أول لقاء لي مع الصندوق ...افرح يا قلبي

[Dreamwithme]

صباح الخير والحرية والسعادة وكل حاجة حلوة .....النهاردة عيد ياجماعة

أنا لسه راجعة من الاستفتاء وقعدت ألف في المحاورات مش عارفة أصرخ من الفرحة فين

فبعد أذنكم هأصرخ هنا لأني مش قادرة أكتم فرحتي مع كامل المراعاة لمشاعر أخواننا المغتربين الذين لم يستطيعوا التصويت

مش قادرة أرفع عيني من علي صباعي الفسفوري

مش قادرة أصدق الناس كلها ماشية في الشارع بتتأكد من بعض إنهم أدلوا بأصواتهم

أول ما نزلت من البيت واحدة ست كبيرة ماأعرفهاش لقيتها بتسألنا (أنا كان معايا أهلي)

أنتم رحتم ولا لسه فقالت لنا المدرسة اللي هناك دي فاضية ورايقة وهتخلصوا بسرعة وتحيا مصر والمصريين اللي قلبهم زي السكر بصراحة

من الفرحة كان نفسي أبوس عساكر الجيش اللي بيحموا اللجنة بس مسكت نفسي

في اللجنة بقي ياجماعة مقدرتش أصدق أني بأشوف الصندوق لأول مرة في حياتي وهو فعلا مستنيني

كل الناس داخل اللجنة مبتسميين بشكل بصراحة راقي جدا جدا كله تمام الحبر مش عايز يروح من أيدي والاستمارة مختومة

والفرحة أكبر من أن تعبر عنها كلمات ......بغض النظر عن النتيجة أنا راضية

وسامحوني بقي بس نفسي أطلع لساني للسيد عمر سليمان ونظيف ومبارك اللي قالوا إن الناس غير جاهزة للديمقراطية

مش قادرة أبطل كلام فياريت كده هأخد فاصل وأرجع لكم تاني بأي كلام يجي علي بالي

أصله يا جماعة كان لقاء السحاب دريم تلتقي مع الصندوق والله لو نزل فيلم يكسر الدنيا

[لماضة مصرية جدا]

من الفرحة كان نفسي أبوس عساكر الجيش اللي بيحموا اللجنة بس مسكت نفسي

السلام عليكم و رحمة الله و بركاته

لا يا دريمي.....ارتجعي.....(وش اي ام ماسكة في بنتها)

مش عارفة اقولك ايه....بس الفرحة و الله كوووووولنا عايشينها...اينعم من خلال اللاب توب...و شاشات التلفاز....بس فعلا مصر بتتغير

و بعدين بقي....انا قاعدة اقول لنفسي...و بكلم ربنا...طب يا رب انا كنت عايزة ابقي معاهم

انا حاسة لسه فيه فرحة كبيرة جاية....و ان شاء الله في الكبيرة ربنا راح يكتبهالي و اكون في المكان اللي انتمي ليه

افرحي بقي من كل قلبك يا دريمي

و ابقي تعالي.....بعد البوس... :P ....قصدي بعد لقاء السحاب....و احكيلنا...الناس....و مصر كلها عاملة ايه

حد ينزلنا بقي باغنية....وحياة قلبي و افراحه

صباحك.....فرحة مصر

[fatfouta]

مبروك يا دريم kis)-

مبروك علينا كلنا.....مبروك لمصر

ومبروك فرحتك بلقاء الصندوق

ومهما كانت النتيجة....الليلادى عيد يا ولاد :110: :110:

يا بختك يا بختك يا بختتتتتتتتتتتتتتك

:chain:

[Howayda Ismail]

انا زيك برضه يادريم

بس دى اول مرة ياختى رجلى تخطى الشارع ايام الانتخابات

واحنا خارجين من اللجنة من مدرسة بنتى بيبتى ومنظر الناس وهى ماشية بطول الكورنيش عطانى احساس

العيد والناس رايحة تتجمع فى ساحة المحكمة على البحر عشان الصلاة

نفس المنظر الفرق انه مافيش معاهم اولاد صغيرة كمان تواجد ظاهر للاخوة المسيحين

بغض النظر عن قولة نعم او لا المنظر يسعدك بجد من غير هرج ولا قلة ادب كله واقف فى الطابور

كل انتخاب وانت طيبة

كل انتخاب ومصر قادرة تثبت انها ام الدنيا بجد مش كلام وبس

[Dreamwithme]

