رئيس جواتيمالا يُطَلِق زوجته لتترشح لمنصب الرئاسة

[se_ Elsyed]

بدأ رئيس جواتيمالا الفارو كولوم وزوجته ساندرا توريس إجراءات الطلاق، حتى تتمكن الأخيرة من خوض الانتخابات الرئاسية المقبلة، وتجنب مأزق دستورى يمنع أقارب الرئيس من خلافته.

وذكرت هيئة الإذاعة البريطانية (بى بى سى) صباح اليوم الثلاثاء، أن توريس أعلنت أوائل الشهر الجارى أنها ستكون مرشحة الحزب الحاكم فى الانتخابات الرئاسية المزمع إجراؤها فى شهر سبتمبر المقبل.

من جانبه اتهم مرشح المعارضة الرئيسى أوتو بيريز الرئيس وزوجته بمحاولة التحايل على النظام، مشدداً على أن الطلاق لا يكفى لرفع حظر الترشح عن توريس، فيما من المنتظر أن تفصل المحكمة الدستورية فى هذه القضية.

[pink rose]

يوستوهايألي و الله اعلم ان الولية دي حبت تضرب عصفورين بحجر واحد

ضحكت عليه و قالتله نتطلق عشان ابقى رئيسة و ارجع اردك تاني

و هو باين عليه اهبل و صدقها

مع انها في الحقيقة عاوزة تخلص منه و تاخد نص فلوسه و كمان تديله بالشلوت من الرئاسة و للابد

الحريم دول اعوذ بالله فعلا فعلا ان كيدهن عظيم

[hOuSsAm]

طيب هو الطلاق ده بحق وحقيق ولا خودعة

وهما بيتقابلوا بالليل فى العوامة اياها

وقال ايه قدام الناس منفصلين وبينهم وبين بعض الدنيا بيس وحلاوة العنتبلى كمان

انا عارفهم

تلاقيهم استعانوا بواحد من الحكام (المخلوعين) اياهم عشان يظبطلهم الليلة

ياخوفى يعملوا خدمة موبينيل اسال استشير...... كيف تستمر طول حياتك فى الحكم دون ان يخلعك الشعب

-- انك تبدل انت ومراتك عالحكم عشان يتقال فيه ديمقراطية وتداول للسلطة

تم تعديل 22 مارس 2011 بواسطة hOuSsAm

[se_ Elsyed]

هو ده الشُغل

سيكو سيكو يعني .. كده وكده

لكن المصيبة إن ساندرا ممكن تكسب وتبقى رئيسة . وييجي الفارو يتحايل عليها ويدور بينهما هذا الحوار على طريقة المسلسلات المكسيكية بنت الجزمة اللي المسلسل بيقعد ييجي تسعميت حلقة ويقول لك " سنعود بعد الفاصل " :

الفارو : حسناً يا أليخاندرو .. لقد كسبتي في الإنتخابات الرئاسية ... تبًاً لكي .. لقد حمضت معدتي من أكل السلمون طوال تلك الفترة التي كنتي فيها بعيدة عني ..

ساندرا : سُحقاً .. الا تستحي أيها الرجل ... إنك تتحدث الأن إلى رئيسة الجمهورية أيها الرعديد

الفارو : اوصدقتي نفسك أيها المرأة الشمطاء ؟ ده أحنا دافنينه سوا يا روح خالتك ..

ساندرا : نعم نعم يا عُمممممممممممممممممممممممممر .... أنا رئيسة ياض من قبل ما تتولد ... ولو ما غورتش من قدامي دلوقت وكتاب الله هانده بتوع امن الدولة ينفخوك ..

الفارو : صحيح .. ما تأمنش لست إلا لأمك ..ولو كانت مراتك يبقى طلقها وأرتاح ... ويا مأمن للستات ... هايجيلك الموت من سُكات ... طب أروح فين أنا والعيال يا ساندرا ؟

ساندرا : مع نفسك يا حبيبي ... وكمان تعالى خد هدومك اللي في الشقة عشان هأجرها إيجار جديد يالا ..

