلال ... كان عندي في كندا واحد جاري سويدي هاريني أغاني طول اليوم لدرجة حفظت أغنية منهم عن ظهر قلب ولما سألته إيه دي .. قال لي دي النشيد الوطني السويدي

س س : نشيد نشيد أي حاجه يا عم أحنا لاقيين

زيزو : بس أمانة عليك يا سين سين .. لما تقابلها وتكلمها .. قولها على خدمة كده لاخوك الغلبان

س س : عيني .. والله إنت تؤمر يا زيزو .. مارجريت بتاعتنا والست بتخدم بعنيها وعُمرها ما أخرت لي طلب ...

زيزو : بقى الموضوع وما فيه إني إتدبست في عربية فولفو موديل 70 .. ودايخ دوخة الأرملة دلوقت على قطع غيار لوش السنلدر ... فلو الست مارجريت تقدر تكلم لنا حد هناك يدبر لنا الحاجات دي من الوكالة أكون ممنون .

س س : وهنا يستحضر سين سين موضوع الأبواب الخشب ... ثم يقول له .. عيني يا زيزو .. ده مش بعيد نصعب عليها وتنفحنا حته موديل 2012 .. إدخل عليه بالأغنية بقى وما تضيعش وقت

زيزو : شوف يا سيدي .. مطلع الأغنية بيقول " إيشن بيشن .. إيخن .. زيج زيج "

س س : ها .. فين الأغنية ؟

زيزو : فين إيه يابني .. ما أهي .. هي دي كلماتها " إيشن بيشن .. إيخن .. زيج زيج "

س س : قول وكتاب الله ؟ أنا باحسبك بتفتح الباب .. والباب بيزيأ وكده ..يعني أدخل على ملكة السويد وأقول له هشتك بشتك زجازيج ؟

زيزو : حد جاب الهشتك بشتك يا بني أدم ؟ يا بني دي مطلع النشيد الوطني بتاعهم . أفهم بقى

س س : آآآآآآآآآآآه .. زي بلادي بلادي عندنا يعني ... طب هو بس يعني إيه زيج زيج ؟

زيزو : يعني إنت فهمت الكلام كله وجت عند دول ؟

س س : خلاص .. هاقعد أحفظ فيهم الأسبوع ده .. .. بس كلمات الأغنية حلوه ومُعبرة ... لأ وجديدة ... وأول ما أقابلها هادلق الكلام ده في وشها وأنا عارف إنها هاتتبسط مني جداً .. خدمة تاني بقى .. اخوك مزنوق في بدلة الاجه عشان أقابل بيها الملكة واطلع بيها في التليفزيون وحاجه تكون أخر حاجه ..

زيزو : بس .. ما فيش غير أبو سامية بتاع المنفوحة

س س : قريبك ده يا زيزو ؟

زيزو : لأ .. ده ترزي البشوات بتاع الرياض يابني ... وكل البدل واللبس اللي عنده حاجه كلاس ... تصدق بالله ؟

س س : لا إله إلا الله .. ولا حول ولا قوة إلا بالله .. وحسبي الله ونعم الوكيل فيك وفي أبو سامية وفي المنفوحة كلها

زيزو : إسمع بس ... عارف باولو كويليو ؟

س س : عارفه طبعاً .. ده أديب زميل من البرازيل ... ماله ؟

زيزو : هو اللي فاز بالسيخ السنة اللي فاتت ... وقصدني برضوا أسنجفه .. وسنجفته

س س : من عند أبو سامية بتاع المنفوحة ؟

زيزو : لأ يا خفيف .. من عند أبو مايكل بتاع ريو دي جانيرو ... طب والله ولا لك عليه يمين يا سين سين وإنت عارف أنا مش بأحلف براسك كدب ... الوليه مارجريت إتهبلت لما شافت البدلة . لدرجة إنها جوزته بنتها الوحيدة صوفيا ..