سيداتي سادتي رجعتلكم بعد الفاصل أكثر سعادة

لأني اقنعت خالي أنه ينزل يقول رأيه بعد ما كان مكبر دماغه (هو عنده 72 سنة ) وشايف أن مفيش فائدة

لكن الحمد لله ميشن امبوسيبول تمت بنجاح يا جماعة و دريم انتصرت يا جماعة واستقطبت فرد من حزب الكنبة

وكما قال الشاعر العظيم : إذا الشعب يوما أراد الحياة فلابد أن يروح الاستفتاء ويقول نعم أو لا

وبمناسبة هذه الفرحة الغامرة وبعد الاستماع لنصيحة الرفيق لماضة أني اصرف نظر عن موضوع أني أبوس العسكري في الشارع

فخلاص يا جماعة أنا قررت أغني ...........من فضلكم مش عايزين هروب شجعوني يا جماعة

http://www.youtube.com/watch?v=Fgw_zfLLvh8

[Dreamwithme]

هو في أيه ياجماعة هو كل المشتركين في المحاورات مغتربين مفيش حد وصفلنا مشاعره في لقاءه الأول مع الصندوق وإن شاء الله مش هيكون الأخير

هو أنا والأستاذة هند بس اللي موجودين في مصر والا أيه

طب وحياة فرحة اليوم اللي أحنا فيه شجعونا بكلمتين وكل واحد يقول هو حس بأيه وهو واقف أمام الصندوق

أنا بصراحة من إمبارح وفي جملة كانت منتشرة علي الفيسبوك وتويتر وعجبتني جدا وحسيت بها قوي

يادي الكسوف أول مرة أقابل الصندوق أقول فيها لأ.......

طبعا ياجماعة أنا مش هأقول لحد أنا صوت بأيه وأنا أثق تماما في ذكاء المواطن المصري

هتصدقوني لو قلت لكم أني مش قادرة لغاية دلوقتي أشيل عيني من علي صباعي الفسفوري

وبأفكر أشتري حبر فسفوري وأبقي أحط منه كل يوم وأهي تبقي موضة جديدة

المهم يا جماعة أحكي لكم عن مشهدين من اللجنة اللي صوت فيها

مشهد سيدة عجوزة جدا جدا ومريضة مش قادرة تمشي وجايه بتتعكز علي ابنها ومصرة أنها تعطي صوتها

ومشهد تاني رجل كبير علي كرسي متحرك ومصر أنه يطلع للدور الأول مكان اللجنة عشان يقول رأيه

معلش مشهد ثالث عشان خاطر أختكم شفت واحدة ست جاره معاها 3 أطفال من سن سنة إلي 5 سنين وواحد رضيع علي أيدها

برضه جايه ومصرة تقول رأيه

فكركم ده كله ليه؟!

لأن كل واحد من دول حس فعلا إن صوته هيفرق وأن البلد دي بتاعته وموضوع "صوتك أمانة" ماعدتش أكلاشيه مستهلك في اعلانات الحزب الوطني

لأ الحلم بقي حقيقي وافرح يا قلبي وغني يادريم مع حمزة نمرة احلم معايا

http://www.youtube.com/watch?v=zHZbZm69PCE

بعد ماغنينا .....مع فاصل كوميدي من بعض التعليقات اللي سمعتها النهاردة ومن علي الفايسبوك وتويتر

صوباعي فسفوري ....وهأغير دستوري smk:

لو صوباعك مش بامبي .....امشي ماتقعدش جنبي :P

السيد حسني مبارك بيصرح: يحز في نفسي ما ألاقيه من بعض بني وطني من الأقبال علي صناديق الاستفتاء :protest:

فاصل وفي انتظار مشاعركم ياجماعة فرحونا معاكم ولا أنا هفرح لوحدي

[engmido]

الله اكبر ولله الحمد

لسه جاى دلوقتى حالا من الصندوق وعشت وشفت الصندوق ع الحقيقة فى مصر

الحمد لله

اول مرة الواحد يحس ان صوته مؤثر وليه لازمة

وان الواحد لو مرحش هيشعر بذنب كبير جدااا نحو هذا البلد

انا ومراتى وملك بنتى اللى تمت سنة امبارح

كل سنة واحنا كلنا طيبين وبخير وعمار يا مصر

[fatfouta]