الفارو : كمان ؟؟؟ مش كفاية عليكي قًصر العروبة ... هاتاخدي الشقة كمان ... طب يهون عليكي عويس إبننا ؟

ساندرا : لا عويس ولا فؤادة وما تعملش الحبة دول بتوع الأفلام المصري ... أنا بصراحة أوباما متكلم عليه دلوقت .. وقولت له هافكر . بس أنا ما أدخلش على ضُره ... يعني لازم تطلق ميشيل الأول .. ووعدني إنه هايطلق أمها ويبعتها على جوانتنامو كمان ... ويتجوزني قبل العدة ما تخلص ...

الفارو : أه يا زمن ... فين لحد امبارح ما كونتيش بتقولي لي إلا يا سي الفارو ...

ساندرا : كان في وخلص يا حبيبي .. ما أعطلكش ... الله لا يعودها ايام .. ويكون في معلومك ... وعِزة جلال الله لو أسمعك في يوم تفتح حنكك وتقول إني كنت جوز الريسة في يوم من الأيام .. هاقطع لك لسانك داهو ... أه .. انا ست رئيسة دلوقت ومسئولة وما حلتيش الا سُمعتي ..

الفارو : طب بُصي .. نعمل إتفاق .. ديل يعني .... إحنا نضرب ورقتين عُرفي وأنا وكتاب الله ما هاقول لحد

ساندرا : إنت عبيط يالا يا الفارو ؟ إيه نظام الطلبة بتوع كلية أداب ده ؟ ما ناقص تقولي تعالي نطلع بعربيتي المقطم ونشرب حلبسة ؟ ياض أنا بأقول لك أنا بقيت ريسة ... ريسة يا متخلف .. يعني يوم ما أقول يا جواز ما يملاش عيني إلا ريس زيي .. وكمان هاشترط عليه إننا بعد الجواز نفتح الدولتين على بعض .. وأنا احكم يوم بلده .. وهو يحكم يوم بلدي .. ويبقى فلورنا على أوييلنا .. ونعيش في تبات ونبات ونخلف رئيسين ورئيسات

الفارو : طب أنا ذنبي إيه في ده كله ؟ ذنبي إني أمنت لك وفتحت لك الطريق وكنا طابخينها سوا ؟

ساندار : ولا .. ما تاكولش دماغي ... إنت كده كده ما كنت هاتترشح ...وبعدين خد يالا ... فين نفقة المتعة والمؤخر ؟

الفارو : كمان ؟؟؟؟ كمان يا مفترية بعد ده كله عاوزة نفقة ومؤخر وقايمة عفش ؟

ساندار : الحق حق يا الفارو يا أخويا .. وأنا بعون الله ممكن أبهدلك في المحاكم ... المحاكم بتاعتي وأي قاضي دلوقت يتمنى إشارة من مونيكير صوابعي ..

الفارو : طب بُصي إتفاق تاني ... أعيش معاكي هنا وأربي العيال وأخد بالي منهم وأمسح وأطبخ لحد ما ترجعي إنتي أخر النهار من قصر الحكم

ساندرا : تصدق صعبت عليه ... لأ يا أخويا متشكرين أنا بإشارة مني أشغل الشيف شيربيني عندي يعمل لي المحمر والمشمر والمحذق والملزق ... بس أوعدك إني ممكن أظبطك في أي شغلانه عندي في قصر العروبة .. جنايني .. سُفرجي .. كهربائي سيليسيون .. إنت مهما كان أبو عويس وعُمر الدم ما يبقى شوربه .

الفارو : بقى بعد ده كله أبقى كهربائي سيلسيون ؟ ماشي يا زهر ... روحي منك لله ... منك لله .. منك لله

تمت