س س : ياااااااه .. للدرجة دي إنبهرت بالبدلة ؟

زيزو : وأنا أؤكد لسيادتك إن بدلتك دي هاتخليها تقول لك " أرحمني وأقبل صوفيا زوجتاً لك يا سين سين " يعني إنت اللي عليك الدور السنة دي يا معلم

س س : إحم إحم .. لأ زهيري .. إنت مش واخد بالك .. صوفيا متجوزة باولو السنة اللي فاتت .. أنا بقى هاتجوزها إزاي السنة دي .؟ ويعدين إيه حكاية السنة دي والسنة اللي فاتت .. هي صوفيا دي شجرة وبتطرح كل سنة ؟

زيزو : يابني الناس دي أوبن مايندد .. والحاجات دي ما تفرقش معاهم.. النهاردة متجوزة باولو .. بكره تتجوز سين سين ... حُرية يابني .. حُرية . أومال هما متقدمين ليه ؟

س س : على رأيك .. إحنا لينا أكل ولا بحلقه .. يا سيدي وكفاية نسب الست المحترمة دي وكل اللي ييجي منها كويس .. ولو إني مش بأثق في شغل الصنايعية البرازيليين ... وشكلي هاستلم بضاعة مضروبة من وراه .

زيزو : إنت أبن حلال .. واديب بجد .. وتستاهل كل خير .. بس لما ربنا يفتحها عليك وتفتح لك مغلق خشب ..ساعتها ما تنساش اخوك اللي وقف جنبك

س س : عيب ... عُمري ما أعمل كده ( سين سين في عقل باله .. ساعتها ولا أعرفك بصوتك التخين الأجش ده وبلوفرك اللي جايب لنا الفقر .... بلا قرف ) إنت إبن حلال .. وامي بتدعيلك يا زيزو وبتقول ليل نهار إلهي وإنت جاهي يوعدك بسيخ يا زهيري يابني عشان تُكلل مسيرتك الفنية وتختمها خير ختام ..

يُتبع

[Alattar]

بصراحة ما كنتش عاوز أرد الا لما تخلص القصة كلها..عشان أحافظ علي تناسق الموضوع..لكن بصراحة ما قدرتش أمسك نفسي أكتر من كده

يعني انت اتكلمت عن كل حاجة..و نسيت مصمم جائزة السيخ الذهبي..اللي هو العبد لله

نبذة عن الجائزة :

الاسم : جائزة السيخ الذهبي

الفائزين : الأدباء و المفكرين و العالم دي

صورة الجائزة :

تاريخ الجائزة : تم تصميم هذه الجائزة بمجهود خاص و فردي من العبد لله..من ييجي جمعتين تلاتة..في حمامنا المتواضع الكائن بشرق الرياض

و نتمني التوفيق لكل المشاركين

[jasmin hamed]

ربنا يسمحك يا استاذ س س و الله اعدت اضحك لما ابنى افتكرنى اتجننت توحفه بجد

[ozoozo]

اولا مااسمهائش قهوه المطربين اسمها قهوه التجاره اللي في شارع محمد علي

ثانيا :هو مارمالكش الجواز علي الارض وقالك وطي هاته ياسنسن؟ :hysterical:

[ابو محمد بن مصطفي]

اولا مااسمهائش قهوه المطربين اسمها قهوه التجاره اللي في شارع محمد علي

ثانيا :هو مارمالكش الجواز علي الارض وقالك وطي هاته ياسنسن؟ :hysterical:

ثالثا : وزارة الثقافة مكتب الوزير في الزمالك ....... الكيت كات ده مكتب الموظفين ...... روقة كان مأنتخ في الزمالك.

بس روعة ....بصراحة

[م تيمور المراغي]

جويرية :

هو مش فاروق حسني مشوه من الوزاره خلاص !

[hOuSsAm]

سين سين في عقل باله .. ساعتها ولا أعرفك بصوتك التخين الأجش ده وبلوفرك اللي جايب لنا الفقر .... بلا قرف

هو انت ليه دايما معترض عالبلوفرات

بلوفر زوهيرى

وبلوفر احمد شفيق

وياعالم بكره هتتكلم على بلوفر مين تانى

ياعم انا رميته خلاص عشان متكلمش عليا

[jamalpody]

ايه الادب ده كله يا معلم

امانه عليك تكمل القصه

ويكون فيها الخريطه الكامله لمحل ابو سامية

فين في المنفوحه بالظبط

وهل هو شخصية حقيقية ام من نسج الخيال

[se_ Elsyed]

ولإن الوقت قد أزف .. فنويت الجلوس لتحضير الكلمة والخُطبة العصماء التي سوف ألقيها أمام الملكة مارجريت ...

وقبل هذا .. جال بذهني كل الدعم المعنوي والمادي الذي حصلت عليه أثناء وجودي بمنتدى المحاورات من كل الزملاء والأحباب ...