شاهدة عيان فى اول لقاء مع الصندوق ذى دريم

صباعى بقي لونه بمبي-بعد مأديت واجبي الشعبي، وانا جنبك يا صندوقى وباوفي بوعدي، بمبي بمبي

[مغتربة]

طيب تعالى بسرعه يا دريم علشان اقرصك فى ركبتك علشان احصلك فى لجنتك :) :D

ادعيلنا بجد انهم يرغعوا عننا الحظر الغريب دا قريب باذن الله :sad: :sad:

[masraweya]

رفيقة الدرب دريم

يا مرحب يا مرحب

خدي عندك

******************

عموما في اللجنة اللي رحتها كله موجود .. و مشفتش حد بيقول للناس يختاروا ايه

و سمعت ناس بتقول انها هترجع تجيب جيرانهم و اصحابهم

الجيش تواجده مش واضح و الموضوع منظم جدا

كان فيه 3 لجان في المدرسة .. كل لجنة فيها دفترين واحد للمقيمين و واحد للمغتربين

ناس كثير جايبة اولادها

و شباب با دوب 20 سنة

يا رب يتمها على خير

و يكون فيه رقابة و شفافية ساعة الفرز و التجميع

:egyflag: :egyflag: :egyflag: :egyflag: :egyflag: :egyflag:

[masraweya]

و آدي روشة

والدي راح الاستفتاء ولسه راجع من شويه .بيقول الدنيا منظمه جدا

ولاْنه راجل كبير وبيمشي ماسك في ايده عصايه (يتعكز عليها ) :old:

الناس ماسابوهوش يقف في الطابور.وخلوه يدخل علطول .وقال الطوابير ماشيه بسرعه والحبر موجود

ملحوظه كمان :كان عندنا اتنين من قرايبنا من دمياط وراحوا انتخبوا عندنا في القاهره بالرقم القومي بتاعهم عادي جدا

انا هاروح كمان ساعه وهابلغ بالتفاصيل لما ارجع

ايه ده انا مش ملاحقه ...الصفحات قبل ما اروح ادلي بدلوي ..قصدي بصوتي كانوا 5 صفحات

ورجعت من ساعتين .قلت اشوف اللي فاتني ..كل ما اخلص صفحه واجي اكتب ..الاقي صفحتين تانيين زادوا

والاخر قلت اكتب بقى

الحمد لله .روحت ومعايا بنتي 13 سنه علشان تتفرج وتشوف .ولقيت الناس فعلا متعاونه ومتفاهمه وبتساعد بعض والستات طابور والرجاله طابور والطوابير ماشيه بسرعه جدا

اخدت دوري ونبهت الناس اللي جنبي انهم يتاْكدوا من ختم اللجنه الفرعيه.وانا كمان اتاْكدت من الختم قبل ما اكتب في الورقه

اللي شد انتباهي

ان في واحد كان رايح ينتخب بجواز السفر (تقريبا مش معاه البطاقه) او ضايعه منه

بس اللجنه سمحت له لان جواز السفر بيكون مكتوب فيه الرقم القومي برضو

كتبت الاجابه (لا)

وعلمت بالحبر الفسفوري وخرجت وانا فرحانه جدا

النهارده احساسي ...زي يوم تنحي مبارك بالظبط

تم تعديل 19 مارس 2011 بواسطة masraweya

[masraweya]

أم زيد

قالولي الطابور من ميدان سفير لميدان الحجاز ،،، هههههه

لالالالالالالالالالالالالالالالالالالالالالالالالالالالالالا

كنت ناوية اظبط زيد و الجو يكسر شوية و ننزل

بس هننزل برده باذن الله

الحمد لله

أدلينا بصوتنا..لقينا لجنة هادية حبتين "عند الهايكستب"-مدرسة أحمد عرابي الثانوية

بس للاسف - كده خروجة النادي باظت

كنا هنروح اللجنة اللي قدامه

:protest:

بنوتة صغيرة مع مامتها أصرت تحط صوابعها في الحبر

حطت ايدها كلها الحقيقة

و الناس مبسوطة جدا

العربيات مالية الدنيا حوالين اللجنة - عرفنا اننا فربنا من اللحنة من كترهم

و الطوابير محدش اصلا بيحاول يتجاوزها

و من نفسهم الستات في طابور و الرجال في طابور

كل الفئات هناك و كل المستويات .. و احنا خارجين شفت مجموعة لابسين اوفرولات و داخلين سيستفتوا