وأستجمعت كل قواي الذهنية والبدنية لصياغة الكلمات التالية

" بسم الله الرحمن الرحيم ... صاحبة الجلالة الست الملكة ام صوفيا الشهيرة بأم مجدي ... السادة الادباء الزملاء .. اعزائي كل تجار الاخشاب بالسويد .... في الحقيقة الحكاية مش حكاية كتاب بيتم تأليفة .. لكن هي حكاية شعب عاوز تثقيفه ..

وعندها تمتليء القاعة بالتصفيق الحاد على تلك الكلمات المنمقة ( أنا متخيل طبعاً ) وتُطلق ام صوفيا زغروطه ترج القاعة رجاً وتقوم باحتضاني - حضن ام لإبنها عشان ما تهفمونيش غلط – وتقول لي : تسلم يا سين سين يا أصيل ... ربنا يخليك لامك يابني

ثم أخذ نفسي وأجفف دموعي التي بدأت تنحدر وأستكمل ...

أيها السادة الحضور ... لا ادعي بأنني أستحق تلك الجائزة بمفردي .. لأ .. فأنني أريد ان اعترف انه قد شاركني فيها جميع زملائي بمنتدى محاورات المصريين

( وما إن يسمع الحضور كلمة محاورات المصريين حتى تهب عاصفة من التصفيق على القاعة )

الست ام صوفيا العزيزة ... أود اليوم أن اتوجه بالشكر لكل هؤلاء الزملاء الأفاضل كل واحد بإسمه

- شكراً للزميل الإبن أركتيكت الذي كون وجداني الثوري بشعاراته البراقة خصوصاً بصورة النسر الامريكي الأقرع اللي كان بيجيلي في كوابيسي وأنا نايم عشان ينقر دماغي ...

- شكراً للزميلة أغابي اللي هارياني تقييمات سالبة كنوع من التحفيز – وأنا يا أم صوفيا مش عاوز أمدي إيدي عليها لحد دلوقت وخليكي شاهده –

- شكراً للزميل عطار اللي أسدى إلي خدمة العُمر في تطفيش القطط اللي كانت بتزعجني وأنا مندمج في الكتابة .. لأنه كان بيبعت لي بإستمرار فراخ مشوية وكنت بارمي منها للقطط فكانت بتطفش .. وتقريباً كانت بتشتمني قبل ما تسيب المنطقة

- شكراً للفنان زهيري صاحب الوتر الحساس اللي ياما كان بييقعد يسليني ويغني لي أغنيتي المفضلة " ماما زمانها جايه " عشان اتخمد وانام

- شكراً لطنط فولانه اللي كانت بتسهر طول الليل تشغل لي بروفرات عشان تدفي صدري وتقيني من برد البرد (برد البرد ؟؟؟ دي فتكرتني بشهداء يناير اللي ماتوا في شهر يناير في صورة يناير للفنان حماده هلال ... يالله زي بعضه )

- شكراً للراعي الرسمي لقلمي الرشيق والشخص اللي كان بيصرف عليه من ريال لألف ريال .. أخي العزيز ساري . اللي كنت كل ما اتصل بيه عشان أطلب منه ألف

ريال أشتري أقلام وورق من جرير يقول لي : الف ريال إنت ووجهك . ليش إبتشتري المكتب كلها ؟؟؟ هما 7 ريال أول عن أخر وإن ما عجبك إجلب وجهك

وكل مره حضرتك كنت انسى أسأله يعني إيه إجلب وجهك

- ونفسي أشكر مشايخنا الأفاضل اللي كانوا بييدعوا لي في كل صلاة أبو عمر والغريب واللفيف السلفي الجميل – السلفيين أجدع ناس .. السلفيين اجدع ناس .

أنا بأقولها اهو في المحافل الدولية

- وأحب أشكر كل واحد في المحاورات دفعني للامام وشجعني على التألق والقراية والكتابة

ولو لديكم متسع من الوقت لحصرت لكم كل الأسماء الرنانة الموجودة . لكن أنا عارف إن وقتكم غالي ومش عاوز أعطلكم ...

والسلام عليكم ورحمة الله وبركاتة ،،،

أخوكم الادييب .. سين سين

- وفي موعد السفر تقابلت مع السيد الوزير راعي الثقافة في المطار ... ودار بيننا هذا الحديث

روقه : إيه القرف اللي إنت لابسه ده .. مين الـ تيييييييييييييييييييييييييييت اللي جاب لك البدلة دي ؟

سين سين : ده الفنان زُهيري حضرتك من عند أبو ساميه بتاع المنفوحه

روقه : زهيري إيه ومنفوحة إيه اللي يحرقكم كلم .... جتكوا القرف ... فكرني أشتري لك أي نيلة من السوق الحُرة .. عرتوني وعرتوا البلد بلد الله يخرب بيوتكم وإيه الاوراق اللي في إيدك ده ؟

سين سين : دي حضرتك الكلمة اللي هاقولها قدام أم صوفيا

روقه : أم صوفيا مين يالا ؟

سين سين : جلالة الملكة مارجريت

روقه : تصدق بالله ... أنا خروجي من الوزارة وسجني في أوروبا الموحدة هايكون علي إيدك .. كل دي أوراق ؟ إنت بتحضر دكتوراة ؟ يابني رفعت ضغطي الله يسامحك حررررام حررررام

سين سين : طب حضرتك أنا ممكن اختصر العشرين ورقة دول والله ... واعمل اللي حضرتك عاوزة

روقه : إنت ما تعملش حاجه . إنت تسكت خالص وتاخد حسنتك من هناك وتدنك راجع

وفي يوم الحفل المهيب اتقدم متلعثماً على السجاد الأحمر وسط جمع من المصورين والصحفيين العالميين وندلف إلى القاعة المهيبة .... وتبدا وقائع الحفل ...

وإذ بالمُذيع يعتذ عن حضور الملكة مارجريت لظروف عائلية – صوفيا كانت متخانقة معا باولو والولا ضربها وراحت المستشفى وهي راحت تقعد جنبها - وينادي مذيع الحفل على اسمي ... على أن يتسلم الجائزة نيابة عني السيد الوزير فاروق حُسني ...

تمت

[اغابي]

شكراً للزميلة أغابي اللي هارياني تقييمات سالبة كنوع من التحفيز – وأنا يا أم صوفيا مش عاوز أمدي إيدي عليها لحد دلوقت وخليكي شاهده

–

طب ليه يا س س القلب الاسود داه bsh:)-

انت نسيت الخمشطاشر نقطة خضرا والتاريخ الحافل بتشجيعك نسيت - وافتكرتلى نقطتين سوووود ايتام من غينيا - قصدي نقطتين احمرون

عبرت بيهم عن غضبي لما نرفيزتنى وشيطنى واستفزتنى وخلتنى انقطك بيهم

عموما انت مبدع يا س س - بجد ضحتنى من قلبي

بس اوعى تنسي تسلملى على ام صوفيا - بقى الست زغرطتلك - اخ من احلام اليقظة بتعمل فينا بلاوى وما تنساش توصيلى

على بدلة من الراجل ابو سامية اللى قالك عليه زوهيري عاوزة واحدة قيافة كدا لجوزى الله يكرمك

كمل يا س س وكلى اذان صاغية ومتسالنيش ازاى - انا تركيزي فى ودانى

اوعى تنسي انى حرمت نفسي من الغطا عشان تستغطو وحرمت نفسي من العشا عشان تستعشوووووو

متابعة يا س س يا كاتب يا عالمى - مع انى كنت مخصماك وحالفة ما اكلمك تانى ابدا طول ما انا على وش المنتدى

لكن اعمل ايه فى قلبي الحونين اللى هو اساسا اساسا - قلب خساية

:)

القصة عجبتنى

رووووعة بجد لا وايه دور زوهيري فيها تاريخي

اكمــــــل

[جسار]

الله ينور يا سين سين ،حقيقى مصر ولادة

الحتة بتاعة نشيد السويد لما قريتها افتكرت على طول الجواب الالمانى بتاع عبد السلام النابلسى

مع عبد الحليم وهو بيقراه : جوتن ناخت أشتاخن براخن فولكس فاجن مرسيدس بنز

وسراج منير بيسأله هو ده ألمانى فرد عليه ده المانى شرقى !!!

[MZohairy]

:P :P :P :P :P

طب بذمة ابوك و يارب ابوك يحج مش انا عملتلك اغنيه و عجبتك و مسمعه معاك في المنطشقه؟

[se_ Elsyed]

:P :P :P :P :P

طب بذمة ابوك و يارب ابوك يحج مش انا عملتلك اغنيه و عجبتك و مسمعه معاك في المنطشقه؟

ما حصلش

لإن ببساطة أبويا مات وشبع مات من ييجي 8 سنين فمش ممكن يحج تاني

[الغريب]

بصراحة يا س س أنت كروتنا في الجزء الثاني وأنا أتفاجأت بكلمة "تمت"