و طبعا الشرطة منتهى الادب

و اللطيف بقى ان فيه ناس وصلتها افتكاسة تغيير السؤال .. قراوا الورقة و اتاكدوا من الختم و اتاكدوا ان اختيارهم هوا اللي يتعلم عليه

الصندوق كان قرب يتملي و انا هناك

تم تعديل 19 مارس 2011 بواسطة masraweya

[masraweya]

هند

http://www.youtube.com/watch?v=P6_-u0vyneE

الله عليك يامصر

لسة جاية من اللجنة وخلى بالكم باكتب انهاردة بالحبر الفسفورى

ودى اول مرة فى حياتى ادخل لجنة انتخابية ويمكن اول مرة حتى اشوف لجنة من اساسه على الطبيعة

لان قبل كده مكنش ممنوع الستات بس لا والرجالة كمان . من الاخر كانت بهدلة مابعدها بهدلة

اخر مرة زوجى يروح لجنة كانت فى انتخابات 2005 لكن الشرطة والامن قفلوا الطرق المؤدية للجان بالبلطجية

وفرقوا الجموع بالقنابل المسيلة للدموع وبالليل تحول الشارع لساحة حرب من الامن المركزى والخير عندنا كتير

فى المنطقة اكبر مركزين للامن المركزى بالاسكندرية

لكن انهاردة اللى حصل شئ حضارى جدا ويمكن مثالى

اخر نظام اختاروا المدارس ذات البابين المواطنين واقفة طوابير خارج المدرسة وعسكرى الجيش يدخل مجموعة

مجموعة من باب ولما تنتهى عملية التصويت يخرجوا من الباب التانى

ورغم الاعداد الكتيرة الا ان النظام اللى الناس كانت فيه قضى على اى زحام

اللجنة كان فيها قاضى وضابط جيش و2 من جنود الجيش ومكنش فى اى اثر للشرطة ورغم كده الهدوء

كان سيد الموقف لان الناس كانت عاوزة كده ودا بيدى امل فى اى انتخابات تتم فى المستقبل

[masraweya]

ضحى

اتصلت بي اختي الساعه 10 الصبح بعد مارجعت من التصويت واخبرتني عن مشاهدتها في اللجنة وقالت بان الجو رايق وانها انتخبت على طول .. نصحتني اروح بدري قبل مالزحام يشتد .. وهو ماكان ..

رحت عشان ادلي بصوتي انا كمان بعدها يمكن بساعه او اقل بس الي حصل ان العدد كان زاد جدا وبالفعل كان في طابورين واحد ستات وواحد رجاله والطابورين طالعين في الشارع عادي جدا .. عساكر الجيش امام اللجنة كانوا بيوجهوا الناس وبيقولوا ان في مدرسة كذا وكذا قريبة الزحام فيها اخف ..

المهم .. دخلت من بين الطوابير ورحت للعسكري الجيش الواقف على راس الطابور وشرحت له ظروفي واني مقدرش اقف وبدون اي نقاش ابتسم وقالي اتفضلي وسمح لي ادخل على طول بدون انتظار ..

دخلت اخذوا مني البطاقة مع مجموعة بطاقات اخرى ووقفنا طابور صغير من خمسة سته سيدات وزيهم في طابور ثاني رجال .. ثم بدأوا ينادوا الاسماء ويسلمونا البطاقات ويعطوا كل واحد استماره للادلاء بالرأي (( بيقولوا في التلفزيون دلوقت تاكدوا ان الاستماره لازم تكون مختومه من الظهر او على الاقل ممضية من قاضي اللجنة ))

المهم ادليت بصوتي وخرجت في دقائق معدوده والجميل ان الطابور كان زاد في طوله ومع ذلك الناس استمرت في وقوفها فيه بدون اي تذمر وبنظام اشهد اني لم اراه في طابور مصري من قبل ..

المشاهدات .....

الانتخاب بالرقم القومي فقط بدون حتى التزام بمحل الاقامه .. والتعامل طبعا راقي جدا وبود ملحوظ ..

اثناء وقوفي كان الجميع بيقول نعم ماعدا واحده فقط قالت ان رأيها لا ..

من الملاحظات الي شفناها برغم اختلاف توقيت خروجنا للادلاء بالصوت واختلاف اللجان الي ادلينا بيها ان في تواجد مسيحي مكثف جدا في اللجان جايين على شكل مجموعات والغريب ان نسبه كبيرة منهم اوي ستات عواجيز وكان معاهم وحده بتنظم الطابور وبتأكد عليهم على الاختيار الي ناويين يقولوه ..

بالفعل في منشورات بتتوزع خارج اللجان ومكتوب فيها قولوا نعم بس للامانة مكتوب على ظهرها جدول يوضح هنقول نعم على ايه وليه مفروض نختار النعم دي ..

لاحظت برضه ان نسبة الشباب الصغير موجوده بوضوح والستات طبعا عددهم تقريبا نفس عدد الرجالة المشاركين ..

من نقاشي بعد عودتي مع البعض فتقريبا كل الي اعرفهم خرجوا للاستفتاء ماعدا اثنين هيشلوني بصراحه .. واحده مكانتش تعرف ان في استفتاء وبتحسب ان الانتخابات على رئيس الجمهورية والثاني رايح يقول لا بثقة وبيقولي عشان لما نقول لأه هتترفض التعديلات ويرجع الدستور للجنة الي عدلته تعدله تاني وتشيل منه نسبة العمال والفلاحين !!!

طبعا الاخير ده شلني مش لانه بيقول لاه ولكن لاني كنت احسبه على المثقفين ورايه الي اخذه ده وبتعصب كمان واخده بناء على قناعه ودراسة لمعطيات خاطئة من الاساس ..

الحمد لله بعد تفكير عميق رحت وعملت الي علي واخترت مابين موافق او غير موافق ..

نعم

اوافق وبكل ثقة ..

[pink rose]

و لا يهمني باعيط في صمت لحد ما ربنا يفكها علينا

بس للحق انا كنت باعيط النهاردة من الفرحة

اه و الله من الفرحة

ازاي شعب بحاله عمره في حياته ما راح مركز انتخاب قبل كده

و يبقى منظم و منضبط و ايجابي و محترم بالشكل اللي شوفناه النهاردة

صدق بيرلسكوني(مع اني ما بحبوش الراجل قليل الادب دا) لما قال

كالعادة المصريون يصنعون التاريخ

[fatfouta]

مصراوية ودريم انتوا فين هنا :)

يا بختكن :sad:

[masraweya]

محمد عبد العزيز

**********************

أنا لسه راجع من عند لجنة برج العرب اللى كانت جايبة الفيديو بتاعها دى, وطبعاً صعقت لما شفت الطابور, رحت لجنة تانية فى منطقة اسمها بهيج, الناس كانوا بيقولوا فاضية.

المهم رحت لقيتها نسخة طبق الأصل من لجنة برج العرب, بس للأسف لقيت مجموعة شباب من الملتحين واقفين على أول الشارع اللى فيه المدرسة وبيٍسألوا بعض الناس حتصوت بإيه, واللى بيقول "لا" بيقولوا قول "نعم".

أياً كانت النتيجة, لازم كلنا نحترمها عشان احنا شعب محترم, والمهم مصلحة البلد.

نزلت الساعة 2:30 ظهراً, لقيت الطابور قل شوية عن الساعة 11, فقلت أقف بقى وأمرى لله.

الوقفة فى الطابور طولت جداً, لدرجة إنى خلصت على الساعة 5:30 تقريباً.

خلال الوقفة فى الطابور, دارت مناقشات بينى وبين من كانوا قريبين منى, وكان فى ناس بتقول نعم وناس بتقول لأ, بس أغلبية بسيطة جداً لنعم.

أثناء المناقشات سمعنا صوت عالى, اتنين شباب المناقشة احتدمت ما بينهم, واحد قعد يقول بصوت عالى: "الإخوان هما اللى قاموا بالثورة وهما اللى عملوا الثورة", والشاب التانى رد عليه بصوت عالى برضه وقال مش الإخوان اللى عملوا الثورة.

اتنرفزت بصراحة ورحت قال بصوت عالى برضه: المصريين هما اللى عملوا الثورة مش الإخوان, ولقيت فى تأييد من الناس اللى حواليا والحمد لله الموضوع انتهى لحد كده.

شفت حرص كبير جداً من الناس على المشاركة, لدرجة إن واحد كان جايب معاه وصل كهرباء عشان كان خايف مايقدرش يصون لأن عنوانه فى البطاقة مش تبع الدائرة.

شفت ناس كبيرة جداً فى السن وكانت حريصة جداً على المشاركة.

توقعاتى إن الأغلبية حتكون لنعم, وأول مرة أحس بإحساس الزمالكاوية النهارده عشان حسيت إن الرافضين للتعديلات أقلية :closedeyes:

تم تعديل 19 مارس 2011 بواسطة masraweya

[fatfouta]

إسلام المصرى

انا لسه جاي من الاستفتاء الان ووقفت طابور طويل اول مرة اشوفه في اي انتخابات او استفتاء سابق والناس فرحانة ومبسوطة وواقفه الطابور وعلي قلبها زي العسل والفرحة في وجوههم والحديث بين التأييد والمعارضة لم يفسد للود قضية والكل يحترم رغبة الاخر في إبداء رأيه فجميع المواطنين يحبون البلد وكل واحد يري في رأيه انه يصب في مصلحة البلد وهذا هو الهدف الذي يسعى اليه الجميع

ورغم طول الطابور الا انه كان يمشي بسرعة كبيرة فلم امكث اكثر من ربع الساعة واصطحبت معي ابني الصغير الذي كانت له رغبة ليشاهد الاستفتاء ويشاهد لاول مرة في حياته يعني ايه انتخابات ويعني ايه استفتاءات وكيف يصر الجميع علي الايجابية وقل له ان حظك افضل مني لانني وبعد هذا العمر اول مرة اشارك في عملية انتخابية حقيقية لكن انت ستتربي علي ذلك وستكبر ويكبر معك هذا الاحساس وستكون ايامكم افضل من ايامنا لانكم لن تشاهدوا لصوص يحكمونكم واذا فكر ان يحكمكم لص ستحاكموه وتسجنوه اما نحن فنهبنا الحاكم ولم يكن لنا بصير ولا حيلة

شاهدت بعض السلفيين ايضا امام اللجنة ولم يتعد دورهم الا تقديم النصح للحائرين ودفعهم لقول نعم للتعديلات اما انا فعندما قدم لي نصيحته بقول نعم فقلت له لا انا لست مع تعديل الدستور انا اريد دستور جديد

لم يعلق علي قولي سوي ان قال لي انت حر في رأيك ثم ودعني بابتسامة وذهب لغيري

ليس هناك بعد اليوم خوف ان تعبر عن رأيك وقناعاتك

السلفيون ايضا تغيروا ولم يعد يستخدمون الترهيب في فرض اراءهم السياسية علي الغير وهذه شهادة يجب ان ندلي بها بناء علي مشاهدتنا لذلك الامر

[masraweya]

احمد انور

يا جماعة دي مشكلة كبيرة

الإقبال فوق ما تتخيلوا ،،

أنا روحت و قولت أرجع تاني آخر النهار

أنا في التجمع الخامس ،،، و الطابور طويل جدا جدا جدا ،،

الطابور طوله حوالي كيلو متر و ده في التجمع

هنزل صور سريعة كمان شوية

كلما قرايبي في مصر الجديدة ،،

قالولي الطابور من ميدان سفير لميدان الحجاز ،،، هههههه

ده صورة نص الطابور بس و الباقي بعد الملف

غير اللي جوه اللجنة نفسها ،،، ده بس اللي في الشارع

صور حصرية لمحاورات المصريين

كرنفال حقيقي و الناس رايحة عائلات و بالأعلام و العربيات قافلة الشوارع

تم تعديل 19 مارس 2011 بواسطة masraweya

[masraweya]

جوناثان

انا لسة جاي حالا من اللجنة الانتخابية و فعلا في افبال ما شفتهوش من ايام انتخابات مجلس الشعب 2005..و الجميل في الامر ان اللجان هنا مشتركة يعني اي مواطن بيدخل رجل او مرأة و في تنظيم من شباب ايدك في ايدي بينظموا لحركة..فعلا تجربة رائعة بغض النظر عن النتيجة و ان كان شعارنا لحد النهاردة سأحمي اختياري و ادافع عنه ..فشعارنا بكرة ساحمي اختيار مصر و ادافع عنها...تحياتي

حمد الله عالسلامه يا وحش

الله يسلم حضرتك ..و لاضفاء جو مرح بدل توتر اليومين اللي فاتوا حاقولكم على موقف طريف حصل لي شخصيا ..و هو اني بعد ما حطيت صباعي في الحبر الفوسفوري..تقريبا حطيت صباعي على انفي و انا مش واخد بالي و لما رجعيت البيت زوجتي لاحظت الموضوع ...و بقيت صاحب الانف الفوسفوري...طبعا اي مراقب في لجنة دلوقتي مش محتاج يبص في ايدي ...كفاية عليه المناخير :lol: